سەرەکی » چاوپێکه‌وتن » ئه‌و پیاوه‌ی‌ جاسووسی ئه‌ڵمانیاو عیراق و توركیا بوو، له‌ سوریا له‌سه‌ر هه‌وڵی تیرۆركردنی ئۆجالان ده‌ستگیركرا

عه‌بدولره‌زاق كۆیی:

ئه‌و پیاوه‌ی‌ جاسووسی ئه‌ڵمانیاو عیراق و توركیا بوو، له‌ سوریا له‌سه‌ر هه‌وڵی تیرۆركردنی ئۆجالان ده‌ستگیركرا

دیداری: سه‌رتیپ جه‌وهه‌ر

به‌شی سێیەم

له‌چوارچێوه‌ی‌ دیداری شامدا، زنجیره‌یه‌ك چاوپێكه‌وتن و دیداری سیاسی و مێژوویی سازكراوه‌، عه‌بدوره‌زاق كۆیی لێپرسراوی نوسینگه‌ی‌ یه‌كێتی نیشتیمانیی كوردستان له‌دیمه‌شق. سه‌ربرده‌و مێژوویه‌كی گرنگی كوردو بزوتنه‌وه‌ی‌ رزگاریخوازی گه‌لی كوردستان ده‌گێڕێته‌وه‌. به‌تایبه‌ت باسی هه‌وڵی تیرۆركردنی مامجه‌لال، یان هه‌وڵی تیرۆركردنی عه‌بدوڵلا ئۆجالان، هه‌روه‌ك هاوكاریی سوریا بۆ بزوتنه‌وه‌ی‌ چه‌كداریی كورد، له‌گه‌ڵ ئه‌گه‌رو پێشهاته‌كانی دۆخی سوریا. هه‌وڵده‌ده‌ین له‌چه‌ند ئه‌لقه‌یه‌ك وه‌كوخۆی بیخه‌ینه‌ روو.

*هۆكاره‌كه‌ ئه‌وه‌یه‌ كه‌ له‌سوریا كورد هه‌یه‌و هه‌رێم ده‌بێته‌ مه‌ترسی له‌سه‌ر ئه‌وێ‌ یان یان هۆكاری دیكه‌ هه‌یه‌؟
-نا مه‌سه‌له‌كه‌ حیزبی به‌عسه‌ بڕوایان پێی‌ نییه‌.

*له‌كاتی گرتنی ئۆجالان په‌یوه‌ندی كوردی توركیا له‌گه‌ڵ سوریا رووی له‌كزی كرد؟
-بێگومان لاواز بوو.

*كه‌سیان لێره‌ مانه‌وه‌؟
-زۆر كه‌م هه‌ندێك به‌نهێنی مانه‌وه‌. هه‌ندێكیان گیران. گرتنیان كادریان ده‌ستگیركرا ئه‌و كادرانه‌ دوای ئه‌وه‌ی ڕێكه‌وتنه‌كه‌یان كرد، مه‌به‌ستم رێككه‌وتنی توركیاو سوریا، ئیدی عه‌بدولڵا ئۆجالان ڕۆیشت. كۆمه‌ڵێك كادریان به‌نهێنی هاتبون و ئیشیان كردبوو،هه‌ندێكیان لێ‌ ده‌ستگیركرا. جا با پێت بڵێم من چۆن زانی مكه‌ خه‌ڵكیان لێ‌ ده‌ستگیركراوه‌؟
براده‌رێك هه‌بوو ره‌نگه‌ تۆ ناوبانیگیت بیستبێت، (د. فوئاد ت) ئه‌و كابرایه‌ دكتۆرێكی كورد بوو له‌ ئه‌لمانیا ده‌ژیا ئامۆزای چه‌ند ناسیاوێكی من بوو، به‌ڵام باوكی ئه‌و له‌شێخ نه‌جم له‌شێخ نه‌جمی عه‌شیره‌تێكی لای خانه‌قین ئه‌و ناوه‌یه‌، ئه‌و فوئاده‌ له‌ ئه‌لمانیا دكتۆر بوو، ژنه‌كه‌ی خۆی كوشت، ژنێكی ئه‌لمانی هه‌بوو ژنه‌كه‌ی كوشت!

