سەرەکی » دۆسێ » میراڵ ئه‌كشینار: ״ژنه‌ ئاسنینه‌״کەی‌ رەوتی توندڕەوی نەتەوەیی

تورکیا لەم شۆڤێنییەی کەم بوو

میراڵ ئه‌كشینار: ״ژنه‌ ئاسنینه‌״کەی‌ رەوتی توندڕەوی نەتەوەیی

دوای‌ چه‌ند مانگێك له‌ گه‌ڕان به‌شوێن ناوێك بۆ حزبه‌كه‌ و واده‌ی‌ راگه‌یاندنی‌، له‌ 25ی‌ تشرینی‌ یه‌كه‌می‌ 2017، حزبێكی‌ نوێ‌ له‌ توركیا دامه‌زرا كه‌ له‌لایه‌ن ژنێكه‌وه‌ سه‌ركردایه‌تی‌ ده‌كرێت.
میراڵ ئه‌كشینار په‌رله‌مانتاری‌ پێشووی‌ حزبی‌ بزوتنه‌وه‌ی‌ ناسیونالیستی‌ راسته‌ڕه‌و كه‌ سه‌ركردایه‌تی‌ حزبه‌كه‌ ده‌كات، دوای‌ ئه‌وه‌ی‌ هه‌موو هه‌وڵه‌كانی‌ شكستیهێنا بۆ سازدانی‌ كۆنگره‌ی‌ حزبی‌ بزوتنه‌وه‌ی‌ ناسیونالیستی‌ و هه‌ڵبژاردنی‌ سه‌ركرده‌یه‌كی‌ نوێ‌ له‌ بری‌ ده‌وڵه‌ت باخچه‌لی‌ سه‌ركرده‌ی‌ ئێستای‌ كه‌ پیاوێكی‌ به‌ساڵاچووه‌، ئه‌و هه‌نگاوه‌ی‌ هه‌ڵنا و حزبێكی‌ نوێی‌ دامه‌زراند.
ناكۆكی‌ نێوان ئه‌كشینار و باخچه‌لی‌ دوای‌ ئه‌وه‌ سه‌ریهه‌ڵدا كه‌ باخچه‌لی‌ له‌ ساڵی‌ رابردوودا پشتیوانی‌ خۆی‌ بۆ گۆڕینی‌ سیستمی‌ سیاسی‌ له‌ توركیا بۆ سیتمی‌ سه‌رۆكایه‌تی‌ ده‌ربڕی‌ و پشتیوانی‌ له‌ هه‌ڵوێستی‌ ره‌جه‌ب ته‌یب ئه‌ردۆغان كرد كه‌ له‌ئێستادا به‌ سه‌ركرده‌ هه‌ره‌ به‌هێزه‌كه‌ی‌ توركیا داده‌نرێت.
ئه‌كشینار له‌ ساڵی‌ 1996دا پۆستی‌ وه‌زیری‌ ناوخۆی‌ وه‌رگرتووه‌ و به‌شداریی‌ له‌ دامه‌زراندنی‌ پارتی‌ داد و گه‌شه‌پێدانی‌ فه‌رمانڕه‌وا كردووه‌، به‌ڵام به‌و هۆیه‌ی‌ كه‌ پێیوابووه‌ حزبه‌كه‌ درێژكراوه‌ی‌ حزبی‌ ره‌فاهی‌ ئیسلامییه‌ به‌ سه‌ركایه‌تی‌ نه‌جمه‌دین ئه‌ربه‌كان، ریزه‌كانی‌ ئه‌و حزبه‌ی‌ به‌جێهێشتووه‌ و چووه‌ته‌ ریزه‌كانی‌ حزبی‌ بزوتنه‌وه‌ی‌ ناسیونالیستی‌. به‌هۆی‌ دژایه‌تیكردنیشی‌ بۆ په‌یڕه‌وی‌ سه‌كرده‌ی‌ حزبه‌كه‌یشی‌ كه‌ پشتیوانی‌ بووه‌ له‌ ئه‌ردۆغان، له‌ ساڵی‌ 2016 له‌و حزبه‌ ده‌ركراوه‌.
