سەرەکی » ئابووری » میسر.. دروستكردنی كەلوپەلی جۆراوجۆر بە چڵی دارخورما

«هەناردەی دەرەوەی وڵات دەكرێت»

میسر.. دروستكردنی كەلوپەلی جۆراوجۆر بە چڵی دارخورما

پیشەی دروستكردنی كەلوپەل بە چڵی دارخورما، مێژوویەكەی بۆ سەردەمانێكی زۆر كۆن دەگەڕێتەوە، نەوە لەدوای نەوە تا رۆژانی ئەمڕۆ بەردەوامە.
ئەم پیشەیە زیاتر لەشارەكانی فەییوم‌و ئەسوان‌و عەریش بەدیدەكرێت، ئەگەرچی وەكو رابردووش باو نەبێت، بەڵام تائێستاش لە هەندێك لە گوندەكان بە پیشەیەكی سەرەكی دادەنرێت.
خەڵكی فەییوم كە ئەم كارەیان لە باو و باپیرانەوە بۆ ماوەتەوە، پێداویستییە جۆراوجۆرەكانی خۆیان لە چڵی دارخورما دروست دەكەن.
لەگوندی (ئیلام)یش لەهەموو ماڵێكدا ئەم كەلوپەلانە بەدیدەكرێن، لەپاڵ ئەمەشدا خەڵكانێك بژێوی رۆژانەیان لە رێگەی ئەم كارەوە دابین دەكەن.
گەنج‌و بە تەمەنەكانی گوندی ئیلام بەم پیشەیەوە خەریكن، گەشتیاران ئەم كەلوپەلانە دەكڕن‌و وەك دیاری دەیبەنەوە بۆ وڵاتەكانیان.
لەیلا محەمەد سەعید كە یەكێكە لە دانیشتوانی گوندی ئیلام لەدایك‌و داپیرییەوە فێری ئەم پیشەیە بووەو تا ئێستاش لەسەری بەردەوامە.
لەیلا محەمەد سەعید بە پەیامنێری ئاژانسی ئانادۆڵوی راگەیاندوە: «چڵە دارخورماكان پاكدەكرێنەوەو دەخرێنە ناو ئاو. ئەگەر بمانەوێت رەنگاڕەنگیش بێت دەبێت بیانخەینە ناو بۆیە. دواتر لەناو قوماشێكی سپی هەڵدەگیرێت بۆ ماوەی یەك شەو. دواجار لەبەر هەتاو دادەنرێت تا وشك دەبێتەوەو بۆ ئیشكردن ئامادە دەكرێت».

هەناردەی دەرەوەی وڵات دەكرێت
لەیلا محەمەد سەعید وتی: «ئێمە بەم چڵانە كەلوپەلی جۆراوجۆر دروست دەكەین‌و بەڕای من ئەمانە لە پلاستیك تۆكمەترن، بەردەوام هەوڵ دەدەین شێوازو رەنگی جیاواز بەكاربهێنین». ئاماژەی بەوەشدا: بەرهەمەكەكانیان هەناردەی دەرەوەی وڵات دەكەن.
لەیلا محەمەد سەعید وتیشی: «نرخی كەلوپەلەكان لە نێوان یەك دۆلار تا ١١٥ دۆلارە، ئەمەش بەندە بە شێوەو قەبارەی بەرهەمەكان».
راشیگەیاندوە: ئەو لەڕێگەی ئەم كارەوە بژێوی ژیانی خانەوادەكەی دابین دەكات.
ناوبراو هەروەها ئاماژەی بەوەدا: كە ئەم پیشەیە بژێوی زیاتر لە ٣٠٠ ماڵ دابین دەكات‌و وتی: «قوتابیەكان لەكاتەكانی پشوودا خەریكی ئەم كارە دەبن‌و كچە گەنجەكانیش لەكاتی شوكردنیان كەلوپەكانی ناو ماڵیان لەم چڵانە دروست دەكەن. گەورەو بچووك بەم كارەوە خەریكن».

print

 11 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*