سەرەکی » چاوپێکه‌وتن » قادر عه‌زیز:به‌هیچ شێوه‌یه‌ك رێگه‌ناده‌ین‌ كه‌سێك سنووری خۆی ببه‌زێنێ له‌ به‌رامبه‌ر یه‌كێتی

به‌شێوه‌یه‌كی مه‌ده‌نیانه‌، ته‌باییانه‌، به‌یه‌كڕیزی ئه‌م هه‌ڵبژاردنه‌ ئه‌نجام بده‌ین

قادر عه‌زیز:به‌هیچ شێوه‌یه‌ك رێگه‌ناده‌ین‌ كه‌سێك سنووری خۆی ببه‌زێنێ له‌ به‌رامبه‌ر یه‌كێتی

قادر عه‌زیز ئەندامی مەکتەبی سیاسی و لێپرسراوی مه‌کته‌بی راگه‌یاندنی (ی.ن.ک) له‌ به‌رنامه‌یه‌كی تایبه‌تی كه‌ناڵی ئاسمانیی گه‌لی كوردستاندا كه‌ هاوكات بوو له‌گه‌ڵ یه‌كه‌م رۆژی بانگه‌شه‌ی هه‌ڵبژاردندا، سه‌باره‌ت به‌ په‌یام‌ و هه‌ڵمه‌تی بانگەشەی یه‌كێتی بۆ ئه‌م هه‌ڵبژاردنه‌، وه‌ڵامی چه‌ندین پرسیاری دایه‌وه‌.
دیدارەکەش لەلایەن هاوکارمان (بەهێز حسێن)ەوە سازکراوە

تیمێكی به‌هێز له‌ به‌غدا
سه‌ره‌تا لێپرسراوی مه‌کته‌بی راگه‌یاندنی یه‌كێتیی نیشتمانیی كوردستان له‌ باره‌ی سه‌رنجی خۆی له‌سه‌ر ده‌ستپێكردنی هه‌ڵمه‌تی هه‌ڵبژاردن، وتی: بانگه‌شه‌ی هه‌ڵبژاردن له‌ سه‌رتاسه‌ری عیراق‌و هه‌رێمی كوردستان‌و كه‌ركوك به‌ناوچه‌ دابڕێنراوه‌كانیشه‌وه‌ ده‌ستیپێكردووه‌، به‌م بۆنه‌یه‌وه‌ هیوای سه‌ركه‌وتن بۆ گه‌له‌كه‌مان له‌م پڕۆسه‌یه‌دا ده‌خوازم، به‌تایبه‌تیش بۆ یه‌كێتیی نیشتمانیی كوردستان‌و كاندیده‌كانی، وتیشی: بڕیاری یه‌كێتی، دیدی یه‌كێتی ئه‌وه‌یه‌ كه‌ ئه‌م هه‌ڵبژاردنه‌ بۆ عیراقه‌، هه‌ڵبژاردنێكی گرنگه‌ بۆ گه‌له‌كه‌مان، ده‌بێ هه‌وڵبده‌ین كه‌ تائێستا ئه‌و شه‌ڕه‌ی كه‌ له‌ به‌غدا هه‌مانبووه‌، ئه‌و شه‌ڕه‌ سیاسی‌و یاساییه‌ی له‌سه‌ر مافه‌ ره‌واكانمان له‌سه‌ر مافه‌ به‌دینه‌هاتووه‌كانمان، له‌سه‌ر مافه‌ زه‌وتكراوه‌كانمان، ئه‌و شه‌ڕه‌ درێژه‌ پێبده‌ین، به‌باشترین شێوه‌، واته‌ كورد تیمێكی به‌هێزی هه‌بێت له‌ به‌غدا، كه‌ بتوانێت له‌ چوارچێوه‌ی ده‌ستوور یان داكۆكی له‌و مافانه‌ بكات كه‌ له‌ ده‌ستووردا هاتوون، به‌تایبه‌تیش یه‌كێتیی نیشتمانیی كوردستان تیمێكی هه‌بێت وه‌كو هه‌میشه‌ بتوانێ به‌ ئه‌ركی خۆی هه‌ستێ‌و داكۆكی له‌ مافه‌ ره‌واكانمان بكات له‌ به‌غدا.

دوو فاكته‌ری گرنگ
سه‌باره‌ت به‌بنه‌مای یان هێڵه‌ گشتییه‌كانی هه‌ڵمه‌تی یه‌كێتیی نیشتمانیی كوردستان، لێپرسراوی مه‌كته‌بی راگه‌یاندنی یه‌كێتی ئاماژەی به‌وه‌كرد: له‌به‌رئه‌وه‌ی ئه‌م هه‌ڵبژاردنه‌ بۆ به‌غدایه‌‌و له‌كاتێكیشدایه‌ كه‌ دۆخی كورد خراپه‌، به‌تایبه‌تی دوای ریفراندۆم‌و دوای هه‌موو ئه‌و كاره‌ساته‌ی به‌سه‌رماندا هات، ئێستا كورد له‌ بارودۆخێكی خراپدایه‌ به‌گشتی‌و به‌تایبه‌تی له‌ به‌غدا، مافه‌كانی لێ زه‌وت ده‌كرێ، یاسا پێشێل ده‌كرێ، هه‌ڕه‌شه‌ی لێده‌كرێ، به‌ڵام دیسان ئه‌وه‌ نییه‌ كه‌ ئێمه‌ سارد بكاته‌وه‌ له‌ خه‌بات‌و تێكۆشان، بۆیه‌ وه‌كو وتم تیمێكی به‌هێز له‌ به‌غدا بۆ كورد گرنگه‌، بۆ یه‌كێتیی نیشتمانیی كوردستان گرنگه‌، ئه‌مه‌ به‌وه‌ ده‌كرێ كه‌ بتوانین به‌هه‌موولایه‌كمان ئه‌م هه‌ڵبژاردنه‌ سه‌ربخه‌ین.
قادر عه‌زیز روونیشیكرده‌وه‌: سه‌رخستنی ئه‌م هه‌ڵبژاردنه‌ په‌یوه‌ندیی به‌ دوو فاكته‌ری گرنگه‌وه‌ هه‌یه‌، یه‌كێكیان ئه‌وه‌یه‌ بانگه‌شه‌كه‌ به‌شێوه‌یه‌كی دیموكراسی‌و مه‌ده‌نیانه‌ به‌ڕێوه‌بچێ، چونكه‌ هه‌ڵبژاردن خۆی دیارده‌یه‌كی دیموكراسییه‌، واته‌ هه‌نگاوێكی دیموكراسییه‌، ده‌بێ به‌ئامرازی دیموكراسی‌و به‌ڕێگه‌ی دیموكراسیش ئه‌م ئامانجه‌ به‌ده‌ست بهێنین، واته‌ ئامانجی دیموكراسی ده‌بێت به‌ڕێگه‌ی دیموكراسی به‌ده‌ستبێ‌، نه‌ك به‌پێچه‌وانه‌وه‌. خاڵێكی تر به‌شداریی خه‌ڵكی كوردستانه‌ له‌م هه‌ڵبژاردنه‌ گرنگه‌دا، چونكه‌ یه‌كێك له‌و شتانه‌ی كه‌ ده‌توانین خه‌ڵكی هانبده‌ین، ده‌توانین رازی بكه‌ین بۆئه‌وه‌ی به‌شداریی له‌م هه‌ڵبژاردنه‌دا بكات ئه‌وه‌یه‌ كه‌ به‌شێوه‌یه‌كی مه‌ده‌نیانه‌، به‌شێوه‌یه‌كی ته‌باییانه‌، به‌یه‌كڕیزی ئه‌م هه‌ڵبژاردنه‌ ئه‌نجام بده‌ین، چونكه‌ له‌وانه‌یه‌ یه‌كێك له‌و شتانه‌ی كه‌ خه‌ڵكی ئێمه‌ پێی رازی بێ، ئه‌م یه‌كڕیزییه‌یه‌ كه‌ داوای ده‌كات، ئه‌گه‌ر ئێمه‌ هه‌موولایه‌نه‌كان له‌م هه‌ڵبژاردنه‌دا یه‌كڕیزی خۆمان نیشان بده‌ین، به‌تایبه‌تی كه‌ هه‌ڵبژاردنه‌كه‌ بۆ عیراقیشه‌، من پێموایه‌ زیاتر ده‌توانین خه‌ڵكی خۆمان هانبده‌ین یان رازی بكه‌ین، چونكه‌ له‌گه‌ڵ هه‌موو ناڕه‌زاییه‌تییه‌كه‌یش كه‌ ئه‌مڕۆ خه‌ڵك هه‌یه‌تی له‌ كوردستان، به‌ڵام بۆ به‌غدا جیاوازی هه‌یه‌، به‌غدا زیاتر مه‌سه‌له‌یه‌كی نه‌ته‌وه‌ییه‌، زیاتر مه‌سه‌له‌یه‌كی نیشتمانییه‌، په‌یوه‌ندیی به‌ئیستحقاقی نه‌ته‌وه‌ییه‌وه‌ هه‌یه‌، راسته‌ ئیستحقاقی هه‌ڵبژاردن گرنگه‌، به‌ڵام ئیستحقاقێكی تریشمان له‌ عیراق هه‌یه‌، ئه‌ویش ئیستحقاقی نه‌ته‌وه‌ییه‌.

