سەرەکی » راپۆرت » راپۆرتی، ته‌ها عه‌بدوڵلا‌ » هیچ رۆژێك نییە لە رۆژژمێری ساڵ بە خوێنی شەهیدێكی یەكێتی تۆمارنەكرابێت

هیچ رۆژێك نییە لە رۆژژمێری ساڵ بە خوێنی شەهیدێكی یەكێتی تۆمارنەكرابێت

رۆژی 21ی تشرینی دووەم رۆژی شەهیدانی یەكێتیی نیشتمانیی كوردستانە و هاوكاتیشە لەگەڵ رۆژی لەسێدارەدانی سێ سەركردەی یەكێتیی نیشتیمانیی كوردستان، خاڵە شەهاب و جەعفەر عەبدولواحیدو ئەنوەر زۆراب، ساڵانە بەچەندین شێواز یادی ئەو شەهیدانە دەكرێتەوە.

کچان و کوڕانی شەهیدان لە پەرلەمان
جگە لە یادكردنەوەی شەهیدان یەكێتی ئاوڕی جدی لە كەسوكاری شەهیدان داوەتەوە، بەجۆرێك بەشێك لە كوڕ و كچی شەهیدان توانیویانە لە پەرلەمان و حكومەت و كاری حزبیدا پێگەی گرنگ بەدەستبهێنن و رۆڵی خۆیانن ببینن.

بەشێك لەوانە لەم خولەی ئێستا لە پەرلەمانی كوردستان پەرلەمانتارن، ئەوان لە رێگای كوردستانی نوێ_وە، تیشك دەخەنە سەر رۆژی شەهیدانی یەكێتی و ژیان و خەباتی بنەماڵەكەیان.

شنۆ شەهید ئەشقی ئەندامی پەرلەمانی کوردستان وتی، لای هەموو كەس ئاشكرایە یەكێتیی نیشتیمانیی كوردستان بە حزبی شەهیدان ناسراوە، چونكە لە ماوەی شۆڕشی نوێ و قۆناغەكانی راپەڕین و دوای راپەرینیش زیاتر لە بیست هەزار شەهیدی داوە، لەگەڵ ئەوەش گرنگی زۆری بە كەسوكاری ئەو شەهیدانە داوە.

باسی لەوەشکرد، یەكێتی بەردەوام دەرفەتی بۆ كوڕ و كچی شەهیدان رەخساندوە لەناو حزب یان حكومەت و پەرلەمانیش رۆڵی خۆیان بگێڕن، هەر بۆیە لە خولی ئێستای پەرلەمان ژمارەیەكی زۆر لە پەرلەمانتاران لە كەسوكاری شەهیدان پێكدێن.

ئەو کچە شەهیدە وتیشی، جگە لەوەی حزب دەرفەتی رەخساندووە، هاوكات كەسوكاری شەهیدان لەبەرئەوەی لەسەر رێبازی شەهیدەكەیان لایان نەداوە، بۆیە بەدڵسۆزیەوە ئەركی سەرشانیان جێبەجێ دەكەن، بۆیە دەبینین و كوڕان و كچانی شەهیدان لە زۆربەی بوارەكان جێ پەنجەیان دیارە و كەسانی سودبەخشن بۆ كۆمەڵگە.

رۆژان شەهید حەمەڕەش یەكێكی ترە لە ئەندامانی پەرلەمانی كوردستان سەبارەت بە رۆژی شەهیدانی یەكێتی بۆ كوردستانی نوێ وتی، دروود و سڵاو بۆ رۆحی سەرجەم شەهیدانی رێگای رزگاری كوردستان، دیارە یەكێتیی نیشتیمانیی كوردستان بە رابەرایەتی سەرۆك مام جەلال، هەر لە سەرەتای دامەزراندنیەوە تا راپەڕین لەهەموو داستان و نەبەردییەكاندا و لە رزگاركردنی عیراق و بەرەنگاربوونەوەی تیرۆریستان و شەڕی دژی داعش هەمیشە پێشمەرگە قارەمانەكان و تێكۆشەرەكانی لە زیندان بە دروشمی (كەم بژی و كەڵ بژی) لە سەنگەرەكانی پێشەوەی خەباتدابوون، بۆیە هیچ رۆژێك نییە لە رۆژمێری ساڵ بە خوێنی شەهیدێكی یەكێتی تۆمارنەكرابێت.

