سەرەکی » ئەدەب - سێبەر و سایە » تێڕوانینی ماركسییانه‌ بۆ ئه‌ده‌ب باشترین فریادڕه‌سم بووه‌، ئه‌مه‌ فێری كردم و منی كرده‌ ره‌خنه‌گر

نووسه‌ر و ره‌خنه‌گر یاسین نه‌صیر

تێڕوانینی ماركسییانه‌ بۆ ئه‌ده‌ب باشترین فریادڕه‌سم بووه‌، ئه‌مه‌ فێری كردم و منی كرده‌ ره‌خنه‌گر

ژینۆ عه‌بدولڵا*

زۆرن ئه‌وانه‌ی‌ له‌و كاته‌وه‌ی‌ ئه‌م سه‌رزه‌مینه‌ی‌ ناوی‌ نراوه‌ عێراق په‌یدابووه‌، خاك وخه‌ڵك و خاووخێزان وكه‌سوكار و دۆست وئازیزانیان جێهێشتووه‌ و هه‌نده‌ران تاراوگه‌نیشینیی بووه‌ته‌ په‌ناگه‌یان بۆ سه‌لامه‌تیی جه‌سته‌ به‌ڵام غوربه‌تی‌ پڕ له‌ ئازار و دوور وڵاتیی مه‌ینه‌تبار دڵ و دروون و ره‌وانی گوشیون و تاڵیی و سوێریی زۆری‌ پێ چه‌شتوون. یه‌كێك له‌و كه‌سانه‌ی‌ سه‌رباری‌ ناو و ناوبانگ و به‌هره‌ و به‌رهه‌می‌ به‌پێز و پێگه‌ی‌ دیار و به‌رچاو له‌ كایه‌ی‌ ژیانی‌ ئه‌ده‌بییدا ، بڕیاری‌ جێهێشتنی‌ وڵاته‌كه‌ی‌ ده‌دات نووسه‌ر و ره‌خنه‌گر (یاسین نه‌صیر)ـه‌ كه‌ تائێستا خاوه‌نی 24 كتێبی هه‌مه‌جۆره‌ له‌ به‌شه‌كانی ئه‌ده‌ب و ره‌خنه‌ (شیعر، چیرك، شانۆو هونه‌ری شێوه‌كاریی) دا. نه‌صیر كه‌ له‌ 1992 عیراق جێده‌هێڵێت ، سه‌ره‌تا روو ده‌كاته‌ ئوردون پاشان له‌ دیمه‌شقی‌ پایته‌ختی‌ سوریا ده‌مێنێته‌وه‌.پاش سێ ساڵ و نیو وه‌ك په‌نابه‌رێكی سیاسیی له‌ هۆڵه‌ندا ده‌گیرسێته‌وه‌.
له‌ باسی‌ سه‌ره‌تای سه‌رهه‌ڵدانی چالاكییه‌ رۆشنبیرییه‌كانییدا نه‌صیر ئاشكرای‌ كردووه‌ كه‌ راسته‌وخۆ ده‌ستی‌ داوه‌ته‌ ره‌خنه‌،سیناریۆی هه‌ندێ چیرۆكیش ده‌نووسێت به‌تایبه‌ت ئۆپه‌رێت.به‌م شێوه‌یه‌ به‌ پێچه‌وانه‌ی‌ ته‌وژمی‌ باو وگشتیی باڵاده‌ست له‌ نێو خه‌ڵكانی تردا ده‌بزوێت به‌وپێیه‌ی‌ له‌ نێو ره‌خنه‌گراندا هه‌بووه‌ كه‌پێده‌چێت پاش سه‌رنه‌كه‌وتنی‌ ئه‌زموونی‌ شیعر یا چیرۆكنووسین ده‌ستی داوه‌ته‌ ره‌خنه‌گرتن به‌وه‌ش بوونه‌ته‌ گه‌واهیی ئه‌وه‌ی‌ ده‌گوترێت (ره‌خنه‌گر نووسه‌رێكی فاشیله‌). له‌مه‌وه‌ وای‌ ده‌بینێت كه‌ « سه‌باره‌ت به‌ خۆم هیچ وانه‌بووم و ده‌ڵێم له‌وانه‌یه‌ (نووسه‌ریش ره‌خنه‌گرێكی فاشیل بووبێت)».

