سەرەکی » ساڵۆنی کوردستانی نوێ » دەفتەری کوردەواری زیندووکردنەوەی بەرهەمێکی رۆژنامەوانیی کوردیی

ساڵۆنی کوردستانی نوێ

دەفتەری کوردەواری زیندووکردنەوەی بەرهەمێکی رۆژنامەوانیی کوردیی

لەم کۆڕەی ساڵۆندا
ئەوێ رۆژێ كاری رۆژنامەنووسیش خۆی لەخۆیدا سەركێشی ‌و مل لەچەقۆ سووین بوو، كە مامۆستا جەمال خەزنەدار‌و بەشێك لە نووسەران ‌و رووناكبیران لەڕێی نووسینەكانیانەوە‌و بە چەندین پێچ و پەناو لوغزەوە پەیامەكانیان دەگەیاندە خوێنەر، هەرچەندە زمانی نووسینەكانی ئەو رۆژگارە بە لوغزو پێچ و پەناش پەیامەكانیان گەیاندووە، بەڵام بەزمانێكی سادەو ساكارو پاراو نەوەی خوێندەوارو ئارەزوومەندی خوێندنەوەیان هۆشیار كردووەتەوە.
هەر بۆخۆی قەدەغەكردنی ئەم بڵاوكراوانەی وەك «ئەستێرە» و «دەفتەری كوردەواری» بەڵگەی ئەوەن كە نووسینەكان ئەگەرچی ئاماژە یان بە سیاسەت ‌و حزبایەتی نەكردووە، بەڵام لەخزمەتی هۆشیاریی نەتەوایەتی ‌و چینایەتیدا بوون، عەرشی رژێمی حوكمڕانی ئەو سەردەمەی هێناوەتە لەرزین، بۆیە هەوڵیانداوە بەرلەوەی سەرئێشەی زیاتریان بۆ بخولقێنێت، بێدەنگی بكەن ‌و نەهێڵن زیاتر خۆر ببینن ‌و خۆشی وەك خۆرێكی گەشاوە تیشكەكەی رێگای نەوەی خوێندەوارو رووناكبیری ئەو سەردەمە رووناكتر بكاتەوە.
چاپكردنەوەو دووبارە هێنانەوە بەرباسی ناوەڕۆكی ئەو بڵاوكراوانەو جزوبەندكردنی لە دووتوێی كتێبێكدا جگە لەوەی ئەركێكی رووناكبیرانەو كوردپەروەرانەیە، سەرەتاو هاندانێكیشە بۆ خەڵكانی دیكە تا بتوانن هەموو ئەو بڵاوكراوەو نووسراوانەی كەوتوونەتە گۆشەی بیرچوونەوە یان كەوتوونەتە ژێر تەپوتۆزی مێژووەوە یاخود مقەستی رەقیب رێگەی لە بڵاوكردنەوەو درێژە پێدانی گرتووە، سەرەڕای هەموو ئەوانەش دیكۆمێنتكردنی مێژووی رۆژنامەنووسی ‌و رووناكبیریمانە.
نەشدەكرا گرنگیی ئەم هەوڵەی مامۆستا جەمال خەزنەدار هەروا بەبێدەنگی ‌و پەنهانی تێپەڕێت، بۆیە ساڵۆنی كوردستانی نوێ لە رۆژی یەكشەممە 9/9/2018 بەپێویستی زانی كۆڕێك بۆ ناساندنی كتێبەكەو دابەشكردنی بە ئیمزای مامۆستا جەمال خەزنەدار رێكبخات.

سەرنووسەر: هەموو لایەك بەخێربێن بۆ ئەم بۆنەو رێوڕەسمە كە تایبەتە بە ناساندن ‌و دابەشكردنی كتێبی «دەفتەری كوردەواری».
كۆڕی ئەمڕۆمان لەسەر ناساندن ‌و دابەشكردنی كتێبی «دەفتەری كوردەواری» كە لە مێژووی رۆژنامەگەریی كوردی ‌و رووناكبیریی كوردی رۆڵی گرنگی گێڕاوە.
دەفتەری كوردەواری ئەوەی لە بیرەوەریی ئێمەدا ناسراوە، سێ ژمارەی لێ دەرچووە، ئەمڕۆ ئەم كۆششەی مامۆستا جەمال خەزنەدار كردوویەتی، ژمارەیەكی دەفتەری كوردەواریی تێدایە كە ژمارە چوارەمە‌و تائێستا بڵاونەكراوەتەوە.
