سەرەکی » وتار » ماردین عەبدولکەریم » كازمی لە كێڵگەی مین-دایە

دەرگا

كازمی لە كێڵگەی مین-دایە

دوای چەند مانگێك بۆشایی سیاسی لە عیراق، ئەنجومەنی نوێنەران، مستەفا كازمی بەسەرۆكی حكومەت قبوڵكرد. لەگەڵ ئەوەی كازمی بەفەیسێكی جدی و بەبەهێزی هاتە مەیدان و پرۆگرامی حكومەتە پڕچاكسازی و خزمەتگوزارییەكەی راگەیاند، بەڵام مەخابن دابەشكردنەوەی كێكەكە لەمەتبەخی سیاسیدا، هەمان یاساو رێسای پێشووی هەبوو، بەم جۆرە پێشبینیدەكرێت پرۆسەی سیاسیش وەك مارو پەیژە لەئایندەدا بگەڕێتەوە سەر چوارگۆشەی یەكەم.

هەڵبەت ئەم بۆچوونە، نە دژایەتی كازمی-یەو نە بێباكییشە لەگەیشتن بەپرۆسەی ئاشتەوایی نیشتمانی و سەقامگیری لەعیراقدا، بەڵام باشترین گەواهیدەرو دیكۆمێنت لەم بابەتەدا محەمەد تۆفیق عەللاوییە كە داوایكرد دوور لە موحاسەسەی حزبی، كابینەی حكومەت پێكبێنێت، بەڵام سەركەوتوونەبوو. هەربۆیە ئەوەی ئێستا لەعیراقدا دەگوزەرێ‌ لەفەوزای سیاسی زیاتر هیچی تر نییە.

دەستیپێكردنی خۆپیشاندانەكانی نێو شەقامی عیراقی، ڕاستەوخۆ دوای چەند رۆژێ‌ لەدەستبەكاربوونی، پێمان دەڵێت كە هەندێك بەشە كێكەکەی خۆیان لەم حكومەتە بەدڵ نییە، بۆیە نەیانهێشت لانیكەم سێ‌ مانگ بەسەر كاری كازمیدا تێپەڕێ‌، هەزوو شەقامەكانی بەغدا، بەسرە، ناسریە، واست، كەربەلاو كوتیان بەنەیارانی تەیكرد. مایەی تێڕامانە دابەشكارییەكە لەساڵی (2003)ەوە بەم جۆرەیە، هەندێ‌ وەزارەت بۆ شیعەو هەندێكی تر بۆ سوننەو هەندێكی تر بۆ كورد بڕاوەتەوە لەناو ئەم كوتلانەشدا بەكوردیشەوە، نابێ‌ و ناكرێ‌ حزبێک‌ داوای وەزارەتێک بكات كە پێشتر لای حزبێكی تر بووە، حەقیقەتیش ئەوەیە گەر بتوانی‌ ئەو وەزارەتە بكەیتە میراتی حزبەكەت، كە زۆرترین داهاتی هەیە، وەك بڵێیت ماڵی سپی بۆ رۆژی ڕەش، لەكاتێكدا ئەوەی ئەمان ئەمڕۆ بەماڵی سپی و میراتی باوباپیرانیانی دەزانن و دەیان میلیشیای چەكداریان بۆ پارێزگاریكردن لێی دروستكردووە.

لەم كابینەیەشدا وابڕیارە (10) وەزارەت بۆ شیعەكان بكرێتە (11)لەنێویشیاندا تەیاری حیكمە دەوڵەمەندترین وەزارەتی بەرکەوتووە، (6) وەزارەت بۆ سوننە لەنێویاندا (3)بۆ هاوپەیمانی هێزە عیراقییەكان بەسەرۆكایەتی حەلبوسی، (3) بۆ كورد كە بڕیارە بكرێتە (4) لەنێویاندا وەزارەتی دارایی، كە داهاتی نەوت هەموو داهاتەكانیتر دەچێتەوە گیرفانی ئەو وەزارەتە، كە دوو كابینەیە بەدەست پارتی دیموكراتی كوردستانەوەیە.
سەبارەت بەئیحتیكاركردنی وەزارەتەكان لەلایەن حزبەكانەوە بەتایبەتی وەزارەتە دەوڵەمەندەكان، واباشترە باس لەوەزارەتی دارایی بكەم، كە دەبوو بەهۆی بەڕێوەبردنی ئەم وەزارەتە، كورد بەپرۆسەیەكی خێراتر شایستە داراییەكانی بگەیەنێتە هاووڵاتیان و وەبەرهێنەران لەكاتێكدا بەشە بودجەی كورد بڕیارلێدراو بووە، بەڵام وانەبووە.

لەناو ئەم هەموو گەندەڵییەدا، كازمی وەك ئەوە وایە بەنێو كێڵگەی میندا گوزەربكات، چونكە ئەو بەڵێنانەی لەبارەی باشكردنی گوزەران و ئاسایشەوە بە عیراقییەكانی داوە، ناكرێ‌ بگاتە ئەنجام لەكاتێكدا ئابووری عیراق لەئێستادا ئابوورییەكی داڕماوەو كۆرۆناش هێندەی تر گۆمەكەی شڵەقاندووە. لەولاشەوە وڵاتانی زلهێزی جیهانی و ئیقلیمی ئامانجیان لە داگیركردنی خاك و خێری ئەم وڵاتە لەخاوەنە ڕەسەنەكانی كەمترنییەو كێبڕكێیانە تا كازمی بكەنە كلیلی ئەو دەرگایەی بەهۆیەوە سەروەریی خاكی عیراق بخەنە ژێر هەژموونی خۆیانەوە، ئایا كازمی دەتوانێ‌ پارێزگاری لەسەروەریی خاكی عیراق بكات وەك ئەوەی لەبەرنامەی حكومەتەكەیدا دەڵێت شەو دەخەینە سەر ڕۆژ تا پارێزگاری لەسەروەریی خاكی عیراق بكەین و عیراقیش هی عیراقییەكانە.

حكومەتی كازمی كاتییەو یەكێ‌ لەكارەكانی چاكسازییە لەیاسای هەڵبژاردندا، بەڵام تێچووی هەڵبژاردن لەسەرتاسەری عیراق بە نزیكەی (700) ملیۆن دۆلار مەزەندە دەكرێت، ئایا حكومەتی عیراق لەم هەلومەرجە ئابوورییە داڕماوەدا، هێزی ئەوەی هەیە جگە لەبەڵێنەكانی چاكسازی و دابینكردنی مووچەی هاووڵاتیانی و ناردنی بودجەو موچەی كوردستان، ئەو بڕە پارەیەش بۆ هەڵبژاردن ئامادەبكات؟ بۆیە دەپرسین گەر عیراق توانای هەڵبژاردنی پێشوەختی نەبێ، ئاخۆ لەم كێڵگەی مینەدا چ مینێک بە كازمیدا بتەقێتەوە.

print

 287 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*