سەرەکی » وتار » ستران عه‌بدوڵڵا » دەنگی گەلی كوردستان (بانگی هەق)ی شۆڕشی نوێ‌!

دەنگی گەلی كوردستان (بانگی هەق)ی شۆڕشی نوێ‌!

لە یادەكانی دەنگی گەلی كوردستان زۆرم نووسیوون، دوایینیان هەفتەی رابردوو بوو بە ناوی (ئێزگە) لە بەرواری (9/3/2019) بۆ یادی چل ساڵەش، وێڕای پیرۆزبایی، ئەم نووسینەم دووپات دەكەمەوە كە بیست ساڵ پێش ئێستا لە رۆژی (20/3/1999) بڵاوبۆتەوە.

*بەپێی ئەفسانە مێژووییەكە كاوەی ئاسنگەرو هاوەڵانی وا رێككەوتبوون دوای سەركەوتن بەسەر زوڵم‌و زۆری زوحاكدا بۆ جاڕدانی سەركەوتنەكە ئاگرێك لەچیاكاندا بكرێتەوە. بەمجۆرە ئاگركردنەوە لەچیاكانی كوردستان یەكەمین ئامڕاز‌و گوزارشتی راگەیاندنی كوردیی بوون.
بەپێی ئاماژەی ئەوانەش بێت كە یەك لەسەرچاوەكانی دیرۆكی پەیدابوونی راگەیاندن‌و میدیا بۆ سەردەمی جاڕدانی سەركەوتنەكانی شەڕ دەگێڕنەوە، كە وابێ‌ ئێمە دەتوانین ئاگركردنەوەی چیاكان بە سەرەتای راگەیاندنی شۆڕشگێڕانەی كورد بزانین. ئاگركردنەوە لەچیاكان راگەیاندنی سەركەوتنی كوردبوو لەكۆنترین‌و هەرە دێرینترین شۆڕشەكانی كوردستان كەدواتر نەورۆز بووە رۆژی نوێی ساڵێكی تازەو سەردەمێكی تازە.
لەسەردەمی نوێشدا ئێزگە دانان لەچیاكان مژدەی سەركەوتنی كوردبوو لەنوێترین شۆڕشی خۆیدا كەدواتر بە(شۆڕشی نوێی گەلەكەمان) ناسرا. رێككەوتیش نییە كە جاڕدانی (نەورۆزی) ئێزگەی شۆڕش هاوكات بێت لەگەڵ یادی نەورۆزی شۆڕشی دێرینی كوردان. ئێزگەی شۆڕش كە بیست ساڵ بەرلە ئەمڕۆو لە(21/3/1979)دا دامەزرا هەر لەرێكەوتی دامەزراندنەكەیدا دەردەكەوێ‌ ئێزگەیەكی دێرین‌و هاوچەرخ بووە بەومانایەی یەكەمین شۆڕش (شۆڕشی دێرینی كاوە)‌و دوا شۆڕش (شۆڕشی نوێ‌)-ی پێكەوە گرێداوە.
*سەروەرییەكانی دەنگی گەلی كوردستان زۆرن لەواری خزمەتكردنی كوردایەتی بەهەموو دەركەوتەكانییەوەو لەواری خزمەتكردنی گەلی كورد بەگشتی. لەواری كوردایەتییدا ئێزگە (بانگی هەق)ی شۆڕش بوو كە بەگوێی خەڵكی كوردستاندا درا. لەسەروەختێكدا كە دوژمن هەموو نوزەو دەنگی هەموو ناڕەزایەتییەكی لەخەڵكی بڕیبووئێزگە (نا)یەكی گەورەبوو بەڕووی زوڵم‌و زۆری راگوێزان‌و تەعریب‌و كورد قڕاندا، مینبەری ئازادانەی كورد بوو وەختێك كورد دەرفەتی نەبوو لەسیستمێكی تۆتالیتاری نەتەوەیی سەردەستدا بڵێ‌ ئەز هەم، چ جای ئەوەی قسەیەك، بیروبۆچوونێكی پێچەوانە بڵێت. ئێزگەی شۆڕش وتەبێژی سەربازیی سەركەوتنەكانی هێزی پێشمەرگەی كوردستان بوو لەسەروەختێكدا تەشكیلاتی پێشمەرگە لەبەر چەنگی پارتیزانی لەشوێنێكدا گرد نەدەكرانەوە، ئێزگە راكالی جفرەو نامەی ژوانی پێشمەرگانە بوو لەو رۆژەدا كە پێشمەرگە لەهێكرا دەردەكەوتن، زەبریان لەدوژمن دەوەشاندو لەچاوتروكانێكدا بزردەبوون. چەند پێشمەرگەی دلێر بەئومێدی ئەوەی ئێزگەكە لەكاروانی شەهیدانیدا ناویان بخوێنێتەوە حەزیان دەكرد شەرەفی شەهیدبوونیان پێ‌ ببڕێ‌‌و چەند پێشمەرگەی شەهیدیش لەڕێی جۆشدانی ئێزگەوە لەنەبەردییەكاندا تۆڵەیان بۆكرایەوە؟