وەك كوردستانی نوێ شانازیی دەكەین بە چاپكردنەوەی ئەم بیرەوەرییەی رۆژنامەگەریی كوردی كە لەڕاستیدا وابڕیاربوو لەمانگی نیساندا بڵاوبكرێتەوە، بەڵام لەبەرئەوەی كەمپین-ی هەڵبژاردن بۆ ئەنجومەنی نوێنەرانی عیراق هەبوو لەو مانگەدا، لەگەڵ مامۆستادا وا رێككەوتین كە ئەو بڵاوی بكاتەوە.
«دەفتەری كوردەواری» ئەوە دەهێنێت وەك دیارییەكی هەموو كوردستان بناسێنرێت ‌و نەخرێتە كەمپینی هەڵبژاردنەوە، بەڵام دواجار هەروا كەوتەوە، لەبەرئەوەی مامۆستا تێیدا سەفەری كرد.
ئەم بەرهەمە دووەم كۆششی مامۆستایە لەگەڵ كوردستانی نوێدا، گۆڤاری ئەستێرە كە گۆڤارێكی گرنگی بواری رۆژنامەگەریی منداڵان بوو، بەشێكی وێستگەی سیاسیی گەلی كوردبوو، ئەو هۆكارانەی ئەم گۆڤارەی بەداخستن دا، هەمان ئەو هۆكارانە بوون كە رێگربوون لەوەی كێشەی كورد لە كوردستان چارەسەر بكرێت.
گۆڤاری ئەستێرە هەرچەندە گۆڤارێكی منداڵانە بوو، بەڵام ئەو شانازییەی بەردەكەوێت كە وەك گۆڤارێك، بەشێك بوو لە خەباتی رزگاریخوازی گەلی كورد. ئەو گۆڤارە كاتی خۆی كوردستانی نوێ چاپی كردنەوەو بە كۆششی مامۆستا جەمال خەزنەدار كۆكرایەوە، دیسان ئەویش سێ ژمارە بوو، بەڵام ژمارە سێیەمی بڵاونەكرابووەوە، بەڵام كوردستانی نوێ لەگەڵ ژمارەی یەكەم ‌و دووەمدا چاپی كردەوە،
ئەم كۆكراوەیەی دەفتەری كوردەواری-ش بەهەمان شێوە ژمارەی چوارەمی تێدایە كە 48 ساڵ پێش ئێستا ئامادە كرابوو، بەڵام وا ئێستا بڵاو دەكرێتەوە.
ئێمە دەستخۆشیی لە مامۆستا دەكەین كە ئەو شەرەفەی پێبەخشین كە ئەو دوو وێستگە گرنگەی رۆژنامەگەریی كوردی بڵاوبكەینەوە، هیوادارم مامۆستا باسێكی گۆڤارەكەتان بۆ بكات ‌و بە واژۆی خۆی كتێبەكەتان پێشكەش بكات.
جەمال خەزنەدار:
خوشك‌و برایانی بەڕێز، خۆم بە خۆشحاڵ دەزانم لەگەڵ هەڵبژاردەی نووسەر‌و هەڵبژاردەی كوردی شاری هەڵمەت ‌و قوربانی پێكەوە قسە بكەین‌و بیرەوەرییەكانی ساڵی پەنجاكانتان بۆ بگێڕمەوە كە ئێمە چ هەوڵ ‌و كۆششمان داوە بۆ فراوانكردنی بیروباوەڕی كوردایەتی. دەمەوێ هەندێك باسوخواستان بۆ گێڕمەوە كە یەكەم دەیگێڕمەوە‌و خزمەتێكی گەورەی مێژووی ئەدەبی و رۆژنامەگەریی كوردی دەكات،
-لە كودەتا رەشەكەی 8ی شوباتی ساڵی 1963دا، تا ساڵی 1970 ‌و تا بەیاننامەی 11ی ئاداری ساڵی 1970 لە عیراق ‌و كوردستانی باشووردا بە دەگمەن گۆڤارێك یان رۆژنامەیەك ‌و بڵاوكراوەیەكی كوردیی لە گۆڕێدا بوو، یان هەر دەكرێت بڵێین نەبوو، لەبەرئەوە ئێمە بیرمان لەوە كردەوە كە پڕۆژەی «دەفتەری كوردەواری» لەبەر نەبوونی رۆژنامەو گۆڤار لەساڵی 1970دا بێنینە مەیدانی رۆژنامەگەریی كوردی، بەئامانجی ئەوەی كۆمەڵە نووسینێكی ئەدەبی ‌و زانستی ‌و فیكریی كوردی رێگەی ئامانجی كوردایەتی ئەمڕۆ ‌و سبەینێمان بە پرشنگی بیری نوێ رووناك بكاتەوە‌و بە روخسارێكی نەتەوەیی ‌و ناوەڕۆكێكی مرۆڤایەتی خۆی بنوێنێ.
