سەرەکی » وتار » لەتیف فاتیح فەرەج‌ » ئاوایە رێگای عاشقان

خورجە

ئاوایە رێگای عاشقان

1
بە جێ‌ ماوم لە یاران نابەجێ‌ ماوم ئەجەل زووبە
بەمردن لەم قوسووری ژینەئیستیعفا نەكەم چبكەم
لە كۆڕەكەی رابەری سەید برایم لە بارەی بڵاوكراوەی رزگاریەوە، باسی چیرۆكی شەهید بونەكەی دكتۆر مەلاحەمیدو خۆسوتاندنی هاوسەرەكەی كرد، گوایە كاتی خۆی رزگاری بە قەڵەمی ئەو ئاماژەی پێداوە، گەڕام لە ژمارە 24ی رزگاری لاپەڕە 13بە بێ‌ ناوی نوسەر بە كورتی بە نێو نیشانی وەفاداری بابەتێك چیرۆكەكە باس دەكات،لێ‌ ئەوە تەواوی چیرۆكەكە نەبوو، من دەمێكە دەمەوێ‌ ئەو چیرۆكە وەك خۆی باس بكەم، لە گەڵ ئاسۆی برای شەهید دكتۆر حەمیدیش كاتی خۆی بەكورتی لەو بارەیەوە قسەمان كردبوو، چیرۆكی دكتۆر حەمیدو هاوسەرو مناڵەكەی یەكێكە لەتراژیدیا پڕ ئازارەكانی كورد، رەنگە نووسین هەرگیز لە توانایدا نەبێت ئەو چیرۆكە وەك خۆی باس بكات.
2
دكتۆر حەمید ساڵی 1958 هاتوەتە دنیاوە، پەیمانگای تەندروستی باڵای بەغدای خوێندوەو ساڵی 1981 بووە بە پێشمەرگە دوای سێ‌ ساڵ لە تەك پەخشان لەتیف چیمەنیدا هاوسەرگیری دەكات، لە شەوی 11-1-1987 لە كلكە سماق شەهید دەكرێت، یەك رۆژدوای شەهید بوونەكەی هاوسەرەكەی كچێكی دەبێت و نێوی دەنێن دیاری، دووڕۆژ دوای هاتنە دنیای دیاری كە پەخشان بە شەهید بوونی هاوسەرەكەی دەزانێ‌ خۆی دەسوتێنێ‌ و بە تەنیشت یەكترەوە لە مەرزیخە دەیاننێژن، تراژیدیاكە بەمە تەواو نابێت و رۆژی 12-4-1987 رێك سێ‌ مانگ دوای شەهید بوونی باوكی دیاری سێ‌ مانگە بە بۆردومانی فڕۆكە شەهید دەبێت و ئەویش لە نێوان دایك و باوكیدا دەنێژن، بەم جۆرە تراژیدیای عیق و ئومێد كۆتای دێت و حەمیدو پەخشان عیشق و ئەوین و مەرگەكەشیان زۆر لە عیشق و ئەوین و تراژیدیای لەیل و مەجنون و شیرن و فەرهاد مەزنترە، لێ‌ كەس نەبووە ئەم داستانە ورد ورد بنووسێتەوە.
3
قسە كردن و لەو ئەوینە بە م گۆشە بچوكە تەواو نابێت و من جاری تر دەگەڕێمەوە سەری ئەو باسە، ئەم كورتە نووسینە تەنها وەك هاندانێكە بۆ ئەوەی هەركێ‌ رابگات راستیەكان بنووسێتەوە، حەمیدو پەخشان هەر عیشق و ئەوینی یەكتر نەیسوتاندون، ئەوان عیشق و ئەوینی نیشتمان و ئازادیش هەڵیقرچاندون، ئەوە بۆیە ژیانی هاوسەرگیریشیان لە نێو تۆپ و خومپارەی دوژمندا دروستكردووە، ئەوان سور بە سور زانیویانە ئەم هێلانە دروستكردنە لە نێو ئاگردایە، بەڵام ئیدی « ئاوایە رێگەی عاشقان «.
بە نۆشی جانی وەردەگرم پیاڵەی زەهری هەر نێشێ‌
بە دەردی دڵ بچم گەر بێ‌ لە جەوری تۆ دڵم بێشێ‌
سڵاو لە مەحوی و نەمری بۆ حەمیدو پەخشان و دیاریەكەی خودا بۆیان.

 500 جار بینراوە