سەرەکی » مانشێت » دەبێت هەڤاڵانی یەکێتی ئەرکی خۆیان لە خەباتی چیانیەتیدا لە بیرنەکەن و خەباتەکەیان لە خزمەتی رەنجدەرانی بیروبازووشدا پەرەپێبدەن

دەبێت هەڤاڵانی یەکێتی ئەرکی خۆیان لە خەباتی چیانیەتیدا لە بیرنەکەن و خەباتەکەیان لە خزمەتی رەنجدەرانی بیروبازووشدا پەرەپێبدەن

خوشك ‌و برایانی خۆشه‌ویست
كرێكاران ‌و ره‌نجده‌رانی بیروبازوی كوردستان
به‌سڵاوێكی گه‌رمه‌وه‌ پیرۆزبایی جه‌ژنی كرێكارانی دنیاتان لێ ده‌كه‌م.
به‌هه‌لێكی له‌باری ده‌زانم كه‌ به‌بۆنه‌ی یه‌كی ئایاری جه‌ژنی كرێكارانی دنیاوه‌، پیرۆزبایی گه‌رم و گوڕی ی.ن.ك و خۆمتان پێشكه‌ش بكه‌م به‌ ئێوه‌ی ره‌نجده‌رو خه‌باتگێڕ‌و هه‌م به‌ ئێوه‌ی ره‌نجده‌رو خه‌باتگێڕ‌و هه‌م به‌هه‌موو كۆمه‌ڵانی خه‌باتگێڕی خه‌ڵكی كوردستان.
چه‌نكه‌ له‌ راستیدا ، جه‌ژنی یه‌كی ئایار هه‌ر جه‌ژنی كرێكاراتن به‌ مانا نوێیه‌كه‌ی واته‌ پرۆلیتاریا نییه‌، به‌ڵكو جه‌ژنی هه‌موو ره‌نجده‌رانی بیروبازووی كورده‌واریشه‌، بگره‌ بۆته‌ جه‌ژنی هه‌موو كۆمه‌ڵانی خه‌باتگێڕی خه‌ڵكیش، واته‌ جه‌ژنێكی چینایه‌تی- نیشتمانیی-شه‌، هه‌روه‌ك جه‌ژنێكی چینایه‌تی هه‌موو كرێكارانی سه‌رتاسه‌ری دنیاشه‌، واته‌ جه‌ژنێكی نێونه‌ته‌وه‌یی-شه‌.
چینی کرێکار لای ئێمە کێ دەگرێتەوە؟
به‌ كوردیی په‌تی، پێویسته‌ له‌سه‌ر هه‌موو كرێكاران ‌و ره‌نجده‌رانی بیروبازوو به‌تایبه‌تی و هه‌موو كۆمه‌ڵانی خه‌ڵك به‌گشتی ئه‌م جه‌ژنه‌ پیرۆزه‌ به‌جه‌ژنی خۆیان بزانن ‌و یادی بكه‌نه‌وه‌، زه‌ماوه‌ندی بۆ بگێڕن ‌و كۆڕو كۆبوونه‌وه‌ی بۆ ببه‌ستن، سیمینارو باس‌و لێكۆڵینه‌وه‌ی له‌سه‌ر سازده‌ن سه‌باره‌ت به‌م راستییانه‌ی خواره‌وه‌ش:
یه‌كه‌م: له‌وڵاتێكی وه‌ك كوردستانی ئێمه‌دا كه‌ داگیركه‌ران به‌ئه‌نقه‌ست رێگه‌ی گه‌شه‌كردنی سه‌نعه‌تیان لێ گرتووه‌، هه‌رچه‌نده‌ توانای زۆرو زه‌وه‌ندیشی تێدایه‌، چینی كرێكاران هه‌ر ته‌نها ئه‌و كرێكارانه‌ ناگرێته‌وه‌ كه‌ له‌كارگه‌و فابریقه‌كانی سه‌ناعیدا كارده‌كه‌ن كه‌ به‌داخه‌وه‌ ژه‌ماره‌یان كه‌مه‌، به‌ڵكو هه‌موو كرێكارانی تریش ده‌گرێته‌وه‌، هه‌موو ئه‌وانه‌ی به‌كرێی كاریان به‌ڕێوه‌ده‌چن، به‌ كرێكارانی بیناو رێگه‌وبان ‌و كووره‌ خشت ‌و بلۆك و كرێكارانی كشتوكاڵ ‌و فیته‌رو شۆفێران ‌و كرێكارانی هۆتێل ‌و ریستۆران ‌و چاپخانه‌و ته‌له‌فۆن ‌و كاره‌باو كرێكارانی جۆراوجۆری تر.
واته‌ هه‌موو ئه‌وانه‌ی ژیانیان به‌ كارو ره‌نجی بیروبازوویان دابین ده‌كرێ.
