سەرەکی » کەلتوور » رابردووی كورد لە تەرجەمەكانی (دواڕۆژە)وە

رابردووی كورد لە تەرجەمەكانی (دواڕۆژە)وە

دەزگای دواڕۆژ بۆ روناكبیری و راگەیاندن، بەشێكی دیكەی لە بەڵگەنامە نهێنییەكانی بریتانیای لە زمانی ئینگلیزیەوە كردووە بە كوردی، كە تایبەتن بە دۆزی كورد لە نێوان ساڵانی 1918 تا 1924.
كتێبەكان، كە بریتین لە سێ‌ بەرگ و بەسەریەكەوە لە هەزار و 670 لاپەڕە تێپەڕیوە، زنجیرە 21ی كتێبەكانی دەزگای دواڕۆژی دراوەتێ‌ و هەرسێكیان چاپی ئەمساڵی 2017-ن.
بەرگی یەكەمی كتێبی (كورد لە بەڵگەنامە نهێنییەكانی بریتانیادا) تایبەتە بە بەڵگە نهێنییەكانی هەردوو ساڵی 1918 و 1919ی بریتانیا. ئەم بەرگە لەلایەن بروسكە عەبدول-ەوە كراوە بەكوردی.
بەرگی دووەمیش كە بەڵگەكانی هەردوو ساڵی 1919 و 1920 ی لەخۆگرتووە، لەلایەن بروسكە عەبدول و پاسار شێركۆ-وە كراوە بەكوردی.
بەرگی سێیەمی كتێبەكەیش، بەڵگەنامەكانی ساڵانی 1921 تا 1924 ی تێدایە و لەلایەن پاسار شێركۆ و دیار ئەكرەم-ەوە كراوە بەكوردی. هەرسێ‌ بەگەكەش ژمارەی جیای سپاردنی لە بەڕێوەبەرایەتی كتێبخانە گشتییەكانەوە وەرگرتووە.
ئەم كتێبانە بەشێكن لەو زنجیرە كتێبەی كە دەزگای دواڕۆژ بۆ روناكبیری و راگەیاندن دەستیداوەتێ‌ و بەرنامەی ئەوەی هەیە راستەوخۆ لە زمانی (دایك) ئینگلیزیەوە وەریانبگێڕێتە سەر زمانی كوردی بۆ ئەوەی خوێنەری كورد، لەڕێی بەڵگەنامە فەرمی-نهێنیەكانی پارێزراوی بریتانیاوە، بەرچاوڕوونییەكی هەبێت لەسەر ئەو ماوە مێژووییەی پرسی كورد، هەروەك بشكرێنە سەرچاوەیەكی باوەڕپێكراوی بەڵگەیی لەسەر هەر توێژینەوە و لێكۆڵینەوەیەكی زانستیانە كە دەربارەی ئەو ماوەیەیەی قۆناغی ژیانی سیاسیی گەلی كورد، لەلایەن ئەكادیمی و پسپۆرانی بوارەكەوە ئەنجامبدرێن.
هەر لەو چوارچێوەدا، دەزگای دواڕۆژ دوو بەرگی كتێبێكی نوێی چاپ و بڵاوكردەوە بە ناونیشانی «كورد لە بەڵگەنامە نهێنییەكانی بریتانیاندا» لە نێوان ساڵانی 1966 بۆ 1979.
ئەو دوو بەرگەی»كورد لە بەڵگەنامە نهێنییەكانی بریتانیاندا» لەلایەن محەمەد مستەفا قەرەداغی لە زمانی ئینگیلیزییەوە وەرگێڕداوەتە سەر زمانی كوردی.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*