سەرەکی » وتار » شوان کەریم کابان » لە پەراوێزی كۆنگرەی چوارەمدا…

لە پەراوێزی كۆنگرەی چوارەمدا…

لە پەراوێزی كۆنگرەی چوارەمدا، گلەییەك بە تامی رەخنە

یەكێتیی نیشتمانی كوردستان، حزبێك نییە لە كاتێكی پڕ لە ئارامی و سەقامگیر و كەش و هەوای ئازادیدا دروست بووبێ، حزبێكە لە سەختترین و دژوارترین و تاریكترین ساتەوەختەكانی كوردەواریدا دروست بوو لە كاتێكدا دیكتاتۆرییەت لە عیراقدا لەوپەڕی بەهێزیدا بوو، بۆیە هەمیشە تێكۆشەر و ئەندام و لایەنگرە راستەقینەكانی، لە هیچ نسكۆ و تەنگ و چەڵەمەیەك و گرفتێكدا، تووشی نائومێدی و داڕمان نەبوون و نابن، بەڵكو شانیان داوەتە بەر ئەركی قورسی هێشتنەوە و هەڵساندنەوە و بەهێزكردنەوەی حزبەكەیان.
یەكێتی لە 44 ساڵی تەمەنیدا، تووشی چەندین گرفت و نەهامەتی و بارودۆخی قورس و زەحمەت بووە، هەردەم چۆكی دانەداوە، بە هیممەتی خەباتگێڕە راستەقینەكانی و پشت ئەستوور بە بەرنامە و خوێنی شەهیدان و پشتگیری جەماوەرەكەی و راست و رەوایی ئامانجەكانی و خۆڕاگریی، لە هەموو تەنگژەكان دەربازبووە و سەرلەنوێ هەستاوەتەوە و شانی داوەتەوە بەر ئەركە قورسەكان.
لە بارودۆخە سەختەكانی یەكێتیدا، بە داخەوە زۆر كەس نوقڵانەی نەمان و فەوتانی یەكێتی لێداوە، جگە لە دوژمن و نەیارەكانی هەندێك لە ئەندامەكانی خۆشی، بە جۆرەها شێوە و شێواز بەدەر لە شێوازی رەخنە و هەڵسەنگاندن بانگەشەیان بۆ شكست و نەمانی یەكێتی كردووە و هەرچی نەشیاو و خراپە بە حزبەكەی خۆیان كردووە، بە ناوی مافی ئازادی رادەربڕین و مافی رەخنەگرتن بێ رەچاوكردنی دیسپلینی حزبی، بە پێچەوانەی ئەوانەوە بەشێكی زۆری تێكۆشەرەكانی، ئەوانەی هەمیشە خەمی یەكەم و سەرەكییان، مانەوە و بە پێوەوەستانی یەكێتییەكەیان بووە بێ ئەوەی حزبەكەیان تەنیا جێبهێڵن و ببنە بوقی نەیارانی، ئازایانە شانیان داوەتە بەر ئەو بەرپرسیارێتییەی لە ئەستۆیان بووە، بۆ پاراستنی حزبەكەیان كە میراتی سەرۆك مام و هەزاران شەهید و ماندووبوون و قوربانیدانی سەدان هەزار تێكۆشەری گەلەكەمانە لە مێژووی دوور و درێژی تێكۆشانیدا.
ئێستا یەكێتی كە رۆژی 21/12/2019 ، بە سەركەوتوویی كۆنگرەی چواری بەڕێكرد و كۆمەڵێك هەنگاوی ناوە، هەندێك لەوانەی لە كاتە پێویست و چارەنووسسازەكاندا دەمیان لە یەكێتییەكەیان كردبۆوە و بانگەشەی نەمان و فەوتانیان دەكرد، هەندێك لەوانە ئەندامی ئەو كۆنگرەیە بوون و هێندێكیش لەو هێندانە، خۆیان بۆ سەركردایەتیش پاڵاوتبوو.
بە داخەوە لە لایەكی تریشەوە سەدان لەو تێكۆشەرانەی لە هیچ كات و ساتێكدا یەكێتییەكەیان بە تەنیا و بێ كەس جێنەهێشتووە، شەرەفی ئەندامێتی كۆنگرەیان پێنەبڕا، جا بە هەر هۆكارێك بێت، بەڵام ئەندامی دڵسۆز و بە ئەمەكی یەكێتییەكەیان دەبن. بۆیە هەقە و پێویستە، یەكێتیی نیشتمانی كوردستانی پاش كۆنگرەی چوار جیاوازتر لەوەی جاران، دڵسۆزی و بە ئەمەكی تێكۆشەر و ئەندام و لایەنگرە راستەقینەكانی لەبەرچاو بگرێت و ئەوانەیان پێشنەخات كە بۆ بەرژەوەندیی خۆیان یەكێتین.
بژی یەكێتیی نیشتمانیی كوردستان

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*