بۆیه‌ كه‌م بایه‌خدان به‌ چینی كرێكاران به‌بیانووی كه‌میی ژماره‌ی پڕۆلیتاریا له‌ كورده‌واریدا تووشی هه‌ڵه‌یه‌كی گه‌وره‌مان ده‌كات ‌و ده‌بێته‌هۆی سه‌رلێشێوان ‌و لادانێكی سامناك له‌ ره‌وتی پێشكه‌وتنی مێژوودا.
دووه‌م: چینی كرێكاران به‌ ره‌نجده‌رانی بیروبازووشه‌وه‌، ده‌ورێكی زۆر گه‌وره‌و گرنگ ‌و كاریگه‌ریان هه‌یه‌ له‌ رزگاریی نیشتمانی ‌و دیموكراتی ‌و كۆمه‌ڵایه‌تیدا.
به‌ خۆیان ‌و جووتیارانه‌وه‌، هێزی سه‌ره‌كی ‌و كاریگه‌ریی ئه‌و رزگارییه‌ن ‌و خۆشیان سه‌رچاوه‌و كانگه‌ی هێزی پێشڕه‌وی ئه‌و رزگارییه‌ن، كه‌ رزگاربوونه‌ له‌ زوڵم و زۆری نه‌ته‌وایه‌تی ‌و چه‌وساندنه‌وه‌ی چینایه‌تی ‌و دواكه‌وتوویی كۆمه‌ڵایه‌تی.
هه‌ربۆیه‌ش كه‌م بایه‌خدان به‌و چینه‌ كرێكاره‌، تووشی هه‌ڵدێرێكی هه‌زار به‌هه‌زاری ئه‌وتۆمان ده‌كات، كه‌ هێزی سه‌ره‌كی ‌و هێزی پێشڕه‌وی رزگاریی نیشتمانی ‌و چینایه‌تی ‌و كۆمه‌ڵایه‌تی نه‌ناسین ‌و لێیان دوور بكه‌وینه‌وه‌، واته‌ نه‌توانین هاوكاریی ‌و هاوبه‌شیی كاریگه‌رانه‌ بكه‌ین له‌و رزگارییه‌دا.
سێیه‌م: چینی كرێكاران به‌ ره‌نجده‌رانی بیروبازووشه‌وه‌، چاكترین پشتیوان ‌و هاوكاری جووتیاران ‌و ژنانی كوردستانن، كه‌ به‌شێكی زۆری كۆمه‌ڵی كورده‌واریی پێكدێنن ‌و كه‌ به‌بێ رزگاركردنیان له‌ زوڵم ‌و زۆری ده‌ره‌به‌گایه‌تی ‌و كۆت‌و زنجیره‌كانی پاشماوه‌ی ده‌ره‌به‌گایه‌تی ‌و داب‌و نه‌ریت ‌و ره‌وشت ‌و خووی رژێمی ده‌ره‌به‌گایه‌تی، پێشكه‌وتن‌و گه‌شه‌كردنی كوردده‌وارییه‌كی له‌توانادا نابێت ‌و نابینه‌ خاوه‌نی كورده‌وارییه‌كی دیموكرات ‌و حه‌زاریی ‌و نوێ.
داهێنانی عەدالەتێکی کۆمەڵایەتیی پێویست بەم سەردەمە
چواره‌م: سه‌ركه‌وتنی كوردایه‌تی، واته‌ به‌دیهێنانی رزگاریی نیشتمانی ‌و دیموكراتی، به‌مافی چاره‌ی خۆنووسینیشه‌وه‌، به ‌سه‌ربه‌ستی ‌و ئازاییه‌ دیموکراتییه‌كانیشه‌وه‌‌ و گه‌شه‌كردنی كورده‌واریی‌و پێكهێنانی كوردستانێكی نوێی دیموكرات ‌و داهێنانی عه‌داله‌تێكی كۆمه‌ڵایه‌تیی پێویست له‌م سه‌رده‌مه‌دا، راسته‌وخۆ به‌نده‌ به‌ خه‌باتی كرێكارانی ره‌نجده‌رانی بیروبازووشه‌وه‌.
چونكه‌ وه‌ك هه‌موو ده‌زانین، قانونی رزگاری، ئه‌مه‌یه‌: كه‌ هه‌ر گه‌لێك خۆی خۆی رزگارده‌كات ‌و هه‌ر چینێكیش ده‌بێت خۆی خۆی رزگاربكات، دیاره‌ به‌ پشتیوانی ‌و هاریكاریی هه‌موو هاوپه‌یمانه‌كانی ناوه‌وه‌و ده‌ره‌وه‌ی وڵاته‌كه‌ی.