ئه‌كشینار كه‌ به‌ «ژنه‌ ئاسنینه‌كه‌» ناوده‌برێت، له‌كاتی‌ راگه‌یاندنی‌ حزبه‌كه‌ی‌ كه‌ هه‌ڵگری‌ ناوی‌ «حزبی‌ خێر»ه‌ رایگه‌یاندبوو:»توركیا باش ده‌بێت له‌سایه‌ی‌ حزبه‌كه‌ی‌، و وڵات و گه‌له‌كه‌یشی‌ مانوو بوون. ده‌وڵه‌ت به‌ره‌و داڕمان ده‌چێت و سیستم نه‌ماوه‌ و هچ چاره‌سه‌رێك نییه‌ جگه‌ له‌ گۆڕینی‌ هه‌موو ژینگه‌ سیاسییه‌كه‌».
له‌نێوان ئه‌ندامه‌ دامه‌زرێنه‌ره‌كانی‌ ئه‌و حزبه‌ نوێیه‌، چوار په‌رله‌مانتاری‌ بزوتنه‌وه‌ی‌ ناسیونالیست و په‌رله‌مانتارێكی‌ حزبی‌ گه‌لی‌ كۆماری‌ ئۆپۆزسیۆنی‌ تێدایه‌.
وێڕای‌ ئه‌وه‌ی‌ زۆربه‌ی‌ ئه‌ندامه‌ دامه‌زرێنه‌ره‌كانی‌ حزبه‌كه‌ مێژوویه‌كی‌ دوورودرێژییان هه‌یه‌ له‌گه‌ڵ حزبی‌ بزوتنه‌وه‌ی‌ ناسیونالیستی‌، به‌ڵام ئه‌و حزبه‌ نوێنه‌رایه‌تی‌ هێڵی‌ مامناوه‌ندی‌ نه‌ته‌وه‌یایه‌تی‌ ده‌كات و ده‌یه‌وێت ده‌نگی‌ نه‌ته‌وه‌یی‌ و دیموكراته‌كان بۆخۆی‌ ده‌سته‌به‌ر بكات.
حزبی‌ خێر نه‌یتوانی‌ هۆڵێك یان هۆتێلێك له‌ ئه‌نقه‌ره‌ی‌ پایته‌خت به‌كرێ‌ بگرێت، ئه‌وه‌ش له‌به‌ر ترسی‌ خاوه‌ن هۆڵ و هۆتێله‌كان كه‌ نه‌بادا بگوترێت پشتیوانی‌ له‌ هه‌ڵوێستی‌ ئه‌و حزبه‌ ده‌كه‌ن، بۆیه‌ دامه‌زرێنه‌ره‌كانی‌ ناچاربوون گۆنگره‌ی‌ راگه‌یاندنی‌ دامه‌زراندنی‌ حزبه‌كه‌یان له‌ سه‌نته‌ری‌ «نازم حیكمه‌ت»ی‌ رۆشنبیری‌ سه‌ر به‌ حزبی‌ گه‌لی‌ كۆماری‌ ئۆپۆزسیۆن ساز بكه‌ن.
ئه‌كشینار له‌ وڵامی‌ ئه‌و دروشمانه‌ی‌ ده‌گوترانه‌وه‌ «میراڵ سه‌رۆك وه‌زیرانه‌»  رایگه‌یاندبوو كه‌ حزبه‌كه‌ی‌ و دامه‌زرێنه‌ره‌كانی‌ و دۆستانی‌ پێداگری‌ لێده‌كه‌ن تا له‌ هه‌ڵبژاردنی‌ داهاتووی‌ ساڵی‌ 2019، خۆی‌ بۆ پۆستی‌ سه‌رۆك كۆمار كاندید بكات.
چاودێران پێیانوایه‌، ئه‌كشینار رووبه‌ڕبوونه‌وه‌یه‌كی‌ راسته‌قینه‌یه‌ بۆ ئه‌ردۆغان، چونكه‌ جه‌ماوه‌ره‌كه‌ی‌ له‌ هه‌مان بنكه‌وه‌ سه‌رچاوه‌ی‌ به‌ستووه‌ كه‌ تێیدایه‌، ئه‌ویش توێژی‌ ده‌نگده‌ره‌ موحافیزكاره‌كان و لایه‌نگرانی‌ كه‌رتی‌ بازرگانی‌ و دیندار و نه‌ته‌وه‌ییه‌كانه‌.