*نه‌هاته‌وه‌ ئێره‌؟
-نا نه‌هاته‌ ئێره‌، ژنه‌كه‌ی كوشت عه‌لائه‌ساس مه‌وزوعی شه‌ره‌ف، له‌ كوێش كوشتویه‌تی؟ له‌سه‌ر به‌حر! چونه‌ته‌ سه‌ر به‌حر و سه‌یران به‌ چه‌قۆ كوشتبوی. له‌ لێكۆڵینه‌وه‌دا كوڕێكی هه‌بوو كوڕه‌كه‌ ده‌ڵێت ئه‌م چه‌قۆ هی ئێمه‌یه‌، دكتۆر فوئادیان گرت و ئیعترافی كرد. وتی به‌ڵێ‌ من كوشتومه‌. دكتۆر فوئادیان زیندان كرد له‌ئه‌ڵمانیا، دواتر ئه‌ڵمانه‌كان به‌چی ڕێگایه‌ك و چۆن ئازادیانكرد نازانم، به‌ڵام پێده‌چوو موخابه‌راتی ئه‌ڵمانیا ناسیبویان ئه‌و كێیه‌ و چییه‌، خۆیشی كه‌سێكی زیره‌ك بوو، هه‌م به‌ پزیشك بوو، هه‌میش به‌ ده‌م‌و زار بوو! ئه‌ڵمانه‌كان ته‌جنیدی ده‌كه‌ن و ده‌ڵێن ئێمه‌ به‌ره‌ڵات ده‌كه‌ین بڕۆ بۆ عێراق له‌وێ‌ ئیشمان بۆبكه‌! ئیدی به‌ڕه‌ڵای ده‌كه‌ن و دێته‌وه‌ عێراق. كه‌ هاته‌وه‌ عێراق چوو خۆی گه‌یاندبووه‌ حكومه‌تی عیراق و سه‌دامی بینیبو! لای سه‌دام ئیعترافی كردبوو كه‌ ئه‌ڵمانه‌كان ئه‌ویان ناردوه‌ تا له‌عیراق بۆ موخابه‌راتی ئه‌ڵمانیا ئیش بكات. سه‌دامیش پێی وتبوو باشه‌ تۆ موشته‌رك به‌ له‌به‌ینی هه‌ردوو لادا واته‌ جاسوسی دووسه‌ره‌، خه‌سته‌خانه‌یه‌كیان بۆ كرده‌وه‌و هه‌مووشتێكییان خسته‌به‌ر ده‌ست. ژنێكیشی هێنا به‌ناوی (د. وه‌فا).
ڕێك وپێك ماوه‌یه‌ك له‌به‌غدا بوو، حكومه‌ت د. فوئاد ده‌ینێرێت بۆلای (مام جه‌لال) تا ره‌حمه‌تی مام جه‌لال تیرۆر بكات، ده‌چێته‌ لای مام جه‌لال له‌وێش ئیعتراف ده‌كات كه‌ سه‌دام ناردویه‌تی تۆ تیرۆر بكه‌م و ده‌ڵێت سه‌دام منی ناردوه‌ تۆ بكوژم!! ئه‌وكاته‌ له‌ ئاوه‌ژێ‌ بوو، فوئاد ماوه‌یه‌ك له‌وێ‌ مایه‌وه‌ دوای ئه‌وه‌ فوئاد ڕۆیشته‌وه‌ به‌غدا. دیاره‌ پێی وتبون كاره‌كه‌م پێنه‌كراوه‌.
ڕۆژی نه‌ورۆزی ساڵی 1984 له‌ سورداش نه‌ورۆزێكی گه‌وره‌ بوو، من خۆم له‌وێ‌ بوم (فوئاد ت) هات بۆ ئه‌وێ‌ كامێرایه‌كیشی هێنابوو وێنه‌ی ده‌گرت، له‌وێ‌ كامیراكه‌یان لێ‌ سه‌ند، بیرمه‌ مولازم عومه‌ر ئه‌مری كرد، وتی بڕۆن ئه‌و كامێره‌ی لێ‌ بستێنن. هێنایان و دوایێ‌ كه‌ نه‌ورۆزه‌كه‌ ته‌واو بوو هه‌موو له‌ماڵی مولازم عومه‌ر دانیشتبووین، مه‌وزوع كرایه‌وه‌ مام جلال وتی به‌ڕه‌ڵای بكه‌ن، بابڕوات فلیمه‌كه‌ی لێ‌ بسڕه‌نه‌وه‌. مام وتی چونكه‌ ئێستا بیگرم سبه‌ینێ‌ 100 تاڵه‌بانیی دێنن واسته‌ ده‌كه‌ن و ده‌ڵێن ئازادی بكه‌، بۆیه‌ با بڕوات و پێویست ناكات.