به‌ته‌بایی، به‌ئارامی، به‌شێوه‌یه‌كی مه‌ده‌نیانه‌
له‌باره‌ی ئه‌و پرسیاره‌شی كه‌ ئه‌مه‌ ئه‌گه‌ر بۆ هاووڵاتیانی هه‌رێمی كوردستان راست بێ، تاچه‌ند به‌سه‌ر هاووڵاتیانی ناوچه‌ دابڕێنراوه‌كاندا به‌رجه‌سته‌ ده‌بێ، كه‌ ژماره‌یه‌كی زۆر كوردی لێیه‌‌و مه‌ترسی هه‌یه‌ له‌سه‌ر گۆڕینی دیموگرافی، له‌سه‌ر ئه‌منیه‌تی، له‌سه‌ر چاره‌نووسی به‌گشتی، لێپرسراوی مه‌كته‌بی راگه‌یاندنی یه‌كێتی روونیكرده‌وه‌: له‌ هه‌رێمی كوردستان‌و له‌ ناوچه‌كانی ده‌ره‌وه‌ی ئیداره‌ی هه‌رێمی كوردستان خۆ كورد جیاناكرێته‌وه‌، شه‌ڕی هه‌موومان بۆ یه‌ك ئامانجه‌، یه‌كێك له‌و شه‌ڕانه‌ جێبه‌جێكردنی ماده‌ی (140)ه‌، گه‌ڕانه‌وه‌ی كه‌ركوك‌و ناوچه‌ دابڕێنراوه‌كانه‌، كه‌ ئه‌وه‌ ئه‌ركی هه‌موو گه‌لی كورده‌، ئه‌ركی ئه‌م تیمه‌یه‌ كه‌ ده‌چێ بۆ به‌غدا. له‌به‌رئه‌وه‌ ئێمه‌ چه‌ند بتوانین ئه‌م پڕۆسه‌یه‌ به‌ته‌بایی، به‌ئارامی، به‌شێوه‌یه‌كی مه‌ده‌نیانه‌ ئه‌نجام بده‌ین، من پێموایه‌ ئه‌وه‌نده‌ زیاتر كاریگه‌ریی ده‌كه‌ین له‌سه‌ر رای خه‌ڵكی كوردستان یان خه‌ڵكی كوردستان هانده‌ده‌ین به‌شداریی زیاتر له‌م هه‌ڵبژاردنه‌دا بكات، ئێوه‌ خۆتان ده‌زانن خه‌ڵكی كوردستان له‌ مه‌زاجێكی خراپدا ده‌ژی، به‌تایبه‌تی دوای ریفراندۆم، دوای ئه‌و دۆخه‌ی به‌سه‌ر كوردستاندا هات، ئه‌مه‌ چجای كه‌ له‌ كوردستان هه‌یه‌، مه‌سه‌له‌ی بێمووچه‌یی، مه‌سه‌له‌ی چاره‌كه‌ مووچه‌ كه‌ تائێستا به‌ته‌واوی چاره‌سه‌ر نه‌كراوه‌، مه‌سه‌له‌ی ژیان‌و گوزه‌ران، مه‌سه‌له‌ی ناڕەزایه‌تیی خه‌ڵك له‌ ده‌سه‌ڵات، ئه‌مانه‌ هه‌موو وایكردووه‌ كه‌ خه‌ڵكی كوردستان مه‌زاجی خراپ بێ، به‌ڕاستی نابێت ئێمه‌ پڕۆسه‌یه‌ك ئه‌نجام بده‌ین به‌شێوازێك كه‌ زیاتر مه‌زاجی خه‌ڵكی كوردستان خراپ بكه‌ین، واته‌ مه‌زاجی كورده‌وارییان خراپ بكه‌ین‌و زیاتر دووریان بخه‌ینه‌وه‌ له‌ پڕۆسه‌كه‌، به‌پێچه‌وانه‌وه‌، ئێمه‌ ده‌بێ خه‌ڵكی كوردستان رازی بكه‌ین به‌شێوه‌یه‌ك كه‌ خه‌ڵكی كوردستان هانبده‌ین به‌شدارییه‌كی كارا له‌م هه‌ڵبژاردنه‌دا بكات‌و ده‌بێ بزانین گرنگیی ئه‌م هه‌ڵبژاردنه‌ له‌چیدایه‌ بۆ عیراق، ئه‌وه‌ش به‌ته‌بایی ده‌كرێ، به‌ڕاستی به‌رنامه‌ی یه‌كێتیی نیشتمانیی كوردستان ستراتیژی یه‌كێتی له‌م هه‌ڵبژاردنه‌دا ئه‌وه‌یه‌ كه‌ هه‌ڵبژاردنێكی شه‌فاف، هه‌ڵبژاردنێكی ئارام، هه‌ڵبژاردنێكی مه‌ده‌نیانه‌‌و دیموكراسیانه‌ به‌ڕێوه‌بچێ‌و هه‌موو لیسته‌كان هاوكاربن، راسته‌ ململانێ هه‌یه‌، راسته‌ تای هه‌ڵبژاردن هه‌یه‌، به‌ڵام چونكه‌ هه‌ڵبژاردنه‌كه‌ بۆ عیراقه‌، جیاوازیی هه‌یه‌ له‌گه‌ڵ كوردستان.