هه‌روه‌ها دایه‌تیكردنی‌ توندیشی‌ بۆ پشتبه‌ستن به‌ سیستمی‌ سه‌رۆكایه‌تی‌ له‌ وڵات، هێنده‌ی‌ تر ئاستی‌ جه‌ماوه‌ریی‌ ئه‌و ژنه‌ی‌ به‌رزكردۆته‌وه‌، ته‌نانه‌ت له‌ نێوه‌ندی‌ حزبه‌كه‌ی‌ ئه‌ردۆغانیش كه‌ دژ به‌ سیستمی‌ سه‌رۆكایه‌تین له‌ توركیا.
به‌پێچه‌وانه‌ی‌ كه‌مال كڵیچدار ئۆغڵۆ سه‌ركرده‌ی‌ حزبی‌ گه‌لی‌ كۆماری‌ كه‌ نه‌یتوانی‌ بگاته‌ ئه‌و توێژه‌ی‌ له‌ ده‌ره‌وه‌ی‌ بازنه‌ی‌ بژارده‌ خوێنده‌واره‌كه‌ن له‌نێو شاره‌كان، ئه‌كشینار توانای‌ به‌زاندنی‌ بنكه‌ی‌ جه‌ماوه‌ریی‌ ئه‌ردۆغانی‌ هه‌یه‌ كه‌ ده‌یه‌وێت توركیا له‌سه‌ر بنه‌مای‌ نوێ‌ بنیاتبنێته‌وه‌.
سه‌روه‌ریی‌ یاسا
ئه‌كشینار له‌ ساڵی‌ 1956 له‌ دایك بوو، باوك و دایكی‌ له‌ ساڵۆنیكی‌ یۆنانه‌وه‌ هاتوونه‌ته‌ توركیا و هه‌ر زوو تێكه‌ڵ به‌ كاریی‌ سیاسی‌ بووه‌. هه‌ڵگری‌ بڕوانامه‌ی‌ دكتۆرایه‌ له‌ مێژوو، به‌ڵام وازی‌ له‌ كاریی‌ ئه‌كادیمی‌ هێنا كاتێك له‌ ساڵی‌ 1994 توانی‌ له‌ڕێی‌ حزبی‌ رێگه‌ی‌ راست كورسییه‌كی‌ په‌رله‌مان بباته‌وه‌.
دوای‌ چه‌ند ساڵێكی‌ كه‌م، پۆستی‌ وه‌زیری‌ ناوخۆی‌ له‌ حكومه‌ته‌كه‌ی‌ نه‌جمه‌دین ئه‌ربه‌كان له‌ ساڵی‌ 1996دا وه‌رگرت تا ئه‌و كاته‌ی‌ سوپا هاته‌ناوه‌وه‌ و له‌ڕێی‌ كوده‌تایه‌كی‌ نه‌رمه‌وه‌ له‌ ساڵی‌ 1997له‌ڕێی‌ ده‌ركردنی‌ ئاگاداركردنه‌وه‌ی‌ كۆتایی‌ بۆ حكومه‌ته‌كه‌ی‌ ئه‌ربه‌كان، حكومه‌تی‌ روخاند.
ئه‌كشینار له‌ دژی‌ هاتنه‌ناوه‌وه‌ی‌ سوپا بۆ نێو ژیانی‌ سیاسی‌ وه‌ستایه‌ و رووبه‌ڕووی‌ یه‌كێك له‌ جه‌نه‌راڵه‌كان بووه‌وه‌ كه‌ هه‌ڕه‌شه‌ی‌ لێكردبوو به‌ په‌رژینی‌ ئاسنینی‌ به‌رده‌م ئه‌نجومه‌نی‌ وه‌زیراندا هه‌ڵیبواسێت و له‌خاچی‌ بدات.
ئه‌كشینار ته‌ئكید له‌سه‌ر گرنگی‌ سه‌ره‌وه‌ریی‌ یاسا و پاراستنی‌ دامه‌زراوه‌كان و شوێنكه‌وتنی‌ رێكار و رێوشوێنه‌ یاساییه‌كان ده‌كاته‌وه‌. رونیشكردبۆوه‌ كه‌ ئه‌ردۆغان جیهان ته‌نیا به‌ دوو ره‌نگ ده‌بینێت كه‌ ئه‌ویش سپی‌ و ره‌شه‌، «به‌ڵام من له‌ روانگه‌ی‌ راست و هه‌ڵه‌وه‌ ته‌ماشای‌ سه‌روه‌ریی‌ یاسا ده‌كه‌م، من بڕوام به‌ سه‌روه‌ریی‌ یاسا هه‌یه‌».