هەر واش بوو، ژمارە (1) یەك كە لە كانوونی دووەمی 1970دا دەرچوو، نووسەرانی ئەم ژمارەیە بۆئەوەی بەراوردێك بكەن لەنێوان نووسەرانی ئەو رۆژگارە و ئەمڕۆ كە 48 ساڵ پێش ئێستا بوو.
ئەحمەد خواجە، د. ئەحمەد عوسمان، د. ئیحسان فوئاد، ئیسماعیل رەسوڵ،د. پاكیزە رەفیق حیلمی، جەمال بابان، جەمال خەزنەدار، حەمید عوسمان، ساڵح حەیدەری، شێركۆ بێكەس، د. عیزەدین مستەفا رەسوڵ، د. قەناتی كوردۆ، د. مارف خەزنەدار، شێخ محەمەدی خاڵ، محەمەد مەولود، مستەفا ساڵح كەریم، موكەڕەم تاڵەبانی، د. نەسرین فەخری.
كە ژمارە (1) یەك لە چاپخانە تەواو بوو، (10) ژمارەم بردە ژووری كاكم «مارف خەزنەدار» ژمارەیەكی هەڵگرت، هەڵگێڕ‌و وەرگێڕی كرد‌و هەستا ماچی كردم‌و وتی: «دەستخۆش، بەڵام پێم ناڵێی كەی واز لە رەنگی سوور دەهێنیت؟». منیش ئەم شیعرەم بۆ هات، «رەنگی كەسك ‌و زەرد‌و سوورم بۆیە خۆشدەوێ، چونكە ئاڵای كوردستانی لێ دەردەكەوێ».
پاشان ژمارە (2) لە مانگی مارت ‌و نیسانی ساڵی 1970 بە نووسینی ئەم نووسەرانەی خوارەوە بوو: د. ئیحسان فوئاد، ئیسماعیل رەسوڵ، د. پاكیزە رەفیق حیلمی، جەمال خەزنەدار، حسێن عارف، د. حسێن عەلی مەحفووز، شوكور مستەفا، شێركۆ بێكەس، شێرۆ موفتی، عاسم حەیدەری، كاكەی فەلاح، د. مارف خەزنەدار، مەسعوود محەمەد، محەمەد ئەمین عوسمان، محەمەد رەسوڵ هاوار، محەمەد ساڵح دیلان، محەمەد مەولود «مەم»، محەمەدی مەلا كەریم، مومتاز حەیدەری، نوری شێخ جەلال، نوری عەلی ئەمین.

  
پاش بڵاوبوونەوەی ژمارەی دووەم لە وەزارەتی راگەیاندنی عیراق بەڵێنیان پێماندا كە دەفتەری كوردەواری، ببێتە گۆڤارێكی رەسمی ‌و بە خاوەنایەتی ‌و سكرتێری نووسین جەمال خەزنەدار‌و سەرنووسەری د. مارف خەزنەدار گۆڤارەكە دەبێت .
ژمارە (3) مان دەركرد، بەیانی بەڕێوەبەرایەتیمان كرد‌و بە نووسینی ئەم بەرێزانەی كە بەشداربوون بڵاوكرایەوە كە بریتی بوون لەم بەڕێزانە :
د. موكەڕەم تاڵەبانی، محەمەد مەولود «مەم»، ع.ع. شەونم، جەمال بابان، عەبدولمەجید عەبدولڕەحمان، جەمال نوری، ئەحمەد خواجە، د. مارف خەزنەدار، د. سەڵاحەدین ئەلمونجید، سادق بەهادین، كەریمی حوسامی، ئەحمەد غەفور، س.ع. شادمان، ئەحمەد دڵزار، د. پاكیزە رەفیق حیلمی، شێخ محەمەدی خاڵ، عومەر مارف بەرزنجی، پرۆفیسۆر قەناتی كوردۆ، جەمال خەزنەدار، مستەفا ساڵح كەریم، د. نوری تاڵەبانی، كەریم شارەزاو شێخ مارف بەرزنجی.
