سەرەکی » راپۆرت » دیكتاتۆره‌كان چۆن له‌ سزا ده‌رباز ده‌بن؟

دیكتاتۆره‌كان چۆن له‌ سزا ده‌رباز ده‌بن؟

ساسه‌ پۆست
و: كورده‌وان محه‌مه‌د سه‌عید

له‌ ساڵانی‌ حه‌فتاكان‌و هه‌شتاكانی‌ سه‌ده‌ی‌ رابردوودا چه‌ند رژێمێكی‌ دیكتاتۆری‌ سه‌ركوتگه‌ر فه‌رمانڕه‌وایی وڵاتانی‌ وه‌ك ئه‌رجه‌نتین، چیلی‌، ئۆرۆگوای‌‌و به‌رازیلیان ده‌كرد. به‌ پێی‌ راپۆرتێكی‌ فۆرین ئه‌فێرز، كه‌ به‌م دواییانه‌ بلاو كراوه‌ته‌وه‌، دیكتاتۆره‌كانی‌ ئه‌و وڵاتانه‌ به‌ پشتیوانی‌ ئه‌مریكا چوونه‌ته‌ سه‌ر كورسی‌ ده‌سه‌ڵات‌و ئه‌مریكا پێی‌ وابوو ده‌توانن ببنه‌ شورای‌ قه‌ڵا‌و به‌ربه‌ستێكی‌ باش بۆ رێگرتن له‌ بڵاوبوونه‌وه‌ی‌ سۆشیالیزم. دیكتاتۆره‌كان رووخان‌و هه‌ندێك له‌و وڵاتانه‌ دوای‌ رووخانی‌ دیكتاتۆره‌كه‌یان لیژنه‌ی‌ تایبه‌تیان پێكهێنا بۆ سزادانی‌ هه‌ر به‌رپرسێك كه‌ مافی‌ مرۆڤی‌ پێشێل كردبێت، به‌وه‌ش توانیویانه‌ رابردووی‌ پڕ له‌ ئازار به‌ڕێ بكه‌ن‌و ژیانی‌ نوێ ده‌ست پێبكه‌ن، به‌ڵام به‌رازیل وای‌ نه‌كرد، لیژنه‌ی‌ پێكهێنا‌و لێپرسینه‌وه‌شی‌ له‌گه‌ڵ كه‌س نه‌كرد، راپۆرته‌كه‌ی‌ فۆرین ئه‌فێرز ئاماژه‌ به‌وه‌ ده‌كات، نه‌بوونی‌ لێرسینه‌وه‌‌و ده‌ربازبوونی‌ پێشێلكارانی‌ مافی‌ مرۆڤ وای‌ كردووه‌ له‌ 2018دا كه‌سێك ده‌سه‌ڵات بگرێته‌ ده‌ست كه‌ پشتیوانی‌ له‌ ئه‌شكه‌نجه‌دان‌و دیكتاتۆریی ده‌كات، ئه‌و كه‌سه‌ش جایر بۆلسۆنارۆ-ی‌ سه‌رۆكی‌ به‌رازیله‌ كه‌ كه‌سێكی‌ راستڕه‌وی‌ تونڕه‌وه‌.
حوكمی‌ دیكتاتۆریی به‌رازیل له‌ ساڵی‌ 1964وه‌ تا ساڵی‌ 1985ی‌ خایاند، له‌و ماوه‌یه‌دا ده‌سه‌ڵات به‌ ئاگر‌و ئاسن وه‌ڵامی‌ ئۆپۆزسیۆنی‌ ده‌دایه‌وه‌، هه‌زاران كه‌سی‌ ئه‌شكه‌نجه‌ دا‌و 475 كه‌س كوژران‌و بێسه‌روشوێن كران. له‌ ئه‌رجه‌نتینیش حكومه‌تی‌ دیكتاتۆری‌ له‌ ساڵه‌كانی‌ نێوان 1976 بۆ 1983دا پازده‌ هه‌زار كه‌سی‌ كوشت، زۆربه‌ی‌ ته‌رمه‌كانی‌ له‌ گۆڕی‌ به‌ كۆمه‌ڵی‌ نهێنیدا شارده‌وه‌‌و ته‌رمی‌ هه‌ندێك له‌ كوژراوه‌كانیشی‌ به‌ فڕۆكه‌ له‌ ئاسمانه‌وه‌ فڕێ ده‌دایه‌ خواره‌وه‌ بۆ ناو زه‌ریای‌ ئه‌تڵه‌سی‌. به‌ڵام جیاوازییه‌كه‌ له‌وه‌دا بوو حكومه‌تی‌ ئه‌رجه‌نتین دوای‌ رووخانی‌ دیكتاتۆر زۆر له‌ به‌رپرسانی‌ حكومه‌تی‌ دیكتاتۆری‌ دادگایی كرد‌و خستنییه‌ كونجی‌ زیندانه‌وه‌.
