سەرەکی » مانشێت » پیرۆزبایی بۆ PUKmedia

پیرۆزبایی بۆ PUKmedia

پیرۆزبایی د.فوئاد مەعسوم

بەڕێز كاك كاروان ئەنوەر و هەڤاڵانی نووسەر و رۆژنامەنووسانی PUKmedia ی ئەزیز
پڕ بە دڵ پیرۆزباییتان لێدەكەم لە ساڵیادی سایتە پڕ لە راستگۆیی و ماندووەكەتان، هیوادارم وەك هەمیشە لە كاروانی ڕۆژنامەنووسی كوردیدا لەپێشكەوتندا بتانبینم .
دووبارە ماندوو نەبن و پیرۆزتان بێت
د.فوئاد مەعسوم

دوێنێ لە یادی 17 ساڵەی دامەزراندنی PUKmedia-دا، سەرنووسەر و ستافی PUKmedia پێشوازییان لە هەڤاڵانی یەكێتیی نیشتمانیی كوردستان و میوان و خوێنەرانی سایتەكە كرد. هەر بەوبۆنەیەوە چەندین بروسكەی پیرۆزبایی ئاڕاستەی سەرنووسەر و ستافی PUKmedia كراوە.

گەیاندنی راستییەكان
رەفعەت عەبدوڵڵا حەمەڕەش لە بروسكەیەكی پیرۆزباییدا رایگەیاندووە «PUKmedia سەركەوتوو بووە لە گەیاندنی خەبەر و گەیاندنی راستییەكان، هیوای سەركەوتنتان بۆ ئەخوازم، بەئومێدی ساڵی نوێی كاركردنتان ساڵی خزمەتی زیاتر بێت».
هەروەها سەعدی ئەحمەد پیرە ئەندامی ئەنجومەنی سەركردایەتیی گشتی ئاماژەی بەوەداوە «لە17 ساڵی رابردوودا ماڵپەڕی PUKmedia پێ بە پێ لەگەڵ قۆناغە جیاوازەكانی سیاسی و ئابووری و رۆشنبیری هەمیشە لەپێشەوەی كاروانی خەباتی رۆژنامەگەری و رۆشنبیری بەردەوامی داوە بەو پەیامە روونەی كە ساڵەهایە كردوویەتی بە دروشم كە خۆی لە راستی و دروستی زانیارییەكانی و ئازادیی رادەربڕین و رای جیاوازدا دەبینێتەوە، بۆیە هەمیشە سەكۆی ئازادیخوازان و بڵندگۆی چین و توێژە جیاوازەكان بووە».
لە بروسكەی پیرۆزبایی شۆڕش ئیسماعیل-دا هاتووە «لەم بۆنەیەدا بەدەرفەتی دەزانم دەستی ماندووبوونی یەكە بەیەكەتان بگوشم كە بوونەتە مینبەرێكی گرنگ و كاریگەری میدیایی، ئێوە ئۆرگانێكی گرنگی بڵاوكردنەوەی بیری كراوەی حزبی و ناحزبی بوون، كاركردنتان لەسەر بنەمای راستگۆیی و ئیتیكی رۆژنامەوانی جێگەی بایەخ و پێزانینی هەمووانە».
هەروەها دكتۆر خەسرەو گوڵ لە بروسكەی پیرۆزباییدا دەڵێت: ماڵپەڕی PUKmedia وەك میدیایەكی ئەلیكترۆنی سەنگین و متمانەپێكراو، پابەند بە ئیتیك، بابەتی بوون، پیشەیی بوون، بە رەچاوكردنی بەرژەوەندیی نیشتمانیی، رووماڵی پێشهات و رووداوەكانی وەك خۆی كردووە و بە ئەمانەتەوە سەرچاوەی گەیاندنی زانیارییەكان بووە وەك خۆی بە خوێنەرانی».

سەرچاوەیەكی باوەڕپێكراوی هەواڵ و زانیاری
هەربەوبۆنەیەوە شاڵاو كۆسرەت رەسوڵ ئەندامی ئەنجومەنی سەركردایەتیی گشتیی یەكێتیی نیشتمانیی كوردستان بروسكەیەكی پیرۆزبایی ئاڕاستەی سەرنووسەر و ستافی PUKmedia كردووە و تێیدا هاتووە «‏PUKmedia لە ماوەی تەمەنی خۆیدا وەك سەرچاوەیەكی باوەڕپێكراوی هەواڵ و زانیاری لەنێو گۆڕەپانی میدیای كوردیدا رۆڵی خۆی هەبووە و شانبەشانی میدیاكانی تر خزمەتی كردووە و تائێستا بەردەوامە و دیارییەكی بە نرخی یەكێتیی نیشتمانیی كوردستان بووە بۆ میدیاكاران و خزمەتكردنی ئازادی و رەوتی رۆژنامەگەری لە كوردستان».
دەرباز كۆسرەت رەسوڵ ئەندامی ئەنجومەنی سەركردایەتیی گشتیی یەكێتیی نیشتمانی كوردستانیش ئاماژەی بەوەداوە «دەستپێكی كاری میدیایی ماڵپەڕی PUKMedia لەو سەردەمەدا وەرچەرخانێكی گەورە و دیارییەكی بەنرخی یەكێتیی نیشتمانیی كوردستان بوو بۆ رەوتی میدیای ئەلیكترۆنی لە كوردستاندا، لە ساڵەكانی رابردووشدا بە چەندین زمانی جیاواز توانیوتانە ببنە سەرچاوەیەكی ورد و متمانەپێكراوی هەواڵ و زانیاری بۆ كوردستان و دەرەوە».