وتیشی، پێویستە لەسەر یەكێتی هەموو خزمەتگوزارییە پێویستییەكانی ئەم سەردەمە فەراهەم بكات بۆ كەسوكارو كچ و كوڕی شەهیدان، چونكە ئەوان گەورەترین سەرمایەن بۆ یەكێتی، ئەمەش لە بەشێك لە ئۆرگانەكانی حزب و بەرپرسیارێتییە سیاسی و حكومییەكاندا بەدی دەكرێت، كە كچ و كوڕ و نەوەی شەهیدان پێشەنگن و خاوەنی ئەو متمانەیەن كە بە خوێنی شەهیدەكانیان بەدەستیانهێناوە .

دیاریکردنی رۆژێک بۆ شەهیدان وەفایە
هەر لە رۆژی شەهیدانی یەكێتی، هەژان شەهید حەسەن كوێستانی ئەندامی پەرلەمانی كوردستان بۆ کوردستانی نوێ وتی، یەكێتی بەراورد بە حزبەكانی دیكە زۆرترین شەهیدی هەیە و دیاریکردنی رۆژێک بۆ شەهیدان وەفایە بۆ خوێنی ئەو شەهیدانە و خەبات و قوربانیدانی خۆیان و كەسوكارەكانیان.

باسی لەوەشکرد، دوژمنانی كورد هەمیشە ترسیان هەبووە لە خەباتی راستەقینەی یەكێتی و زۆرترین پیلانیان دژی یەكێتی هەبووە، هەر ئەمەش وایكردبوو هەمیشە پێشمەرگەكانی یەكێتی و فەرماندەكانی لە سەنگەرەكان چاو نەترسانە رووبەڕووی دوژمنان ببنەوە و سڵ لە شەهیدبوون نەكەنەوە.

وتیشی، باوكم خوێنی خۆی بەخشییە نیشتمان و وەك فەرماندەیەك و پێشمەرگەیەكی دێرین چووە كاروانی نەمرانەوە و سەربەرزانە بەرگری لە دەستكەوتەكانی هەرێمی كوردستان كرد.

رۆژێکە بۆ خۆشەویستی خاک
سەلما فاتح ئەندامێكی دیكەی پەرلەمانی كوردستانە و كچی شەهید( وەستا فاتح)ە، لە رۆژی شەهیدانی یەكێتی وتی، باسكردن لە ژیان و خەباتی باوكم لە رۆژی شەهیدانی یەكێتی باسكردنە لە خەبات و تێكۆشانی گەلی كوردستان، چونكە یەكێتی هەموو شەهیدەكانی لەپێناو ئازادی و سەربەستی كوردستان رشتووە، رۆژی شەهیدانی یەكێتی رۆژێكە تا نەوەكان لێوەی فێری خۆشەویستی خاك و نیشتمانیان بن.

وتیشی، رشتنی رووبارێك خوێن بۆ ئازادی كوردستان هەروا ئاسان و سانا نییە، بەڵكو ئەمە لە پەروەردەی روحیەتێكی كوردانەی بەرزەوە سەرچاوەی گرتووە.

باسی لەوەشکرد، پێویستە لە رۆژی شەهیدانی یەكێتیدا هەڵوەستە بكەین لەسەر ئەو ئازایەتی و قارەمانێتیەی كە باوك و برا و كەسوكارمان هەیانبووە و خۆیان فیدای گەل و نیشتمان كردووە، شانازی دەكات بە هەموو شەهیدەكانی كوردستانەوە، چونکە هەموویان یەك ئامانجیان هەبووە ئەویش پاراستنی كورد و كوردستان و رزگاربوون لە ستەم و ژێردەستەیی بوو.

 365 جار بینراوە