*ئێزگەی شۆڕش نەتەنها ئێزگەی جۆشدانی ورەی پێشمەرگەو هاندانی خەڵكی كوردستان بوو. بەڵكو ئێزگە بۆ خۆی خوێندنگەیەكی هوشیاركردنەوە بوو بۆ شۆڕشگێڕان‌و كۆمەڵانی خەڵكی كوردستان. مەڵبەندێكی راستەوخۆی پێگەیاندنی خۆڕسكانەی كادیرو جەماوەر بوو لەو شوێنانەی كەمتر دەستی شۆڕشی دەگەیشتێ‌. ئێزگە هەروا كۆڕی داهێنانی چەندین وشەی جوان‌و رەسەنی كوردیی، چەندین زاراوەی نێو فەرهەنگی سیاسیی بوو لەسەردەمێكدا كورد زاراوەی سیاسیی كەم‌و توانای داڕشتنی رستەو ئاماژەی سیاسیی لەگەلێك بواردا كورتی دەهێنا. ئێزگە بۆخۆی سەرەڕای هەلومەرجی سەختی شۆڕش، هەوڵیداو لەو هەوڵەشدا تاڕادەیەك سەركەوتوبوو، ببێتە نیشتمانێكی ئاوەدان بۆ زمانێكی پاراو، لەو دەمەیدا بەغدا حەزی لێبوو زمانی كوردان بشێوێنێ‌ وەك چۆن لە تەقەلای شێواندنی كوردستان ‌و كوردەواریدا بوو.
واوەتریش ئێزگە مەڵبەندی پێگەیاندنی دەیان نووسەرو كادیری بەتوانای راگەیاندن بوو كەدواترو بەتایبەتی لەدوای ئەو راپەڕینەی ئێزگە دەوری لەجۆشدانیدا هەبوو، بەسەر كەناڵەكانی دیكەی راگەیاندنی یەكێتییدا دابەش بوون. لە ئێزگەی دەنگی گەلی كوردستانەوە نووسەرو كادیری موحتەریفی ئەوتۆ دەرچوون كەدواتر لەماڵە گەورەكەی راگەیاندنی یەكێتییدا درێژەیان بەداهێنان‌و رێگای لەمێژینی ئێزگەكەدا.
*لەبەرئەو هۆیانە هەمووی یادی بیست ساڵەی ئێزگەی دەنگی گەلی كوردستان، یادی جاڕدانی شۆڕشی نوێ‌و بیرەوەری ئەو شەهیدە نەمرانەیە كە ئومێدیان دەكرد ئێزگە بیانلاوێنێتەوە، لەبەرئەو هۆیانە هەمووی، یادی بیست ساڵەی ئێزگەكە رێزلێنانە لەتێكۆشانی هەموو ئەو هەڤاڵە دێرینانەی لەكاروانی ئێزگەدا رۆڵێكیان گێڕاوە. یادی ئەو هەڤاڵانەیە ئێزگەكەیان كڕی ‌و یادی ئەوانەیە ئێزگەكەیان هێنایە كوردستان، یادی ئەوانەیە شانە‌وشان‌و شاخەوشاخی كوردستان گێڕایان‌و لەچاوی پیسی دوژمنیان دەشاردەوە. یادی ئێزگە، بیرەوەری رۆژانی راپەڕینی 1991‌و رێزلێنانە لەو هەوڵ‌و تەقەلایانەی فەرهەنگی سیاسیی كوردیان بە چەندان وشەی جوان ‌و پاراو دەوڵەمەندكرد. یادی ئێزگە ڕێزلێنانە لەراگەیاندنی (ڕێبازی نوێ‌)ی شۆڕشی نوێ‌ كە شەرارەكەی بووە ئاگرێكی نەكوژاوەی نەورۆزو لەراپەڕینی كوردستانێكی نوێ‌دا (الاتحاد)و یەكەمین تەلەفزیۆنی كوردی‌و كوردستانیی هێنایە بوون.
*سڵاو لە ئێزگەی دەنگی گەلی كوردستان، سڵاو لەو هەڤاڵ ‌و لەو پێشمەرگانەی درێژە بەكاروانە دێرینەكەی (ئێرە دەنگی گەلی كوردستان)ە دەدەن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

مانشێت نەما!

مانشێت نەما رۆژنامەكان لەسەر پێكهێنانی حكومەت بیڵێن، سەپتایتڵ نەما تەلەفزیۆنەكان ...