سەرەکی » وتار » عه‌بدوڵڵا عه‌باس » لافاوی زانیاریی بێ‌ سەرچاوە!

لافاوی زانیاریی بێ‌ سەرچاوە!

عەبدوڵا عەباس

بەر لە چەند ساڵێ‌ فلیمێكی میسری بڵاو بوویەوە بەناونیشانی (خەڵتە بیتە) كە دەكرێ‌ بە (چێشتی مجێوەر)ی خۆمان تەرجمە بكرێ‌، فلیمەكە بەوە دەست پێ دەكات، لاوێكی بێكار لەژوورێكی تەنگی كرێدا هەر جێگای دۆشەك و سەرینەكەی و چەند وردەشتێكی بەردەستی تێدا دەبێتەوە دەژی و رادیۆیەكی بچوكی لای سەریەوە داناوە، یەكەم دیمەنی بەوە دەست پێ دەكات خاوەن ژوورەكە بەهەموو هێزی لەدەرگاكەی دەدات و لەخەو رای دەپەڕێنێ‌ و داوای كرێی ژوورەكەی لێ دەكات، ئەویش بەچاوی خەواڵوەوە دەرگا دەكاتەوە و لێی دەپارێتەوە هەفتەیەكی دی مۆڵەتی بدا بەڵكو كارێكی دەست كەوێ‌، بەهەرحاڵ رازی دەبێ‌ و ئەویش دەرگای ژورەكە دادەخات و رادیۆكە دەكاتەوە، هەواڵ دوای هەواڵی سەغڵەتی و شەرو شۆڕو تەقینەوەی ئوتوموبیلی بۆمبڕێژ و كوژران و برینداربوونی سەدان سەروەری هەواڵەكانی دنیاو بەدوایدا هەواڵی بێكاری و گرانی بازار! ئەویش بەهەموو هێزی رادیۆكە دەگرێتە دیوارەكەی بەرامبەری و دەبێت بە سەد پارچەوە و بۆ پێكەنین رادیۆكە لە راگەیاندنی ئیخباری بەرزكردنەوەی پاڵەپەستۆی خوێ ناكەوێ‌، بەپەلە كراس و پانتۆڵەكەی لەبەر دەكات و دەچێتە دەرەوە، لەسەری كۆڵانی گەڕەك دوكانی رۆژنامە و كتێب فرۆشەكە رای دەگرێ‌ و دەست دەبات بۆ رۆژنامەی «جمهوری» هەڵدەگرێ‌ و مانشیتی سەرەكی ژمارەی كوژراوەكانی شەڕی ناوخۆی لوبنان دڵی ئەونەی دی تەنگ دەكات و رۆژنامەکە بە توندی فڕێ‌ دەداتەوەی شوێنەكەی و ملێ‌ رێ دەگرێ‌ و دیمەنەكانی فلیمەكە بە هەڵبژاردەی چەند رووداوێكی دی بێ‌ هیوایدا دەڕوا تا كابرا ئیشی لای خاوەن نووسینگەیەكی مەشبوها دەست دەكەوێ‌ و بەو دەشكێتەوە پۆلیس دەیگرێ‌ و دوای حوكمدرانی لە رووی دەروونییەوە تێكدەچێت و دوا مەنزڵگای لە سجنەوە بۆ شێتخانە دەبێ!

بەچاوپۆشین لە رەشبینی دیمەنەكانی فلیمەكە، بەڵام نزیك لەراستگوییەكی غەم بەخشەوە راستی ئێستای بەشێكی زۆری بەشەریەت لەم سەردەمەدا دەگێڕێتەوە كە سەرچاوەكانی زانیاری و راگەیاندن بۆ غایەتێك لە عەقڵی یەعقوبی ئەم زەمانە دەیەوێ‌ بە دوو لایەندا رایگەنێ‌، لایەنێ‌ تێكەڵ و پێكەڵی چێشتی مجێوەر ئاسا، لایەنێ‌ بەهەشتی بەختەوەری ئادەمیزاد بە هەواڵی نزیك بوونەوەی بەشەریەت لە دۆزینەوەی ئەوەی پێی ئەوتری (ئەكسیری حەیات) و سواربوونی گالیسكە و چون بۆ سەیران بۆ مەریخ! و لە بەینی ئەم دوو واقیعەدا ئینسانی هەستیار، خۆی و هەستی و جەستەی كەوتۆتە بازنەیەكەوە ئەیهاڕێ‌! زانیاریەكی بڵاوكراوە و هونراوە بە وشەو رستەی هەست و نەست بزوێن ئەخوێنیتەوە كە باس لەداهێنانێ‌ دەكات بەیەكجار بەكارهێنانی چەند نەخۆشبی دەتكاتەوە بەگوێزی ساغ، هەیە وا باوەڕی پێ دەكات گیرفانی بۆ بەتاڵ دەكات، كەمتر لە دوو هەفتە سەرچاوەیەكی دی زانیاری رای دەگەیەنێ‌ ئەو داهێنانە ئەوەندە كەسی تووشی ئیفلیجی كردووە و دوایی، سەرچاوەی سێیەم رای دەگەیەنێ كە راستیی هەواڵی یەكەم و دووەم پێشبڕكێی چاوچنۆكی قازانجە و لەسەر هیچ بنەمایەكی زانستی نییە.

بەمجۆرە ئینسانی سەردەم لە سەردەمی (خەڵتەبیتە) دا دەژی و تاڵ و شیرینی زانیاری دەمانهاڕێت! هاندەری سەرهەڵدانی ئەم دیاردە ترسناكە : ئیرسی بە پەلە هەڵئاواسانی عەشقی ماددی ئینسانە، یاخوا وانەبێ‌!

• دواقسە
چاوچنۆكی بۆ ئەوەی هەموو شتێكت هەبێ‌، ئەتگەیەنێتە ئەوەی، ئەوەی هەتە بیدۆرێنی / پەندێكی ئینگلیزی

 88 جار بینراوە