له‌ چیلی‌ ژه‌نه‌ڕاڵ ئۆگستۆ پینۆشێ- دیكتاتۆری‌ ئه‌و وڵاته‌ له‌ نێوان ساڵه‌كانی‌ 1973 بۆ 1990دا نزیكه‌ی‌ سێ هه‌زار كه‌سی‌ كوشت‌و نزیكه‌ی‌ 35 كه‌سیشی‌ ئه‌شكه‌نجه‌ دا، به‌ڵام حكومه‌ته‌كانی‌ دوای‌ خۆی‌ لیژنه‌یان پێكهێنا بۆ لێكۆڵینه‌وه‌ له‌ راستییه‌كان‌و پێدانی‌ قه‌ره‌بوو به‌ كه‌سوكاری‌ كوژراوه‌كان‌و قوربانیان، له‌ ساڵی‌ 2003شدا لیژنه‌یه‌كی‌ تری‌ پێكهێنا بۆ ده‌سنیشان كردنی‌ ئه‌و قوربانیانه‌ی‌ ئه‌شكه‌نجه‌ دراون‌و له‌ كۆتاییشدا ئه‌وانه‌ی‌ مافی‌ مرۆڤیان پێشێل كردبوو دادگایی كران.
ئۆرۆگوای‌ به‌ هه‌مان شێوه‌ حاڵی‌ له‌ حاڵی‌ وڵاته‌كانی‌ تر باشتر نه‌بوو، نه‌یارانی‌ دیكتاتۆر زیاد له‌ ده‌ ساڵ رووبه‌ڕووی‌ رفاندن‌و بێسه‌رۆشوێنكردن‌و ئه‌شكه‌نجه‌دان بوونه‌وه‌، رووداوه‌كان له‌ ساڵه‌كانی‌ 1973‌و 1985دا بوو، به‌ڵام دوای‌ نه‌مانی‌ دیكتاتۆر دوو لێژنه‌ی‌ پێكهێنا، یه‌كێكیان راسته‌وخۆ دوای‌ نه‌مانی‌ دیكتاتۆر واته‌ له‌ ساڵی‌ 1985دا‌و ئه‌وی‌ تریان له‌ ساڵی‌ 2001دا.
هه‌رچه‌نده‌ وه‌ك گۆڤاره‌كه‌ ئاماژه‌ی‌ پێداوه‌، پێكهێنانی‌ ئه‌و لیژنانه‌ بیره‌وه‌ری‌ تاڵی‌ رابردوو ناسڕێته‌وه‌، به‌ڵام یارمه‌تیده‌ر ده‌بێت له‌ چه‌سپاندنی‌ چه‌مكی‌ دادپه‌روه‌ری‌‌و لێپرسینه‌وه‌ له‌ ناو ئه‌و كۆمه‌ڵگانه‌دا كه‌ ده‌یان ساڵیان له‌ ژێر ده‌سه‌ڵاتی‌ رژێمێكدا به‌سه‌ر بردووه‌ به‌ درۆ سیستمی‌ دیموكراسی‌‌و سه‌روه‌ری‌ یاسا بووه‌، هه‌روه‌ها یارمه‌تیده‌ر ده‌بێت له‌وه‌ی‌ كه‌سوكاری‌ قوربانیا‌و كوژراوه‌كان بتوانن رابردوو له‌بیر بكه‌ن.