ساڵی 1987 بۆ 1988 به‌یانیه‌كی زوو كات ژمێر 7ی به‌یانی زه‌نگی ته‌له‌فون لێی‌ دا، وتم به‌ڵێ‌ جه‌نابت كێی؟ وتی من سه‌ڵاحی شێخ شه‌ره‌فم!! دوای هه‌واڵ پرسین، وتم ئه‌وه‌ له‌كوێوه‌ قسه‌ده‌كه‌یت؟ وتی له‌ ئوردنه‌وه‌. وتم خێره‌ كاك سه‌ڵاح چی قه‌وماوه‌؟ وتی هیچ نییه‌ دڵت هیچ نه‌كات مام جه‌لال له‌سوریایه‌؟ وتم به‌ڵێ‌ له‌ سوریایه‌. وتی پێی بڵێ‌ سبه‌ینێ‌ (فوئاد ت) دێت بۆلای. منیش وتم (فوئاد ت) چی ده‌كات و دێت بۆ ئه‌وێ‌؟ وتم پێی ناڵێم! وتم كاك سه‌ڵاح چیه‌ خێره‌؟ وتی من سه‌ڵاح نیم، من (فوئاد ت) وتم باشه‌ بۆ ده‌ڵێت سه‌ڵاح؟ وتی ئه‌وه‌ نهێنیه‌ له‌نێوان من و مامجه‌لال. وتی بڵێی سه‌ڵاح شێخ شه‌ره‌ف یه‌عنی (فوئاد ت)، خۆیشی به‌درۆ خسته‌وه‌.
ئه‌وكاته‌ هێرۆ خان و مام جه‌لال به‌سه‌فه‌ر هاتبونه‌وه‌ بۆ ئێره‌. دوای تۆزێك چوم بۆ ماڵی مام، مام جه‌لال دانشتبوو له‌گه‌ڵ هێرۆ خان نانی به‌یانیان ده‌خوارد، هیوای شێخ جه‌نگیم له‌گه‌ڵ خۆم برد، هیوا-ش لێره‌ بوو، له‌نوسینگه‌ ده‌خه‌وت. هێرۆ خانم بانگ كرده‌ مه‌تبه‌خ پێم وت هێرۆ خان حاڵ ومه‌سه‌له‌یه‌كی واهه‌یه‌، وتی باسی مه‌كه‌ لای مام خۆم به‌خۆم پێی ده‌ڵێم. هێرۆخان پێی وت پێی نه‌وت نازانم، به‌ڵام له‌هه‌مان ڕۆژ هاتبو بۆ سوریا ئۆتۆمبێلێكی عێراقی، جۆری شۆفرۆلێته‌ كۆنه‌كان، كه‌ دێته‌ سنوری ده‌یگرن، كه‌ ده‌یگرن ئامێری پشكنینی دڵ و جۆره‌ها ئامێرو كه‌لوپه‌ل و پاره‌یه‌كی زۆری پێیه‌، نزیكه‌ی 25000 جونه‌یهی ئوسته‌رلینی و دۆلاری پێبووه‌؟ له‌گه‌ڵ حه‌فتا هه‌زار دیناری عیراقیی كه‌ ئه‌وكاته‌ زۆر زۆری ده‌كرد.
كه‌ ده‌ستگیری ده‌كه‌ن ده‌ڵێن بۆچی هاتویت؟ ده‌ڵێت من هاتوم بۆ زیاره‌تی جه‌لال تاڵه‌بانی!! ئیدی ده‌یگرن ده‌یخه‌نه‌ به‌ندیخانه‌و دیاره‌ خه‌به‌ری مام جه‌لال ده‌ده‌ن ته‌حقیقی لێ‌ ده‌كه‌ن.
حه‌فته‌یه‌ك ده‌ڕۆژی پێچوو، مامجه‌لال ده‌یویست سه‌فه‌ر بكات، نیوه‌ڕۆ له‌كاتی نانخواردن من و هێرۆ خان و مامجه‌لال و هیوای شێخ جه‌نگی دانیشتبوین، نانمان ده‌خوارد به‌بیرمه‌ دۆڵمه‌مان ده‌خوارد. مام جه‌لال وتی هێرۆ پێم وتن حكومه‌ت ئه‌گه‌ر فوئادتان له‌به‌ر من گرتوه‌، به‌ره‌ڵایبكه‌ن.
دووساڵ یان زیاتری به‌سه‌ردا تێپه‌ڕی به‌ر له‌جه‌ژنی وابزانم 1990 بوو، ڕۆژێك ته‌له‌فونیان له‌ موخابه‌راتی عامه‌ بۆ كردم وتیان داوات ده‌كه‌ن، چووم بۆلای لیوا حه‌سه‌ن كه‌ لێپرسراوی موخابه‌راتی عه‌سكه‌رییه‌ وتیان ده‌مانه‌وێت فوئاد به‌ره‌ڵا بكه‌ین به‌س ده‌ڵێت من ناڕۆمه‌ ده‌ره‌وه‌ ده‌بێ ئیللا عه‌بدوره‌زاق بێت ئه‌گینا ناڕۆم.