رەنجدەرانی کوردستان هێزە هەرە نەبەزو کۆڵنەدەرەکەی خەباتن
واته‌ ده‌بێت هه‌ر گه‌لێك له‌ناوخۆی وڵاته‌كه‌یدا هه‌ڵسێت به‌ راپه‌ڕین ‌و هۆشیاركردنه‌وه‌ ‌و رێكخستن ‌و سازدان ‌و خستنه‌گه‌ڕ ‌و رێبه‌ریكردنی هێزه‌كانی خۆی به‌ رێگه‌ی راست ‌و ره‌وای گونجاو له‌گه‌ڵ ره‌وتی گه‌شه‌كردنی كۆمه‌ڵایه‌تیدا.
زانینی ئه‌و راستییه‌ ‌و كارپێكردنی، ده‌مانگه‌یه‌نێته‌ ئه‌م راستییه‌ی كه‌ هێزه‌ هه‌ره‌ شۆڕشگێڕو خۆڕاگر ‌و نه‌به‌ز و كۆڵنه‌ده‌ری گه‌له‌كه‌مان له‌ناو ره‌نجده‌رانی كوردستاندایه‌.
هه‌روه‌ك هێزه‌ هۆشیارو رووناكبیر و تێگه‌یشتووه‌ شۆڕشگێڕ ژیر و دووربینه‌كه‌ش هه‌ر له‌ناو ره‌نجده‌رانی بیردا هه‌ڵده‌كه‌ون ‌و په‌یداده‌بن.
بۆیه‌ هه‌ر ته‌نها به‌ به‌كارهێنانی ئه‌و راستییانه‌ی سه‌ره‌وه‌ ده‌توانرێ هێز و توانای له‌بن نه‌هاتووی كۆمه‌ڵانی خه‌ڵك وا رێكبخرێن ‌و سازبدرێن ‌و بخرێنه‌گه‌ڕ ‌و رێبه‌ریی بكرێن، كه‌ ببنه‌ هێزێكی له‌بن نه‌هاتوو ‌و له‌به‌زاندن نه‌هاتوو.
هێزێک كه‌ له‌ئه‌نجامدا -هه‌رچه‌نده‌ رێگه‌ی خه‌باته‌كه‌ی سه‌خت ‌و دوورودرێژ و پێچاوپێچ ‌و پڕ له‌ فیداكاریی بێت- هه‌ر ئه‌و ده‌توانێت تاجی سه‌ركه‌وتن بخاته‌ سه‌ر خه‌باتی نیشتمانی ‌و دیموكراتی ‌و كۆمه‌ڵایه‌تی.
پێنجه‌م: ی.ن.ك وه‌ك هێزێكی سۆشیالیست ‌و دیموكراتیش ده‌بێ ئه‌م راستییه‌ دووپات بكاته‌وه‌ كه‌ گه‌شه‌پێداتنی كۆمه‌ڵی رزگاربووی كوردستان به‌ره‌و له‌ڕه‌گوڕیشه‌ هه‌ڵكه‌ندنی زوڵ و زۆر و چه‌وساندنه‌وه‌، به‌ره‌و سۆشیالیزم هه‌ر به‌و هێزه‌ گرنگه‌ی كرێكارانی كوردستان به‌ ره‌نجده‌رانی بیروبازووشه‌وه‌ ده‌كرێ، به‌ هاوكاریی ‌و هاوخه‌باتی له‌گه‌ڵ جووتیاران ‌و كاسبكارانی زه‌حمه‌تكێش‌و جه‌ماوه‌ری زۆرلێكراو و به‌شخوراو.
بۆیه‌ چینی كرێكاران به‌ ره‌نجده‌رانی بیرو بازووشه‌وه‌ بۆ هه‌موو سۆشیالیسته‌كانی دیموكرات ئه‌همییه‌تێكی تایبه‌تیی هه‌یه‌.
پێگەی کرێکاران و رەنجدەرانی بیرو بازوو لە پەیڕەوی ناوخۆی یەکێتیدا
له‌ په‌یڕه‌وی ی.ن.ك دا به‌مجۆره‌ پێناسی خۆی ده‌ربڕیوه‌ كه‌: یه‌كێتیی نیشتمانیی كوردستان رێكخراوێكی سۆشیال دیموكراته‌، له‌پێناوی دیموكراسی ‌و ئازادیی ‌و به‌كسانیدا، دژی دیكتاتۆری ‌و جه‌نگ ‌و داگیركردن ‌و ده‌ستدرێژیی، دژی چه‌وساندنه‌وه‌ی نه‌ته‌وایه‌تی ‌و چینی ‌و دینی، دژی پێشێلكردنی مافی مرۆڤ ‌و دژی تیرۆر ‌و دژی شۆڤێنیزم ‌و كۆنه‌په‌رستی. له‌پێناوی مافی چاره‌ی خۆنووسین ‌و هاوكاریی ‌و پێكه‌وه‌ژیانی گه‌لان به‌ ئاشتی تێده‌كۆشێت.
