خورجە

ئیمرالی

1
كلیلی ئاشتی لە ئیمرالیە ، كێشەكە ئەوەی توركیا نایەوێت گوێی لەو راستیە بێت ، توركیا ئامادەیە مل بۆ بەردانی هاوڵاتیەكی وڵاتێكی تر بدات ، لێ‌ زیاتر لە 20 ساڵە هاونیشتمانیەكی وڵاتەكەی خۆی لە سەر داوای ئازادی لە نێو كەند و لەندەكانی ئیمرالی بەند كردووەو مافی سەردان و بینینیشی لێ‌ قەدەغە كردووە ، من دەزانم رۆژێك دێت ئینرالی دەچێتە نێو داستان و رۆمانی كوردی و جیهانیەوە ، هەرنا لە بەر ئەوەی لەوێ‌ زیندانی كراوێك سەدان لاپەڕەی لە پێناوی ئاشتی و ئازادی مرۆڤدا نووسیوە ، ئەو زیندانی كراوە ئاپۆیە كە رەنگە ئێستا لەبەر خۆیەوە گۆرانیەكی كوردی بچڕێت :
ئەسپەكەم بۆ زین كەن و بینێرنە ئیمرالی
هەموو ئەو دەستنوسانەتان بۆ دەنێرمەوە
لێی تۆقیون چی سوڵتانەو میرو والی
ئەسپەكە بنێرنە لای من
نامەیەكی پیادەنێرم بۆ دەمیر تاش
2
لەتەمەنی 18-19 ساڵیدا بووم لە چیرۆكێكی مناڵاندا بە نێو نیشانی ئازادی بەیتێكم نوسی بوو ، بەیتەكە بەو جۆرە بوو :
ئازادی بوكی جوانی رازاوە
ئازادی هیوای بەرەی چەوساوە
ئێستا هەمو مرۆڤایەتی بە هیوای خۆری ئازادبوونە كە لە ئیمرالیەوە تیشك، بە هەر چوار لادا باوێ‌ ، ئاپۆ ئیمرالی كردە دیرۆك و داستان ، ئەوە ئاپۆیە وێنەی شوێن پێكانی مەزڵوم دۆغان و محەمەد خەیری دورموش و كەمال پیرو هەزاران هەزار ئازادی خواز بۆ نەوەكانی ئایندە دەكێشێت ، كێشانی ئەو وێنانە بۆ شوێن پێهەڵگرتن و هەڵكشانە بەرەو لوتكە ئەوەی هێمنی شاعیر بە دەنگی بەرز دەیگوت « بەرەو بەرزی دەچم گەرچی وردم «.
3
تەنها رێگە بۆ دەرچون لە تەنگژە دیرۆكیەكەی توركیا ئاشتبوونەوەی كوردو توركە ، ئاشتبوونەوەی كوردو تورك بە مانای ملدانی دەسەڵاتی توركیا بە داوا ڕەواكانی كورد لە باكوری كوردستان ، گەر نا ئەمڕۆ نا سبەی رەنگە شتی ناجۆر تر ڕووبدەن ، بۆ ئەوەی كوردو تورك بە ئاشتی و بەیەكەوە بژین ، پێویستە دەرگای زیندانەكەی ئیمرالی بكرێتەوە و ئۆچئالان ئازاد بكرێت ، دەسەڵاتدارانی توركیا بە هێشتنەوەی ئاپۆ لە زیندان ، بە چارەسەر نەكردنی كێشەی كورد ، بردنەوەو مانەوەشیان لە سەر كورسی دەسەڵات جگە لە دۆڕان هیچی تر نیە .
رێگەیەكی دروست بۆ ئەوەی دەسەڵاتی ئێستا درێژە بە تەمەنی خۆی بدات و لە مێژووشدا ئازایەتیەكی بێوێنە تۆمار بكات ، ئەوەیەگۆشە گیری ئیمرالی كۆتا پێبێنێت و بگەڕێتەوە بۆ پرۆسەی ئاشتی لە لایەك و لە لایەكی دیكەشەوە وەك و یەك سەیری ئامەدو ئەستەنبوڵ بكات ، وەك یەك بەو مانایەی چی بۆ ئەستەنبوڵ دەكرێت بۆ ئامەدیش بە هەمان شێوە .

 286 جار بینراوە