به‌ گوێره‌ی‌ راپۆرته‌كه‌، ئه‌وانه‌ی‌ دوای‌ دیكتاتۆری‌ هاتنه‌ سه‌ر حوكم، ده‌ستبه‌جێ كه‌وتنه‌ جووڵه‌ بۆ ساڕێژ كردنی‌ برینه‌كان، به‌ڵام به‌رازیل ئه‌وه‌ی‌ نه‌كرد، لیژنه‌ی‌ پێكنه‌هێنا تا ساڵی‌ 2012 واته‌ دوای‌ سی‌ ساڵ له‌ رووخانی‌ ده‌سه‌ڵاتی‌ سه‌ربازی‌، به‌ر له‌ پێكهێنانی‌ لیژنه‌كه‌ش حكومه‌ت ته‌نها یه‌ك لێپرسینه‌وه‌ی‌ له‌ ته‌نها یه‌ك پێشێلكاری‌ مافی‌ مرۆڤ كرد كه‌ ساڵی‌ 1973 رووی‌ دابوو، ئه‌ویش ئه‌وه‌ بوو كه‌ ئه‌فسه‌رێك‌و هه‌شت سه‌رباز، چوار سه‌ربازیان ئه‌شكه‌نجه‌ دابوو، رووداوه‌كه‌ به‌و جۆره‌ بوو كه‌ ئه‌فسه‌ر‌و سه‌ربازه‌كانی‌ تر به‌ كێبڵ‌و قایش له‌و چوار سه‌ربازه‌یان دابوو، هه‌روه‌ها نینۆكیان ده‌رهێنابوون‌و كاره‌باشیان لێدابوون، دواتریش سه‌ریان پان كردبوونه‌وه‌. له‌ ساڵی‌ 1973دا له‌ هه‌مان ئه‌و سه‌ربازگه‌یه‌ كۆمه‌ڵێك تاوانی‌ كوشتن ئه‌نجام دراوه‌، به‌ڵام تا ئێستاش كه‌س سزا نه‌دراوه‌ به‌هۆی‌ ئه‌و تاوانانه‌وه‌.
له‌ به‌رازیل حاڵی‌ زیندانییه‌كان له‌ وڵاتانی‌ تر باشتر نه‌بوو، ئه‌وانیش به‌ چه‌ندان جۆر مافیان پێشێل ده‌كرا‌و ئه‌شكه‌نجه‌ ده‌دران، له‌ بابه‌تی‌ له‌كاره‌بادان‌و هه‌ڵواسین به‌ ده‌ست به‌ستراوی‌‌و زۆر شێوازی‌ تری‌ ئه‌شكه‌نجه‌، ساڵی‌ 1974 ژه‌نه‌راڵ ئه‌رنستۆ گێسه‌ڵ چواره‌م سه‌رۆكی‌ سه‌ربازی‌ به‌رازیل له‌وه‌ ترسا جه‌لاده‌كان‌و فه‌رمانده‌ سه‌ربازییه‌كانی‌ لێی‌ هه‌ڵگه‌ڕێنه‌وه‌، له‌به‌رئه‌وه‌ ده‌ستی‌ كرد به‌ چاكسازی‌ رژێم‌و ورده‌ ورده‌ سه‌ركوتكردن‌و سانسۆری‌ كه‌م كرده‌وه‌‌و ساڵی‌ 1979 حكومه‌ت هه‌ر له‌و چوارچێوه‌یه‌دا یاسایه‌كی‌ لێبوردنی‌ ده‌ركرد، به‌وه‌ش زیندانیانی‌ سیاسی‌ ئازاد كران‌و رێگه‌ش درا ئه‌ندامانی‌ ئۆپۆزسیۆن له‌ تاراوگه‌ بگه‌ڕێنه‌وه‌، به‌ڵام هه‌ر ئه‌و یاسایه‌ش بووه‌ هۆی‌ ئه‌وه‌ی‌ به‌رپرسانی‌ تاوان‌و ئه‌شكه‌نجه‌كانی‌ زیندان له‌ لێپرسینه‌وه‌ پارێزراو بن‌و یاساكه‌ش تا ئه‌مڕۆ كاری‌ پێده‌كرێت.