مافی‌ ژنان
میراڵ ئه‌كشینار سه‌ركرده‌ی‌ حزبی‌ خێری‌ توركیا ره‌خنه‌ له‌ هه‌ڵوێستی‌ ئه‌ردغان ده‌گرێت به‌رانبه‌ر به‌ ژنان و ده‌ڵێت»ئه‌ردۆغان ده‌یه‌وێت ژینان له‌ ماڵه‌كانی‌ خۆیاندا بمێننه‌وه‌ و نه‌یه‌نه‌ ده‌ره‌وه‌».
له‌ ساڵی‌ 2007دا ئه‌كشینار له‌دوای‌ ده‌ساڵ له‌ دووركه‌وتنه‌وه‌ گه‌ڕیه‌وه‌ په‌رله‌مان، به‌ڵام له‌مجاره‌دا له‌ڕێی‌ لیستی‌ حزبی‌ بزوتنه‌وه‌ی‌ ناسیۆنالیستی‌ توندڕه‌و كه‌ ناوه‌كه‌ی‌ وابه‌سته‌ی‌ ساڵانی‌ حه‌فتای‌ سه‌ده‌ی‌ رابردووه‌ به‌ رێكخراوی‌ «گورگه‌ خۆڵه‌مێشییه‌كان» ناسیۆنالیسته‌ توندڕه‌وه‌كان كه‌ چه‌ندان تاوانیان دژ به‌ چالاكوانانی‌ كورد و چه‌په‌كانی‌ ئه‌و وڵاته‌ كردووه‌.
ئه‌كشینار دژ به‌و دانوستانه‌كانی‌ ئاشتی‌ چه‌ند ساڵی‌ رابردووی‌ حكومه‌ت بوو له‌گه‌ڵ پارتی‌ كرێكارانی‌ كوردستان و له‌و باره‌یه‌وه‌ ده‌ڵێت «یاسای‌ توركیا زه‌مانه‌تی‌ ته‌واوی‌ تێدایه‌ بۆ ده‌سته‌به‌ركردن و پاراستنی‌ مافی‌ كه‌مینه‌كان له‌ وڵات و پێداویستییه‌كانیان».
به‌ڵام له‌دژی‌ ده‌ستگیركردنی‌ په‌رله‌مانتارانی‌ كورد و زیندانیكردنیان وه‌ستایه‌وه‌ و ئه‌و هه‌نگاوه‌ی‌ له‌لایه‌ن ئه‌ردۆغانه‌وه‌ به‌ تۆقاندنی‌ كورده‌كان وه‌سفكرد، بۆیه‌ «په‌رله‌مانتارانی‌ كوردی‌ له‌ گرتوخانه‌كان قایم كرد به‌ر له‌ ئه‌نجامدانی‌ ریفراندۆم له‌سه‌ر سیستمی‌ سه‌رۆكایه‌تی‌» وه‌ك ئه‌كشینار ئاماژه‌ی‌ پێده‌كات.
ئه‌كشینار رووبه‌ڕووی‌ هه‌ڵمه‌تێكی‌ دڕندانه‌ بووه‌وه‌ له‌لایه‌ن میدیاكانی‌ سه‌ر به‌ ئه‌ردۆغان كه‌ له‌ مانگی‌ نیسانی‌ ساڵی‌ رابردوودا باسیان له‌ ژیانی‌ تایبه‌تی‌ كردبوو، هه‌روه‌ها رووبه‌ڕووی‌ هه‌ڕه‌شه‌ی‌ كوشتن بووه‌وه‌ و ئه‌و كاره‌یشی‌ به‌ هه‌وڵێكی‌ تیرۆریستی‌ له‌قه‌ڵه‌م دابوو، له‌و باره‌یه‌شه‌وه‌ ده‌ڵێت:»له‌ نیسانی‌ 2016وه‌ هه‌ڵمه‌تێكی‌ رێكخراویان له‌ دژم ئه‌نجامدا تا ناچارم بكه‌ن پاشه‌كشه‌ بكه‌م، به‌ڵام له‌و هه‌وڵه‌دا شكستخواردوو بوون».
