بێ ناونیشان

فەرەیدوون سامان

سڵاو گوڵی غوربەت
لەدوورەوە
بۆنت دەکەم
بۆنی عیشق
هەناسەی ئاسوودەگی ژیان
خەمی نەگەیشتن بە دیدارت
بە دیداری ئەو چاوانەی پڕن
لە سۆزی عاشقێکی سەرگەردان
لەخەمی باوەشی گەرمی
میهرەبانی تۆ…
کوانووی گڕی عیشقی ئاگرینم
لەنێو سەهۆڵبەندانی چاوەروانیدا
دەبن بە خۆڵەمێش…

جار جار دەبیتە بارانی رەحمەت
جارجاریش گێژەلووکەی نەفرین
کە پشت لە یاسای عیشق دەکەی
مەرگ دەبێتە ناسنامەی ژین…

کەی باران
لە تەڕ بوونی من و تۆدا پەژیوان بوویەوە
شەپۆل لەکەنار هەڵگەڕایەوە
شەرع و یاساکانیش لە من و تۆ…
لەو ونگەیە
کە تۆم ناسی
لەنێو هەورە تاریکەکاندا
بەدوای ئاسۆیەکی تردا گەڕام
رەنگەکان شێوەیەکی تر
خۆیان نواند…
رۆژانێك بوو
لە نێو چاوەكانی تۆدا
بەدوای رەنگێكی تردا گەڕام

ئاخر عیشق وێڕای وەهمێک
خەیاڵێکی سەرشێتانە…
چی بە شاعیر بەخشیوە؟

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*