شه‌شه‌م: كه‌واته‌ جه‌ژنی كرێكاران له‌ راستیدا جه‌ژنی چینێكی ره‌نجده‌ر و پێشكه‌وخواز ‌و پێشڕه‌وی كوردستانه‌، كه‌ ئه‌ركی سه‌ره‌كیی رزگاریی نیشتمانی ‌و كۆمه‌ڵایه‌تی ‌و دیموكراتی كه‌وتۆته‌ ئه‌ستۆ به‌ تایبه‌تی كه‌ مێژوو ئه‌م راستییه‌شی بۆ ده‌رخستووه‌ كه‌ رزگاریی یه‌كجاره‌كیی چینی كرێكار خۆشی، به‌ رزگاریی هه‌موو كۆمه‌ڵ ده‌بێت له‌ زوڵم ‌و زۆری نه‌ته‌وایه‌تی ‌و چینایه‌تی ‌و چه‌وساندنه‌وه‌ی چینایه‌تی ‌و دواكه‌وتوویی كۆمه‌ڵایه‌تی ‌و به‌ له‌ ره‌گوڕیشه‌وه‌ هه‌ڵكه‌ندنی ماك ‌و سه‌رچاوه‌ی زوڵم ‌و زۆرداریی ‌و چه‌وساندنه‌وه‌ ده‌بێت له‌ كۆمه‌ڵی مرۆڤدا.
خەباتی کرێکاران تا رزگاریی تەواوی مرۆڤایەتی بەردەوامە
بۆیه‌ له‌م رووه‌شه‌وه‌ چینی كرێكاران هه‌تا سه‌ر هه‌تا دوایی هه‌تا رزگاریی یه‌كجاره‌كیی مرۆڤایه‌تی هه‌ر درێژه‌ به‌ خه‌باته‌كه‌ی ده‌دات.
كه‌واته‌ جه‌ژنی كرێكاران جه‌ژنی رزگاركه‌رانی هه‌موو كۆمه‌ڵه‌،
چه‌ژنی چینێكه‌ مێژوو ئه‌ركی زۆر پڕ له‌سه‌روه‌ریی رزگاریی یه‌كجاره‌كیی مرۆڤایه‌تیی خستۆته‌ ئه‌ستۆ.
سه‌ره‌ڕای هه‌موو ئه‌وانه‌ش رۆژی یه‌كی ئایار رۆژی هاوكاریی ‌و هاریكاریی نێوان كرێكارانی دنیا ‌و گه‌لانی زۆرلێكراوی دنیایه‌. كه‌ له‌وسه‌ره‌شه‌وه‌ بۆ خه‌ڵكی كوردستانی داگیرو دابه‌ش‌و زۆرلێكراو كه‌ڵكێكی زۆری هه‌یه‌. چونكه‌ هاوكاریی ‌و هاریكاریی كرێكاران ‌و گه‌لانی دنیا بۆ كوردایه‌تی ‌و كورده‌واریی شه‌رتێكی گرنگی سه‌ركه‌وتنیانه‌.
ئه‌وه‌ی راست بێت ته‌نانه‌ت سه‌رچاوه‌ی پشتیوانیی هه‌ندێك حكومه‌تی گه‌وره‌ی وه‌ك ئه‌مریكا ‌و فه‌ره‌نسا‌و ئینگلیز له‌رزگاركردنی كوردستانی عیراق له‌ هه‌لو كۆستی سه‌دام حسێن هه‌ر سه‌باره‌ت به‌ خه‌باتی گه‌لان ‌و بیروڕای گشتی گه‌له‌كانیان بوو، كۆچی ملیۆنیی خه‌ڵكی كوردستان‌و وێنه‌ ته‌له‌فزیۆنییه‌ دڵ ته‌زێن ‌و جه‌رگبڕه‌كانی بوونه‌ هۆی وروژاندنی رای گشتی جیهان ‌و گه‌لانی ئه‌وروپا ‌و ئه‌مریكا، ئینجا هێنانی حكومه‌ته‌كانیان بۆ سه‌ر بیروڕای پاراستنی كورده‌واریی ‌و ده‌رچوواندنی بڕیاری 688 ‌و ناردنی هێزی هاوپه‌یمانان بۆ رزگاركردنمان له‌ هێرشی له‌ناوبردن كه‌ سه‌دام حسێن هێنایه‌ سه‌ر گه‌له‌كه‌مان.
بۆیه‌ هاوكاریی هێزه‌ سۆشیالیست ‌و مرۆڤ په‌روه‌رو دیموكراته‌كانی دنیا له‌گه‌ڵ گه‌له‌كه‌مان هه‌میشه‌ بایه‌خێكی تایبه‌تیی هه‌یه‌ كه‌ كرێكاران هیچ نه‌بێ ده‌توانن له‌لای كرێكارانی دنیاو حزبه‌ سۆشیالیست ‌و كۆمۆنیسته‌كانی دنیا بۆمان دابین بكه‌ن.