په‌یوه‌ندیی به‌چاره‌نووسی نه‌ته‌وه‌ییمانه‌وه‌ هه‌یه‌
ئاماژه‌ی به‌وه‌شكرد: ئێستا خه‌ڵكی كوردستان له‌ مه‌زاجێكی باشدا نییه‌، ئێمه‌ نابێ به‌ململانێ‌و به‌ شه‌ڕه‌ په‌ڕۆ‌و به‌ئاڵۆزكردنی دۆخی پڕۆسه‌ی هه‌ڵبژاردن، هێنده‌ی تر مه‌زاجی خه‌ڵكی كوردستان تێكبده‌ین، نابێ دووریانبخه‌ینه‌وه‌ له‌پڕۆسه‌كه‌، به‌پێچه‌وانه‌وه‌ ده‌بێ هه‌وڵبده‌ین، هانیانبده‌ین نزیك ببنه‌وه‌ له‌ پڕۆسه‌كه‌‌و به‌شدارییه‌كی كارا له‌ پڕۆسه‌كه‌دا بكه‌ن‌و گرنگیی ئه‌م هه‌ڵبژاردنه‌یان بۆ روونبكه‌ینه‌وه‌، خۆشیان ده‌زانن ئه‌مه‌ په‌یوه‌ندیی به‌چاره‌نووسی نه‌ته‌وه‌ییمانه‌وه‌ هه‌یه‌، به‌ئاینده‌ی نه‌ته‌وه‌ییمانه‌وه‌ هه‌یه‌، به‌مافه‌ ده‌ستوورییه‌كانمانه‌وه‌ هه‌یه‌، به‌غدا ئێستا په‌یوه‌ندیی به‌مووچه‌‌و بودجه‌‌و ژیان‌و گوزه‌رانی خه‌ڵكی كوردستانیشه‌وه‌ هه‌یه‌، بۆیه‌ دووباره‌ی ده‌كه‌مه‌وه‌ ئه‌مه‌ به‌وه‌ ده‌كرێ كه‌پڕۆسه‌كه‌ به‌شێوه‌یه‌كی ته‌بایی به‌ڕێوه‌بچێ، هه‌ر لیسته‌‌و هه‌ر كاندیدێك ئازاده‌‌و مافی خۆیه‌تی بانگه‌شه‌ بۆ كاڵاكه‌ی خۆی ده‌كا، بۆ لیسته‌كه‌ی خۆی ده‌كا، به‌ڵام له‌سه‌ر حسابی لیسته‌كه‌ی تر نا، له‌سه‌ر شكاندنی به‌رامبه‌ره‌كه‌ی نا، یان په‌لاماردانی به‌رامبه‌ره‌كه‌ی یان ته‌خوینكردنی به‌رامبه‌ره‌كه‌ی یان بوختان‌و شت دروستكردن بۆ به‌رامبه‌ره‌كه‌ی، من پێموایه‌ هه‌ر لیستێك په‌نا بۆ ئه‌مه‌ ببات خۆی زه‌ره‌ر ده‌كا، چونكه‌ خه‌ڵك به‌م شێوازه‌ ناڕازییه‌، خه‌ڵك له‌كۆنه‌وه‌ واته‌ دابونه‌ریتی كورده‌واری ئه‌ركی نه‌ته‌وه‌یی گه‌لی ئێمه‌ یان هه‌ستی نه‌ته‌وه‌یی گه‌لی ئێمه‌ هه‌میشه‌ وابووه‌ كه‌ له‌گه‌ڵ ته‌بایی بووه‌، له‌گه‌ڵ یه‌كڕیزی بووه‌، هه‌میشه‌ دژی ئاڵۆزیی بووه‌، هه‌میشه‌ دژی ناكۆكی‌و دووبه‌ره‌كی بووه‌، له‌به‌رئه‌وه‌ هه‌ر لیستێك پێیوابێ به‌ئاڵۆزكردنی دۆخه‌كه‌ ده‌نگ به‌ده‌ستده‌هێنێ، من پێموایه‌ هه‌ڵه‌یه‌، هه‌ر له‌و ماوه‌یه‌ش پێش بانگه‌شه‌ هه‌ندێ شه‌ڕه‌ لیستمان بینی، خه‌ڵك لێی ناڕازییه‌، واته‌ پێیان وانه‌بێ ده‌نگی بۆ كۆده‌كه‌نه‌وه‌. سه‌باره‌ت به‌ یه‌كێتیش، وه‌ك هه‌میشه‌ بڕیاریداوه‌، په‌یوه‌ندییه‌كی ته‌ندروستی له‌گه‌ڵ لیسته‌كانی تر هه‌بێ، یه‌كێتی نایه‌وێ له‌سه‌ر حسابی لیسته‌كانی تر ده‌نگ به‌ده‌ستبهێنێ، ده‌یه‌وێ به‌مافی خۆی به‌خه‌باتی خۆی به‌قوربانیی ده‌نگ به‌ده‌ستبهێنێ‌و نایه‌وێ په‌یوه‌ندییه‌كان له‌گه‌ڵ هیچ لیست‌و قه‌واره‌یه‌كی تر له‌كوردستان ئاڵۆزبن.

داكۆكیكردن له‌ خۆت مافێكی ره‌وایه‌
سه‌باره‌ت به‌په‌لاماری ناڕه‌وای هه‌ر لایه‌نێك بۆ سه‌ر یه‌كێتیی نیشتمانیی كوردستان، لێپرسراوی مه‌كته‌بی راگه‌یاندنی یه‌كێتی رایگه‌یاند: ئه‌مه‌ دیوه‌كه‌ی تری ئه‌وه‌یه‌، به‌ڕاستی بڕیارێكی زۆر لێبڕاوانه‌ش له‌ مه‌كته‌بی سیاسی‌و سه‌ركردایه‌تی‌و ئه‌نجومه‌نی ناوه‌ندی‌و هه‌موو ئۆرگانه‌كانی یه‌كێتی هه‌یه‌ كه‌ ئه‌گه‌ر ئێمه‌ بمانه‌وێ له‌گه‌ڵ لایه‌نه‌كان دۆستانه‌ بین یان لانیكه‌م كێشه‌ بۆ كه‌س دروست نه‌كه‌ین، رێگه‌ش ناده‌ین خه‌ڵكی تر كێشه‌ بۆ یه‌كێتی دروست بكا، رێگه‌ناده‌ین په‌لامارمان بده‌ن، رێگه‌ناده‌ین به‌ته‌خوینكردنی یه‌كێتی خه‌ڵكێك ده‌نگ كۆبكاته‌وه‌، به‌هیچ شێوه‌یه‌ك رێگه‌ناده‌ین‌و لێناگه‌ڕێین كه‌سێك سنووری خۆی ببه‌زێنێ له‌به‌رامبه‌ر یه‌كێتی، ئه‌وه‌ مافێكی ره‌وای خۆمان‌و ئه‌وه‌ مافێكی ره‌وای هه‌موو لیسته‌كانی تریشه‌، هه‌موو لیستێك بۆی هه‌یه‌ داكۆكی له‌خۆی بكا، بۆیه‌ ئومێد ده‌كه‌ین نه‌گاته‌ ئه‌وه‌‌و ئێمه‌ به‌هیچ شێوه‌یه‌ك ئۆباڵی ئه‌وه‌ له‌ ئه‌ستۆ ناگرین، به‌ڵام داكۆكیكردن له‌خۆت شتێكی پیرۆزه‌. وتیشی: یه‌كێتی به‌هیچ شێوه‌یه‌ك ده‌ستپێشخه‌ر نابێ، به‌ڵام داكۆكیكردنیش مافێكی ره‌وایه‌، مافێكی پیرۆزه‌، نه‌ك بۆ یه‌كێتی، بۆ لیسته‌كانی تریش، ئومێدیش ده‌كه‌ین دۆخه‌كه‌ نه‌گاته‌ ئه‌وه‌، ئاڵۆزكردنی دۆخه‌كه‌ش زه‌ره‌ر له‌پڕۆسه‌كه‌ ده‌دا، كه‌سیش له‌ئاڵۆزكردنه‌كه‌ قازانج ناكا، یه‌كێتیش ئه‌وه‌نده‌ ده‌ست‌و پێ سپی نییه‌ واته‌ ده‌ستبه‌ستراو نییه‌ تا خه‌ڵكێك بتوانێ شه‌ڕی پێبفرۆشێ یان زوڵمی لێبكا، ئومێد ده‌كه‌ین له‌م هه‌ڵبژاردنه‌دا خۆی له‌به‌رامبه‌ر یه‌كێتی تاقینه‌كاته‌وه‌.