براده‌رایه‌تیی له‌گه‌ڵ سامر
ئه‌وه‌ی‌ زانراوه‌ له‌ كایه‌ی‌ ره‌خنه‌ییدا ناوی نه‌صیر و فازڵ سامری ره‌خنه‌گر بوونه‌ دوانه‌یه‌ك و لێك جیانه‌ده‌كرانه‌وه‌. هۆكاری ئه‌م دیارده‌یه‌ش هه‌ر وه‌ك خۆی‌ ئاماژه‌ی‌ پێكردووه‌ بۆ ئه‌وه‌ ده‌گه‌ڕێته‌وه‌ كه‌لێكچوونی زۆر له‌ نێوانیاندا هه‌بووه‌ و پێكه‌وه‌ كارێكی ره‌خنه‌یی چیرۆكیان ئاماده‌كرد كه‌ بریتیی بوو له‌ هه‌ڵبژاردنی نموونه‌ له‌ كورته‌ چیرۆكی تازه‌ی شه‌سته‌كان له‌ عیراقدا.به‌ پێی‌ گێڕانه‌وه‌ی‌ خۆی‌ له‌م كاره‌ ره‌خنه‌ییه‌دا نه‌صیر»چیرۆكه‌كانیان ئاماده‌كرد به‌بێ گوێدانه‌ ئه‌وه‌ی كه‌ خاوه‌نه‌كانیان سه‌ر به‌چ بیروباوه‌ڕو ئایدیۆلۆژیایه‌كن،گرنگ ئه‌وه‌بوو كه‌ هاچه‌رخ و باش بن، جا خستماننه‌ ژێر ركێفی دووجۆر توێژینه‌وه‌وه‌. یه‌كێكیان تایبه‌ت به‌ چیرۆك له‌لایه‌ن فازڵ سامره‌وه‌، ئه‌وی تر له‌لایه‌ن خۆمه‌وه‌، دواجار ئه‌وه‌بووه‌ سه‌ره‌تا بۆ ره‌خنه‌ی هاوچه‌رخی عیراقی كه‌ مۆركی‌ ره‌خنه‌یه‌كی هۆشیاریی كۆمه‌ڵایه‌تیی به‌خۆوه‌ دی له‌ په‌یوه‌ندییه‌كانی نێوان هونه‌ری چیرۆك و شوناسی كۆمه‌ڵایه‌تیدا».
نه‌صیر ئه‌وه‌شی‌ ئاشكرا كردووه‌ كه‌ له‌ راستییدا ئه‌و و سامر براده‌ربوون وهه‌ریه‌كه‌یان خاوه‌نی رێبازی تایبه‌ت به‌ خۆی بووه‌ له‌ بواری ره‌خنه‌ و شێوازی ره‌خنه‌گرتندا. ئه‌م دۆستایه‌تیی و لێك نزیكییه‌ هێنده‌ دیار و ئاشكرا بووه‌ كه‌ هه‌ندێك جار به‌ نوكته‌ و ته‌نزه‌وه‌ به‌یان كراوه‌ تا ئه‌و راده‌یه‌ی كه‌جارێك وا بڵاوبوویه‌وه‌ گوایه‌ یاسین نه‌صیر له‌ كاتی‌ رۆیشتندا ده‌شه‌لێت چونكه‌ فازڵ سامر تووشی رووداوی ئوتومبیل بووه‌»ئه‌مه‌ ئه‌وه‌ ده‌گه‌یه‌نێ كه‌براده‌رایه‌تییه‌كه‌مان گه‌لێ قووڵ بووه‌ و ته‌نانه‌ت له‌ رووی خێزانیی وئینتیما و فیكری ئه‌وساشه‌وه‌ تا بووینه‌ دووانه‌یه‌كی ره‌خنه‌یی دیار».

