سەرەکی » وتار » رەهبەر سەید برایم » شوێنێك لەكۆیە،بەخوێن تاپۆیە

شوێنێك لەكۆیە،بەخوێن تاپۆیە

ڕۆژگارەكان تۆماری تەمەنن، تۆماری یادگارەكان كاریگەر و پڕ دیمەنن، ئەوێ‌ ڕۆژێ‌ دیوارەكان گوێیان هەبوو، پەنجەرەكان چاویان هەبوو، دەرگاكان كلیل درابوون، ئەشكەوتەكان زاریان هەبوو شەقاموو تولەڕێیەكان، شارو لادێیەكان، دەشت و چیاكان قوڕگیان گیرابوو، زنە و كانی و كارێزەكان كونی چاویان كوێر كرابوو، سەر سنوورەكان ئاویان هەبوو، ئاوەدانیان نەبوو، دێ رووخاوەكان ئاگر و ئاگردانیان نەبوو، بەڵام ئاگر و چرایەكی كەسك و نوورانی بەدی دەكرا، ئاسۆی ئومێدو پەلكە زێڕینەی باوەڕ و گیانی بەرگری و قارەمانی بەدی دەكرا، ئەویش (ی.ن.ك) بوو، نوێخواز و تازە و تۆكمەی بەر خودان بوو، لە و وەختە سەختە، لەو ڕۆژە ئاڵۆزە، ئاسمان و زەمان و زەمین تەسك كرابۆوە، پف لە ئاگردانی شۆڕش كرابوو كوژابۆوە، بەڵام هەمیشە دەركەوتووە، بیر و باوەڕ و ورەبەرزی هەر سەركەوتووە، دەنگی گەل لە تۆپ بەهێزترە، ڕوداوەكان لە وشەكان زۆر بەرزترە، ئاگر لە پڕیشكێكەوە گڵپە دەسێنێ‌، بیر و باوەڕ، شاخ و كێو دەهەژێنێ‌، چۆن پەڕەسێلكە و چۆلەكە پوش بە پوش هێلانە درووست دەكەن بۆ نوایەك، لەكون و كاژێرو بن پنچك و پەنایەك، لە بن میچ و ناوداران و بەرزایەك، چۆن تنۆكە ئاو بەرد كون دەكاو بژوێن و مێرگێك سەوز و شین دەكا، دەشتایەك رەنگین دەكا! ئەو هاش درەختی كەسكی هەڵچووی (ی.ن.ك)، بە خوێن ئاودراوە، بە ئارەقە و ڕەنج و خەباتی بێ‌ وەستان، هاتۆتە بەر و سێبەر، بە كەم دەرامەتی و دەردەسەر، هەموو درەختێ پێشتر تۆیەك بووە، هەموو گوڵێكیش كە دەپشكوێ‌ پێشتر چرۆیەك بووەدرەخت كە سەوز بووە، كە باڵای بەرز بووە، بەڕەنج و خوێنی شەهیدان، ڕەگی چەسپیوە لە ناخی نیشتمان، ئەڵماس لە ناو قوڕ و لیتەش هەر ئەڵماسە! ژەنگ ناهێنێ و تێك ناچێت، سەنگی مەحەك قیاس و ئەساسە، لەگەڵ ئەسڵان، هەموو فەسڵان، هەتا پەسڵان، خۆر لە وە گەورە ترە كە دەیبینی، ڕوناكتر و بە هێزترە تیشك و تینی، داری درێژ بە هەموو بایەك دەشنێتەوە، ئاجار و پاچڵ و پەژو قاژ وئاژووی لێدەبێتەوە، درەختی ڕەگ پتەو ڕەنجی زۆری بۆ كێشراوە، بۆ كوشتنی مێشوولە شمشێر هەڵنەكێشراوە، ڕوحە جوانەكان هەر بە یەك دەنگەن، (دۆست خەبەر دارەن عالەم گشت خەفتەن )، وڵاتی كۆیە خاكێكی ڕەسەنی هەیە، شەتڵی مەردانەی لێ‌ دەڕوێ، لە هەموو زەمین و زەمانێك لێی هەڵدەكەوێ‌ و گوڵی جوانی لێ‌ دەپشكووێ‌، ئاسمانی كۆیە ڕوون گەش و پڕ ئەستێرەیە، لە قوربانی و خەبات و خوێن ئەو بەرچاو تێرەیە، لە گوندێكی قشت و قنجی، وەك مام قلینجی، چواردە شەهیدی داوە، وەك مانگی چواردە دیارە، مێرگی مەرگی بە خوێن ڕەنگینە و بژار و بژوارە، شەهیدەكانی:
(ئەحمەد بڕنۆ، یەكێتی مەجید، شەفیق حاجی برایم، بێكەس، بێ‌ بەش، عەریف حەوێز، گەیلان سابیر، محێدین فارس، شێروان زێندین، جەمال جەلال، رزگار عەبدولڵا، قادر جەنگی، ڕۆستەم حەمەدمین، ئەحمەد كریم).

