سەرەکی » وتار » ئازاد ئیبراهیم ‌ » كاریگەرییەكانی سۆشیال میدیا لە واقیعی ئێمەدا

كاریگەرییەكانی سۆشیال میدیا لە واقیعی ئێمەدا

هەرشتێك دەستی مرۆڤی پێگەشت، عەقڵی مرۆڤیشی پێدەگات، پاش و پێشێك لەم قسەیەدا هەیە، هەندێك داهێنراو بەرهەمی عەقڵە و ئینجا دەستی مرۆڤی پێدەگات، بەڵام ئەوە تەنها بۆ داهێنەرەكان راستە. ئەگینا لای بەكارهێنەرەكان دەستی پێدەگات و ئینجا عەقڵ پێی دەگات و بەكاری دەهێنێت.

خوڵاسەی كەلام، دەمەوێت بڵێم سۆشیال میدیا كە ئێستا شتێكی باوی جیهانییە.

لەكوردستاندا، زۆرێكی بەكارهێنەران تەنها دەستیان پێیگەیشتووە و عەقڵیان پێی نەگەشتووە. راستیی ئەم بۆچوونە لەوێوە دەردەكەوێت كە زۆرینەی تاكی كورد دەزانێت بەكاری بهێنێت وەك مومارەسە، بەڵام نازانێت چۆن بەكاری بهێنێت كە ئایا بۆ كاری باشە یاخود نا؟

كاتێك گوێم لەوە دەبێت، كە زۆرینەیەك سۆشیال میدیا رەتدەكەنەوە و بە كێشەو مەترسیی دادەنێن بۆ سەر كۆمەڵگە و خێزان و دەسەڵات، راستەوخۆ چیرۆكێكی نیچەی فەیلەسوفم بیردەهێنێتەوە كە بە شەقامێكدا دەڕوات و رووداوێك دەبینێت، ئەویش پرسیار لە سێ مرۆڤ دەكات، ئەو رووداوە چۆن بووە؟ هەر سێ مرۆڤەكە سێ وەڵامی جیاواز دەدەنەوە بەنیچە.

نیچە لەوەڵامدا دەڵێت: “ئەگەر ئەم سێ مرۆڤە مێژووی ئەم رووداوە بنووسنەوە، ئەوا سێ شێوەی جیاواز دەبێت و هیچیان راست نابێت و مێژوویەكی درۆ بڵاودەكەنەوە.
كەواتە كاتێك كەسێك دەڵێت سۆشیال میدیا “خراپ”ە و كەسێكیتریش دەڵێت “باش”ە. هەمان ئەو دوو چیرۆكەی سەرەوەیە كە ئەسڵی باشی و خراپیی سۆشیال میدیا لەروانگەی بەكارهێنەرەكانەوەیە، نەك چۆنێتی بەكارهێنانەكەی، هەر كەسێك لە روانگەی خۆیەوە لە سۆشیال میدیا دەڕوانێت.

بێگومان هەر بەكارهێنەرێكی تۆڕە كۆمەڵایەتییەكان چەند ناوێكی نهێنی و چەند توێژێكی جیاواز و چەند بیركردنەوەیەكی دژی كردە هاوەڵ و هاوسێی ئەلەكترۆنی خۆی، ئەوا دەبێت هەر چاوەڕێی ئەوە بكات كە بەردەوام گەڕەكە ئەلیكترۆنییەكەی پڕبێت لە فەوزا و شەڕو ناخۆشی. هەر كەسێكیش چووە گەڕەكێكی ئەلیكترۆنی رۆشنبیر و چەند ماڵ و جێگایەكی باش، نزیكی ماڵە ئەلەكترۆنییەكەی بوو، ئەوا لەو گەڕەكەدا دەحەسێتەوە و كێشەی بۆ دروست نابێت و هاوار لەدەست سۆشیال میدیا ناكات.