خه‌ڵك ئه‌زموونێكی هه‌یه‌ له‌گه‌ڵ بوونی یه‌كێتی له‌ به‌غدا
ده‌رباره‌ی ئه‌وه‌ی بۆچی خه‌ڵك ده‌نگ بدات به‌ یه‌كێتیی نیشتمانیی كوردستان، ده‌نگ بدات به‌ لیستی ژماره‌ (162) بۆ ئه‌نجومه‌نی نوێنه‌رانی عیراق؟ لێپرسراوی مه‌مته‌بی راگه‌یاندنی یه‌كێتیی نیشتمانیی كوردستان باسی له‌وه‌كرد: له‌دوای رووخانی رژێمی سه‌دام‌و یه‌كه‌م په‌رله‌مانی عیراق، خه‌ڵك ئه‌زموونێكی هه‌یه‌ له‌گه‌ڵ بوونی یه‌كێتی له‌ به‌غدا، به‌تایبه‌تی بوونی خوالێخۆشبوو سه‌رۆك مام جه‌لال كه‌ خۆتان ده‌زانن بوونی ئه‌و له‌ به‌غدا چه‌ند گرنگ بوو، هه‌روه‌ها ئه‌و تیمه‌ی یه‌كێتی كه‌ له‌ به‌غدا ئیشی ده‌كرد، به‌تایبه‌تیش په‌رله‌مانتاره‌كانی یه‌كێتی كه‌ تا ئه‌مڕۆش به‌رده‌وامن، داكۆكیكاری سه‌رسه‌ختی مافه‌ ره‌واكانی خه‌ڵكی كوردستان بوون، به‌تایبه‌تیش ئه‌و مافانه‌ی كه‌ له‌ ده‌ستووردا هاتوون، له‌به‌رئه‌وه‌ی خه‌ڵك یه‌كێتیی تاقیكردۆته‌وه‌، ئه‌گه‌ر خه‌ڵك له‌ كوردستان له‌ یه‌كێتیش ناڕازیی بێ یان گله‌یی هه‌بێ له‌به‌رئه‌وه‌ی له‌ ده‌سه‌ڵاته‌، به‌ڵام ده‌بێ بزانن له‌ به‌غدا ئه‌مه‌ ئه‌دای یه‌كێتی بووه‌، ئه‌مه‌ په‌رێزی یه‌كێتی بووه‌، بۆیه‌ یه‌كێتی مافی خۆیه‌تی داوا له‌ خه‌ڵكی كوردستان بكا كه‌ ده‌نگی پێبده‌ن‌و له‌ ئاستی ئه‌م ده‌نگپێدانه‌ش بێ، له‌ ئاستی ئه‌م متمانه‌یه‌ی خه‌ڵكیش بێ‌و تیمێكی تازه‌ش بنێرێ بۆ به‌غدا، تا داكۆكی له‌ مافه‌كانی خه‌ڵك بكا، واته‌ خه‌ڵك كه‌ ده‌نگ به‌ تۆ ده‌دا، تۆ به‌ هێزه‌وه‌ ده‌چی مافه‌كانی ده‌پارێزی، وه‌كو وتم ئێسته‌ زۆربه‌ی مافه‌كانی ئێمه‌ له‌ به‌غدایه‌، مه‌سه‌له‌ نه‌ته‌وه‌ییه‌كه‌مان له‌ به‌غدایه‌، مه‌سه‌له‌ی كه‌ركوك‌و ناوچه‌ دابڕێنراوه‌كان، جێبه‌جێكردنی ماده‌ی (140) له‌ به‌غدایه‌، پێشمه‌رگه‌ له‌ به‌غدایه‌، بودجه‌‌و مووچه‌ له‌ به‌غدایه‌، شه‌ڕه‌كان ئێستا كه‌متر له‌ كوردستانن، ئێستا ده‌بێ شه‌ڕی ژیان‌و گوزه‌ران بكه‌ی، شه‌ڕی بودجه‌‌و مووچه‌ بكه‌ی، خۆ له‌ كوردستان نییه‌، له‌ به‌غدایه‌، له‌به‌رئه‌وه‌ خه‌ڵكی كوردستان ده‌بێ گرنگی ئه‌م هه‌ڵبژاردنه‌ له‌وه‌دا ببینن‌و ده‌بێ متمانه‌شیان به‌یه‌كێتی هه‌بێ كه‌ له‌ڕابردوودا چۆن تاقیكراوه‌ته‌وه‌، دڵنیایان ده‌كه‌ین كه‌ ئه‌وه‌ندی بكرێت، له‌ ئاستی ئه‌م متمانه‌یه‌ی خه‌ڵكی كوردستاندا بین.

