سەرەکی » دۆسێ » 150 هەزار كەس لە باكووری خۆرئاوای سوریا ئاوارەبوون

«لەو ناوچانەدان رێكەوتنیان لەسەر كراوە»

150 هەزار كەس لە باكووری خۆرئاوای سوریا ئاوارەبوون

بەر لە دەستپێكردنی هێرشە وشكانییەكانی سوپای سوریا و هاوپەیمانەكانی بۆ سەر گروپە ئیسلامییەكان كە پارێزگای ئیدلیبیان كرۆتە مۆڵگەی خۆیان، تەوژمی ئاوارەبوون لەو پارێزگایە و ناوچەكانی دەوروبەری دەستیپێكردووە.
زیاتر لە 150 هەزار كەس لەم ماوەیەی دواییدا لە ناوچەكانی باكووری خۆرئاوای سوریا بەهۆی بۆردومانە چڕەكانی هێزەكانی حكومەت و روسیای هاوپەیمانی لە ناوچەكانی چوارچێوەی رێكەوتنی نێوان روسیا و توركیا بۆ هێوركرنەوە، ئاوارەبوون.
ناوچەكە لە كۆتایی مانگی رابردووەوە، رووبەڕووی بۆردومانێكی ئاسمانی چڕبۆتەوە، ئەمەش بەپێی نەتەوە یەكگرتووەكان بۆتە مایەی لەكاركەوتنی 12 دامەزراوەی پزیشكی و خاپوربوونی لانی كەم دە خوێندنگە، وێڕای كوژران و برینداربوونی دەیان كەس.
لە 30ی نیسانی رابردوو، 13 مەدەنی كە چوارییان ژن بوون و منداڵێكیش لەنێوانیاندا بوو، بەهۆی ئەو بۆردومانە چڕەی شارۆچكە و گوندەكانی ریفی ئیدلیب و ریفی حەممای باكووری گرتۆتەوە كوژراون، ئەمەش بەپێی ئامارێكی روانگەی سوریا بۆ مافەكانی مرۆڤ.
ئاژانسی دەنگوباسی رەسمی سوریا (سانا) بڵاویكردەوە»هێزەكانی سوپای سوریا ئۆپەراسیۆنەكانی لەو ناوچانەدا دەستپێكردووە كە گروپە تیرۆریستییەكان تێیدا بڵاوبوونەتەوە لە باشووری ریفی ئیدلیب و باكووری حەمما».
دایڤید سوانسۆن، وتەبێژی نوسینگەی نەتەوە یەكگرتووەكان بۆ كاروباری مرۆیی، بە (فرانس پرێس)ی راگەیاندووە»هەست بە نیگەرانی دەكەین بەرانبەر بەو راپۆرتانەی كە باس لە بەردەوامبوونی هێرشە ئاسمانییەكان دەكەن بۆسەر سەنتەری شارەكان و ژێرخانە مەدەنییەكان».
بەهۆی بۆردومانەكان بۆسەر باشووری ریفی ئیدلیب و باكووری حەمما، وەك نەتەوە یەكگرتووەكان باسی دەكات»زیاتر لە 152 هەزار ژن و منداڵ و پیاو بەرەو ناوچە ئارامەكانی تر ئاوارەبوون».
بە گوتەی پەیامنێری ئاژانسی (فرانس پرێس)، لە كۆتایی مانگی نیسانی رابردوو، دەیان ئۆتۆمبێل و بارهەڵگری بینیبوو كە ژن و منداڵانی تێدا بووە و لەگەڵ خێزانەكانیان لە باشووری ئیدلیبەوە بەرەو ناوچەكانی باكووری دەرۆیشتن. ژمارەیەكیش لە ئاوارەكان، بە تراكتۆر و گالیسكە كشتوكاڵییەكانیان، ئاژەڵەكانیان دەگواستەوە».
دەستەی تەحریری شام (بەرەی نوسرەی پێشوو) لەگەڵ گروپە جیهادییەكانی تر، دەستییان بەسەر ئیدلیب و چەند بەشێكی تری پرێزگاكانی: حەلەب (باكوور) و حەمما (ناوەند) و لازقیە (خۆرئاوا)دا گرتووە.
ناوچەكە تا رادەیەك هێوربوونەوەی بەخۆوەبینیوە، لەو دەمەی مۆسكۆ هاوپەیمانی دیمەشق و ئەنقەرە كە پشتیوانی لە ئۆپۆزسیۆن دەكات رێكەوتنی سوچیان لە مانگی ئەیلولی رابردبوو ئیمزا كرد كە لێوەی ناوچەیەكی «داماڵدراو لە چەك) دامەزرا كە ناوچەكانی ژێر دەسەڵاتی هێزەكانی حكومەتی دیمەشق و ناوچەكانی ژێردەسەڵاتی گروپە ئۆپۆزسیۆنەكان لەیەكتر جیادەكاتەوە.
رێكەوتنەكە تائێستا بەتەواوەتی جێبەجێنەكراوە. دیمەشق ئەنقەرە بە خاویی لە جێبەجێكردنیدا تۆمەتبار دەكات.
ئیدلیب و دەوروبەری كە نزیكەی سی ملیۆن كەس لەخۆدەگرن، لەڕێی رێكەوتنی سوچییەوە لە هەڵمەتێكی سەربازی فراوان بەدوورگیراون كە دیمەشق بەردەوام هەڕەشەی بەرپاكردنی دەكات. بەڵام هێزەكانی سوپای سوریا لە مانگی شوباتەوە بۆردومانێكی چڕییان بۆسەر ناوچەكە دەستپێكردووە، و پاشان فڕۆكەكانی رووسیاش دەستییان بە هێرشكردنە سەر ناوچەكە كرد.
لە دوای ئیمزاكردنی رێكەوتنەكە، تەوژمی بۆردومانەكان گەیشتوونەتە ئاستێكی بێ‌ پێشینە، ئەمەش بەپێی روانگەی سوریا بۆ مافەكانی مرۆڤ.
نەتەوە یەكگرتووەكان دەڵێت، لانی كەم 12 فەرمانگەی تەندروستی رووبەڕووی هێرشی ئاسمانی بونەتەوە.
هەروەها بۆردومانەكان بونەتە مایەی خاپوركردنی لانی كەم 10 خوێندنگە لە هەمان ماوەدا، ئەمەش چالاكی پەروەردەیی لە ناوچەكەدا پەكخستووە.
ئەنتۆنیۆ گۆترێش، سكرتێری گشتی نەتەوە یەكگرتووەكان، لە بەیاننامەیەكدا هەموو لایەنەكانی هانداوە، رێز لە یاسا نێودەوڵەتییەكان بگرن و مەدەنییەكان بپارێزن، داواشی لە هەموو لایەنە ناكۆكەكان كردبوو، رێز لە رێوشوێنەكانی ئاگربەست بگرن كە لە سوچی دیاریی كران.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

گەشتی کوردستانی نوێ بۆ وڵاتی چین و ماچین

دووەم گەشتم بۆ وڵاتی چین ئەردەڵان عەبدوڵڵا ماوەی 12 ساڵە ...