كرێكاران ‌و ره‌نجده‌رانی كوردستان
له‌كاتێكدا ئه‌و راستییانه‌ی سه‌ره‌وه‌تان بۆ دووپات ده‌كه‌مه‌وه‌، باشیش ده‌زانم كه‌ له‌ئه‌نجامی داگیركردنی به‌شه‌ گرنگه‌كه‌ی كوردستانماندا به‌ كه‌ركوكی قودسی كوردستان ‌و خانه‌قینیشه‌وه‌‌و سه‌باره‌ت به‌ ئابڵۆقه‌ی چه‌ند لایه‌نه‌و رێگه‌گیران له‌ په‌یوه‌ندییه‌كانی تیجاری ‌و سه‌ناعیمان به‌ده‌ره‌وه‌ی وڵاته‌وه‌. سه‌باره‌ت به‌ به‌فیڕۆدانی داهاتی گومرگه‌كانی كوردستان به‌ڵێ باشیش ده‌زان كه‌ ئێوه‌ی خاوه‌نی ئه‌و هه‌موو وزه‌و سه‌روه‌رییه‌ دووچاری چ جۆره‌ هه‌ژاریی ‌و نه‌داریی ‌و كوێره‌وه‌رییه‌ك هاتوون.
به‌ڵام دڵنیام كه‌ ئێوه‌ی خۆڕاگر ‌و نه‌به‌ز، ئێوه‌ی داهێنه‌ری داستان ‌و موعجیزه‌ی شۆڕشگێڕانه‌ و قاره‌مانێتی مێژوویی، هه‌رگیز و هه‌میشه‌ ئه‌م راستییه‌ له‌بیرناكه‌ن كه‌ ته‌نها رێگه‌ی رزگاریمان، رێگه‌ی دوایی هێنانه‌ به‌ دیكتاتۆرییه‌ت ‌و داگیركردنی كوردستان ‌و داهێنانی عیراقێكی فیدراڵ ‌و په‌رله‌مانی كه‌ له‌چوارچێوه‌كه‌یدا كوردستانه‌كه‌ی خۆشتان به‌ مافی چاره‌ی خۆنووسینی شادبێت. ئه‌وسا به‌ڕه‌نجی ئێوه‌و به‌ بازو و بیری چینی كرێكارانی كوردستانی خۆمان ده‌توانین ‌و ئه‌بێ خێرو بێری وڵاته‌كه‌مان به‌ نه‌وتی كوردستانیشه‌وه‌ به‌ری زه‌وی ‌و زار‌و ئاو و روباری وڵاته‌كه‌مان، به‌ری كارخانه‌ و فابریقه‌كانمان به‌جۆرێك دابه‌ش بكرێ كه‌ له‌پێش هه‌موواندا به‌شی ره‌وای ئێوه‌ی كرێكارانی به‌ ره‌نجده‌رانی بیروبازووشه‌وه‌، به‌شی شه‌هیده‌ نه‌مره‌كانی كوردستانیان لێ بدرێت.
ئه‌و كوردستانه‌ نوێیه‌ی بۆی خه‌بات ده‌كه‌ین‌و ده‌یان هه‌زار شه‌هیدمان له‌ پێناودا به‌خشیووه‌، ده‌بێ له‌پێش هه‌مووان كوردستان به‌ خێروبێری كرێكاران به‌ ره‌نجده‌رانی بیروبازووشه‌وه‌، جووتیاران، كاسبكاران ‌و دڵسۆزانی گه‌ل ‌و نیشتمان بێت,
ئه‌وه‌ش زۆری نه‌ماوه‌ پێی بگه‌ین ‌و پێی شادبین، كاروانی خه‌باته‌كه‌مان به‌ره‌و لوتكه‌ی سه‌ركه‌وتن به‌ رێگه‌ی پڕ له‌ئازارو مه‌ینه‌ت ‌و ئێش ‌و زه‌حمه‌تی ‌و فیداكاریدا هه‌ڵده‌گه‌ڕێت. دوژمینش، دوژمنی، دیكتاتۆریی ره‌فتار فاشیستیش له‌سه‌ره‌مه‌رگی یه‌كجاره‌كیدایه‌و دوا تیری كه‌وانی خۆی به‌ده‌سته‌وه‌ ماوه‌، ئه‌ویش بۆ خۆپاراستنی هه‌ڵگرتووه‌.