ئاراسته‌ی‌ ره‌خنه‌یی
نه‌صیر له‌ ره‌خنه‌سازییدا زیاتر به‌لای‌ رۆماندا رۆیشتووه‌ ئه‌گه‌رچی‌ سه‌ره‌تا شانۆی‌ ده‌خوێنده‌وه‌ و»گه‌لێ شتی لێوه‌ فێربووم، هونه‌ری دایه‌لۆگ، هونه‌ری قسه‌و دواندن، هونه‌ری رای به‌رامبه‌ر و هه‌تا ده‌نگه‌ جیاجیاكان».به‌ڵام به‌ حوكمی حه‌زو ئاره‌زووی بۆ گێڕانه‌وه‌ (سه‌رد) «به‌ره‌و رۆمان وكورته‌ چیرۆك لامدا،رۆمانیش له‌خۆیدا به‌شێكه‌ له‌ ئه‌ركه‌ مێژووییه‌كانی ره‌خنه‌گر به‌ڵام مه‌سه‌له‌ی شیعر به‌راستیی لێی ده‌ترسم،هه‌تا كه‌ له‌ ئاماده‌یی بووم به‌ باشی بۆم له‌به‌رنه‌ده‌كرا،به‌ڵام ده‌رباره‌ی قه‌سیده‌ به‌ باشی ده‌منووسیی و لێی ده‌دوام.مامۆستاكانم بایه‌خیان به‌و نووسینانه‌م ده‌دا به‌بێ ئه‌وه‌ی حوكمی خۆیان بده‌ن». نه‌صیر ئاماژه‌ی‌ كردووه‌ بۆ ئه‌وه‌ی‌ كه‌ دواجار كه‌م كه‌م شیعر لێی نزیكبۆته‌وه‌ و پێی‌ وایه‌ شیعر به‌شێكه‌ له‌ خواستی راسته‌قینه‌ی رۆشنبیریی خه‌ڵك وشیعری به‌رزیش تایبه‌تمه‌ندیی خۆی هه‌یه‌ چونكه‌ به‌رده‌وام له‌ تازه‌بوونه‌وه‌دایه‌و شتی تازه‌و نوێ ده‌خاته‌ڕوو و له‌ گۆڕاندایه‌ و خۆی‌ وته‌نی‌ «چامه‌كان ده‌تووژێنن و وا له‌ ره‌خنه‌گر ده‌كه‌ن له‌و جۆره‌ شیعره‌ دوور بكه‌وێته‌وه‌ كه‌ ده‌رئه‌نجام و ئاكامه‌كانی لاواز و سست بكه‌ونه‌وه‌».

