سەرەکی » وتار » توندوتیژی ‌و خۆسەپاندن وەك لافاوی رەش وەهایە

توندوتیژی ‌و خۆسەپاندن وەك لافاوی رەش وەهایە

چالاك حسین

خۆخەریك كردن بە كۆمەڵێ تەنگ‌و چەڵەمەو ئازارەوە، بەتایبەتی ئەو ئازارانەی پەڕیونەتە ناو دەروونی مرۆڤەوە، لە پەل‌و پۆخستن ‌و گۆشەگیری بەدواوەیە. لەوانەیە هەندێكیشیان نارەحەتكردن‌و دوورخستنەوەی كەسە نزیك‌و بەرامبەرەكانی پێوە بێت. ئێمە لە كرۆكی زنجیرەی ئەو نەخۆشیانە نادوێین كە مرۆڤ تووشی‌و گیرۆدەی ئێش‌و ئازاری ترسناك‌و درێژخایەن دەكات، ئەنجامەكەشی مەرگی بەدواوە بێت. چونكە ئەو بوارانە تایبەتمەندی كەسانی پسپۆر‌و پزیشكە شارەزا‌و خاوەن بڕیارەكانە. لە خۆمانەوە دەست پێدەكەین. بەداخەوە بەهۆی پابەندبوون بە حیزب حیزبێنە، گەلێك كەسمان هەن بە ئاقاری هەڵچوون‌و داچوون دا پەلەقاژێ دەكەن.
ئەڵبەتە توندڕەویبوون بەشێكی سەرەكییە لە دەمارگرژی‌و بازدانێكی سنور بەزێن. ئەویش بە فەرزكردنی هزری ئەو كەسە گەورەی خانەوادە بێت یان گەورەی هەر كۆمەڵ‌و چین‌و نوێژی حیزب‌و رێكخراوێك، بەسەر هزر‌و بۆچوونی كەسانی دوێنراودا. ئەنجامەكەیشی نیگەرانی‌و كینەی تەشەنە سەندووی لێدەوەشێتەوە. وتراوە، هەمیشە هیۆری‌و سنگفراوانی‌و گوێگرتن لە پێشنیاری زۆرینە‌و كەڵك وەرگرتن لە رێنماییەكانیان شەبەقی ئارامی دەبەخشێ بە گیان‌و هەناسەی لەسەرخۆبوون‌و دڵنیایی دەخاتەروو.بازاڕی خۆفەرزكردن زۆر زۆر كز بووە. دەبێت لە ناخەوە ئەگادار بین‌و بە ئامۆژگاری بەرجەستەی بەرامبەریان باوەشێنی مێشكی گەرمی خۆمان بكەین، تا فێنكی بەسەردا بێت. توندوتیژی‌و سەپاندنی قسەی خود‌و زاڵبوونی بێ بنەما لەو نەخۆشی یە بێ دەرمانانەیە، نەك ئەو كەسە خۆی، بەڵكو زیانی لە رادەبەدەری بۆ دەوربەریشی دەبێت. رزاندن‌و هەڵتەكاندن لەسەر رێیدا قوتدەبنەوە. بۆیە پێویستە لەسەر پاكی قەڵەمە بەپێز‌و بەهێز‌و خاوەن بڕوای گەش‌و بەئەزمونەكان، بە نووسینی وتار‌و رەخنەی بابەتی، پشتبەستوو بە سەرچاوە گونجاوە بڕوا پێكراوەكان هەڵوێستی باڵایان تۆمار بكەن. رووبەرووی دیاردەی توندڕەوی توندوتیژی لە گفتوگۆ و كەسانی خۆدەرخەر بە وێنەی نەهەنگی دەریا‌و فیلی سەرزەوی ئاسا بۆ هەموان روونبكەنەوە، كە ئەوانە لە میزەڵدانێكی فوتێكراو دەچن بە نووكە دەرزییەك فشدەبنەوە‌و پووچەڵییان دەكەوێتە روو. وشیاركرنەوەی مێشكەكان لە قازانجی هەمواندایە. كەواتە ئاكاری تاریكی توندوتیژی‌و تووڕەبوون خۆسەپاندن‌و بایەخیان نیە. هەردەم زمانی گوڵ‌و وەك چەپكە گوڵ پێكەوە ژیان ئاڕاستەكان بەرەو ئاواتە چاوەڕوانبووەكان دەچێت.

 201 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*