ژمارە (4) ی دەفتەری كوردەواری دەبوایە لە مانگی تەممووز‌و ئابی ساڵی 1970 بڵاوبكرایەتە‌وە، بەڵام نەكرا، وا بەهیممەتی رۆژنامەی كوردستانی نوێ ‌و مامۆستای بەڕێز ستران عەبدوڵڵا پاش 48 ساڵ نووسەرانی ژمارە (4) ئەم بەڕێزانەی خوارەوەن:
رەفیق سابیر، شێخ محەمەدی خاڵ، د. ئیحسان فوئاد، سەعید ناكام، عومەر مارف بەرزنجی، عەبدوڵڵا پەشێو، د. نەسرین فەخری، مەجید ئاسنگەر، محەمەد حەمە باقی، ج. داراغایی، ساڵح عەلی گوللی، جەمال نوری، عەزیز گەردی، فاروق حەفید زادە، تاهیر ساڵح سەعید، كەریمی حوسامی و ئیسماعیل رەسوڵ.
لەسەرەتادا ئەمە كارێكی قورس بوو پێمان بكرێت، ئەو هەموو كەسایەتییە جۆراوجۆرانە جیاوازییان هەیە لە بیركردنەوە ‌و بۆچوون ‌و نووسین‌و هەڵوێستدا، لەسەر لاپەڕەكانی «دەفتەری كوردەواری» دا كۆبكەینەوە، بەڵام هیمەتی میوان ‌و سووربوون لەسەر بەجێگەیاندنی هیوا‌و ئامانج رێگر نییە بۆ ئەم هەڵوێستەی ئێمە دەستمان پێكرد.
ئێستاش من حەزدەكەم كاك مستەفا نووسێنێكی خۆی پێش 50 ساڵ پێش ئێستا بەراورد بكات، ئێمە چاوپێكەوتنەكەمان چۆنە، لە زمان ‌و هەموو شتێكی كوردەواریی، سوپاسی دەكەم ئەگەر بێت و بابەتەكە بخوێنێـتەوە.
مستەفا ساڵح كەریم:
من دەمەوێت هەندێك شت بڵێم، پەیوەندیی بە نیزامەوە هەبوو، بەڵام بابڵێین خەوبوو. بابڵێین خەو بوو، تازە تەلەفزیۆن دانرابوو لە كەركوك، شاری سلێمانی كەوتبووە هەڵپەی تەلەفزیۆن كڕین بە قەرز‌و بە ناوماڵ فرۆشتن ‌و بە گەلێك هۆ هەژار‌و دەوڵەمەند پەلەی ئەوەی بوو تەلەفزیۆن پەیدابكات، بە رۆژیش خەڵكی هەر باسی (هەنبەكە) ‌و (بنت الحتە) یان دەكرد،
پوورە هەمینیش كە ماڵیان لەپشت سەددەكەوە بوو، لە گەڕەكی مەڵكەندی كردبوو بە خوو، هەموو شەوێ منداڵە وردیلەكانی كوڕەزاكانی دائەنا بۆ ئامادەكردنی وانەكانیان ‌و نووسینەوەی مەشقەكانیان تا نزیك سەعات نۆی شەو، ئەمجا كە لێئەبوونەوە، كۆی ئەكردنەوە‌و هەر شەوەی چیرۆكێكی بۆ ئەگێڕانەوە تا خەویان لێ ئەكەوت بۆئەوەی ناوی تەلەفزیۆن نەبەن، ئەگینا ناچار ئەبێ ئەو چەند سەر ماڵاتەی كە هەیەتی بیفرۆشێت‌و بۆیان بدات بە تەلەفزیۆن.