سه‌رنج راكێشیی شوێن له‌ كاره‌ ره‌خنه‌ییه‌كاندا
بۆ نه‌صیر شوێن (مكان) له‌خۆیدا به‌های ره‌خنه‌ییه‌،به‌ر له‌ نووسینیش هه‌ر ئه‌و به‌هاو نرخه‌ی له‌لای‌ هه‌بووه‌و بایه‌خدانیشی‌ پێی هه‌روا له‌ خۆڕا نه‌بووه‌ به‌ڵكو « ده‌ره‌نجامی شاره‌زایی و توێژینه‌وه‌و به‌دواداچوونی به‌رده‌وامم بووه‌ له‌ رووی په‌یوه‌ندیی ده‌قه‌كه‌ به‌ شوێنه‌كه‌وه‌. ئه‌مه‌ ئه‌وه‌ی ده‌نواند كه‌ شوێن له‌ ده‌قه‌كه‌دا حزوری به‌گران كه‌وتبۆوه‌،له‌ واقیعی هونه‌ری و كۆمه‌ڵایه‌تیشدا ئاشكراو دیاره‌،به‌ڵام له‌ ده‌قی ئه‌ده‌بیدا توخمێكی ونبووه‌، ئیتر له‌ سه‌ره‌تای حه‌فتاكانه‌وه‌ بایه‌خم پێی داوه‌». له‌م روه‌وه‌ له‌ 1972 له‌ چیرۆكه‌كانی (محمد خزه‌ییر) (المملكه‌ السودا‌‌و) كه‌ له‌ 1970 دا چاپكرابوو هه‌روه‌ها (السلام والبیوت، الغرف المعزوله‌،الملاجئ) ده‌كۆڵێته‌وه‌ به‌ڵام ئه‌و كتێبه‌ی‌ كه‌ له‌ 1980 چاپكراوه‌ و وه‌ك له‌ پێشه‌كییه‌كه‌یدا هاتووه‌ له‌ 1976 خرابووه‌ ژێر چاپه‌وه‌. « ئه‌مه‌ ئه‌وه‌ ده‌گه‌یه‌نێ كه‌ گرنگیدانم به‌ شوێن به‌ر له‌ هه‌مووان بووه‌، به‌ر له‌وه‌ی هیچ شتێك له‌ ئه‌ده‌بی بیانیدا بنووسرێ له‌سه‌ری یا وه‌رگێڕدرێ ..دوای ئه‌مه‌ ئیتر نووسین و لێكۆڵینه‌وه‌كان ده‌رباره‌ی ئه‌م باسه‌ كه‌وتنه‌ڕوو و بڵاوبوونه‌وه‌، منیش تا ئه‌مرۆ هه‌ر به‌م باسه‌وه‌ سه‌رقاڵم».

پرۆگرامی كۆمه‌ڵایه‌تیی وه‌ك خولیا
له‌رێڕه‌وی كاری ره‌خنه‌ییدا (پرۆگرامی كۆمه‌ڵایه‌تیی) به‌ یه‌كێك له‌ خولیاكانی‌ نه‌صیر داده‌نرێت به‌ڵام بۆ چ مه‌به‌ستێك؟ به‌ر له‌ وه‌ڵامی ئه‌مه‌ ده‌كرێت ئاماژه‌ بكه‌ین بۆ ئه‌وه‌ی‌ هه‌ندێك زاراوه‌ هه‌ن كه‌ باشترین فریادڕه‌س بوون بۆ نه‌صیر له‌ره‌خنه‌گرتندا ئه‌و زاراوانه‌ش كه‌خۆی‌ ده‌ستنیشانی‌ كردوون بریتیین له‌ (پانتاییه‌ ونبووه‌كانی ناو ده‌ق، پاراستن وگه‌شه‌كردن ،كوانووی شوێن ).
هه‌روه‌ها ئه‌وه‌ی‌ نه‌شاردۆته‌وه‌ كه‌ په‌یوه‌ندیی به‌ ( پڕۆگرامی كۆمه‌ڵایه‌تییه‌وه‌) هه‌بووه‌ وده‌ڵێت « تێڕوانینی ماركسییانه‌ بۆ ئه‌ده‌ب باشترین فریادڕه‌سم بووه‌، ئه‌مه‌ فێری كردم و منی كرده‌ ره‌خنه‌گر،من له‌ ماڵی حزبی شیوعیی عیراقییدا پێگه‌یشتووم.بۆیه‌ ئه‌ركی كۆمه‌ڵایه‌تیی ده‌ق پشت به‌و پڕۆگرامه‌ ده‌به‌ستێت،واتا به‌شێكه‌ له‌ تێكۆشانی كۆمه‌ڵایه‌تیی وبه‌شێكه‌ له‌هۆشیارییه‌كی وا كه‌ به‌هۆیه‌وه‌ په‌ی به‌كێشه‌كانی ناوكۆمه‌ڵ به‌رێت.كاتی خۆی،دیارده‌ كۆمه‌ڵایه‌تییه‌كانمان ده‌ ستنیشانده‌كرد ، ئه‌وسا پرسیاره‌كانمان له‌باره‌یانه‌وه‌ ده‌كردو دوایی رێگه‌چاره‌مان بۆ ده‌دۆزینه‌وه‌».