*مه‌به‌ستی تۆ ده‌بێ بچیییت؟
• به‌ڵێ‌ به‌ڵێ. پێی ده‌چێت پێشتر چه‌ند جارێك به‌ڕه‌ڵایان كردبێت و دواتر چاودێریان كردووه‌و گرتویانه‌ته‌وه‌، تا بزانن كێ ده‌بینیت و چی ده‌كات، به‌ڵام ئه‌م بڕیاریاندابوو ئازادی بكه‌ن و نه‌یگرنه‌وه‌. بۆیه‌ ئه‌ویش متمانه‌ی‌ نه‌بوو بۆیه‌ وتبوی ده‌بێ‌ فڵان بێت وه‌رمگریت له‌ به‌ندیخانه‌. منیش بڕێك پاره‌م پێداو ئوتێلم بۆی گرت و بردمانه‌ خه‌سته‌خانه‌ پشكنینمان بۆی كردود واتر ژنه‌كه‌ی‌ هات و دیاربوو ره‌گه‌زنامه‌ی‌ نه‌مساویشی هه‌بوو چووه‌ سه‌فاره‌ت و پاسپۆرتیان بۆ دروستكردوو چونه‌ ئه‌وروپا وابزانم چوونه‌ بریتانیا چونكه‌ ژنه‌كه‌ی له‌به‌ریتانیا بوو، دواتر فوئادمان ونكرد وابزانم هاته‌وه‌ كوردستان و كوژرا، به‌ڵام وورده‌كاریی و زانیارییم نییه‌ له‌سه‌ری‌. جا بێینه‌وه‌ سه‌ر مه‌سه‌له‌كه‌، ئه‌وه‌بوو كه‌ چووم فوئاد ئازاد بكه‌م وتم ئه‌وه‌ له‌كوێ زیندانی بووی، وتی من له‌گه‌ڵ وتی له‌ (ته‌دمور) له‌گه‌ڵ كادرانی په‌كه‌كه‌ زیندان بووم. به‌وه‌ زانیم فوئاد بۆچی هاتووه‌ بۆ سوریا! بۆم ده‌ركه‌وت كه‌ حكومه‌تی عێراق و توركیا ڕێككه‌وتوون فوئادیان ناردوه‌ عه‌بدوڵا ئۆجالان بكوژێت.