یه‌كێتی یه‌ك دیوی هه‌یه‌، ئه‌ویش دیوی یه‌كێتییه‌
سه‌باره‌ت به‌پێكهاته‌ی لیستی ژماره‌ (162)ی یه‌كێتیی نیشتمانیی كوردستان بۆ له‌ئه‌ستۆگرتن‌و به‌جێهێنانی ئه‌و ئه‌ركه‌ گه‌وره‌یه‌ی پێی سپێردراوه‌ تا له‌ به‌غدا به‌جێی بگه‌یه‌نێت، لێپرسراوی مه‌کته‌بی راگه‌یاندنی یه‌كێتیی نیشتمانیی كوردستان وتی: له‌ هه‌موو پارێزگاكان لیستی باش‌و به‌هێز دروستكراوه‌، خه‌ڵكی باش‌و تێكۆشه‌ر‌و پسپۆڕ‌و به‌توانای تێدایه‌، له‌ هه‌موو بواره‌كاندا خه‌ڵكی تێدایه‌ كه‌ بتوانن له‌ به‌غدا به‌شێك بن له‌م تیمه‌، كه‌ بتوانێ داكۆكی له‌ مافه‌ ده‌ستوورییه‌كانی خه‌ڵكی كوردستان بكا.
سه‌باره‌ت به‌وانه‌ی كه‌ هه‌ڵبژاردنه‌كانی رابردوو و ئێستاش خۆیان به‌مێژووی یه‌كێتیدا هه‌ڵواسیوه‌‌و وا خۆیان نیشان ده‌ده‌ن كه‌ دیوی دووه‌می یه‌كێتیی نیشتمانیی كوردستانن، قادر عه‌زیز وتی: بێگومان یه‌كێتی یه‌ك دیوی هه‌یه‌‌و هیچ دیوێكی تری نییه‌، ئه‌ویش دیوی یه‌كێتیی نیشتمانیی كوردستانه‌، یه‌ك لیستیش هه‌یه‌ كه‌ چه‌ندینجار له‌ڕاگه‌یاندنه‌كان رامانگه‌یاندووه‌ كه‌ لیستی ژماره‌ (162)ه‌، من بڕوا ناكه‌م ئه‌و شتانه‌ له‌خه‌ڵك بشاردرێته‌وه‌، هه‌موو خه‌ڵك یه‌كێتی ده‌ناسێ‌و خه‌ڵكی تریش ده‌ناسێ‌و ئه‌وه‌نده‌ شتێكی زه‌حمه‌ت نییه‌ ئێمه‌ خۆمان به‌خه‌ڵك بناسێنین، یه‌كێتیی كێیه‌‌و دیوی راسته‌قینه‌ی كێیه‌‌و لیسته‌كه‌ی ژماره‌ چه‌نده‌، زۆرجار خه‌ڵك خۆی كردووه‌ به‌دیوی دووه‌میش، به‌ڵام یه‌كێتی هه‌ر ده‌نگی خۆی هێناوه‌.

گه‌لی ئێمه‌ هه‌میشه‌ به‌ئه‌ركی نه‌ته‌وه‌یی خۆی هه‌ستاوه‌
سه‌باره‌ت به‌كێبه‌ركێی گه‌وره‌ له‌ ناوچه‌ جێناكۆكه‌كان‌و چۆنێتی ئاماده‌بوونی یه‌كێتی له‌و ناوچانه‌، لێپرسراوی مه‌کته‌بی راگه‌یاندنی یه‌كێتیی نیشتمانیی كوردستان وتی: بێگومان ئه‌و ناوچانه‌ پرسی سه‌ره‌كیی گه‌لی كوردستان بوون، به‌تایبه‌تی كه‌ركوك‌و ناوچه‌ جێناكۆكه‌كان، وه‌كو شه‌نگال، خانه‌قین‌و شوێنه‌كانی تر، ئێستا دۆخه‌كه‌ له‌م ناوچانه‌ خراپه‌، دوای ریفراندۆم‌و په‌لاماردانی كه‌ركوك‌و ئه‌و ناوچانه‌، ئێستا دۆخه‌كه‌ چ له‌ڕووی ئه‌منی‌و له‌ڕووی ئاسایشه‌وه‌، چ له‌ڕووی ئاواره‌بوونی خه‌ڵكه‌وه‌، چ له‌ڕووی ئه‌و سته‌مه‌ی كه‌ له‌خه‌ڵك ده‌كرێ، به‌دڵنیاییه‌وه‌ دۆخه‌كه‌ باش نییه‌، به‌ڵام شتێكی تر هه‌یه‌ كه‌ قه‌ره‌بووی ئه‌مه‌ ده‌كاته‌وه‌، ئه‌ویش ئه‌وه‌یه‌ كه‌ گه‌لی ئێمه‌ هه‌میشه‌ له‌و ناوچانه‌ به‌ئه‌ركی نه‌ته‌وه‌یی خۆی هه‌ستاوه‌، واته‌ چه‌ند چه‌وسێنرابێتنه‌وه‌، چه‌ند هه‌ڕه‌شه‌یان لێكرابێ، چه‌ند سته‌میان لێكرابێ، ئه‌وه‌نده‌ زیاتر ئه‌ركی نه‌ته‌وه‌یی خۆیان جێبه‌جێكردووه‌، كه‌ ئه‌مه‌ش ئه‌ركێكی نه‌ته‌وه‌ییه‌ ئه‌وان له‌م هه‌ڵبژاردنه‌دا به‌شدارییه‌كی كارا بكه‌ن، من دڵنیاشم به‌شداریی كارا ده‌كه‌ن له‌و رووه‌وه‌، سه‌رباری ئه‌و دۆخه‌ی ئاماژه‌م پێكرد، دیاریشه‌ رۆڵی یه‌كێتیی له‌و ناوچانه‌ یان خه‌بات‌و قوربانیدانی یه‌كێتی له‌م ناوچانه‌، هه‌ڵبژاردنه‌كانی رابردووش بینیومانه‌، دڵنیام ئه‌مجاره‌ش ده‌یبینین كه‌ سه‌رباری ئه‌م دۆخه‌ش كه‌ هاتۆته‌ پێش، سه‌رباری ئه‌و هه‌موو تۆمه‌ته‌ش كه‌ بۆ یه‌كێتی دروستكرا به‌ناڕه‌وا، به‌ڵام من پێموایه‌ ئه‌م خه‌ڵكه‌ راستییه‌كان ده‌زانێ‌و ده‌نگ به‌ لیستی یه‌كێتیی ده‌دا‌و یه‌كێتی به‌نوێنه‌ری راسته‌قینه‌ی خۆی ده‌زانێ‌و له‌ به‌غدا یه‌كێتیی‌ تاقیكردۆته‌وه‌،