له‌م روانگه‌یه‌وه‌ ئه‌م رێبازه‌ كۆمه‌ڵایه‌تییه‌ سیاسییه‌ نه‌صیری‌ فێركرد كه‌ چۆن ده‌قێكی ئه‌ده‌بی بخوێنێته‌وه‌» ئه‌و ده‌قه‌ش له‌ خۆیدا دیارده‌یه‌كی كۆمه‌ڵایه‌تییه‌ و پرسیار ده‌خاته‌ڕوو و ده‌بێ تۆش وه‌ڵامی بده‌یته‌وه‌ یا رێگه‌چاره‌ی بۆ دابنێیت.من وا مامه‌ڵه‌م له‌گه‌ڵ ده‌قدا كردووه‌ هه‌روه‌ك پرسێك بێت و یه‌خه‌ی توێژه‌كانی ناو كۆمه‌ڵی گرتبێت، جا من له‌و مه‌یدانه‌وه‌ پێگه‌یشتووم، ئه‌و مه‌یدانه‌ش له‌سه‌ر بناغه‌یه‌كی نه‌گۆڕ راناوه‌ستێت به‌ڵكو ده‌گۆڕێت به‌ گۆڕانی ژیان و هه‌رده‌م نوێ ده‌بێته‌وه‌، ئه‌مه‌ له‌ به‌ره‌وڕووی ته‌وژمه‌ بیانیه‌كانیشدا كراوه‌ و ئاوه‌ڵایه‌.ده‌گوترێت ئه‌مه‌ دۆگماییه‌ و له‌ قاڵبدانه‌. نه‌خێر به‌ پێچه‌وانه‌وه‌، ئه‌وه‌ی به‌ باشیی له‌ ماركسییه‌ت حاڵی ببێت،ده‌بینێت كه‌ قوتابخانه‌یه‌كه‌ له‌گشت ئه‌وانیدی كراوه‌تره‌ به‌ رووی گۆڕان و نوێبوونه‌وه‌دا، به‌ڵام له‌ مه‌سه‌له‌ كۆمه‌ڵایه‌تییه‌كان و فیكری ئینسانیدا به‌ گشتیی دوورناكه‌وێته‌وه‌.
له‌مه‌وه‌ تێده‌گه‌ین كه‌ بۆچی‌ نه‌صیر روانگه‌یه‌وه‌ به‌ولاتر نه‌چووه‌، به‌ڵكو نوێبوونه‌وه‌ی‌ تێداكردووه‌، دیاره‌ ئه‌مه‌ش به‌ پێی پێویست و بۆ دۆزینه‌وه‌ی ده‌قی تازه‌ كه‌ بتوانرێت به‌ تێڕوانینێكی تازه‌وه‌ چاره‌سه‌ربكرێت هه‌ر بۆیه‌ سوودی‌ له‌ بونیادگه‌رییش بینیوه‌ هه‌روه‌ك چۆن له‌ رێبازه‌ ره‌خنه‌ییه‌ تازه‌كانیشدا بابه‌تی‌ هه‌ڵێنجاوه‌ « به‌ڵكو هه‌تا له‌ سلبییاته‌ تازه‌كانی سه‌رده‌میش، به‌ڵام بڕبڕه‌ی پڕۆگرامه‌كه‌م وه‌ك خۆم پاراستووه‌ (پڕۆگرامی كۆمه‌ڵایه‌تی).».