خەباتی کرێکاران نە کۆڵدان و نە نووچدانی هەیە
هێزی هۆشیاری كرێكاران ‌و ره‌نجده‌رانی بیروبازووش به‌هاوكاریی هه‌موو كۆمه‌ڵانی خه‌ڵكی كوردستان ‌و هه‌موو ئازادیخوازو شۆڕشگێڕان ‌و دیموكراتانی عیراق، بێباكانه‌ له‌ نووچدان ‌و هه‌ڵنگوتن، نه‌ كۆڵدانیان هه‌یه‌، نه‌ لادانیان هه‌یه‌و هه‌میشه‌ خه‌بات ده‌كه‌ن، هه‌تا رژێمی دیكتاتۆریی سه‌دام ده‌خه‌نه‌ ناو چاڵی مه‌رگه‌وه‌ له‌شوێنه‌واره‌كه‌یدا عیراقێكی دیموكرات ‌و فیدراڵ ‌و په‌رله‌مانی داده‌مه‌زرێنن.
ئێوه‌ش ئه‌ی كرێكاران ‌و ئه‌ی ره‌نجده‌رانی بیروبازوو رۆژی جه‌ژنه‌ پیرۆزه‌كه‌تان بكه‌نه‌ رۆژی باشتر خۆ رێكخستنتان له‌ نه‌قابه‌ی كرێكاراندا، له‌ رێكخراوه‌ دیموكراته‌كاندا، باشتر ریزه‌كانتان یه‌كخه‌ن ‌و خه‌باته‌كه‌تان بهێننه‌ جۆش‌و خرۆش.
بێگومان ئه‌و هه‌موو فیداكاری‌و له‌ خۆبوردن‌و خۆبه‌ختكردنه‌ی تا ئه‌مڕۆ نواندووتانه‌، به‌فیڕۆ ناچێت ‌و هه‌ر به‌رده‌دات، ئه‌وا رۆژی رزگاریتان له‌ودیو كه‌له‌، ده‌با هه‌موو هێزو توانامان بۆ ئه‌و رۆژ سازو ئاماده‌ بكه‌ین ‌و ئێزوش ئه‌ی كرێكاران ‌و ره‌نجده‌رانی بیروبازوو چه‌ژنی ئایاری ئه‌مساڵ ‌و هه‌موو ساڵێكتان هه‌ر پیرۆز بێت ‌و هه‌میشه‌ش هه‌ر شادو سه‌ربه‌رز‌و سه‌روه‌ربن.
ئەرکی یەکێتی لە سەرخستنی خەباتی چینایەتیدا
ی.ن.ك-یش كه‌ مێژوو ئه‌ركی گه‌وره‌ی پیرۆزی خستۆته‌ ئه‌ستۆ، هه‌روه‌ك سه‌ربه‌رزانه‌ ئه‌ركی هه‌ڵگیرساندنه‌وه‌ی شۆڕشی نوێی گه‌له‌كه‌مانی به‌دیهێنا، هه‌روه‌ك ئه‌ركی سازدان ‌و رێبه‌ریی راپه‌ڕینه‌ مه‌زنه‌كه‌ی ئه‌نجام دا، هه‌روه‌ك ئه‌ركی چه‌سپاندنی دروشمه‌كانی ئاشتی ‌و دیموكراتی ‌و مافی مرۆڤ ‌و مافی چاره‌ی خۆنووسینی گرته‌ ئه‌ستۆ، هه‌روه‌ك ئه‌ركی داهێنان ‌و پێكهێنانی ئه‌نجومه‌نی نیشتمانیی كوردستان ‌و حكومه‌تی هه‌رێمی كوردستانی به‌هاوكاریی دڵسۆزان به‌دیهێنا، ئائه‌وهاش به‌ڵێن دووپات ده‌كاته‌وه‌ كه‌ وه‌ك هه‌میشه‌ له‌ ریزی پێشه‌وه‌ی  خه‌باتی بێوچان بێت ‌و بۆ چه‌سپاندنی ئاشتی له‌كوردستاندا، بۆ چاره‌ی سیاسی ‌و دیموكرات بۆ گیروگرفته‌كان، بۆ ته‌رخانكردنی هه‌موو هێزو تواناكانی، شانبه‌شانی هه‌موو دڵسۆزانی رزگاریی عیراق له‌ دیكتاتۆرییه‌ت، بۆ په‌له‌كردن له‌ رووخاندنی دیكتاتۆرییه‌ت ‌و رزگاركردنی به‌شه‌كه‌ی داگیركراوی كوردستانه‌كه‌مان ‌و داهێنانی دیموكراسی ‌و فیدرالیزم له‌ عیراق ‌و كوردستاندا. ئائه‌وهاش به‌ڵێن دووپات ده‌كاته‌وه‌ كه‌وا هه‌میشه‌ ‌و هه‌تاسه‌ر رێكخراوی ره‌نجده‌رانی بیرو بازووی كوردستان بێت له‌ڕووی چینایه‌تییه‌وه‌و رێكخراوی كۆمه‌ڵانی خه‌ڵكی كوردستانیش بێت له‌ڕووی نیشتمانییه‌وه‌.