بایكۆتكردنی هه‌ڵبژاردن كارێكی خراپه‌
له‌باره‌ی بایكۆتی لایه‌نێكی سیاسی بۆ هه‌ڵبژاردنی په‌رله‌مانی عیراق له‌ناوچه‌ دابڕێنراوه‌كان‌و كاریگه‌ری نه‌رێنی له‌سه‌ر ده‌نگی كورد له‌و ناوچانه‌، قادر عه‌زیز ئه‌ندامی مه‌كته‌بی سیاسی‌و لێپرسراوی مه‌كته‌بی راگه‌یاندنی یه‌كێتی وتی:»بایكۆتكردنی هه‌ڵبژاردن له‌و ناوچانه‌ كارێكی خراپه‌، چونكه‌ ده‌نگی كورد كه‌م ده‌كات‌و سه‌ره‌نجام به‌قازانجی به‌غدا ده‌بێت، به‌ڵام ئه‌گه‌ر لایه‌نێك بایكۆتی كردووه‌، ئه‌وه‌ لیستی كوردی تر هه‌یه‌، بۆ نمونه‌ لیستی یه‌كێتی هه‌یه‌ كه‌ خه‌ڵك ده‌توانێت ده‌نگی پێبدات، چونكه‌ پرسی ده‌نگدان له‌و ناوچانه‌ پرسێكی نه‌ته‌وه‌ییه‌».
راشیگه‌یاند: ئه‌و زوڵمه‌ی كه‌ له‌دوای ریفراندۆمه‌وه‌ له‌خه‌ڵكی كورد له‌و ناوچانه‌ ده‌كرێت، رق ئه‌ستورتره‌ له‌پێشووتر كه‌ خۆمان حوكمڕانیمان ده‌كرد، بۆیه‌ دڵنیام كه‌ ئه‌و دۆخه‌ قه‌رەبوو ده‌كرێته‌وه‌و دۆخی ئێستاش وه‌كو پێشووتر نییه‌، هاوكات هه‌رچه‌نده‌ ئێستا له‌ڕووی ئه‌منی‌و رێگه‌دان‌و ده‌رفه‌ت‌و ئاواره‌بوون‌و ته‌نانه‌ت ده‌نگ سووتاندن‌و ساخته‌كاری له‌قازانجی كورد نییه‌ له‌و ناوچانه‌، به‌ڵام له‌به‌ر ئه‌وه‌ی هه‌ڵبژاردنه‌كه‌ بۆ په‌رله‌مانی عیراقه‌و تائێستاش ئه‌و ناوچانه‌ نه‌گه‌ڕێنراونه‌ته‌وه‌ سه‌ر هه‌رێمی كوردستان، بۆیه‌ كێشه‌ی نه‌ته‌وه‌یی زیاتر زه‌قه‌و خه‌ڵك ئه‌ركی نه‌ته‌وه‌یی به‌ ئه‌ركی خۆی ده‌زانێت، بۆیه‌ پێموایه‌ خه‌ڵكی ئه‌و ناوچانه‌ به‌شداری كارا له‌پڕۆسه‌ی هه‌ڵبژاردن ده‌كه‌ن‌و وه‌كو پێشتر ده‌نگ به‌ لیستی 162 ده‌ده‌ن.

فه‌راهه‌مكردنی ئازادی له‌لایه‌ن یه‌كێتییه‌وه‌
ده‌رباره‌ی ئه‌وه‌ی له‌ڕابردوودا یه‌كێتیی نیشتمانی ئه‌و هێزه‌ بووه‌ كه‌ پارسه‌نگی زۆر ئه‌و هاوكێشانه‌ی داوه‌ته‌وه‌ كه‌ گۆڕیویه‌تی به‌ قازانجی گه‌لی كورد، له‌چه‌ند وێستگه‌یه‌كیشدا كه‌ یه‌كێتی ده‌نگی كه‌میكردووه‌ بینرا كه‌ باڵانسه‌كه‌ له‌ زیانی گه‌لی كورد تێكچوو، ئایا یه‌كێتی به‌هه‌مان پێگه‌وه‌ له‌م هه‌ڵبژاردنه‌ گرنگی هه‌یه‌، قادر عه‌زیز ئاماژه‌ی به‌وه‌دا، گرنگی یه‌كێتی كاڵ نه‌بۆته‌وه‌، به‌پێچه‌وانه‌وه‌ رۆڵی یه‌كێتی چی له‌هه‌رێمی كوردستان‌و چی له‌عیراق‌و ناوچه‌كه‌، رۆڵێكی گرنگی هه‌یه‌ له‌هه‌موو ئاسته‌كاندا، به‌تایبه‌ت له‌پڕۆسه‌ی سیاسی عیراق رۆڵی یه‌كێتی دیاره‌، نه‌ك ته‌نها بۆ گه‌لی كورد، به‌ڵكو بۆ هه‌موو پێكهاته‌كان تر، له‌هه‌رێمی كوردستان به‌بێ یه‌كێتی شتێك نییه‌ به‌ناوی پڕۆسه‌ی سیاسی، یه‌كێتی هه‌میشه‌ (صمام امان)ی ئه‌و ئازادییه‌ بووه‌ كه‌ له‌هه‌رێم هه‌یه‌. سه‌ره‌ڕای هه‌موو ئه‌و گله‌یی‌و ره‌خنانه‌ی كه‌ رووبه‌ڕووی بۆته‌وه‌ به‌هۆی ئه‌وه‌ی له‌ده‌سه‌ڵاته‌، ئه‌مه‌ش یه‌كێتی نایشارێته‌وه‌و به‌رده‌وام دان به‌هه‌ڵه‌كانی ده‌نێت‌و ماف به‌ناڕه‌زایه‌تی هاووڵاتیانیش ده‌دات، به‌ڵام یه‌كێتی هه‌ر ئه‌و رۆڵه‌ كاریگه‌رییه‌ی هه‌یه‌ له‌پڕۆسه‌ی سیاسی عیراق‌و هه‌رێمی كوردستان.
سه‌باره‌ت به‌وه‌ی تاچه‌نده‌ ده‌نگهێنانی زۆری یه‌كێتی یان متمانه‌كردنی زۆری كۆمه‌ڵانی خه‌ڵكی كوردستان به‌ لیستی 162 و كاندیده‌كانی ده‌ستبه‌ری ئازادی زیاتر بۆ خه‌ڵك ده‌كات‌و ئه‌زموونی دیموكراسی له‌كوردستان ده‌پارێزێت، لێپرسراوی مه‌كته‌بی راگه‌یاندنی یه‌كێتیی نیشتمانیی كوردستان وتی:»بوونی ئۆپۆزسیۆن‌و لیستی نوێ، بوونی ئۆپۆزسیۆنی وڵاتانی ترو مێدیای ئازادو خۆپیشاندانی‌و ناڕه‌زایه‌تی خه‌ڵك، هه‌موو ئه‌مانه‌ له‌م زۆنه‌دا هه‌یه‌، كه‌ زۆر كه‌س پێیوایه‌ ئه‌مه‌ كارێكی نه‌رێنییه‌ یان ده‌وترێت ئه‌مه‌ زیانی بۆ یه‌كێتی ده‌بێت، به‌ڵام نه‌خێر ده‌بێت ئه‌وه‌ بزانرێت كه‌ ئه‌مه‌ ئه‌و ئازادییه‌ كه‌ یه‌كێتی فه‌راهه‌میكردووه‌و بوونی لیستی نوێ به‌مانای ئه‌وه‌ نییه‌ كه‌ له‌ده‌نگی یه‌كێتی ده‌بات، چونكه‌ له‌داهاتوودا ئه‌گه‌ر هه‌ر لیستێكی تر بۆ به‌غدا كورسی به‌ده‌ستبهێنێت بۆ كورد گرنگه‌، بۆیه‌ یه‌كێتی ئه‌و بیركردنه‌وه‌ ته‌سكه‌ی نییه‌، هاوكات هه‌رچه‌نده‌ یه‌كێتی حه‌ز ده‌كات لیسته‌كه‌ی زۆترین ده‌نگ بهێنێت، به‌ڵام لیستی كوردیش له‌ به‌غدا چه‌ند به‌هێز بێت یه‌كێتی به‌ قازانجی كوردو خۆی ده‌زانێت».

