سەرەکی » راپۆرت » ئامادەكردنی: دیاری سابیر » یونسێف: ژیانی ملیۆنەها منداڵ لە مەترسیدایە

یونسێف: ژیانی ملیۆنەها منداڵ لە مەترسیدایە

رێكخراوی نەتەوە یەكگرتووكان بۆ منداڵان (یونسێف) هۆشداریی دەدات لەوەی كە نزیكەی 10 ملیۆن منداڵی خوار تەمەن 5 ساڵ ‌و نزیكەی 4 ملیۆن ‌و 500 هەزار منداڵی خوار تەمەن 15 ساڵ، لە ناوچەی خۆرهەڵاتی ناوەڕاست ‌و باكووری ئەفریقا مەترسییان لەسەرە، لە ئەنجامی بێبەشبوون لە ڤاكسینەكان بەهۆی ڤایرۆسی كۆرۆناوە.

كوتان بەردەوامە
رێكخراوە نێودەوڵەتییەكە ئاماژەی بەوەكردووە، كە هەڵمەتەكانی كوتانی تایبەت لە هەندێ وڵاتانی خۆرهەڵاتی ناوەڕاست ‌و باكووری ئەفریقا پەكیانكەوتووە، چونكە كارمەندانی تەندروستی لەو وڵاتانە زیاتر بە بەرەنگاربوونەوەی پەتای ڤایرۆسی كۆرۆناوە سەرقاڵن، لەبەرئەوە لە هەر 5 منداڵ منداڵێك كە ژمارەیان دەگاتە نزیكەی 10 ملیۆن منداڵی خوار تەمەن 5 ساڵ، مەترسی ئەوەیان لەسەر كە ڤاكسینی ئیفلیجی منداڵیان دەست نەكەوێت. هەروەها نزیكەی 4 ملیۆن ‌و 500 هەزار منداڵی خوار تەمەن 15 ساڵیش مەترسیی بێبەشبوونیان لە ڤاكسینی دژی سورێژە لەسەرە.

یونسێف جەختیكردۆتەوە كە وێڕای بڵاوبوونەوەی پەتای ڤایرۆسی كۆرۆنا كۆڤید 19، لەگەڵ رێوشوێنە تەندروستی ‌و خۆپارێزییە توندەكان، كوتانی رۆتینی منداڵان لە خۆرهەڵاتی ناوەڕاست ‌و باكووری ئەفریقا بەردەوامە.

گرتنەبەری رێوشوێنی خۆپارێزی
تید شیبان بەڕێوەبەری هەرێمیی یونسێف لە ناوچەی خۆرهەڵاتی ناوەڕاست ‌و باكووری ئەفریقا دەڵێت: پرۆسەی كوتانی هەر منداڵێك لە دژی نەخۆشییە كوشندەكان زۆر گرنگە، لە نێویشیاندا ئیفلیجی منداڵان ‌و سورێژە ‌و هەوكردنی جگەر. وتیشی: تەنانەت لە سەردەمی بڵاوبوونەوەی ڤایرۆسی كۆرۆناشدا كوتانی منداڵان بەردەوام دەبێت، ئەوەش بە گرتنەبەری رێوشوێنی خۆپارێزی ‌و پابەندبوون بە پرۆسەی پاكژكردنەوە ‌و بەكارهێنانی كەرەستەكانی پاراستنی كەسی، منداڵ ‌و دایك ‌و ئەو كەسەش دەپارێزێت كە ڤاكسینەكەی دەداتێ.

بە وتەی تید شیبان: یونسێف ‌و هاوبەشەكانی ساڵی رابردوو توانیویانە لە هەموو ناوچەكە بە ڤاكسینی ئیفلیجی منداڵ ‌و سورێژە نزیكەی 34 ملیۆن منداڵ بكوتن.

17 ملیۆن ‌و 500 هەزار جورعەی ڤاكسین
لە بەیاننامەیەكیشدا باس لەوەكراوە، كە لە سەرەتای ئەمساڵەوە، سەرەڕای ئاستەنگەكان ‌و كۆت ‌و بەندە سەپێنراوەكان لەسەر جوڵە ‌و داخستنی سنوور ‌و كایەی ئاسمانی زۆربەی وڵاتانی ناوچەكە، یونسێف توانیویەتی 17 ملیۆن ‌و 500 هەزار جورعەی ڤاكسین بۆ خۆرهەڵاتی ناوەڕاست ‌و باكووری ئەفریقا دابین بكات ‌و كاروانی دیكەی باری ڤاكسین ‌و پێداویستییەكانی پاراستنی ژیانیش لە ئامادەكردندان.

هەروەها یونسێف تەئكیدیكردۆتەوە، كە بەردەوام دەبێت لە پشتیوانیكردنی دەسەڵاتە تایبەتەكان ‌و كارمەندانی بواری تەندروستی، بۆ ئاسانكاریی هەڵمەتەكانی كوتانی منداڵان لە سەرتاسەری ناوچەكە ‌و كڕینی ڤاكسین، بەتایبەتی بۆ ئەو وڵاتانەی سنووریان داخستووە ‌و گەشتە ئاسمانییەكانیان هەڵپەساردووە، لەگەڵ چاودێریكردنی كۆگاكانی ڤاكسین لەو وڵاتانە لەپێناوی بەسەرنەچوونی ماوەی بەكارهێنانیان، بەتایبەتی لەو وڵاتانەی هەڵمەتەكانی كوتانیان راگرتووە.

سەرچاوە، ئاژانسەكان

print

 199 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*