باڵای وەك بڕنۆیەك بوو،
شەهیدی فەرماندە ئەحمەد بڕنۆ، بنەچڵ و پشكۆژ و تۆیەك بوو، بوو بە درەختێ باڵای وەك بڕنۆیەك بوو، ڕەگ و بنجی، لە گوندی مام قلینجی، پێ‌ گەیی و هاتە بەر، لەوێ‌ ژیانی بردە سەر، بەهەر هۆیەك بێ نەیخوێند و نەبووە خوێندەوار، بووە جوتیارێكی بە تواناو بە كار، وەك جوتیارێكی دەگمەن و كەم وێنە، نمونەی نەبوو لە دار كردن و دروێنە، شەهید ئەحمەد بڕنۆ، شێواز هەڤیاز و هەژیا و تەڤكۆ، هەمیشە قۆڵی لێ‌ هەڵدەكرد، گورجوو بە جوڵەو بە دەست و برد، ساڵی 1978 بۆتە پێشمەرگە، لە (وەرمێنگە) دەركەوت چەند بە جەرگە، پلە بە پلە پێگەیوە، قۆناغی پێشمەرگایەتی بڕیوە، بە ئازایەتی و بە هیمەتی خۆی و بە هەوڵ و تەقەڵا، بۆتەفەرماندەی كەرت و جێگری قوەتی حاجی قەڵا، لە ئاگردانی شۆڕش پشكۆیەك بوو، لە سەر چیای باواجی هەڵۆیەك بوو، لە داستانێكی پڕشانازی دا، لە قارەمانیەكی بێ‌ وێنەو گیان بازیدا، لە ناو جەرگەی شاری كۆیە، بە قرچە و نوێژی نیوەڕۆیە، لە 16/8/1981لە نزیك سەنتەری گەنجان لێرانەدا، لە چالاكیەكی بوێرانە دا، ئەحمەد بڕنۆو یەكێتی مەجید شەهید كران و مامۆستا عەزیز فەرماندەی قوەتی حاجی قەڵاو ئەمیر تیمارۆكی و قادر تیمارۆكی و شەمدین حەوێز بریندار كران، ئەو چالاكی و شەڕە وا دەنگی دایە وە، دوژمن واتۆقی و شەرمەزاری بۆ مایەوە، گەرچی ئەو داستانە پڕ جەسارەت بوو، بەڵام لە ڕاستی دا زۆر خەسارەت بوو، لە دەستدانی شەهیدان ئەحمەد بڕنۆ و یەكێتی مەجید و بریندار بوونی فەرماندەی سەرەكی مامۆستا عەزیز، قۆشەن لە كۆیە بێ‌ شوان مانەوە، لە گوند و دەشت و شاخان بێ‌ سەر دەخولانەوە، هیچ شتێك وەك فرمێسك زووتر وشك نابێتەوە، بەهای ژیان لە مەر گدایە هەرگیز ناگەڕێتەوە، جوانەمەرگ و شەهید، یەكێتی مەجید، نەك ناوی ڕاستەقینەی یەكێتی بوو، بەناخ و خوێن ومێشك و دڵ (یەكێتی) بوو، خوێندكاری پیشە سازی بوو، بۆ هەموو ژان و ژیانێك ڕازی بوو، هونەرمەند و دەنگ خۆش بوو، خاوەنی باوەڕو بە بیر و هۆش بوو، لە كۆڕو دانیشتن دا بە جۆش و خرۆش بوو، چوست و چالاك و جەربەزە بوو، فەرماندەی مەفرەزە بوو، قۆز و قشتیلە و پرچ درێژ، گەش گەش وەك ئەستێرەی گەلاوێژ، دیار و درەوشاوەبوو، بەركەتی ولێوەشاوە بوو،، لەگەڵ شەهید ئەحمەد بڕنۆدا، لە ناو جەرگەی شاری كۆدا، بەیەك ڕۆژ، لەیەك شوێن، شەهید كران و گەوزان لە خوێن، بۆیە ئەو شوێنە لە كۆیە، بە خوێن تاپۆیە، موڵكی (داژدە )ی شەهیدان یەكێتی و ئەحمەد بڕنۆیە.

وشە نامۆیەكان:
پەسڵان : قیامەت
ئاجار : تۆی ڕوەك
پاچڵ : ڕەگی سەرەكی
پەژ : بەشی دار
قاژ : لق
وەرمێنگە : شوێنی سەرهەڵدان
هەڤیاز : ممتاز
هەژیا : شەریف
تەڤكۆ : كامل
پشكۆژ: چرۆ
قۆشەن : لەشكری چەكدار
بژوار : زەوی سەوزی پڕ گیا
ئاژوو : زیادبوونی لقی دار
داژدە : موڵك

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*