سەرەکی » هەمەڕەنگ » سلێمانی، دیداری مزەفەر نەواب بەڕێوەچوو

سلێمانی، دیداری مزەفەر نەواب بەڕێوەچوو

رۆژی شەممە 22/2/2020 لە هۆڵى پرۆفیسۆر عیزەددین مستەفا رەسوڵ لەهۆڵی گراند ملینیۆم لە شارى سلێمانى، بە ئامادەبوونى ژمارەیەکى زۆر لە ئەدیب و نووسەران و مامۆستایانى زانکۆو کەس و کارو هاوڕێیانى مزەفەر نەواب، بنکەى روناکبیریى گەلاوێژ دیدارێکى بۆ شاعیرى شۆڕشگێڕ (مزەفەر نەواب) لەژێر ناونیشانى (مزەفەر نەواب لەویژدانماندا دەدرەوشێتەوە) ساز کرد.
لەسەرەتادا وتارى بنکەى روناکبریى گەلاوێژ لەلایەن (د. ئیبتسام ئیسماعیل) خوێنداریەوە، لەوتارەکەیدا سوپاسی میوانان و ئامادەبووانی کرد کە رێگەى دووریان بڕیوە بۆ ئەم مەراسیمە. وتیشی: بەڕێز مام جەلال رۆحى شادبێت کاتێک لە کۆشکى سەرۆکایەتى عیراق دەبێت پێشوازى لەشاعیرى گەورە (مزەفەر نەواب) دەکات و دەڵێت: دەبێت شانازیت پێوە بکەین، میللەت دەبێ رێزت لێبگرێت، وەک هێمایەک بۆ داهێنان و خەبات، شیعرەکانت قوتابخانەن و بەهاى شۆڕشگێڕانەى جوتیارو کرێکارو خوێندکارو سەرجەم توێژەکانى ترى گەل لەسەرى پەروەردە بوون. هەروەها (د. ئیبتسام ئیسماعیل) لەوتارەکەیدا ئاماژەی بەوەدا کە شاعیری شۆڕشگێڕ مزەفەر نەواب، لەبەر خراپى رەوشى تەندروستى نەیتوانى لەم مەراسیمەدا ئامادەبێت. پاشان فاروقى مەلا مستەفا وەک هاوڕێى مزەفەر نەواب وتەیەکى پێشکەشکردو لەبەشێکی وتارەکەیدا وتی: مزەفەر نەواب شاعیرێکە لە لوتکەدایەو لەنێو عیراق و سوریاو لوبنان و میسرو لیبیاو چەندین وڵاتى تردا جەماوەرێکى زۆرى هەیە، لەگوێگرتن بۆ شیعرەکانى تێر نابین و چێژ دەبینین نەک تەنها لەبەپێزى مانادا، کە سرووشتێکى میللى هەیەو هەڵقوڵاوى دەربڕینى خەڵکن، هاوکات لەشیعرەکانیدا بیسەر هەستى شۆڕشگێڕى و هێزێکى سەیرى پێدەبەخشێت.
دوابەداوى وتارەکان فیلمێکى دۆکیۆمێنتارى لەسەر ژیانى مزەفەر نەواب نمایشکرا، پاشان چەند تێکستێکى شیعرى شاعیر خوێندرایەوە، دواتر پانێڵی یەکەم پێشکەشکرا، کە لەم پانێڵەدا (3) توێژینەوە پێشکەشکران بەمشێوەیە:
– پ. د. قاسم حسێن ساڵح: ریسواکاریی سێکسى لە شیعرە سیاسییەکانى مزەفەر نەوابدا.
– د. عەمار عەبدولباقی سەفار ئەلمەرواتی: گێڕانەوە وەک پەناگەیەک.. نەوابیش دەبینێت.
– غەزاى درع ئەلتائى: مزەفەر نەواب شاعیرى عیشق و رۆشنایى و ستران.
دواتر ئاهەنگێکى موزیک و گۆرانى پێشکەشکرا، کە بەشێکى زۆرى شیعرەکانى نەواب کرابوون بەگۆرانى و پێشکەشى ئامادەبووان کرا، دواتریش پانێلى دووەم و کۆتایى پێشکەشکرا کە تیایدا (3) پانێڵى دیکە پێشکەش کران بەمشێوەیە:
– د. قەحتان جاسم جەواد: مزەفەر نەواب شاعیرى عیشق و شۆڕش و یاخیبوون.
– د. سەعد حەسەنى: مزەفەر نەواب خاچى زمانى شیعرى.
– کازم غەیلان: شۆڕش وەک کەلەپورو وەک هاوچەرخێتى لە شیعرى میللیى عەرەبیدا، مزەفەر نەواب بە نموونە.
دواتر خەڵاتى رێزلێنان لەلایەن د. ئیبتسام ئیسماعیل پێشکەشى توێژەران کراو کتێبێکیش بەدیارى بەسەر سەرجەم ئامادەبواندا دابەشکرا، کە تایبەت بوو بەژیان بەرهەمەکانى مزەفەر نەواب.
لە کۆتاییدا مەلا بەختیار وتەیەکى کورتى پێشکەشکرد، ئاماژەى بۆ ئەوەکرد، کە ئێستا شارەکانى عیراق بەقۆناغێکى مێژوویى شۆڕشگێڕانە تێدەپەڕێت، عیراق بەدرێژایى مێژوو دیمەنێکى واى بەخۆوە نەبینیووە، شاعیرى گەورە مزەفەر نەواب لە بۆتەى ئەو رووداوانە ژیاوەو تامەزۆرى ئەوە بوو لەعیراق ئەوە ببینێ، کە عیراق شۆڕش دەکات، رادەپەڕێت، بەداخەوە ئەمە لە کاتێکدایە کە نەواب نەخۆشە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*