خستنەڕووی راستییەكان
شێركۆ میروەیس ئەندامی ئەنجومەنی سەركردایەتیی گشتیی یەكێتیی نیشتمانیی كوردستانیش ئەوەی خستۆتەڕوو «بەبۆنەی 17 هەمین ساڵیادی دامەزراندنی ماڵپەڕی PUKmedia، پیرۆزبایی راستگۆیی، بەردەوامی، نوێگەری و بەدەمەوەچوونی كێشە و گرفت و خۆڕاگریتان لە بەرامبەر سەختی و كۆسپەكان، لە سەرنووسەر و ستافە ماندوونەناسەكەی PUKmedia دەكەم. هیوادارم هەمیشە بەم رۆحیەتە، لە روانگەی خستنەڕووی راستییەكان و ئاڕاستەكردنی هەوڵەكانتان بۆ بەئاگایی كۆمەڵگە لە ناوەرۆك و ئاشكراكردنی نەواخنی رووداوەكان لە كاركردن بەردەوام بن».
هەر بەبۆنەی یادی PUKmedia-وە، دڵپاك تاهیر ئەندامی ئەنجومەنی سەركردایەتیی گشتیی یەكێتیی نیشتمانیی كوردستان لە بروسكەیەكی پیرۆزباییدا ئاماژەی بەوەداوە «پیرۆزبایی لە سەرنووسەر ‌و تەواوی كادر و هەڵسوڕاوانی ئەو ماڵپەڕە دەكەم، كە ساڵانێكە بە سەنگینی ‌و بەزمانێكی هاوچەرخ ‌و دوور لە هەر هەڵچوون ‌و پەرچەكردارێك وەك فۆڕمێكی بە بەهای میدیا لە خزمەت خوێنەران ‌و وەرگرانیدایە، هیواخوازم ئەو بۆنە و دەستكەوتە نوێیەكانی تری یەكێتیش كە خۆی لە كۆنگرەی نوێبوونەوەدا بەرجەستە كرد، هۆكارێكی تر بێت كە هەموو هەڤاڵان‌ و تەواوی ئۆرگانەكانی یەكێتیی نیشتمانیی كوردستان لە خزمەت پێشخستن ‌و پەرەپێدانی ئەو ماڵپەڕە سەنگینەدا بن، چونكە قورسایی ‌و سەنگی پیوكەی میدیا، بە تەنها لەئاستی ناوخۆی كوردستان نەبۆتە سەرچاوە، بەڵكو بۆ دۆستەكانیشمان ئێستا سەرچاوەیەكی بەنرخی ئاشنابوونە بە كوردستان‌ و ئەزموونەكەی».
لەلایەكی دیكەوە، پۆڵا سیروان تاڵەبانی لێپرسراوی مەڵبەندی بەغدا لە بروسكەیەكی پیرۆزباییدا رایگەیاندووە: بەهیوام وەك هەمیشە بە دڵسۆزانە بەردەوام بن لە گەیاندنی پەیامی كوردان بە گشتی و یەكێتی بە تایبەتی، بە زمانی جیاواز و نیشاندانی جوانییەكانی كومەڵگەی ئێمە و هەروەها كەموكوڕییەكان، بۆ ئەوەی لایەنی بەرپرس ئاگادار بێت و بتوانن چارەسەر بدۆزنەوە».
سالار عومەر نوری ئەندامی ئەنجومەنی سەركردایەتیی گشتی لە هەمان بۆنەدا و لە بروسكەیەكی پیرۆزباییدا دەڵێت: ئومێدەوارم وەك چۆن هەمیشە ئومێدمان پێتان بووە بە بەردەوامی داهێنەرانەتر ‌و پرۆفیشناڵانەتر درێژە بە ئەركە گرنگ ‌و پیرۆزەكەتان بدەن ‌و هەگبەیەكی تری شانازیی بخەنە سەر تەمەنی ماڵپەڕە خۆشەویستەكەتان».

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*