سەرەکی » راپۆرت » هه‌واڵ و سیاسەت » روسیا گەورەترین مانۆڕی سەربازی دەکات

روسیا گەورەترین مانۆڕی سەربازی دەکات

حکومەتی روسیا بە نیازە لە 11 بۆ 15 مانگی ئەیلولدا گەورەترین مانۆڕی سەربازی ئەنجام بدات، کە تێیدا نزیکەی 300 هەزار سەرباز بەشداریدەکەن، ئەمەش گەورەترین مانۆڕی سەربازییە لە ساڵی 1981 ەوە، میدکانی جیهانیش باس لە دووبارە گەڕانەوەی جەنگی سارد دەکەن.
فۆستۆک -2018
دیمیتری بیسکوف وتەبێژی کۆشکی کرێملین بە میدیاکانی راگەیاند: ئەو مانۆڕە سەربازییە ناوی « فۆستۆک-2018» . راشیگەیاند: هۆکاری ئەم مانۆڕە بەرگریکردنە لە وڵات و رووبەروبوونەوەی ئەو مەیلە دوژمنکاریانەیە کە رووبەروی روسیا دەبێتەوە.

36 هەزار تانک و هەزار فرۆکەی جەنگی بەشدار دەبن
لە لایەکی ترەوە سێرگی شویگۆ وەزیری بەرگری روسیا بە میدیاکانی راگەیاند: لەو مانۆڕە سەربازییەدا 36 هەزار تانک و زرێپۆش بەشدار دەبن. وتیشی: هەزار فرۆکەی جەنگیش بەشداری دەکەن. راشیگەیاند: ئەو مانۆڕە سەربازییە لە ناوەڕاست و رۆژهەڵاتی روسیا ئەنجام دەدرێت.

چین و مەنگۆلیاش بەشداری دەکەن
لەلایەکی ترەوە سەرچاوە حکومییەکان رایانگەیاند: لەو مانۆڕە سەربازییەدا هەریەک لە چین و مەنگۆلیاش بەشداری دەکەن.
جێگەی ئاماژەیە ماوەی چەند ساڵێکە پەیوەندییەکانی روسیا و دەوڵەتانی رۆژئاوا رۆژ لەدوای رۆژ خراپتر دەبێت، زۆرێک لە میدیاکانی جیهانیش باس لە دووبارە گەڕانەوە جەنگی سارد دەکەن.

سەرچاوە:ئاژانسەکان

 341 جار بینراوە