*به‌ڵام چۆن؟
-فوئاد توانای هه‌بوو نه‌خۆشخانه‌ بكاته‌وه‌، پاره‌یه‌كی زۆریان پێدابوو، كه‌ نه‌خۆشخانه‌ بكاته‌وه‌ به‌ خۆڕایی جه‌ماعه‌تی په‌كه‌كه‌ چاره‌سه‌ر بكات ورده‌ ورده‌ خۆی له‌ عه‌بدولڵا ئۆجالان نزیك بكاته‌وه‌و ڕۆژێك ده‌رزیه‌كی لێ‌ بدات و بیكوژێت! پێم وایه‌ ئیعترافیكردبوو به‌ڵام تائێستا ئه‌وه‌ بڵاو نه‌بوه‌ته‌وه‌.

*باشه‌ له‌نێوان ساڵانی 1990 تا ساڵی 1998 زروه‌تی په‌یوه‌ندی نێوان سوریاو په‌كه‌كه‌ بوو، ئه‌وان لێره‌ مه‌عه‌سكه‌ری گه‌وره‌یان هه‌بوو؟
-گه‌وره‌ترین معه‌سكه‌ریان هه‌بوو، بۆ مێژوو ڕاستیه‌كه‌ی بڵێین عه‌بدوڵا ئۆجالان به‌ئاشكرا شتی نه‌ئه‌كرد، هه‌ر به‌نهێنی ده‌یكرد.

