سەرەکی » ئەدەب - سێبەر و سایە » وەكو خوێن لە دەمارەكانمدا

وەكو خوێن لە دەمارەكانمدا

گەلێك شاعیر و نووسەر هەن لە بەرانبەر ئەوینی ژناندا بەجۆرێك دەنوشتێنەوە كە خوێنەرەكانیان هیچ كات باوەڕ ناكەن، بەڵام دەردی ئەوینداری و تیری عەشق لەسەر دڵی هەر كەسێك چەقی بێت ژانی مەرگی بردووەتە دڵەوە، نەك هەر ئەدیب و نووسەران زۆرجار دیكتاتۆرەكانیش كەوتوونەتە داوی عەشقەوە بەجۆرێك بچووك بوونەتەوە، بەجۆرێك نوشتاونەتەوە، كە هەرگیز باوەڕپێكراو نەبووە. دەردی ئەوینداری گەلێك پیاوی مەزنی شێت و شەیدا كردووە، شێخی سەنعانی لە لووتكەی ئیمانەوە خستە خوارێ و هەمیشە ئەم چیرۆكانە لەلای خەڵكی وەكو چیرۆكی ئەویندارییەكی پیرۆز و جوان سەیركراوە، چون عەشق لووتكەی جوانییە لە مرۆڤدا.
شاملو ئەو شاعیرەی بە رەمزی ئازادی و شۆڕش ناسراوە، ئەزموونی شیعریی ئەم شاعیرە ئێرانییە هەمیشە بۆنی ئازایەتی و بەرپەرچدانەوە و ئینكەبەری لێ دێت، شاعیرێك هەمیشە وەك هەور گراماندوویەتی و بە گژ ستەمكاراندا چووە، بەڵام ئەوەتانێ لە بەرانبەر ئەوینی كچێكدا، عەشقێكی پیرۆز بۆ ئەوینی كیژۆڵەیەك شاعیرێكی مەزنی بەچۆكدا هێناوە. شاملوی مەزن وەكو رەوف بێگەردی وەرگێڕی نامەكانی ئەم شاعیرە ئەویندارە لە پێشەكی ئەم كتێبەدا نووسیوێتی شاملو دوای دووجار شكست هێنان لە ژیانی هاوسەری عاشق دەبێ، عاشقی كچێك دەبێت بە ناوی ئایدا.
لەیەكێ لەنامەكاندا هاتووە»چاوت مزگێنی و ئومێدم تێدەگەڕێنێت. لێ بێدەنگییەكەت لێوڕێژم دەكات لە نائومێدییەكی كوشندە. ئاه چەند ئاتاجی ئەوەم زمانیشت لە چاوتەوە فێر بێت، بۆ ئەوەی زمانیشت وەك چاوت میهرەبان و دڵنەواز بێت…»
ئەمە زمانی شاملوی شیعر و شۆڕشە لەبەردەم ئەوینی كچێكدا چۆن عەشق بەدەمارەكانیدا لەجێی خوێن دەجمێ، وێنەی دڵی شەقار شەقاری نیشانی ئایدا دەدات. یان لە شیعرێكدا دەڵێ:
روانینت
شكستی ستەمكارییە
هەنووكە، چاوت كە هەوێنی خۆشەویستییە
خۆرێكە لە كازیوەی هەموو ئەستێرەكان بێنیازم دەكات.
ئەم كتێبە»وەكو خوێن لە دەمارەكانمدا « كۆمەڵێك نامەی شاعیری ناوداری ئێران ئەحمەدی شاملووە لە دووتوێی كتێبێكی 148 لاپەڕەی بچووكدا چاپ بووە، نووسەر و وەرگێڕ رەوف بێگەرد وەریگێڕاوەتەوە سەر زمانی كوردی و لە بڵاوكراوەكانی دەزگای پەخشی سەردەمە. ناوەڕۆكی كتێبەكە جگە لە پێشەكییەكەی وەرگێڕ لە كۆمەڵێك نامەی ئەوینداری شاعیری مەزن شاملو پێكدێ، كۆمەڵێك نامەی ئەوینداری شاعیرێكی مەزن و سەنگینی ئێرانە كە چۆن عاشقی كچێك دەبێ، بەجۆرێك شاعیر ژیان و بەختەوەری خۆی بەو ئەوینەوە گرێداوەتەوە، ئەم عەشقەی شاملو بۆ ئایدا ئەوینێكی رۆحی راستگۆیانە و پیرۆز بووە، بەجۆرێك كە لەدوای ژیانی هاوسەری خۆی و ئایدا درێژەی هەبووە و شاعیر بۆ ئەوینی ئایدا دیوانە شیعرێكیشی بەناوی ئایداوە بڵاوكردوەتەوە. ئایدا چرای رووناكی ئەو ساڵانەی ژیانی شاملو بووە و تا دەمی مەرگ بەو ئەوینەوە ژیاوە، وەك لە نامەكانیشدا دەبینرێ، خەو و خۆراكی لێ حەرام بووە، لە دووری ئایدا رۆژی رووناكی تاریكە شەوبووە، وەكو هەرزەكارێك ئەوینداری خستوویەتییە سەما و دڵیشی وەكو ئاگری دۆزەخ سووتاوە. لە دوای دوو ئەزموونی شكستخواردوو شاملو بەو شێوەیە عاشق دەبێ. عەشقی دڵێكی پیر بەو چەشنە ئاگری لە دڵی شاعیر بەرداوە وەكو شێخ رەزای تاڵەبانی دەڵێت:
لام وابوو پیربووم عەشق دەستم لێ هەڵئەگرێ
نەمزانــــی داری وشــــك باشـــتر ئاگــر ئەگرێ
رەوف بێگەرد وەرگێڕی نامەكان لە پێشەكییەكەیدا دەڵێت» دیارە لە سەرەتادا ئایدا نەیویستووە نامەكان بڵاوببنەوە، چونكە وەك لە هەندێك جێگەی نامەكاندا دەردەكەوێت شاملو لە رادەبەدەر با لە گەورەیی ئایدا و خۆشەویستییە شێتانەكەی خۆی دەكات …»
ئەوەی بۆ وتن ماوەتەوە، سوپاسی مامۆستا رەوف بێگەرد دەكەین كە چۆن شاملو بەوشێوە شێتانەیە عاشقی ئایدا بووە، ئەویش بەو ئەندازەیە عاشقی وەرگێڕان و نووسینە و بەو دۆخەوە، كە هەموومان دەزانین تەندروستی باش نییە و پێویستی بە پشووە، بەڵام ئەوەتانێ بێ وچان كار دەكات و كۆڵ نادات لە وەرگێڕان. ئەمەش دواین بەرهەمی وەرگێڕانی مامۆستایە و ئێمەش هیوای تەندروستییەكی باش و بەرهەمی تازەی بۆ دەخوازین.

ئەدەب و هونەر

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*