ئاخ خۆ لە كڕینیش نایەت، چووە بە قوڕا، تەنانەت فرۆشیارەكانی شار كۆنەی بەغداشیان بەسەر ئەم خەڵكەدا ساغ كردەوە بە نرخێكی زۆر گران»، هەر لەبەرئەوەی ژنان نەڵێن یا تەلەفزیۆن یاخود سێ بەردە»، بەڵام سەرفرازین پوورە هەمین مناڵەكانی بە چیرۆكە خۆشەكانی فریودا بوو، ئەمەیان زۆر بەلاوە خۆشتر بوو لە باسی» موعەلیم زەكی».
****
شەوێ لە شەوانی ئەو زستانە بەفرێكی زۆر باری بوو، دنیا سارد بوو، كەم كەس توانای ئەوەی هەبوو دەرگا بكاتەوە‌و بێتەدەرێ، دنیا كش‌و مات بوو، دەنگ نەئەهات لە هیچ لایەكەوە، جگە لەشەو تەقە نەبێ ئەویش وەك شەوچەرەی لێ هاتبوو، خەڵكەكە لەگەڵی راهاتبوون، وردیلەكان لە گۆی ئاگردانەكە كۆبوونەوە‌و روویان كردە پوورە هەمین‌و وتیان:
-نەنە گیان! دەی چیرۆكێكمان بۆ بگێڕەرەوە.
نەنەش دەستی برد بۆ قوتوە جگەرەكەی ‌و زەلێكی لێ دەرهێنا ‌و چەند جارێك كۆتای بە پشتی قتوەكەدا‌و بە پشكۆی ناو ئاگردانەكە دایگیرساندبوون، منیش چوومە لایانەوە، وەستام، ئافرەتێ لە خوارەوە ‌و وتی:
-لە شارێك بووم، بەیانی هاتمە دەرەوە بچم بۆ بازاڕ، قەڵەباڵغییەكم دی راوەستابوون، منیش چوومە لایانەوە وەستام، ئافرەتێ لەخوار خەڵكەكەوە بوو لێم پرسی:
-ئەوە بۆ راوەستاون؟
پوورێ گیان ئەوە بۆ پاس راوەستاوین، بمان بات بۆ لای سەراوە، بڕوا بكە ئەوە نیو سەعاتە وەستاوین، ئەگەر بەپێ بڕۆیشتینایە دەمێك بوو گەیشتبووین».
سەرتان نەیەشێنم-كوڕە شیرینەكانم- پاش ماوەیەكی زۆر پاسە سوور بە لەنجە‌ولار هات‌و هەموومان سوار بووین، هەر خۆتێخزاندنێك بوو، لەم كاتەدا كابرایەكی هەژاری رووتەڵە سەركەوت، لەگەڵ جابی ناو پاسەكەدا لێیان بوو بە مشتومڕ لەسەر پارەی بلیتەكە، سۆندی ئەخوارد كە هیچی پێ نییە، لەگەڵ ئەوەشا نەمدی كەسێ دەست بەرێ پارەكەی بۆ بدات، كابرایان بە تەكان كردە خوارێ، ئەوەندەی پێ نەچوو ئەفەندییەكی سوورفلی لچ پان سەركەوت، سێ چوارێك كەوتە سوێند خواردن لەسەر ئەوەی هەریەكەیان ئەیەویست ئەو پارەی بلیتەكەی بۆ بدات، ئەمە لەكاتێكا كە هەمووشیان ئەیانزانی كە ئەم گیرفانی ئاوساوە لە پارەدا‌و هەژارەكەش بۆسۆی لێ هەڵئەستا ، پاس كەوتە جووڵان و سەیرمكرد تۆپی ئاسمانی ڕیزكراوە نە یەكێكە‌و نە دووان ‌و نە دە ‌و نە بیست، هەموو لوولەكانیان رووی كراوەتە ئاسمان ‌و چاوەڕێی تەقاندنن، بەراستی زۆر ترسم لێ نیشت، لە ژنەكەی تەنیشتم پرسی:
-ئەرێ ئەم تۆپانە چین؟
-وا دیارە تۆ غەریبی! ئەمانە تۆپ نین، عەرەبانەی نەوتن ‌و ریز كراون.