یه‌كێتی پێشه‌نگی پرسه‌ نه‌ته‌وه‌ییه‌كانه‌
له‌باره‌ی ئه‌وه‌ی بۆچی ئه‌م هه‌موو سه‌رنج و فۆكسه‌ له‌سه‌ر یه‌كێتییه‌ له‌هه‌ڵبژاردنه‌كانداو به‌شێك ده‌یانه‌وێت یه‌كێتی به‌ به‌هێزی بمێنێته‌وه‌و به‌شێكی تریش ده‌یانه‌وێت بچوكی بكه‌نه‌وه‌، قادر عه‌زیز روونیكرده‌وه‌، له‌ڕاستیدا یه‌كێتی به‌ئامانجكراوه‌، به‌و واتایه‌ی هه‌ر له‌كۆنه‌وه‌ گه‌له‌كۆمه‌كی هه‌یه‌ له‌سه‌ری یه‌كێتی به‌ ئێستاشه‌وه‌، بۆ نمونه‌ ئه‌وه‌ی له‌كه‌ركوك روویدا، هه‌ڵوێستی توركیا، ئه‌مانه‌ هه‌مووی بۆ رۆڵی گرنگی یه‌كێتی ده‌گه‌ڕێته‌وه‌ له‌ناوچه‌كه‌دا كه‌ ئه‌مه‌ حه‌زی زۆر كه‌س نییه‌و پێی قبوڵ نییه‌، به‌تایبه‌ت رۆڵی یه‌كێتی له‌سه‌ر ئاستی نه‌ته‌وه‌یی‌و پارچه‌كانی تری كوردستان، وه‌ك ئه‌وه‌ی سزا به‌سه‌ر یه‌كێتی سه‌پێنراوه‌ له‌ڕێگه‌ی گه‌شتی فڕۆكه‌خانه‌ی نێوده‌وڵه‌تیی سلێمانی بۆ توركیا، كه‌ ئه‌مه‌ باجی هه‌ڵوێستی یه‌كێتییه‌ له‌سه‌ر پرسه‌ نیشتمانی‌و نه‌ته‌وایه‌تیه‌كان، كه‌ ئه‌مه‌ شانازی‌و خاڵێكی به‌هێزو گرنگه‌ بۆ یه‌كێتی، ئه‌مه‌ش پرنسیپه‌ بۆ یه‌كێتی، وه‌ك ئه‌وه‌ی له‌چه‌ند رۆژی رابردوودا وته‌بێژی یه‌كێتی ئاماژه‌ی بۆ كرد، «ئێمه‌ جاشایه‌تی بۆ كه‌س ناكه‌ین»، بۆیه‌ ئه‌و لایه‌نانه‌ وا فێركراون كه‌ تۆش بچیت كه‌واسوری به‌ر له‌شكر بیت، به‌ڵام یه‌كێتی پێچه‌وانه‌كه‌ی له‌ به‌رنامه‌كه‌یه‌تی. یه‌كێتی له‌ په‌یامه‌كه‌ی بۆ هه‌ڵبژاردن هاتووه‌ كه‌ پشتیوانی له‌چاره‌سه‌ری ئاشتیانه‌ی پارچه‌كانی تری كوردستان ده‌كات. یه‌كێتی له‌ڕابردوودا پێشه‌نگی پرسه‌ نه‌ته‌وه‌ییه‌كان بوو له‌ناوچه‌كه‌دا، به‌جۆرێك به‌رپرسێكی ئه‌مریكا ده‌ڵێت:»ئه‌وه‌ یه‌كێتی بوو كه‌ ئێمه‌ی رازی كرد بچین بۆ رۆژئاوا»، ئه‌مه‌ جگه‌ له‌ڕۆڵی سه‌رۆك مام جه‌لال‌و یه‌كێتی له‌كوردستانی باكوورو زۆر شتی تریش. خه‌ڵكیش ئه‌م راستییه‌ ده‌زانێت، به‌ڵام زۆرجار یه‌كێتی خۆی كه‌مته‌رخه‌م بووه‌ له‌ زه‌قكردنه‌وه‌ی ئه‌و سه‌روه‌رییانه‌.
یه‌كێك له‌دروشمه‌ سه‌ره‌كییه‌كانی یه‌كێتی بریتییه‌ له‌ (نوێبوونه‌وه‌)، ئایه‌ یه‌كێتی له‌چیدا خۆی نوێ ده‌كاته‌وه‌، له‌وه‌ڵامدا ئه‌و ئه‌ندامه‌ی مه‌كته‌بی سیاسی یه‌كێتی وتی:»یه‌كێتی دروشمی نوێبوونه‌وه‌ی بۆ هه‌ڵبژاردنی په‌رله‌مانی عیراق نییه‌، به‌ڵكو نوێبوونه‌وه‌ بۆ ناوخۆی خۆی كه‌ پێویستی پێیه‌تی، یه‌كێك له‌و كارانه‌ی كه‌ پێداگیری له‌سه‌ر ده‌كرا كه‌ یه‌كێتی كۆنگره‌ بكات، به‌مه‌به‌ستی نوێبوونه‌وه‌ی ناوخۆی خۆی بوو، بۆ ئه‌وه‌ بوو كه‌ خوێنی تازه‌ بێنه‌ سه‌ركردایه‌تی یه‌كێتی به‌ به‌رنامه‌ی نوێوه‌، به‌ڵام بۆ به‌غدا یه‌كێتی دروشمێكی هه‌یه‌ ئه‌ویش ئه‌وه‌یه‌ (گه‌ڕانه‌وه‌ی ده‌سه‌ڵات)، به‌و واتایه‌ی به‌شداری كورد له‌ده‌سه‌ڵاتی به‌غدا، یه‌كێتی پێیوایه‌ له‌ماوه‌ی رابردوودا كورد ده‌سه‌ڵات‌و شه‌راكه‌تێكی ئه‌وتۆی له‌ به‌غدا نه‌ماوه‌و خه‌ریكه‌ ته‌وافوق نه‌ماوه‌و باس له‌ حكومه‌تی زۆرینه‌ ده‌كرێت، كه‌ دژ به‌ دیموكراسی‌و پرەنسیپه‌كانی یه‌كێتی‌و كورده‌، بۆیه‌ له‌م هه‌ڵبژاردنه‌دا یه‌كێتی داوا ده‌كات كه‌ ئه‌گه‌ر به‌ تیمێكی به‌هێز بچین بۆ به‌غدا بتوانێت پێگه‌كانی خۆی له‌حوكمڕانی‌و شه‌راكه‌ت به‌ده‌ستبهێنێته‌وه‌، چه‌ند یه‌كێتیش پێگه‌ی به‌هێز بێت له‌و شه‌راكه‌ته‌، هێنده‌ش ده‌توانرێت مافه‌كانی كورد كه‌ له‌ده‌ستووردا هه‌یه‌ به‌ده‌ستیبهێنێته‌وه‌، به‌و واتایه‌ی گه‌ڕانه‌وه‌ی ده‌سه‌ڵاتی راسته‌قینه‌و ئیستحقاقی نه‌ته‌وه‌یی بۆ كورد له‌ به‌غدا له‌ڕێگه‌ی ته‌وافوقه‌وه‌.