ده‌با هه‌ڤاڵانی یه‌كێتیی نیشتمانیی كوردستان باشتر‌و ژیرانه‌تر ئه‌ركه‌كانی نیشتمانی ‌و چینایه‌تی ‌و كۆمه‌ڵایه‌تی خۆیان بزانن ‌و ئه‌نجام بده‌ن.
هۆشیارکردنەوەی کرێکاران ئەرکێکی تری یەکێتییەکانە
ده‌با چاكتر‌و باشتر به‌ته‌نگ ره‌نجده‌رانی بیرو بازووغ كورده‌وارییه‌وه‌ بێن ‌و چاكتریان خزمه‌ت بكه‌ین. ده‌با هه‌میشه‌ خزمه‌تكار ‌و فیداكاری دڵسۆز و هۆشیاری كۆمه‌ڵانی خه‌ڵك بن ‌و هه‌میشه‌ش له‌ ریزی پێشه‌وه‌ی جه‌ماوه‌ردا ئه‌ركی پیرۆزی مێژوویی خۆیان،  ئه‌ركی رێبه‌ریی خه‌باتی رزگاریی نیشتمانی ‌و چینایه‌تی ‌و كۆمه‌ڵایه‌تیی خه‌ڵكی كوردستان به‌دی بهێنن.
بۆ ئه‌وه‌ش له‌پێش هه‌موو شتێكدا، پێویسته‌ باشتر‌و چاكتر بڕژێتی‌ ناو كۆمه‌ڵانی كرێكارو ره‌نجده‌رانی بیروبازووی كوردستان ‌و چاكتریان هۆشیاربكه‌نه‌وه‌و رێكبخه‌ن ‌و هێز و تواناكانیان باشتر سازبده‌ن. هه‌روه‌ك پێویسته‌ زووتر به‌پیر داخوازییه‌ ره‌واكانیانه‌وه‌ بچین ‌و هه‌وڵده‌ین ئه‌وه‌نده‌ی ده‌كرێ بۆیان دابین بكه‌ین، به‌تایبه‌تی به‌هۆی حكومه‌تی هه‌رێمی كوردستان ‌و خستنه‌وه‌گه‌ڕی كارگه‌كان ‌و هه‌وڵدان بۆ چاره‌سه‌رێكی ره‌وای مومكین بۆ مه‌سه‌له‌ی ژیان ‌و گوزه‌رانی خه‌ڵك كه‌ هه‌ر به‌ڕاستی یه‌كه‌مین ئه‌رك ‌و مه‌سه‌له‌یه‌ و نابێ به‌هیچ بیانوویه‌ك بشاردرێته‌وه‌، واته‌ پێویسته‌ چاكتر ئه‌و راستییه‌ بهێنینه‌وه‌ بیری خۆمان كه‌ خه‌باتی نیشتمانیی دیموكراتیی راسته‌قینه‌و خه‌باتی چینایه‌تی ره‌نجده‌ران دژی خوێنمژه‌كان، زۆر به‌توندی به‌شێوه‌یه‌كی ئۆرگانیك پێكه‌وه‌ گرێدراوه‌، له‌راستیی خه‌باتی كوردایه‌تی واته‌ خه‌باتی رزگاریی نیشتمانیی دیموكراتی راسته‌قینه‌، هه‌م خه‌باتێكی نیشتمانییه‌ دژی داگیركه‌رانی كوردستان ‌و هه‌م خه‌باتێكی چینایه‌تییه‌ دژی چینه‌ خوێنمژو زۆرداره‌كانی بێگانه‌و خۆماڵی، ده‌با هه‌موو داهاتی كوردستان به‌ داهاتی گومرگه‌كانی سه‌رانسه‌ری كوردستانیشه‌وه‌ له‌پێشه‌وه‌ بۆ ژیان ‌و گوزه‌رانی كرێكاران ‌و هه‌موو ره‌نجده‌ران ‌و كه‌سوكاری ئه‌نفالكراوه‌كان ‌و شه‌هیده‌كان ته‌رخان بكرێت. ده‌با خه‌بات په‌ره‌پێبده‌ین بۆ ناچاركردنی دیكتاتۆرییه‌تی به‌غدا تا ملكه‌چ پێكردنی بۆ بڕیاری 986ی نه‌ته‌وه‌یه‌كگرتووه‌كان، كه‌ به‌چاكی جێبه‌جێكردنه‌كه‌ی ده‌بێته‌ هۆی بووژاندنه‌وه‌ی خه‌ڵكی كوردستان به‌گشتی ‌و كرێكاران ‌و ره‌نجده‌ران به‌تایبه‌تی. ده‌بێته‌ هۆی بوژاندنه‌وه‌ی زه‌راعه‌ت ‌و سه‌ناعه‌ت ‌و په‌یدابوونه‌وه‌ی كارو كاسبـی له‌كوردستانی رزگاردا. ده‌بێته‌ هۆی دابینكردنی ئازووقه‌و ده‌رمان ‌و كاره‌با‌و خوێندنگاكان ‌و زانكۆكانمان ‌و ده‌بێته‌ هۆی چاككردنه‌وه‌ی خه‌ته‌كانی كاره‌با‌و ته‌له‌فۆن ‌و رێگه‌وبان ‌و نه‌خۆشخانه‌‌و خوێندنگه‌كانمان ‌و دابینكمردنی كارو كاسبیش بۆ ده‌یان هه‌زار ره‌نجده‌ری كوردستان.
