سەرەکی » وتار » عه‌بدوڵڵا عه‌باس » شیعر هێشتا سەروەرە

شیعر هێشتا سەروەرە

عەبدوڵڵا عەباس

كاتێ تەنیایت و لە گۆشەی چڕی ئەو دیمەنە تێكەڵ و پێكەڵەی دنیای 21 ساڵی یەكەمی سەدەی بیست و یەكەوە سەرنج دەدەیت و هێشتا رۆحی سۆزی دەروون زاڵە بەسەر روانینەكەتدا، هەحقتە بلێی: دنیا بۆتە شورای ئاسنین و خەریكە دوا دڵۆپەی هەستی بزواوی دەرون بۆ هەڵچوونی سۆزی ناخ خەریكە وشك دەكات.
بەڵام، تۆ هەر لەخۆتەوە دەست پێبكە، تەنیا ئەم هەستە با بەراگوزەریش بێ‌ و رەنگدانەوەی دیمەنێكی بێ‌ رۆحی سەردەم هوكاری دەربڕینی بێ‌، مانای ئەوەیە، سۆز، تروسكە بێ‌ یان شەپۆل، هێشتا لە ناخماندا رەگی وشكی نەكردووە.
كە بە دوێنێی ژیان و نەریتی كۆمەڵایەتی خۆماندا دەچینەوە و لە گۆشەی روانینی فراوانی مرۆڤایەتیشەوە بۆی دەڕوانین، بەو ناوەی ئێمەش بەشێكبن لەو زەمینە فراوانە، سەرەتای یەكەم بینای شارستانیەتی ژیان و دروست بوونی تیشكدارانەی بە (وشە) دەستی پێكردووە، شكی تیانیە وشەكە كاریگەر و هەست بزوێن و رووناكی بەخشی بە هیوای سبەینێی مرۆڤایەتی بووە، بە ئاراستەی وشە پیرۆزەكانی كتێبە پیرۆزەكانی ئاینە ئاسمانیەكانیشەوە، بەم پێیە، كاریگەریی وشە، لە گەیاندنی سەرەتایدا، بەنیازی بزواندنی هەستی جوانی مرۆڤ دەستی پێكردووە هەتا ماناكانی بیناكاری ژیانی رووناك بەخش بێ‌ لە بە ئاوازی وشەی كاریگەر بۆ سەر هەست دەست پێدەكات .
لە خوێندنەوەی ئەم حەقیقەتەدا، كام وشەی كاریگەر لە ژیانی مرۆڤدا توانی لە بەهرەی داهێناندا لە وشەی شیعر كاریگەرتر بێ؟ بەتایبەتی كۆمەڵی وەك ئێمەی رۆژهەڵاتی هەڵهاتنی خۆری ژیانی بیناكاری لە سوودی ئاسوودەیی.
داستانەكان، بە وشەی بزواندنی ناخەوەی هەستی ئینسانی دەستی پێكردووە، هەر لەو چوارچێوەیەشدا، روومان لە داهێنانی گێڕانەوەی شتە جوانە نەبینراوەكان كردووە بە (وشە) و كاریگەری وشەكە رووناكییەكانی پشتەوەی نەبینراو هلاتۆتە پێشەوەی كاركردنە سەر دەروون و هەستمان، پیرۆزی ئەو جۆرە وشانە كە تەنیا بە شیعر دەر دەبڕرێ‌ ئەو پیرۆزیەیە بۆ هەتا هەتایە لە دەروون و سۆزی ئینسانیماندا، بەهرەی داهێنانی شیعر بە پیرۆزی دەهێڵێتەوە …بەڵام كاریگەری پیرۆزیی شیعر لە قوەتی ئینشایدایە.

دوا قسە:
نالی نییەتی سیحری بەیان حیکمەتی شیعرە
ئەمما نیەتی قووەتی دڵ قودرەتی ئینشا
نالی

 163 جار بینراوە