مه‌ترسی له‌سه‌ر ئه‌زموونی كوردستان هه‌یه‌
راشیگه‌یاند: ئێمه‌ نه‌ته‌وه‌ی دووه‌مین له‌ عیراق، به‌و واتایه‌ی ئێمه‌ كورسیمان هه‌بێت یان نه‌بێت، كه‌م بێت یان زۆر، به‌ڵام ئیستیحقاقێكی جێگیرمان هه‌یه‌ كه‌ ئیستحقاقی نه‌ته‌وه‌ییه‌‌و ئێستا مه‌ترسی له‌سه‌ره‌، بۆیه‌ ده‌بێت له‌مه‌ودوا كار له‌سه‌ر ئه‌و پرسه‌ نه‌ته‌وه‌ییه‌ بكرێت.
له‌باره‌ی ئه‌وه‌ ئه‌گه‌ر كۆی لایه‌نه‌ سیاسییه‌كانی كورد له‌م هه‌ڵبژاردنه‌ ده‌نگی پێویست به‌ده‌ستنه‌هێنن‌و ئه‌و حزبه‌ به‌ ئه‌زموونانه‌ی كه‌ په‌یوه‌ندییه‌كی نێوده‌وڵه‌تی‌و هه‌رێمایه‌تی باشیان هه‌یه‌ كورسی زۆر به‌ده‌ستنه‌هێنن، مه‌ترسی له‌سه‌ر ئه‌زموونی هه‌رێمی كوردستان ده‌بێت، لێپرسراوی مه‌كته‌بی راگه‌یاندنی یه‌كێتی رایگه‌یاند: ئێستاش مه‌ترسی له‌سه‌ر ئه‌زموونی كوردستان هه‌یه‌، به‌تایبه‌ت له‌دوای ریفراندۆم كاردانه‌وه‌كانی به‌غداو وڵاتانی هه‌رێمایه‌تیمان بینی، ئه‌و گه‌له‌كۆمه‌كییه‌ی كرا كه‌ هیچ پێویست نه‌بوو، له‌كاتێكدا هێشتا موماره‌سه‌ی ریفراندۆممان نه‌كردو ته‌نها رای خه‌ڵك وه‌رگیرا كه‌ مافی هه‌موو گه‌لێكه‌، بۆیه‌ ئێستاش هه‌ڕه‌شه‌ له‌سه‌ر قه‌واره‌ی سیاسی‌و ده‌ستووری هه‌رێمی كوردستان هه‌یه‌، كه‌ ده‌بێت وه‌كو یه‌كێتی‌و كورد به‌گشتی رووبه‌ڕووی ببینه‌وه‌.

رۆڵی گرنگ‌و به‌هێزی سه‌رۆك مام جه‌لال
ده‌رباره‌ی ئه‌وه‌ی ئه‌وه‌ی تاچه‌نده‌ راسته‌ كه‌ یه‌كێتی ده‌بێته‌ زامنێك بۆ ئه‌وه‌ی خه‌ڵكی كوردستان رووبه‌ڕووی مه‌ترسی گه‌وره‌ نه‌بنه‌وه‌، قادر عه‌زیز وتی:»یه‌كێتی تاقیكراوه‌ته‌وه‌ له‌سه‌ر هه‌ردوو ئاستی هه‌رێمی كوردستان‌و عیراق، له‌دوای رووخانی رژێمی به‌عس ئه‌وه‌ی كه‌ زامن بووه‌ یه‌كێتی بووه‌، به‌تایبه‌تیش بوونی سه‌رۆك مام جه‌لال، بینیمان كه‌ له‌دوای نه‌خۆشكه‌وتن‌و كۆچی دوایی مام جه‌لال چ جۆره‌ دۆخێك دروست بوو له‌عیراق، پێشتر زۆر شت هه‌بوو كه‌ چاوه‌ڕوان ده‌كرا له‌نێوان كوردو به‌غدا دروست بێت، به‌ڵام به‌ حیكمه‌تی سه‌رۆك مام جه‌لال رێگری لێكرا، بۆ نمونه‌ كاتێك ویسترا به‌شێك له‌لایه‌نه‌كان به‌كوردیشه‌وه‌ متمانه‌ له‌ نوری مالكی وه‌ربگرنه‌وه‌، ئه‌گه‌ر مام جه‌لال نه‌بوایه‌ ئه‌وكات دۆخه‌كه‌ تێكده‌چوو».
راشیگه‌یاند: ته‌نانه‌ت له‌دوای مام جه‌لالیش، یه‌كێتی سه‌ره‌ڕای ئه‌و دۆخه‌ی كه‌ئێستا هه‌یه‌تی، به‌ڵام له‌ ئه‌ركی نه‌ته‌وه‌یی خۆی دوانه‌كه‌وتووه‌، له‌شه‌ڕ له‌به‌غدا بۆ به‌ده‌ستهێنانی مافه‌ ده‌ستووری‌و سیاسییه‌كان دوانه‌كه‌تووه‌.
له‌باره‌ی په‌یامی لێپرسراوی مه‌كته‌بی راگه‌یاندنی یه‌كێتیی نیشتمانیی كوردستان سه‌باره‌ت به‌ بانگه‌شه‌ی‌ هه‌ڵبژاردن، قادر عه‌زیز وتی:»داوا له‌خه‌ڵكی خۆڕاگری كوردستان و ناوچه‌ دابڕێنراوه‌كان‌و كوردانی هه‌نده‌رانیش ده‌كه‌م، به‌شدارییه‌كی كارا له‌م هه‌ڵبژاردنه‌ بكه‌ن، چونكه‌ ئه‌م هه‌ڵبژاردنه‌ گرنگه‌و زۆربه‌ی پرسه‌ چاره‌نووسازه‌كان‌و ژیان‌و قوتی ئێمه‌ له‌ به‌غدایه‌، داوا ده‌كه‌م ده‌نگ به‌ لیستی 162ی یه‌كێتی بده‌ن. داواش له‌ ئه‌ندام‌و لایه‌نگرانی یه‌كێتی‌و پێشمه‌رگه‌ قاره‌مانه‌كان ده‌كه‌م، له‌م هه‌ڵبژاردنه‌ سه‌ره‌ڕای خراپی ژیان‌و گوزه‌رانیان، به‌ڵام به‌شدارییه‌كی كارا له‌م هه‌ڵبژاردنه‌ بكه‌ن‌و دڵنیاشم كه‌ خه‌ڵك به‌ ئه‌ركی خۆی هه‌ڵده‌ستێت به‌رامبه‌ر به‌م لیسته‌‌و ئومێدی سه‌ركه‌وتنیش بۆ كاندیده‌كانی یه‌كێتی ده‌خوازم كه‌ له‌لایه‌ن مه‌كته‌بی سیاسییه‌وه‌ به‌ یه‌ك چاو سه‌یری هه‌موویان ده‌كه‌ین به‌تایبه‌ت له‌ راگه‌یاندنه‌كانی یه‌كێتی. دڵنیام له‌م هه‌ڵبژاردنه‌ش یه‌كێتی ده‌توانێت تیمێكی به‌هێز بنێرێت بۆ به‌غدا».

ئامادەکردنی بۆ رۆژنامە دیاری سابیر و ئەرکان جەبار

print

 115 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*