كە ئاوڕم دایەوە بەملادا لە پەنجەرەی پاسەكەوە بینیم ژن ‌و پیاوو گەورە‌و مناڵ پاڵەپەستۆیانە بە تەنەكە‌و گاڵۆن ‌و بەرمیلەوە بۆ نەوت وەرگرتن، هەرایەك بوو هەر مەپرسن، یاخوا نەیبینن، كاتێ پاسەكە لە نزیك سەراوە وەستا، ئافرەتەكەی تەنیشتم دابەزی ‌و رووی لێ نام‌و وتی: پوورێ گیان، مادام غەریبی بۆ لەگەڵ من دانابەزی ‌و لەگەڵما بێیتەوە ماڵی خۆمان، باشە، پوورێ بەقوربانت بێ، ئافرەتێكی باش دیاری، خۆ هەر ئەم شەویشم ماوە لەم شارە، لای تۆ بەسەری ئەبەم.
ئیتر بە جووتە دابەزین ‌و چووینە بەر دوكانێك پسوڵەیەكی دەرهێنا‌و پیشان دوكاندارەكەی دا وتم:خوشكەلێ ئەوەچی بوو؟
-ئەوە بیتاقەی شەكر‌و چایە، لێرە بە بیتاقەیە،بەڵام چ وەرگرتنێك؟ ناعیلاجی نەبێ چایەكەی بەكەڵك نایەت، ئەوەندە تاو تووی پێ كراوە.
دوای وەرگرتنی شەكر‌و چاكە پێكەوە گەڕاینەوە بەرەو ماڵی ژنەكەی هاوەڵم، لە رێگا تووشی ئافرەتێك بووین بە ژنەكەی هاوڕێی وت:عوزار خان چۆنی؟ چاكی، ئەوە دیار نیت.
ئیتر گفتوگۆ ‌و راز‌و گلەیی، ژنەكە زۆر بێزار بوو، لە كوڕە گەورەكەی ‌و ئەیوت: بڕوات بێ ئەم مانگە هیچمان بۆ نەماوەتەوە، ئازادم بە زۆر دەستێ بەرگی پێ كردووین پانتۆڵەكەی وەك تیرۆك وایە، چاكەتەكەی دوو قڵیشی گەورەی تا بن باخەڵی هاتووە (16) دیناری تێ چووە لەم بێ دەرەتانییەدا، خۆزگە لە قوتابخانەكەشی باش ‌و گوێرایەڵ بوایە، یان دەرس ‌و دەوری خۆی بە باشی ئامادە بكردایە‌و بە وتەی مامۆستاكانی هەڵسایە‌و دانیشتایە، خوا نەكات، هەر ئەوەندە ئەزانی دێتەوە كتێبەكانی فڕێ ئەدات‌و نانەكەی ئەخوات‌و دەست بە خۆیا ئەهێنێ‌و لەگەڵ دووان سیانێكی وەك خۆیا ئەكەونە كۆڵانان‌و بەر دوكانان، نازانین چی بكەین، عوزارخان بە دەستییەوە گیرمان خواردووە. دوابەدوای سكاڵا سەرپێیەكەی ئەو ئافرەتە، لێك جیا بووینەوە، ئەوەندە نەڕۆیشتین كە تووشی ئافرەتێكی مناڵكار بووین، ساوایەكی بە باوەشەوە بوو، دوای چاك‌و چۆنی وتی:
ئەم مناڵەم نەخۆشە لەو پەڕی دنیاوە هێناومە بۆ خەستەخانە، سەعاتێك راوەستاوم تا نۆرەكەم بەر كەوتووە، ئینجا 25 فلسیان لێ سەندووم ‌و پسووڵەیەكیان دامێ ‌و خۆم گەیاندە بەر ژووری دەرمانەكە، بەهەر حاڵ شتكە بەم شێوەیە دەڕوات با سەرتان نەیەشێنم. هەموو كێشەكانی ناوشار ئەم ژنانە لە بەینی خۆیان باسیان كرد. بابڵیین خەو بوو زۆر سوپاستان دەكەم.
سەرنووسەر :
دەستخۆش مامۆستا، پێش ئەوەی مامۆستا كتێبەكەمان بۆ ئیمزا بكات، هەركەس پرسیارێك یان بیرەوەرییەكی لەگەڵ ئەم گۆڤارەدا هەیە باسی بكات، بەداخیشەوە ئەو كەسانەی كە نووسینیان هەیە، زۆریان وەفایان كرووە، رۆحیان شادبێت.
رەهبەر سەید برایم:
دەستان خۆشبێت، دەبوو ناوی نووسەرەكانتان بنووسایە، گۆڤاری گەلاوێژ ژیاننامەی هەموو نووسەرەكانیان نووسیووەتەوە، دەبوایە ئێوەش ناوی نووسەرەكانتان بنووسایەیەتەوە.