*كه‌ی‌ ده‌نگوباسی رۆیشتنی ئۆجالان له‌سوریا ده‌ستی پێكرد؟
-له‌به‌هار بوو ڕۆژێك هاتن وتیان عه‌بدوڵا ئۆجالان تۆو كه‌ریم خانی برادۆستی ده‌عوه‌تكردوه‌، شه‌و چوینه‌ لای، كه‌چوین بۆ ئه‌وێ‌ له‌ ڤێلاكه‌ی له‌ (دارییه‌) بینیمان پڕه‌ له‌خه‌ڵك، ژماره‌یه‌كی زۆر خه‌ڵك له‌وێ‌ بوون، وه‌ك و ئاهه‌نگ بكه‌ن گۆرانی و مۆسیقا هه‌بوو، ئێمه‌ دانیشتین و عه‌بدوڵا ئۆجالان هات له‌ نێوان من و كه‌ریم خان دانیشت، دوای ده‌ستی به‌قسه‌كردن كرد. یه‌كه‌مجاربوو ببینم به‌ئاشكرا ئیشبكات. دوای ئه‌وه‌ به‌ماوه‌یه‌ك ده‌رچوو كه‌ توركیا داوای كردووه‌ كه‌ ده‌بێت عه‌بدوڵا ئۆجالان له‌ سوریا نه‌مێنێت و هێزیان كۆكرده‌وه‌و هه‌ڕه‌شه‌یان كرد. هه‌ر به‌هار بوو پێش ئه‌وه‌ی عه‌بدوڵا ئۆجالان بڕوات به‌ 15 بۆ20 ڕۆژ، من و ئه‌حمه‌د بامه‌ڕنی ئێستا ئه‌و ماوه‌و مه‌حمود عیدۆی ئێزیدی و دانای ئه‌حمه‌د مه‌جید، ئه‌و چواره‌ چوین بۆلای. ڕۆژه‌كه‌ یه‌ك ڕه‌شه‌بای ده‌هات زۆر ناخۆش بوو، ئێمه‌ی له‌باخچه‌كه‌ دانا دووجار وتم ئاپۆ بابچینه‌ ژوره‌وه‌، وتی نا. خه‌ڵكی كه‌ ده‌بوایه‌ پێی بڵێن سه‌رۆك، به‌ڵام بۆ من ده‌یگوت قه‌ینا تۆ پێم بڵێ‌ ئاپۆ، وتی نابێت تومه‌ز ده‌یویست قسه‌ بكات ژوره‌وه‌ش دیاره‌ ئه‌مین نه‌بوو. یه‌كه‌م جار بوو ره‌خنه‌ له‌سوریا بگرێت و كورد وته‌نی زه‌می سوریا بكات، منیش پێم وت ئاپۆ وه‌ك و من سوریه‌كان بناسم، ته‌سلیمی توركیات ناكه‌ن، به‌ڵام له‌وانه‌یه‌ پێت بڵێن لێره‌ بڕۆ. وتی نا ئه‌مانه‌ جێی سیقه‌نین (حافز ئه‌سه‌د) برای خۆی زیندان كرد، منیش وتم جا برای خۆی موئامه‌ره‌ی له‌سه‌ركرد، خۆ تۆ موئامه‌ره‌ت له‌ حافز ئه‌سه‌د نه‌كردوه‌! دوای ئه‌وه‌ به‌ره‌ئی ئێمه‌ ده‌كه‌یت بڕۆ، وتی ئاخر بۆ كوێ‌ بچم؟ من یه‌ك له‌و كه‌سانه‌ بووم وتم بڕۆ بۆ كوردستان له‌هه‌مان كاتدا دوو به‌دیل واته‌ هاوشێوه‌ بۆخۆت په‌یدا بكه‌، خه‌ڵك هه‌یه‌ زۆر شكلیان له‌تۆ ده‌چێت، هاوشێوه‌یه‌كت با له‌ ئه‌وروپا بێت، هاوشێوه‌یه‌كیشت با له‌توركیا بێت، به‌ڵام خۆت له‌كوردستان به‌. ئه‌و هاوشێوانه‌ با هه‌ر ماوه‌ ماوه‌ ده‌ركه‌ون، لێدوان بده‌ن و ڤیدیۆ بڵاوبكه‌نه‌وه‌، بۆ ئه‌وه‌ی سه‌ر له‌توركیا بشێوێنن. وتی كوردستان ئه‌مین نییه‌ وتم كوردستان بۆ ئه‌مین نییه‌؟ ئێمه‌ ئه‌و چه‌ند ساڵه‌ له‌ كوردستانین مامجه‌لال هه‌موو حكومه‌تی عێراق به‌دواوه‌یه‌تی نه‌یتوانیوه‌ بیگرێت، وتی نا من 5 وڵاتی ئه‌وروپی پێشوازیم لێ‌ ده‌كه‌ن!! ده‌چم بۆ ئه‌وروپا ناوه‌كانی نه‌هێنا.