ده‌ركردنی‌ له‌ حزبی‌ بزوتنه‌وه‌ی‌ ناسیونالیستی‌
له‌ 9ی‌ ئه‌یلولی‌ ساڵی‌ رابردوو، حزبی‌ بزوتنه‌وه‌ی‌ ناسیونالیستی‌ توركیا، میراڵ ئه‌كشینار له‌ ریزه‌كانی‌ حزبه‌كه‌ ده‌رده‌كات، خه‌لیل ئه‌ۆزتورك له‌و ده‌مه‌دا وه‌ك سه‌رۆكی‌ لیژنه‌ی‌ ته‌مێكردنی‌ ناوه‌ندی‌ حزبی‌ بزوتنه‌وه‌ی‌ ناسیونالیست، ده‌ركردنی‌ «میراڵ ئه‌كشینار» ده‌ركه‌وتووترین كاندیده‌كانی‌ سه‌رۆكایه‌تی‌ حزبه‌كه‌ی‌ راگه‌یاند، ئه‌وه‌ش وه‌ك ئۆزتورك ئاماژه‌ی‌ پێكردبوو، به‌پێی‌ بڕیارێك بووه‌ كه‌ به‌ كۆی‌ ده‌نگ په‌سه‌ند كراوه‌.
وه‌ك رۆژنامه‌ی‌ حورییه‌تی‌ توركیاش له‌و ده‌مه‌دا باسی‌ كردبوو»حزبی‌ بزوتنه‌وه‌ی‌ ناسیونالیستی‌ بڕیاریدا به‌ ده‌ركردنی‌ ئه‌كشینار به‌شێوه‌یه‌كی‌ كۆتایی‌ له‌ حزب، ئه‌و بڕیاره‌ش له‌ڕێی‌ ده‌نگدانێكی‌ نێنییه‌وه‌ بووه‌ له‌نێو ئه‌ندامانی‌ بزوتنه‌وه‌ی‌ ناسیونالیستی‌».
له‌نێوان ئه‌و تۆمه‌تانه‌ی‌ رووبه‌ڕووی‌ ئه‌كشینار كرابوونه‌وه‌ و بوونه‌ مایه‌ی‌ ده‌ركردنی‌ له‌ حزبی‌ بزوتنه‌وه‌ی‌ ناسیونالیستی‌ وه‌ك لیژنه‌ی‌ ته‌مێكردنی‌ ناوه‌ندی‌ حزبه‌كه‌ ئاماژه‌ی‌ پێكردبوو»زیان گه‌یاندن بووه‌ به‌ یه‌كێتی‌ و هه‌ماهه‌نگی‌ حزب، ناپابه‌ندبوون به‌و بڕیارانه‌ی‌ له‌لایه‌ن ئیداره‌ی‌ حزبه‌وه‌ ده‌رده‌كرێن، زیان گه‌یاندنی‌ مه‌عنه‌وی‌ به‌ سه‌ركرده‌ و كارگێڕه‌كانی‌ حزب، پێشێلكردنی‌ به‌كارهێنانی‌ مافه‌كانی‌ ئه‌ندامبوون».
رۆژنامه‌ی‌ حورییه‌ت ئاماژه‌ی‌ به‌ بوونی‌ هه‌ندێك تۆمه‌ت كردبوو له‌نێو دۆسێكه‌ی‌ ئه‌كشینار كه‌ پێشكه‌ش به‌ لیژنه‌ی‌ ته‌مێكردن كرابوون و باسیان له‌ پشتیوانیكردن له‌ ئه‌كشینار ده‌كرد له‌لایه‌ن نه‌یارانی‌ حزبه‌كه‌. به‌ڵام ئه‌كشینار لای‌ خۆیه‌وه‌ و له‌ به‌یاننامه‌یه‌كی‌ نوسراودا كه‌ له‌دوای‌ بڕیاری‌ ده‌ركردنی‌ له‌ حزبی‌ بزوتنه‌وه‌ی‌ ناسیونالیستی‌ بڵاویكردبۆوه‌ ده‌ڵێت»دۆسێی‌ ده‌ركردنه‌كه‌ی‌ ره‌وانه‌ی‌ دادوه‌ریی‌ ده‌كات».
هه‌ر له‌ به‌یاننامه‌كه‌دا رایگه‌یاندبوو:»بڕیاری‌ ده‌ركردنم له‌ حزبی‌ بزوتنه‌وه‌ی‌ ناسیونالیستی‌ سه‌باره‌ت به‌ خۆم هیچ بنه‌مایه‌ی‌ نییه‌، ئه‌و بڕیاره‌ له‌لایه‌ن ئیداره‌یه‌كه‌وه‌ ده‌ركراوه‌ كه‌ هیچ بونێكی‌ له‌ ویژدانی‌ گه‌لی‌ توركیادا نییه‌».
