سەرەکی » ئەدەب - سێبەر و سایە » كاری ئاسان و ئاسان به‌ده‌ستپەڕە 18

كاری ئاسان و ئاسان به‌ده‌ست

فاروق هۆمه‌ر

یه‌كێك له‌و دیاردانه‌ی كه‌ ئه‌مڕۆ له‌و ناوه‌نده‌ هه‌ژاره‌ی كورد دا، بۆته‌ باو و رۆژانه‌ دووباره‌ ده‌بێته‌وه‌ زوو گه‌یشتنه‌ به‌ ناوبانگ و زوو گه‌یشتنه‌ به‌بوون به‌ ناو. له‌پڕێك دونیای ئێمه‌ پڕبوون له‌ هه‌زاران گۆرانیبێژ و رۆماننووس و چیرۆكنووس و شاعیر و وه‌رگێڕ و فیمینیست …. هتد. له‌ ئاوڕدانه‌وه‌یێكدا دونیایێك سه‌رله‌به‌ری گۆڕا. ئه‌وه‌ی جێی رامان و لێكۆڵینه‌وه‌یه‌ نه‌ك ته‌نیا ته‌مه‌ن، به‌ڵكو ئه‌زموونیش. ده‌شێ بپرسین كه‌سێك هێشتا بیسته‌كانی ته‌مه‌نی خۆی نه‌بڕیووه‌ و پڕ نه‌كردۆته‌وه‌، چۆن ده‌توانێ خاوه‌نی ده‌یان كتێب بێ. ئه‌وه‌ ده‌ڵێین داهێنان ده‌توانێ ته‌مه‌ن ببڕێ به‌ڵام ئه‌ی ئه‌زموون. له‌پڕێك سه‌دان كه‌س ده‌بینی له‌ ماوه‌ی شه‌و و رۆژێكا ده‌بنه‌ وه‌رگێڕ، به‌بێ ئه‌وه‌ی پاشخانێك و پێشكارێكیان بینرابێ، به‌بێ ئه‌وه‌ی سه‌ره‌تا گوتارێك یان لێكۆڵینه‌وه‌یێكیان له‌ رۆژنامه‌یێك له‌ گۆڤارێك بینرابێ، كتوپڕ به‌ كتێب دێنه‌ پێشێ. وه‌رگێڕان له‌ زمانه‌ زیندووه‌كانی جیهانه‌وه‌، به‌ ته‌مه‌نێكی بیست ساڵییه‌وه‌ جێی گومانه‌، له‌ كاتێكا ئه‌و كه‌سه‌ به‌سه‌ر كتێبێكه‌وه‌ بنیشێته‌وه‌ كه‌ پێشتر به‌ كوردی كراوه‌ و كه‌سێكی پڕ ئه‌زموون و زمانناسیش وه‌ریگێڕابێ. كاتێكیش لێپرسینه‌وه‌ی لێده‌كه‌ی، به‌ده‌م شڵه‌ژانێكه‌وه‌ ده‌ڵێ، خۆ تۆ مافی فڵان كتێب و نووسه‌رت بۆ خۆت قۆرخ نه‌كردووه‌. ئه‌و وه‌ڵامدانه‌وه‌یه‌ كتوپڕ پێتده‌ڵێ تۆ له‌ به‌رانبه‌ر كه‌سێكی ساویلكه‌ و بێئه‌زموون دا وه‌ستاویت.
من بۆ خۆم دوای ده‌ ساڵ دووریم له‌ كوردستان و له‌و ناوه‌نده‌ی هه‌یبوو، له‌ گه‌ڕانه‌وه‌مدا كۆمه‌ڵێك كتێبم بینین كه‌ هه‌شتاكان به‌شێوه‌یه‌ك وه‌رگێڕدراون و جارێكی دی كه‌سانێك هاتوون وه‌ریان گێڕاوه‌ته‌وه‌. بۆ ناوه‌ندێكی بچكۆله‌ی كوردی كه‌ چوار ملیۆن كه‌سی تیا ده‌ژی و سه‌دانێكی ده‌خوێننه‌وه‌ ئه‌وه‌ جێی تێڕامانه‌. بۆ نموونه‌، داغستانی منی ره‌سوڵ حه‌مزه‌ تۆڤ، كه‌ مامۆستا عه‌زیز