له‌ وه‌ڵامی‌ ئه‌و پرسیاره‌ی‌ كه‌ داخۆ چۆن هه‌ماهه‌نگیی ده‌كه‌ن له‌نێو ئه‌م ته‌وژمه‌ جیاوازانه‌ و پرۆگرامه‌ ناكۆكانه‌دا، بۆ ره‌خنه‌گرتن؟ نه‌صیر وای‌ ده‌بینێت ناكۆكی نییه‌، به‌ڵكو سوودمه‌ند بووه‌ لێیان و شته‌ بنه‌ڕه‌تییه‌كه‌ی ناواخنی كه‌ له‌لای‌ ماوه‌ته‌وه‌ ماركسییه‌ كۆمه‌ڵایه‌تییه‌كه‌یه‌ له‌ ده‌قه‌كه‌دا،به‌ڵام ئه‌مه‌ له‌ دووتوێی چاره‌سه‌ركردنه‌ ره‌خنه‌ییه‌كه‌دا، زاراوه‌و موفره‌داته‌ تازه‌بابه‌ته‌كانی ناو ئه‌و ته‌وژمانه‌ و ماهییه‌ته‌كه‌یانی‌ ره‌خساندووه‌، نه‌ك ورد ورد پێیانه‌وه‌ بنووسێت، ئه‌مه‌ش له‌ پێناو پڕۆگرامی ره‌خنه‌یی تایبه‌ت به‌ خۆی‌.
ده‌شێت ئه‌و راستییه‌ زانراو بێت كه‌ نه‌صیر یه‌كێكه‌ له‌وانه‌ی ده‌مێكه‌ چاودێریی شانۆی كوردی ده‌كات و به‌ دوایدا ده‌چێت.بۆیه‌ جێێ‌ خۆیه‌تی‌ كه‌ ببێته‌ وێستگه‌ی‌ ئه‌و پرسیاره‌ی‌ كه‌ داخۆ ئه‌مڕۆ ئه‌م شانۆیه‌ چۆن ده‌بینیت به‌ تایبه‌ت كه‌ ئاشنایه‌تیی ئه‌و له‌گه‌ڵ شانۆی كوردییدا ده‌گه‌ڕێته‌وه‌ بۆ كۆتایی ساڵانی‌ حه‌فتاكانی‌ سه‌ده‌ی‌ رابردوو و ره‌نگه‌ پێشتریش. له‌و وه‌ڵامدا نه‌صیر وای داده‌نێت كه‌ ئه‌م شانۆیه‌ به‌شێكه‌ له‌ شانۆی عێراقیی به‌گشتیی « به‌ڵام تایبه‌تمه‌ندیی ناوچه‌یی خۆیشی هه‌یه‌ چ له‌ زمان وچ له‌ بابه‌تدا.هه‌ندێك له‌ كاره‌كته‌رانی ئه‌م شانۆیه‌ له‌ ده‌رچووانی په‌یمانگه‌ و ئه‌كادیمیای هونه‌ره‌جوانه‌كانی به‌غدادن، هه‌روه‌ك زۆرێك له‌وانه‌ له‌سه‌ر شانۆكانی به‌غداد كاریان كردووه‌ به‌ڵام ئه‌وه‌ی شانۆی كوردیی جیاده‌كاته‌وه‌ سیمای ناوچه‌یی و نیشتمانییه‌تی،جگه‌ له‌ تایبه‌تمه‌ندیی شێوازی سروشتی كۆمه‌ڵگه‌ی كورده‌واریی كه‌ به‌راورد به‌ واقعی كۆمه‌ڵایه‌تیی له‌ شاره‌كانی تری عیراقدا زیاتر كراوه‌یه‌ . هه‌ر بۆیه‌ له‌ په‌یوه‌ندیی ئافره‌ت به‌ پیاوه‌وه‌ دیارتر و فراوانتره‌ و زه‌مینه‌یه‌كی باش ره‌خساوه‌ بۆ كه‌رنه‌ڤاڵ و ئاهه‌نگه‌ میللیه‌كانی شاره‌ كوردییه‌كان، جگه‌ له‌ دۆزێكی نه‌ته‌وه‌یی نیشتمانیی كه‌ عه‌یامێكه‌ ئه‌م میلله‌ته‌ تیاده‌ژی و خه‌باتی بۆ ده‌كات به‌ جۆرێ كه‌ بۆته‌ شێوه‌ خولیایه‌كی ره‌مزیی، ئه‌مه‌ش توانایه‌كی ئه‌وتۆی به‌ هونه‌رمه‌ندی كورد به‌خشیوه‌ له‌ نواندن و چاره‌سه‌ركردن و ده‌رهێناندا كه‌ جیای بكاته‌وه‌ له‌ هه‌ر ده‌وروبه‌رێكی دی».