ئامانجی‌ روخاندنی‌ ئه‌ردۆغانه‌
حزبی‌ خێر كه‌ له‌لایه‌ن میراڵ ئه‌كشیناره‌وه‌ سه‌ركردایه‌تی‌ ده‌كرێت و له‌ 25ی‌ تشرینی‌ یه‌كه‌مدا خۆی‌ راگه‌یاند، ئامانجی‌ سه‌ره‌كی‌ كۆتایهێنانه‌ به‌ حوكمڕانی‌ پارتی‌ داد و گه‌شه‌پێدان و ره‌جه‌ب ته‌یب ئه‌ردۆغان كه‌ له‌ئێستادا جگه‌ له‌وه‌ی‌ سه‌رۆكی‌ وڵاته‌كه‌یه‌، وه‌ك به‌هێزترین سه‌ركرده‌ی‌ سیاسی‌ له‌و وڵاته‌دا ده‌رده‌كه‌وێت.
حزبه‌كه‌ له‌ ساڵی‌ 2002وه‌ جڵه‌وی‌ سه‌ركردایه‌تی‌ توركیا و حكومه‌تی‌ توركیای‌ به‌ده‌سته‌وه‌یه‌، وێڕای‌ ئه‌وه‌ی‌ چاكسازییه‌كی‌ گه‌وره‌ی‌ له‌ ئابوریی‌ توركیادا كردووه‌ و له‌ هه‌وڵی‌ گۆڕینی‌ ئاراسته‌ی‌ وڵاته‌كه‌دا له‌ خۆرئاواوه‌ به‌ره‌و خۆرهه‌ڵات، به‌ڵام له‌ ناوخۆ و ده‌ره‌وه‌ی‌ ئه‌و وڵاته‌دا رووبه‌ڕووی‌ ره‌خنه‌یه‌كی‌ زۆر بووه‌ته‌وه‌ و سه‌باره‌ت به‌ هه‌ندێكیش، «كاتی‌ ئه‌وه‌ هاتووه‌ گۆڕانكاریی‌ له‌ حوكمڕانی‌ توركیادا بكرێت و قۆناغی‌ (ئاكه‌په‌) له‌و وڵاته‌دا كۆتایی‌ بێت».
میراڵ ئه‌كشینار له‌ڕێی‌ دامه‌زراندنی‌ حزبه‌ نوێیه‌كه‌ی‌ «حزبی‌ خێر»، ته‌نیا چاوی‌ له‌ گرتنه‌ده‌ستی‌ جڵه‌وی‌ حكومه‌تی‌ داهاتووی‌ توركیا نه‌بڕیوه‌، بگره‌  وه‌ك خۆی‌ له‌ كاتی‌ راگه‌یاندنی‌ حزبه‌كه‌یدا ئاماژه‌ی‌ پێكردووه‌»ده‌یه‌وێت له‌ هه‌ڵبژاردنی‌ سه‌رۆكایه‌تی‌ 2019دا خۆی‌ بۆ پۆستی‌ سه‌رۆكایه‌تی‌ كۆمار بپاڵێوێت».
له‌پاش ریفراندۆمه‌كه‌ی‌ مانگی‌ نیسانی‌ رابردوو كه‌ تێیدا زۆرینه‌ به‌ «به‌ڵێ‌» ده‌نگیدا و له‌پێناو هه‌مواركردنی‌ ده‌ستوری‌ وڵاته‌كه‌ ئه‌نجامدرا، لێوه‌ی‌ سیستمی‌ سیاسی‌ توركیا له‌ سیستمی‌ په‌رله‌مانییه‌وه‌ ده‌گۆڕێت بۆ سیستمی‌ سه‌رۆكایه‌تی‌، سه‌رۆك كۆماریش له‌ داهاتوودا ده‌سه‌ڵاته‌كانی‌ زیاتر ده‌بێت و قۆناغێكی‌ نوێ‌ له‌ مێژووی‌ سیاسی‌ توركیادا له‌ پاش هه‌ڵبژاردنی‌ داهاتووی‌ ئه‌و وڵاته‌ كه‌ بڕیاره‌ له‌ ساڵی‌ 2019دا سازبكرێت، ده‌ستپێده‌كات.
print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شیكاری سەربازیی: كەركوك‌ و ئەوەی دەتوانرا رزگار بكرێ

پەیڤێک ماوەیەکی زۆرە قسەوباسی بێ مانا و ناڕەوا لە بارەی ...