خوێنی كورد

خوێنی كورد

1

ئەو هەموو لاوە
نەمامن نێژران لەم باخچەیە

ریشەی كوردایەتی بوو یانی بۆمان نێژران
تورك لە نێو ماڵەكەی خۆماندا دەمانكوژێت، بۆ كوشتنەكەش دەبێت ئێمە داوای لێبوردن بكەین وەك چۆن لە بەر خاتری ئەوان «ئەی رەقیب « پشتگوێ‌ دەخەین، جا ئەوە سەردەمێك لەمەوبەر بابا هەبوو لەسەر ئەو ئەی ڕەقیبە دەیوست دنیا بەسەر كوردا بڕوخێنێ‌، ئێستا كە لێنادرێ‌ نق و جق ناكات، تورك دەمانكوژێت و دەیەوێت لە ئەستەنبوڵیش دەنگی پێ‌ بدەین، یانی ئێمە چۆلەكەكەین، ئەوی منداڵە عەجەم سەری گرتوەو دەڵێت سەمام بۆبكە بەرت دەدەم.هەر تورك نا ئەوی ئێمە هەرسێمان بەدەفتەر گرتبوو دەمانكوژن و خۆشمانخۆمان دەكوژین، دەبینی لەبەردەم چ ناجۆریەكداین، لە سەر دەمە قاڵێك هەزارچەكدار كۆدەبنەوە، بۆ لێدانی یەكتر، كەچی پۆلیسێكی بیانی دەتوانێ‌ زۆر بەتوندی تێمانخوڕێ‌ و بێدەنگمانكات.
حاجی قادر دەیگۆ « گوێم لێدەگرن زەریفە – ناگرن بە ڵا لە خۆتان «
2
كۆڵبەری كورد بە دووی ناندا لە سەر خاكی خۆی گەرمێن و كوێستان دەكات، لە سەر خاكی خۆی لەو بازاڕە بێرەحمەدا كە ژیان هەرزانترە لە نان بە دوای نانی مناڵەكانیەوەیەتی، كەی ئەو شایانی كوشتنە، لە دنیادا شانازی بەوانەوە دەكرێت كە كاردەكەن و خۆیان دەژێنن، لێرە بە بیانوی جۆراو جۆر دەكوژرێن، كوردبوون چ ئازارێكی گەورەیە، مەگەر هەر من و ئەحمەد قایەو بەهمەنی قوبادی لەو ئازارە بگەین، كە هەرسێك كوردین و هەرسێك ناسنامەی شوێنی دیكەمان لە باخەڵدایە، بۆ ئەوەی دنیا لە ئازاری كورد بوون بگەن، هەر پێویستمان بە شەڕوان و گەریلاو پێشمەرگە نیە، پێویستمان بە رێگای یەڵماز گۆنەیی و ساتێك بۆ مەستی ئەسپەكانی بەهمەنیشە.
ناكرێ‌ چی دی دڵ بەوە خۆشكەین كە « لاوان بە عەشق ئەچوون بە بەرەو پیری مەرگەوە « ئێمە دەبێت وابكەین لاوان بە عەشق بڕۆن بەرەو پیری ژیان.
3
كاتی ئەوەیە بیر لەوەبكەینەوە چۆن بەر بەو خوێن بەربوونە كوردیە بگرین، من دەزانم لاوی كورد ئەگەر بواری بێت، ئەگەر هەوری شەڕ و نەهامەتی لە سەر خۆی وخاكەكەی لاچێت، ئەگەر دەرگای گەیشتن بە زاست وزانیاری بۆ واڵا بكرێت، دەتوانێ‌ كاری گەورە بكات، ئاخۆ كەی ئەو رۆژە دێت كە ئیدی دایكی كورد، ژنی رووسوری كورد، منداڵەكەی بۆ كوشتن و مەرگ گەورە ناكات و بۆ ئەفراندن و داهێنانی گەورە دەكات، ئەورۆژە ئیدی كورد بوون هاوشان لە تەك مرۆیی بووندا مانایەكی قوڵتری دەبێت و جادەی ئاسنیش دەچێتە شاخی هەورامانەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

كۆڵكێشه‌كانی‌ به‌ر هه‌تاو

1 من ئه‌وكه‌سه‌م هه‌موو رۆژێ‌ ژیانی‌ ئه‌مڕۆم ئه‌فرۆشم بۆ كڕینی‌ ...