جەمال خەزنەدار :
بەڕاستی ئێمە تەنها مەبەستمان ئەوەبوو ئەم دەفتەری كوردەوارییە كە سێ ژمارەی لێ دەرچوو، ژمارە چواریشی هەیە، بەفراوانی باسی دەفتەری كوردەواریمان نەكردووە، ئەوە پێویستی بە دیراسەیەكی ورد هەیە، سێ ژمارەكەی پێشوو دەرچووە بەئاگاداریی حكومەت بوو، تەنها مەبەستمان ژمارەی چوارەم بووە.
ئەحمەد حسێن:
دەستخۆشیت لێدەكەم بۆ ئەم ئیشە جوانە، ئایا ناوی «دەفتەری كوردەواری» كامتان داتان نا، ئایا پڕۆژەیەكتان بەدەستەوەیە بۆ چاپكردنەوەی بەشێوەیەكی مۆدیرنانە؟
جەمال خەزنەدار:
لە ڕاستیدا «دەفتەری كوردەواری» دكتۆرێكی عەرەب بابەتێكی دوورو درێژی نووسیبوو كە دەفتەر لە چییەوە هاتووە، چ میللەتەكانی دوینا دەفتەر بەكاردێنن لە چوارچێوەی ئەوانەدا دەڵێت: «میللەتی كورد دەفتەر بەكاردێنن، ئێمەش ئەو ناوەمان دانا».
رەئوف حەسەن:
بیرەوەرییەكی كورتە، پەیوەندیی بە گۆڤاری ئەستێرەوە هەیە، ژمارە سێ تیراژەكەی 12 هەزار بوو، دەستی بەسەرداگیرا، نوسخەیەكی نابێ دەرچێ لەگەڵ كاك جەمال چوین بۆ چاپخانەكەو لەگەڵ پۆلیسەكاندا دەستی بە قسەكردن كردو مەشغوڵی كردن ‌و من 300 نووسخەیەم لێ خستە ژێر قەنەفەكەوە، منیش بەهەمان شێوە پولیسەكانم مەشغوڵكردو كاك جەمالیش 300 نوسخەی خستە ژێر قەنەفەكەوە، دوایی باقیەكەیان برد بۆ بەسرە كردیان بە هەویر، ئەو 600 نوسخەیەشمان نارد بۆ ئەوروپا ‌و كوردستان ‌و شارەكانی تر لە فەوتاندن پاراستمان.
جەمال خەزنەدار:
با هەندێك بیرەوەریی «دەفتەری كوردەواری»تان بۆ بگێڕمەوە، دكتۆر ئیحسان سەرنووسەری ئەستیرە بوو، گۆڤارێكی منداڵان بوو، من سكرتێری نووسین بووم، ژمارەی (1) تەواو بوو، ژمارە (2) ئامادەكرابوو، لە وەزارەتەوە فەرمانێك دەرچووبوو وتی نابێ ئەو ژمارە (2) ە، بڵاوبكرێـتەوە، دوای من چووم بۆلایان، باسی گۆڤارەكەم بۆ كردن، وتیان كێ سەرنووسەرە؟ وتم دكتۆر ئیحسان، دوایی ئەویان خانەنشینكرد، بە منیان وت ئەو ئەستیرەیە نابێـت بڵاوبكرێتەوە، من یەكەم كەس دەچوومە چاپخانەكان، ئیتر بەو شێوەیە بوو ژمارە (3) لای من بوو، هاتم بۆ لای كاك ستران، وتم وەك خۆی بۆمان چاپ بكەنەوە، گۆڤارێكی دەگمەنە بۆ منداڵان كە نووسەری بەتوانا نووسین بنووسێـت بۆ منداڵان.
كەمال شاڵی:
جەنابت وتت لەوكاتە رۆژنامە درەنەدەچوو، بەڵام لە ساڵی 1968 لە سلێمانی رزگاریی دەردەچوو، خوالێخۆشبووان نەوشیروان مستەفا ‌و شازاد سائیب سەرپەرشتیان دەكردو رۆڵێكی گرنگیان هەبوو.