*هه‌رئه‌وه‌نده‌ بوو گفتوگۆكه‌تان؟
-درێژه‌ی‌ كێشا، به‌ڵام ئه‌وه‌ قسه‌ی من بوو، دوای ئه‌وه‌ من عه‌بدوڵا ئۆجالانم نه‌بینیوه‌، ماوه‌یه‌كی پێچوو وتیان عه‌بدوڵا ئۆجالان ڕۆشت لێره‌ چۆته‌ یۆنان، ئه‌و عومه‌ر ئۆسییه‌ی‌ له‌گه‌ڵ بوو، له‌ناو فرۆكه‌كه‌ عومه‌ر ئۆسێی له‌گه‌ڵ بوو، دوایی بۆی گێڕاینه‌وه‌ وتی له‌ یۆنان نه‌یان هێشت له‌ناو فرۆكه‌كه‌ش دابه‌زین، وتیان نابێت دابه‌زن له‌ فرۆكه‌كه‌! وتی ئێمه‌ ترسمان لێنیشت هه‌ر له‌وێوه‌ ڕاده‌ستی توركیامان بكه‌ن! وتی ئه‌وانه‌ی كه‌ دێن خزمه‌تگوزاره‌كانی فرۆكه‌ 6 پاككه‌ره‌وه‌مان به‌بارمته‌گرت وتی وتمان هه‌ر شتێك بكه‌ن ئێمه‌ش ئه‌وانه‌ ده‌كوژین! له‌ كۆتایدا وتیان نا ئێمه‌ ئه‌وه‌تان له‌گه‌ڵ ناكه‌ین ڕێگاتان ده‌ده‌ین بڕۆن. وتی په‌یوه‌ندی كرا به‌ڵام هیچ شوێنێك پێشوازی لێنه‌كردین! یه‌ك له‌ فرۆكه‌خانه‌كانی ڕوسیا له‌وێش كابرایه‌ك هه‌یه‌ ئه‌ندام په‌رله‌مانی روسیاسه‌ كورده‌ به‌ ئه‌سڵ ئه‌و پێشوازی لێكردین، بردینیه‌ ماڵی خۆی. دوای له‌وێ‌ نه‌مایه‌وه‌و خۆی گه‌یانده‌ ئیتاڵیا، كه‌ گه‌یشته‌ ئیتاڵیا مام جه‌لال لێره‌بوو، مام جه‌لال بانگی منی كرد وتی بڕۆ باره‌گای په‌كه‌كه‌، باره‌گایه‌كیان هه‌بوو وتی بڕۆ پێیان بڵێ‌ یه‌كه‌م شت له‌ ئیتالیا نه‌جوڵێت، دوو به‌یانێك ده‌ركات بڵێ‌ من شه‌ڕی چه‌كداریی ڕاده‌گرم ته‌نها خه‌باتی سیاسی ده‌كه‌م، سێ‌ هه‌تا پێیان ده‌كرێت با له‌هه‌موو دنیا خۆپیشاندان بكه‌ن، كه‌ خۆپیشاندانه‌كه‌یان كرد به‌یانه‌كه‌ ده‌ركه‌ن، وتیشی له‌ ئیتاڵیا نه‌جوڵێت، به‌ڵام رۆیشت. ئه‌وه‌ مه‌حمود عوسمان ماوه‌ وتی ڕۆژێك پێشتر من ڕۆشتم بۆ ئه‌وێ‌ وتی كه‌ چووم بۆ لای، جا مه‌حمود عوسمان ناڵێت ئه‌مریكیه‌كان پێیان ووتوم، وتی پێم وتوه‌ نه‌جوڵێت له‌ جێی خۆت، دوو ڕۆژی دیكه‌ ئه‌مریكیه‌كان دێن ده‌تبینن، به‌ڵام به‌ قسه‌ی نه‌كرد ڕۆشت.
سوریه‌كان پێیان وتبوو عه‌بدولحه‌لیم خه‌دام كه‌ جێگری سه‌رۆك كۆمار بوو پێی وتبوو ئێمه‌ گوشارێكی زۆرمان له‌سه‌ره‌، تورك هێزێكی زۆری هێناوه‌، ئێمه‌ ئێستا توانای‌ ئه‌و شه‌ڕه‌مان نییه‌ بیكه‌ین، له‌به‌ر ئه‌وه‌ ئه‌گه‌ر تۆ بتوانیت 6 مانگ خۆت بشاریته‌وه‌..

*له‌ سوریا خۆی بشارێته‌وه‌؟
-له‌هه‌ر شوێنێك خۆی بشاریته‌وه‌و دیار نه‌مێنیت. دیاره‌ نه‌یانویستوه‌ ئه‌وه‌ قسه‌ی خۆیانه‌، دوایی بۆمنیان گێڕاویه‌وه‌، عومه‌ر ئۆسێش ئه‌و قسه‌یه‌ ده‌زانێت ده‌توانی لێی بپرسی.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*