له‌ كۆتایی مانگی‌ ئاداری‌ 1985دا دیكتاتۆری‌ له‌ به‌رازیل كۆتایی پێهات، دوای‌ ئه‌وه‌ی‌ متمانه‌ی‌ ئابووری‌‌و سیاسی‌ له‌ده‌ست دا. دوای‌ ئه‌وه‌ش چالاكوانانی‌ بواری‌ مافی‌ مرۆڤ كتێبێكیان چاپ كرد به‌ ناونیشانی‌ (به‌رازیل بۆ هه‌تاهه‌تایه‌)، كتێبه‌كه‌ بۆ یه‌كه‌م جار په‌رده‌ی‌ له‌سه‌ر سه‌ركوتكارییه‌كانی‌ دیكتاتۆر هه‌ڵماڵی‌، بۆ ئه‌وه‌ش پشتی‌ به‌ ئه‌رشیفی‌ سوپا به‌ستبوو، ئه‌بره‌شیه‌ی‌ ساوپاولۆ-ش لیستێكی‌ بڵاو كرده‌وه‌ كه‌ ناوی‌ 444 جه‌لادیی‌ تێدابوو.
ئه‌و كتێبه‌ بووه‌ به‌ناوبناگترین كتێب له‌ مێژووی‌ به‌رازیلدا، وه‌ك له‌ پێشه‌كییه‌كه‌شیدا هاتووه‌، په‌رده‌ له‌سه‌ر واقیعێكی‌ تاریك هه‌ڵده‌داته‌وه‌، كه‌ ساڵانێكی‌ زۆر له‌ تاریكی‌‌و قوڵایی زیندانه‌كاندا شاراوه‌ته‌وه‌‌و واقیعێكه‌ تیایدا زیندانیانی‌ سیاسی‌ سه‌ركوت ده‌كرێن، به‌ڵام ئه‌م كتێبه‌ جێگه‌ی‌ لیژنه‌ی‌ به‌دواداچوونی‌ راستییه‌كان ناگرێته‌وه‌، هه‌ر له‌به‌ر ئه‌وه‌ش بوو نووسه‌رانی‌ كتێبه‌كه‌ سازشیان كرد به‌ یاسای‌ لێخۆشبوونه‌كه‌ی‌ به‌رازیل‌و رایانگه‌یاند، كه‌ پڕۆژه‌كه‌ی‌ ئه‌وان ئامانجی‌ ئه‌وه‌ی‌ نییه‌ ببێته‌ به‌ڵگه‌ تا له‌ دادگای‌ به‌رازیلدا به‌كار بهێنرێت‌و گه‌لی‌ به‌رازیلیش هان نادات بۆ تۆڵه‌سه‌ندنه‌وه‌.
گه‌لی‌ به‌رازیل له‌ ساڵی‌ 1994دا فێرناندۆ ئینریك كاردۆسۆیان هه‌ڵبژارد به‌ سه‌رۆك، نه‌یاری‌ سوپا بوو، ساڵی‌ 1976 سه‌نته‌رێكی‌ لێكۆڵینه‌وه‌كه‌ی‌ به‌ده‌ستی‌ كۆمه‌ڵێك تیرۆریستی‌ لایه‌نگری‌ دیكتاتۆری‌ ته‌قێنرایه‌وه‌، ئه‌م سه‌ركرده‌یه‌ دوای‌ گه‌یشتنی‌ به‌ ده‌سه‌ڵات لیژنه‌یه‌كی‌ پێكهێنا‌و لیژنه‌كه‌ به‌ ره‌سمی‌ دانی‌ به‌وه‌دا نا كه‌ كوشتن‌و بێسه‌روشوێنكردنی‌ سه‌دان كه‌سی‌ ئۆپۆزسیۆن له‌ ئه‌ستۆی‌ دیكتاتۆره‌، كه‌سوكاری‌ ئه‌و قوربانیانه‌شی‌ قه‌ره‌بوو كرده‌وه‌. دوای‌ ئه‌ویش گه‌لی‌ به‌رازیل له‌ ساڵی‌ 2003دا لویس ئیناسیۆ لۆلا داسیلڤایان هه‌ڵبژارد‌و تا ساڵی‌ 2011 حوكمی‌ كرد، باگراوه‌ندی‌ ئه‌م كه‌سایه‌تییه‌ش هاوشێوه‌ی‌ كاردۆسۆ بوو، له‌به‌ر ئه‌وه‌ی‌ له‌سه‌رده‌می‌ دیكتاتۆردا بۆ ماوه‌ی‌ مانگێك له‌ زینداندا بوو، ته‌نها له‌به‌ر ئه‌وه‌ی‌ به‌ ئاشكرا دژایه‌تی‌ خۆی‌ بۆ رژێم ده‌ربڕیبوو، ماوه‌ی‌ هه‌شت ساڵ لۆلا داسیلڤا نه‌یتوانی‌ شوێنی‌ شاردنه‌ی‌ ته‌نها یه‌ك ته‌رمی‌ قوربانیانی‌ ده‌ستی‌ دیكتاتۆریش بدۆزێته‌وه‌، له‌هه‌موو گرنگتر هه‌ردوو سه‌رۆكه‌كه‌، واته‌ كاردۆسۆ‌و داسیلڤا-ش بیریان له‌وه‌ نه‌كرده‌وه‌ یاسای‌ لێبوردن هه‌ڵبوه‌شێننه‌وه‌ كه‌ ئه‌و یاسایه‌ ببوه‌ قه‌ڵایه‌ك بۆ پاراستنی‌ پێشێلكارانی‌ مافی‌ مرۆڤ له‌ هه‌ر سزایه‌ك، هۆكاره‌كه‌یشی‌ پێده‌چێ ئه‌وه‌ بێت كه‌ نه‌یانویستبێ له‌گه‌ڵ سوپادا بكه‌ونه‌ كێشه‌وه‌.
