سەرەکی » ئاراستە » مەحمود گەرمیانی شنەی گەرمیان

مەحمود گەرمیانی شنەی گەرمیان

ئازاد سه‌راوی

لە گەرمیان دا لە جێی گڕە (بوویت بە شنە)، لە كێوو چیاو بەندەن دا بوویت بە كانی (بوویت بە زنە) لە شارەزور بوویتە قەرسیلیێكی سەوز و بەدەم شنەی شەماڵەوە دەشنێیتەوە ئەی شنەی شەماڵی فێنك، كێ دەیزانی لە گەرمیاندا یەكجاری سەر دەنێیتەوە.
گەلە جاشێك بەدەستی چەپەڵی ئەوان، گەڵای تەمەنت هەڵوەری بووە خەزان، پیاوە نەمر و تێكوشەر و دەم بە خەندە و گەردن كێلەكەی گەرمیان
لە قوڵایی گەرمیانەوە، لە گردی كوڵێنجە ڕێ ڕێ و لە و پێدەشتە گڕكانەوە، كاتێك هەرەس باڵی ڕەشی بە سەر وڵات دا كێشابوو، ئەسپی ئە یلولی گلاند و شاخ و بێدەشتی لول دابوو، هەرچی هەبوو هەڵیلوشی، هەردە و هەڵەتی گەرمیانی بە بەرگێكی ڕەش داپۆشی.
وڵات كزر و كش و مات بوو، زەوی وشك و، ساڵ و وەرزێكی نەهات بوو، دار و درەخت ڕەنگی هەرەسی پۆشیبوو، بەعس مەستی سەركەوتن و سەرچوپی كێشی خۆشی بوو، زەوی چاوەڕێی بارینی بارانێك بوو گەروی وشكی تەڕكاتەوە، تەپووتۆزی هەرەسی لێ بتەكێنێ، بەرگی یەخسیری داكەنێ و مژدەی ئازادی بۆ بێنێ.
لە گەڵ یەكەم ڕێژنە بارانی شۆڕش دا، كانیاوەكان ژیانەوە، ڕژانە ناو گەروی تینوی گەرمیانەوە، هەرچی زنە و كوێرەكانی و جۆگەلەیە بووژانەوە، گەرمیان بووە كوانوی خەبات و شۆڕش و هەستانەوە.
لە پێدەشتی گەرمیانەوە كەڵە پشكۆكانی شۆڕش گەشانەوە، بەر بوونە پوش و پەڵاشی داگیركەران، بوونە مەشخەڵی شۆڕش و لە قەندیل دا هەڵبوون و داگیرسانەوە، یەكێك لە و كەڵە پشكوانە سەرەتای داگیرسانی بوو، شەهید مەحمود گەرمیانی بوو.
محەمود گەرمیانی فەرماندەی زەبر قورس و كوڕی ئەو پێدەشتانە بوو، هەنگا و هەنگا و بەرە و لوتكە سەردەكەوت، لە گەرمیان دا باڵای كرد و لە شارەزوردا دەركەوت.
كام داستان و نەبەردی یە، زور گەورە و قورس و گرانە، مەحمود گەرمیانی دەناسێ و ورەی كەڵەگەتی دیووە، كام هەڵمەت و كام شەڕی دەستە و یەخەیە، كام كەمین و كام بۆسەیە، توند و تۆڵ و پڕ تەڵەیە، لە بەردەمی هەڵمەتی مەحمود گەرمیانی پوچەڵ بۆتەوە و تەقیوە، كام سوپا و كام گەلە جاشە دڕو پڕو، كامە لەشكرە پۆشتەیە، لە بەردەم باوەڕی بەرزی مەحمود گەرمیانی بەزیوە.
لە بێناوی سەر فرازی كوردستان دا تێكۆشەر و ماند و نەناس، خوشە ویستی بوو نیشتمان هێند گەورە بوو، وەكو خەزاڵ و كاكە لاس، وەكو بێستونی كێو كەن بوو، كام كێوو كامە سەنگەرە قوڵ و قایم و قەڵا بوو، وەك ئاگر بەر دەبووە گیانی و وەك بێستون هەڵی دەكۆڵی، مەحمود گەرمیانی عاشق بوو عاشقی شیرینەكەی وەتەن، نەك عاشقی شیرینی فەرهادی كێو كەن.
چەمی چەقان، هەندێك جاران بۆ پێشمەرگە دەبووە ژوان، جێژوانێك بۆ پەڕینەوە، پەڕینەوە بە خەندە و پێكەنینەوە، بە نوكتە یەك ڕێگای دور و، پڕ گومانی بۆسە و ڕێگە و كەمینەوە، هەموی دەڕەوینەوە، وای لێ دەهات.
چەمی چەقان، ئە ویش بە پێكەنینەوە، خۆی دەنەوان، مات و مەنگ و بی دەنگ دەبوو هەتاكو دەپەڕینەوە.
شارەزور ئیستاكەش پڕە، لە بۆنی مەحمود گەرمیانی، لە جەولەی شاتوان و ڕەزڵە و لە گورجی هەنگاوەكانی، لە پیاسەی ئێوارانی ناو گردان و لە بزە و لە خەندەكانی، لە دوا سەرنج و ڕوانین و یادەوەری، لە وێنەی ئەحمەد شاتوانی.
هەر چوار وەرزی ساڵ دەتناسن دەزانن كێیت، دەزانن ڕیبوواری كام ڕێیت، زستان وێنەی تۆی لە یادە بە قەمسەڵە یەكی خاكی و بە جوتێك پوزەوانەوە، ڕێگات دەبڕی و شەختە بەندت دەشكاند و بەفری ڕێگەت دەتوانەوە.
بەهار هەرگیز تۆی بیر ناچێت لە بیرەوەری دا ماوە، كاتێك چە پكێك گوڵت دەچنی نێرگزت دەلاواندەوە، دەتكردە چەپكێ دوان و سیان، لە سەر گوڕی نوێترین شەهید دات دەنان.
هاوین هەمیشە تۆی بیرە، لە جەولەدا لە گەرمیانەوە بوو كوێستان، چەند عارەقەی ڕێگەت دەسڕی، بەڵام ماند و نەدەبوویت و نە دەوەستان، ئێوە گەرما و ڕێگەی دورتان هەڵدەپڕوكان.
پایزیش ئیوەی لە یادە و دەتانناسێت، كە رێبوواری ڕێی سەروەرین، لە وەرزی گەڵا ڕێزان دا شەهید بوون و بە هێمنی هەڵدەوەرین.

print

 107 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*