گه‌ردی وه‌ریگێڕاوه‌ و هه‌ردوو به‌رگه‌كه‌ی به‌ یه‌كێك له‌و ڕه‌گوڕیشه‌ گرنگانه‌ی نێو زمانی كوردی داده‌نرێت كێ بوێری ده‌كات جارێكی دی خۆی تیا تاقیبكاته‌وه‌ ئه‌گه‌ر له‌و كوردیناستر نه‌بێ. پاشان وه‌رگێڕانه‌وه‌ی كتیبێك بۆ ناوه‌ندێكی وا پێشێلكردنی ره‌نجی ئه‌و پیاوه‌یه‌ و به‌فیڕۆدانی كات و وزه‌ی كه‌سێكی تره‌ كه‌ ده‌كرێ له‌ شوێنێكی تر و له‌ كارێكی ترا به‌كار بخرێ. ئه‌گه‌ر كارێك خراپ كرابێ و له‌ زمانی ره‌سه‌نه‌وه‌ نه‌كرابێ ده‌شێ بیانووی خۆی له‌گه‌ڵ خۆی هه‌ڵگرتبێ، به‌ڵام ئه‌ی ئه‌گه‌ر وا نه‌بێ چی. ته‌نیا ئه‌وه‌نده‌ هه‌یه‌ ده‌گوترێ كه‌سێك له‌ كاری ئاسان و له‌ ناوبانگی ئاسان ده‌گه‌ڕێ. لێره‌دا ئێمه‌ ده‌كرێ له‌ پێزانین بڕوانین، له‌ پێزانین بۆ ئه‌و كه‌سه‌ گه‌ورانه‌ی كه‌ له‌ كاره‌كانیان وه‌ستا و لێوه‌شاوه‌ن و نه‌هێڵین بێرێزی به‌ ڕه‌نج و به‌رهه‌میان بكرێ. من ئه‌و كاره‌م دیوه‌ به‌رانبه‌ر به‌ كه‌سانێكی گه‌وره‌ی وه‌ك شكور مسته‌فا و خه‌بات عارف و زۆری تر كراون. ئه‌و گه‌نجانه‌ كه‌ له‌ كاری واوه‌ ده‌گلێن و ده‌ست به‌سه‌ر شانیان دا ده‌درێ، فێری كاری ئاسان و ئه‌زموونی هه‌ڵه‌ و كه‌وتنی خێرا ده‌بن. ده‌شێ وه‌كو وه‌رگێڕ بۆ ماوه‌یێك كه‌مێك شوێنی ته‌ماشا و ناوبانگێكی كاتییش به‌ده‌ست بێنن، به‌ڵام زۆر نابات ده‌كه‌ون و خراپ ده‌شكێن. ئه‌و بێنه‌زاكه‌تییه‌ دونیای ئێمه‌ی ته‌واو داغان كردووه‌. هه‌ر به‌ته‌نیا گاڵته‌ و سووككردنی كتێب نییه‌، هه‌موو بواره‌كانی دی گرتۆته‌وه‌ و مێشك و دیده‌ و مه‌زاجی مرۆڤی ئێمه‌شیان به‌ به‌رهه‌م و كاری خراپ راهێناوه‌ و دواجار كلتور و زمان و هونه‌ری میلله‌تێكیش به‌ره‌و قڵپبوونه‌وه‌ و له‌ رێچكه‌ ده‌رچوون ده‌به‌ن. من نازانم كێ به‌رپرس و خه‌مخۆری دونیای ئێمه‌یه‌ به‌ڵام ئه‌گه‌ر سنوورێك بۆ ئه‌و په‌لاماره‌ بۆ سه‌ر كلتووری كوردی دانه‌نرێ زۆرێك نابات هه‌موو شتێك له‌گه‌ڵ خۆی ده‌سووتێنێ.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

گه‌وهه‌ر له‌ هونه‌ری مۆسیقادا

ئا : ئازاد مه‌عروف 24 دژبه‌ری هونه‌ر هه‌میشه‌ مایه‌ی خۆشبه‌ختییه‌ ...