وه‌ك ئه‌وان نه‌یانویست له‌گه‌ڵ سوپادا بكه‌ونه‌ كێشه‌وه‌، بزوتنه‌وه‌یه‌كی‌ ئاشكرا‌و راشكاوانه‌ی‌ فراوانیش له‌سه‌ر شه‌قام نه‌بوو كه‌ داوای‌ هه‌ڵوه‌شانه‌وه‌ی‌ یاسای‌ لێبوردن بكات، ته‌نها گروپی‌ بچووك بچووكی‌ سه‌ر به‌ رێكخراوه‌كانی‌ مافی‌ مرۆڤ هه‌بوون له‌گه‌ڵ كه‌سوكاری‌ قوربانییه‌كاندا‌و له‌ هه‌مان كاتدا لایه‌نگرانی‌ دیكتاتۆر به‌ ئاشكرا دژی‌ هه‌ڵوه‌شانه‌وه‌ی‌ یاساكه‌ وه‌ستانه‌وه‌، په‌رله‌مانی‌ ئه‌و وڵاته‌ش كاتێك ناڕه‌زاییه‌كی‌ فراوانی‌ دژی‌ یاساكه‌ نه‌بینی‌ له‌سه‌ر شه‌قام، به‌ پێویستی‌ نه‌زانی‌ هیچ هه‌نگاوێك بنێت. ساڵی‌ 2010 سه‌ندیكای‌ پارێزه‌رانی‌ به‌رازیل داوایان له‌ دادگای‌ باڵا كرد ئه‌و به‌شه‌ی‌ تایبه‌ته‌ به‌ پاراستنی‌ جه‌لاده‌كان له‌ سزا له‌ ناو یاسای‌ لێبوردندا هه‌ڵوه‌شێنێته‌وه‌، به‌ڵام دادگا داواكارییه‌كه‌ی‌ ره‌ت كرده‌وه‌.
زۆر دره‌نگ‌و له‌ ساڵی‌ 2012دا لیژنه‌ی‌ به‌دواداچوونی‌ راستییه‌كان له‌ به‌رازیل پێكهات، ئه‌ویش له‌سه‌رده‌می‌ سه‌رۆكایه‌تی‌ خاتو دیلما رۆسێف-دا، سه‌ره‌تا راپۆرتێك باسی‌ له‌وه‌ ده‌كرد كه‌ خودی‌ خاتو دیلما له‌ ساڵی‌ 1970دا وه‌ك كچێكی‌ ئۆپۆزسیۆن ده‌ستگیر كراوه‌‌و دوای‌ 22 رۆژ ئه‌شكه‌نجه‌ وه‌ك زیندانێكی‌ سیاسی‌ دوو ساڵ له‌ زینداندا ماوه‌ته‌وه‌، دوای‌ ئه‌م راپۆرته‌ لیژنه‌كه‌ راسپێردرا له‌ هه‌موو ئه‌و تاوانی‌ كوشتن‌و بێسه‌روشوێنكردنانه‌ بكۆڵێته‌وه‌، كه‌ له‌سه‌ر ده‌ستی‌ هێزه‌ چه‌كداره‌كان ئه‌نجام دراوه‌، به‌ڵام لیژنه‌كه‌ ده‌سه‌ڵاتی‌ ئه‌وه‌ی‌ نه‌بوو سوپا ناچار بكات به‌ڵگه‌كان بدات به‌ ده‌سته‌وه‌‌و شوێنی‌ ته‌رمه‌كان ئاشكرا بكات، پاشان سه‌رۆك دیلما-ش هه‌ر وه‌ك سه‌رۆكه‌كانی‌ پێش خۆی‌ له‌گه‌ڵ ئه‌وه‌دا نه‌بوو به‌ یاسای‌ لێبوردندا بچێته‌وه‌، بۆ ئه‌وه‌ی‌ له‌گه‌ڵ سوپادا نه‌كه‌وێته‌ كێشه‌وه‌.