كورد گه‌لێكی‌ بیانیی نییه‌
به‌ بڕوای‌ نه‌صیر باشترین ده‌قی شیاو له‌ ناو ده‌قه‌ كوردییه‌كاندا ئه‌وانه‌ی‌ هونه‌رمه‌ند ئه‌حمه‌د سالاره‌،ئه‌و مرۆڤه‌ هونه‌رمه‌نده‌ به‌ ئه‌مه‌ك و به‌توانایه‌ كه‌ به‌رده‌وام له‌ ئاهه‌نگ و بۆنه‌كانیدا ئاماده‌بووه‌. هه‌روه‌ها ده‌ڵێت «خۆشه‌ویستیی ئه‌و خه‌ڵكه‌ (كورد)یش له‌ مه‌ینه‌تییه‌كانیاندا زیاتر په‌یوه‌ستی كردووم بۆیه‌ (كورد) به‌گه‌لێكی بیانیی دانانێم.من تێڕوانینێكی تایبه‌تم بۆ رۆشنبیریی كورد هه‌یه‌، هونه‌رمه‌نده‌ عه‌ره‌به‌كانی عیراق شانۆی كوردییان به‌ هی خۆیان ده‌زانی و به‌ پێچه‌وانه‌شه‌وه‌، ئه‌م تێكئاڵانه‌ رۆژێك له‌ رۆژان سنوری بۆ نه‌بووه‌ تا ئه‌و راده‌یه‌ی‌ دۆزه‌ نیشتمانییه‌كانی نێوانیشیان تا راده‌ی ئاوێته‌بوون به‌یه‌كدا چوون و تێكچڕاون . جا له‌م روانگه‌یه‌وه‌ نابێ كتێبه‌كه‌م -ده‌رباره‌ی شانۆی كوردیی- شێكی سه‌یربێت له‌لاتان، ره‌خنه‌ و پێداچوونه‌وه‌یه‌كی ئینتیباعییه‌ ده‌رباره‌ی به‌دواداچوونم بۆ كاره‌ هونه‌رییه‌كانی ناو كوردستان و هۆڵه‌ندا و ئه‌مه‌ش به‌ به‌رپرسیارییه‌كی شه‌خسیی ده‌زانم سه‌باره‌ت به‌ خودی خۆم.سوپاسم بۆ ده‌زگای سه‌رده‌م كه‌ جارێكی دی له‌ سلێمانی به‌چاپی گه‌یانده‌وه‌، به‌هیوام كه‌ په‌یوه‌ندییم به‌م شانۆیه‌وه‌ به‌رده‌وامبێ و ئه‌وانیش هاوكاریم بكه‌ن.».
*ته‌واوی ئه‌م زانیاریانه‌ له‌دیدارێكی نێوان نوسه‌ری بابه‌ت و یاسین نه‌صیردا،كه‌پێتر له‌ ڕۆژنامه‌ی الاتحادبڵاو كراوه‌ته‌وه‌.

*خوێندكاری دكتۆرا له‌ زانكۆی سلێمانی.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*