سەرەکی » چاوپێکه‌وتن » رۆڵی ژن لەناو یەكێتیدا یەکێک بووە لە خاڵە گەشەکانی خەبات

رۆڵی ژن لەناو یەكێتیدا یەکێک بووە لە خاڵە گەشەکانی خەبات

لەشۆڕشی نوێی گەلەكەماندا بەڕابەرایەتی یەكێتیی نیشتمانیی كوردستان، رۆڵی ژن یەکێک بووە لە خاڵە گەشەکانی خەباتی یەکێتی چ وەک ژنان لەناو ریزەکانی رێکخستندا چ وەک ژنانی پێشمەرگە کە هاوڕێ لەگەڵ هاوسەرەکانیان هاوخەبات بوون.

دەربارەی ئەم گرنگیدانە بە ژنان و هەوڵ و ماندووبوونەکانیان لەیادی دامەزراندنی (45) ساڵەی یەكێتیی نیشتمانیی كوردستاندا كە بەیادی (نوێ.. نوێبوونەوە) دادەنرێت، کوردستانی نوێ ژمارەیەك ژن دەدوێنیت كە رۆڵی بەرچاویان هەبووە لە داینەمۆی شۆڕش و ئێستاش لەگەڵ نووێبوونەوەی یەكێتی بەردەوامن:

تارق کەمال

لەمبارەیەوە پرشنگ مەجید رەحمان كارگێڕی مەڵبەندی یەكی سلێمانی و لێپرسراوی بەشی شەهیدان، وتی:
لەم یادە پیرۆزەدا سڵاو و درود بۆ ڕۆحی بەفرینی جەنابی مام جەلال شكۆی نەتەوەیەك، سڵاو و درود بۆ گیانی پاكی شەهیدانی (ی.ن.ك) كە بەخوێنی گەشیان یەكێتی گەشتە ئەمڕۆ.

ژن بۆ خوی كارەكتەرێكی گرنگە لەناو كومەڵگەداو رۆڵی كاریگەری هەیە لە بەرەو پێشبردنی كومەڵگەدا، یەكێتی نیشتمانی كوردستانیش هەڵقوڵاوی ناو كومەڵگەیە، واتە بەپشتیوانی خەڵك دروستبووە، بۆیە یەکێتی هەر لەسەرەتای دروستبوونییەوە گرنگی زۆری داوە بەژن، ئەو گرنگیدانەش لەكار و بەرنامەكانیدا بەتەواوی رەنگیداوەتەوە، بەتایبەتی جەنابی مام جلال زۆر پشتوپەناو هاوكاری ژنان بووە بۆ بەشداریكردنیان لەسیاسەتدا بۆ بەدەستهینانی مافەكانیان، ئەمەش هاوکاربوو بۆئەوەی كە ژنان خۆشیان هەوڵبدەن‌و ئامادەییان هەبێت لەناو یەكێتیی نیشتمانیی كوردستاندا.

ژنان لە سەرەتای دامەزراندنی یەكێتیی نیشتمانیی كوردستانەوە روڵیان هەبووە لە خەباتی نهێنی و هاوكاریی شۆڕش و پشتیوانێكی باشی برا پێشمەرگەکان لە شاخدا هاوكارو پشتیوانیكی باشی باوك و براو میردەكانیان بوون، هەم وەك دایك و هەم وەك ژنە پێشمەرگەیەك كە رۆڵێكی بەرچاویان گێڕاوە ئامادەبوونیشیان لەناو ئۆرگانەكانی یەكێتیی نیشتمانیی كوردستاندا، ئەمەجگەلەوەی هیشتا ئەم بەشدارییە كەمەو لە ئاست خواستی ئێمەی ژناندا نییە، لەلایەكی تریشەوە دروستكردنی رێكخراوەكانی ژنان پشتیوان و هاوکارێکی باشی یەكێتی نیشتمانی كوردستان بووە بۆ داكوكیكردن لە مافەكانی ژنان.

لەڕاپەڕینە جەماوەرییەكانیشدا روڵی كاریگەریان هەبوو بۆ پشتیوانیی یەكێتیی نیشتمانیی كوردستان و سەركەوتنی لەكاتی هەڵبژاردنەكانیشدا روڵی گەورەیان هەبووە بۆ سەرخستنی لیستی یەكێتیی نیشتمانیی كوردستان، هەروەها ژنان بەشداریشیان هەبووە لە پوستی سیاسی و ئیداری لە پشكی یەكێتیی نیشتمانیی كوردستان، ژنان روڵی گەورەیان بینیووە لە مافەكانی ژنان لەناو یەكێتیی نیشتمانیی كوردستان، ژنانی یەكێتی لە شاخیشدا رۆڵێكی بەرچاویان هەبووە لە كارەكانیاندا لەڕێكخراوەكان و هێزی پێشمەرگەی ژنان و رێكخراوە جێندەرەكان و بەرەنگاربوونەوەی توندوتیژی دژی ژنانیشدا رۆڵێكی باشیان گێڕاوە بۆ چەسپاندنی مافەكانی ژنان بەگشتی و نەهێشتنی جیاوازیی.

print

 425 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*