جەمال خەزنەدار:
من پڕۆژەیەكی گەورەم هەیە، بەداخەوە كەس ئاوڕم لێ ناداتەوە، پێنچ هەزار رۆژنامەی كوردیم كۆكردۆتەوە، 15 بەرگە، كەس نایەت بڵێت با چاپی بكەین، من چی بكەم، پارەم نییە، ژمارە 1 یان سەندیكای رۆژنامەنوسان بڵاویان كردەوە، گلەیی لە حكومەت بكەن، بڵێن خزمەتی رۆشنبیریی چۆن دەكەن؟.
شێخ محەمەد سۆڵەیی:
گۆڤارێكی ترمان هەبوو بەناوی زانیاریی، داوا دەكەم لە كوردستانی نوێ ئەو ئەركە بكێشن ئەو گۆڤارە زیندوو بكرێتەوە، ئەگەر بتوانن ئەوەش بخەنە سەر مەڵۆی كارەكانتان.
جەمال خەزنەدار:
مامۆستا من وتم پێنچ هەزار رۆژنامەم كۆكردۆتەوە، پەنجا ساڵە خەریكم گۆڤاری رزگاریی شەش ژمارەی هەیە، بۆتان ئامادەكەم، هی هەر چوار پارچەی كوردستان لە هەموو زەمەنەكان گۆڤارمان بڵاو كردۆتەوە.
مستەفا ساڵح كەریم:
دەستخۆشیت لێدەكەم كاك جەمال، ئەركەكانت لە «دەفتەری كوردەواری» گەیاند بە خوێنەران، یەكەم: قسەیەكم هەیە لەسەر قسەكانی كاك رەهبەر، خەڵك دوای پەنجا ساڵ نازانێ «ری بێ» كێیە، یان «ع .ع. شەونم كێیە، لەگەڵ ئەم بەرگە جوان ‌و چاپكردنەدا پاشكۆیەك هەبووایە لەسەر ئەو نووسەرانەی كە بەشدار بوون تیایدا. دووەم: حەزدەكەم بۆ مێژوو ئەوە بڵێم كاك جەمال ئەركێكی زۆری كێشاوە، كەس خۆی ناكات بە خاوەنی، من وەكو جێگری سكرتێری سەندیكای رۆژنامەنوسانی كوردستان لە سەندیكا توانیمان پارەیەكی باشی بۆ تەرخان بكەین، بەرگی یەكەممان چاپكرد، بۆ بەرگی دووەمیش 250 هەزار دینارمان بۆ تەرخانكرد لە بانقدا، بۆ بەرگی دووەم، بەڵام دوای ئێمە پارەكە تەفروتونا كرا، من 1964 لە زیندان ئازادكرام بە بڕیاری بەعس، ژین لە سلێمانی داخرابوو، هەتاو لە هەولێر داخراوە، من موبادەرەیەكم كرد بەهاوكاریی هاوڕێكانم، عەلی شەونم ‌و دیلان ‌و كامەران بەناوی قوتابخانەوە گۆڤارێكم دەركرد بەناوی رابەر، ئەمانتوانی هەناسەیەكی تیادا بدەین، «دەفتەری كوردەواری»یش یەكێك بوو لەو كتێبانەی هەناسەیەكمان تێدا داو سوپاستان دەكەم.
جەمال خەزنەدار:
هەر بۆ روونكردنەوەی بیرو بۆچوونەكانی مامۆستا خۆی بەڕاستی ژمارەی (1) یان دەركرد، دەستەی نوێ هات‌و ئینسكلۆپیدیا وەستاو چاپ نەكرا‌و پارەكە فەوتا.
سەرنووسەر:
لەبەر ئەوەی سەرۆكایەتی سەندیكا كەسیان لێرە نین، شوێنی راستەقینەی ئەم ئیشانە وەزارەتی رۆشنبیرییە، بەرنامەیەك هەبێت بۆ چاپكردنی رۆژنامەگەری كوردی، كتێب بابەتێكە ئەوەی زۆری خەڵك بەشداریی تێداكردووە، رۆژنامەیە، ئەوەی مامۆستا ئامادەیكردووە، زۆرن ‌و جێگەی دەستخۆشییە، فەرموو مامۆستا بۆ ئیمزاكردنی كتێبەكان ‌و خەڵاتێكیشمان بۆ مامۆستا هەیە‌و لەلایەن كاك رەهبەرەوە پێشكەشی دەكرێت زۆر سوپاس.

print

 71 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*