ده‌با جه‌ژنی یه‌كی ئایاری پیرۆزیش هانده‌ری هه‌موولایه‌ك بێت بۆ چه‌سپاندنی ئاشتی له‌ كوردستاندا، بۆ دۆزینه‌وه‌و پیاده‌كردنی چاره‌سه‌ری راست ‌و ره‌واو دیموكرات بۆ هه‌موو گیروگرفته‌كان به‌شێوه‌یه‌كی سیاسی ‌و له‌ رێگه‌ی دانوستان ‌و كۆبوونه‌وه‌كانی به‌ره‌ی كوردستانی ‌و هه‌موو هێزه‌ كوردستانییه‌ دڵسۆزه‌كان ‌و به‌ هاریكاریی دۆستانی.
ده‌با هه‌موو پێكه‌وه‌ خه‌بات جۆش بده‌ین له‌ پێناوی ئاشتی ‌و دیموكراسی ‌و مافی مرۆڤ ‌و مافی چاره‌ی خۆنووسین.
ئه‌ی كرێكاران ‌و ره‌نجده‌رانی بیرو بازوو:
له‌گه‌ڵ ئه‌وه‌شدا كه‌ هه‌مووتان باش ده‌زانن گه‌ر بهاتبا‌و هه‌موو داهاتی كوردستان له‌سه‌رانسه‌ری كوردستاندا، له‌ پێنجوێنه‌وه‌ تا برایم خه‌لیل زۆربه‌ی به‌فیڕۆ نه‌درابا ‌و گه‌ر كارگه‌كانمان خرابانه‌ گه‌ڕ، ئه‌وا ده‌توانرا نه‌ختێ ژیان ‌و گوزه‌رانی ئێوه‌ی ره‌نجده‌رانی تێكۆشه‌ر باشتر بكرابا‌و چاكتر كشتوكاڵ ببوژێندرایه‌ته‌وه‌و باشتر به‌ نه‌خۆشخانه‌و خوێندنگه‌و زانكۆكان راگه‌یشباین. له‌گه‌ڵ ئه‌وه‌شدا هه‌مووتان –به‌ڕاست ‌و ره‌وانی- تووڕه‌و ناڕازین له‌شه‌ڕی كوردكوژه‌ی ماڵوێرانكه‌ر‌و باش ده‌زانن ده‌بوایه‌ لووله‌ی تفه‌نگه‌كان هه‌موویان بكرابایه‌ جه‌لاده‌كانی هه‌ڵه‌بجه‌ی شه‌هیدی زیندوو و بكوژانی ده‌یان هه‌زار كوردی ئه‌نفالكراوی بێ سه‌روشوێن ‌و بكوژانی هه‌زاران بارزانی ‌و هه‌زاران لاوی كوردپه‌روه‌ر، هه‌زاران برای توركمانی زۆرلێكراوی ئه‌م كوردستانه‌ی ئێمه‌. به‌ڵام دڵنیام هه‌موو ئه‌و كاره‌ دزێوه‌ دوور له‌ شه‌رمه‌، هانده‌رتان ده‌بێت  بۆ چه‌سپاندنی ئاشتییه‌كی ره‌واو سه‌پاندنی چاره‌سه‌ری دیموكراتیی راسته‌قینه‌ی كێشه‌كان ‌و پتر جۆشدانی خه‌باتی شۆڕشگێڕانه‌تان له‌م بواره‌شدا، باشتر پێكه‌وه‌ به‌ستنه‌وه‌ی خه‌باتی نیشتمانیی ‌و چینایه‌تیتان.
ئێوه‌ش ئه‌ی بینه‌رو گوێگرانی خۆشه‌ویست هه‌میشه‌ هه‌ر شادو سه‌ربه‌رزو سه‌ركه‌وتووبن.
print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

عومەر شێخمووس:لە رۆژئاڤا كورد كارتی گرنگی سیاسی لەبەردەستە

عومەر شێخمووس سیاسەتمەدار و كەسایەتیی سەربەخۆی رۆژئاڤای كوردستان رایگەیاند: لە ...