ئێمە دەبێت پێش هەموو شتێك عەقڵ وەپێش خۆمان بخەین كە چۆن دەتوانین بەشێوەیەكی تەندروست سۆشیال میدیا بەكاربهێنین. تا قیامەت لەڕێگەی كۆمێنت و هێرشكردنەوە بۆسەر مەزهەبی شیعە، هاووڵاتییەكی شیعە مەزهەب ناكەین بە سوننە! و بەپێچەوانەشەوە، كەواتە یان لێبگەڕێ یان لێی دووركەوینەوە، با عوقدەیەكی گەورەمان بۆ دروست نەكات. با عەقڵمان بخەینەكار، هەركەسێك لەم تۆڕە كۆمەڵایەتییانەدا بۆ دراوسێیەتیمان ناشێت، هاتوچۆی ماڵیان نەكەین!

ئەگەر تۆ لەم تۆڕە كۆمەڵایەتییانەدا ماڵێكی ئەلەكترۆنیت هەیە و بەردەوام لەگەڵ ماڵێكی تری ئەلیكترۆنی تر لەكێشە و چەلەحانێ و شەڕدایت، ئەوا هەڵەیە تۆ بەردەوامی بە دراوسێیەتییەكی لەو شێوەیە بدەیت.
لەم كاتەدا ناچار یان دەبێت تۆ عاقڵانە لە دراوسێیەتی بڕۆیت، یان هەر خەریكی بۆڵەبۆڵێكی بێسوود بیت لەدەست سۆشیال میدیا كە چەندین جۆر مرۆڤی پێ ناساندوویت!
كەسێك هیچ پڕۆژەیەكی عەقڵی و ئایینی و هیچ خەونێكی نەبێت لە سۆشیال میدیاوە بانگەشەی بۆ بكات و ئیشی لەسەر بكات، ئەوا بە چەمكی پێشێلكاریی، سۆشیال میدیا جێگەی حەزەكانێتی و جگە لە خۆخاڵیكردنەوەیەك لە بەكارهێنانی سۆشیال میدیا، هیچ مەبەستێكی تری لەپشتەوە نییە، یان سیفاتی ئەم تۆڕانە وایە كە بەبێ بوونی پڕۆژەیەك هەموو بەكارهێنەرێك لەم تۆڕانەدا شوناسە ئەسڵییەكەی خۆی ون دەكات و دەبێتە جۆرێكی تر لەوەی لە ماڵە ئەلەكترۆنییەكانی تردا ناسیومانە.

ئەگەر تۆ خوێنەرێكی جدیت و عەقڵت ئاراستەی شتە باشەكانت دەكات، بۆ لەم سۆشیال میدیا گەورەیەدا چوار نووسین و وتاری بەپێزی تێدا نییە بەرچاوت بكەوێت و بیخوێنیتەوە؟ بۆچی چاوت شتە ناشیرینەكان بەزوویی دەبینێت و رقت هەڵدەسێنێت لە سۆشیال میدیا؟ ئەی بۆچی چاوی سەرت شتە جوانەكان نابینێت تا وات لێ بكات عاشقی خوێندنەوە و زانیاریی بیت؟

سۆشیال میدیا بەهیچ جۆرێك خراپ نییە، بەڵام ئەو كاتەی ئێمەی تاك هاوارمان لێ هەڵدەستێت لە خراپیی سۆشیال میدیا، ئەوە لەو كاتەدایە كە بەبێ ئەوەی ئیشێكمان بە سۆشیال میدیا هەبێت، خۆمان كردۆتە ئەندامێكی ئەم تۆڕانە و ناشتوانین بەرگەی كاریگەرییەكانی بگرین.

سۆشیال میدیا ئەوكاتە خراپە كە كاریگەریی ماڵە ئەلەكترۆنییەكانی جیرانت لە سۆشیال میدیا لەسەر تۆی بەكارهێنەر زیاترە وەك لە كاریگەریی تۆ لەسەر ئەوان.
سۆشیال میدیا كاتێك خراپە چواردەورە خراپەكەت زیاتربێت لە چواردەورە باشەكەت، پۆستە خراپەكانت زۆرتر بەرچاو بكەوێت وەك لە پۆستە باشەكان.

print

 233 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*