40 ساڵه‌ یاسای‌ لێبوردن له‌ به‌رازیل پیاده‌ ده‌كرێت، ئه‌و یاسایه‌ی‌ پێشێلكارانی‌ مافی‌ مرۆڤ له‌ ناو سوپای‌ وڵاته‌كه‌دا له‌ سزادان ده‌پارێزێت، له‌و ماوه‌یه‌دا هیچ گفتوگۆیه‌كی‌ نیشتمانی‌ سه‌باره‌ت به‌ مافی‌ زه‌وتكراوی‌ قوربانییه‌كان نه‌كراوه‌، له‌به‌ر ئه‌وه‌ی‌ یاساكه‌ رێگره‌. پاولۆ دی‌ تارسۆ فانۆچی‌ وه‌زیری‌ پێشووی‌ مافی‌ مرۆڤی‌ به‌رازیل له‌و باره‌یه‌وه‌ ده‌ڵێ: هیچ بزوتنه‌وه‌یه‌ك یان جموجۆڵێكی‌ گه‌وره‌مان له‌ ناو كۆمه‌ڵگه‌دا نه‌ماوه‌ ئه‌و قسه‌ له‌سه‌ر رژێمی‌ سه‌ربازی‌ بكات. به‌ پێی‌ راپۆرته‌كان هۆكاری‌ ئه‌م قسه‌یه‌ ئه‌وه‌یه‌ كه‌ سوپای‌ به‌رازیل پێشێلكارییه‌كانی‌ مافی‌ مرۆڤ له‌ ئه‌ستۆ ناگرێت‌و تا ئێستاش سوپا باوه‌ڕی‌ به‌وه‌ نییه‌ كه‌ دیكتاتۆریی چه‌مكی‌ دیموكراسی‌‌و سه‌روه‌ری‌ یاسای‌ پێشێل كردبێت.
له‌به‌ر ئه‌م هۆكارانه‌ پێشێلكارییه‌كانی‌ مافی‌ مرۆڤ له‌ به‌رازیل به‌ره‌و له‌بیركردن ده‌چێت، راپۆرته‌كه‌ی‌ فۆرین ئه‌فێرزیش ئاماژه‌ بۆ ئه‌وه‌ ده‌كات، به‌ هه‌ڵبژاردنی‌ جایر بۆلسۆنارۆ هێنده‌ی‌ تر به‌رازیل به‌ره‌و دواوه‌ ده‌بات، به‌ تایبه‌ت كه‌ ئه‌م سه‌رۆكه‌ به‌ ئاشكرا بێزاریی خۆی‌ له‌ وه‌زاره‌تی‌ مافی‌ مرۆڤ ده‌ربڕی‌‌و داواشی‌ كردووه‌ كه‌ به‌رازیل له‌ چه‌په‌كان پاك بكرێته‌وه‌، كه‌واته‌ ئه‌و وڵاته‌ ئه‌گه‌ر هه‌نگاوی بچووك‌و له‌سه‌رخۆشی‌ هه‌بووبێت به‌ره‌و چه‌سپاندنی‌ دیموكراسی‌‌و مافی‌ مرۆڤ، ئه‌وا ئه‌ویش له‌به‌رده‌م هه‌ڕه‌شه‌دایه‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

كەركوك ‌و خانەقین؛ بەغدا و هەرێم دەخاتە جووڵەی بەپەلەوە

کوردستانی نوێ و یادگار عەلی: كێشە و ئاڵۆزییەكانی ناوچە دابڕێنراوەكان ...