سەرەکی » دۆسێ » كامپی هۆل بۆمبێكی گه‌وره‌ى ترسناكه‌، چاره‌سه‌ر نه‌كرێت دوباره‌ به‌جیهاندا ده‌ته‌قێته‌وه‌

خاكی ره‌ش

كامپی هۆل بۆمبێكی گه‌وره‌ى ترسناكه‌، چاره‌سه‌ر نه‌كرێت دوباره‌ به‌جیهاندا ده‌ته‌قێته‌وه‌

*دادگای تایبه‌تیان هه‌یه‌ له‌ناو كه‌مپ، ئه‌وه‌ى له‌رێساكانی داعش لابدات ده‌یكوژن
*هه‌رچی بچێته‌ كه‌مپه‌كه‌ له‌وانه‌ روبه‌رووی په‌لامار ببێته‌وه‌
*زیاتر له‌ 70 هه‌زار پاشماوه‌ى داعش له‌كه‌مپێكدا كۆكراونه‌ته‌وه‌

سه‌رتیپ جه‌وهه‌ر
به‌شی/ ده‌یه‌م

شه‌و دوكه‌ڵی جگه‌ره‌ قانگی دابووم، هه‌موو شه‌و ئه‌وه‌ حاڵی من بوو، یه‌كێك بوو له‌گرفته‌ گه‌وره‌كانم. به‌یانی دره‌نگانێك له‌خه‌و رابووم و ده‌بوو بچمه‌ كامپی هۆل. ئه‌و كه‌مپه‌ یه‌كێكه‌ له‌چیرۆك و باسه‌ زۆر گرنگه‌كانی رۆژئاوای كوردستان، پرسێكی زۆر هه‌ستیاره‌و نه‌ك ئیداره‌ى رۆژئاوای كوردستان، به‌ڵكو ئه‌وروپاو ئه‌مریكاو وڵاتانی ناوچه‌كه‌ى سه‌رقاڵكردووه‌ تائێستا نه‌توانراوه‌ چاره‌سه‌رێكی گونجاوی بۆ بدۆزرێته‌وه‌.

كامپی هۆل نزیكه‌ى 100 كیلۆمه‌ترێك له‌ قامیشلۆوه‌ دووره‌، نزیكه‌ی 70 هه‌زار ژن و منداڵی تیرۆرستانی داعشی لێی نیشته‌جێكراوه‌، ئه‌وانه‌ له‌شه‌ڕو روبه‌رووبونه‌وه‌كاندا به‌دیل گیراون، یان خۆیان دوای كۆنترۆڵكردنی ناوچه‌كانی پێشتر داعش داگیری كردبوون ده‌ستگیركران و كه‌وتنه‌ ده‌ست هێزه‌كانی سوریاى دیموكرات.

پێشتر له‌گه‌ڵ رێڤه‌به‌رى خۆسه‌ر قسه‌مكردبوو سه‌ردانی كامپه‌كه‌ بكه‌م، ئه‌وان ئامۆژگاریان كردم سه‌ردانی ناو كامپه‌كه‌ نه‌كه‌م، ئه‌گه‌ر سه‌ردانیشم كرد زۆر به‌وریاییه‌وه‌ مامه‌ڵه‌ بكه‌م و زۆر له‌ناوه‌وه‌ نه‌مێنمه‌وه‌. بێگومان ئه‌م ئامۆژگارییه‌ بۆ خۆپارێزی له‌ رووداوی نه‌خوازراو له‌لایه‌ن دانیشتوانی كامپه‌كه‌ كه‌ هه‌موویان تیرۆرستن.

به‌یانی ده‌وروبه‌رى سه‌عات 10ی به‌یانی به‌ره‌و كامپ به‌ڕێكه‌وتم، مه‌به‌ستم بوو ته‌نها كامپه‌كه‌ ببینم یان چه‌ند وێنه‌یه‌كی بگرم، ئه‌گینا زانیاریی زۆرم له‌سه‌ر كامپه‌كه‌ له‌لای لێپرسراوانی رێڤه‌به‌رى خۆسه‌رى و چالاكوانان و خه‌ڵكی به‌ئاگا كۆكردبۆوه‌. چونكه‌ باسی ئه‌م كامپه‌ گه‌لێك گرنگه‌، هه‌رچی ده‌یهێنن و ده‌یبه‌ن ناتوانن چاره‌سه‌رێكی بۆ بدۆزنه‌وه‌و گرێدراوی ته‌واوی ناوچه‌كه‌و جیهانیشه‌.

پێشتر ته‌گبیری ئۆتۆمبێلم كردبوو، ته‌له‌فۆنم بۆ رێڤانی شۆفێر كردبوو ئه‌و له‌واده‌ى خۆیدا ئاماده‌بوو. به‌یه‌كه‌وه‌ هورده‌ هورده‌ به‌ره‌و حه‌سه‌كه‌ به‌ڕێكه‌وتین. رێگایه‌كی ناخۆش و پڕ پێچاو پێچ، سه‌رمایه‌كی زۆرو وشك. رێڤان له‌گه‌ڵ ئه‌وه‌ى شۆفێر بوو، كڵاشینكۆفێكیشی پێبوو له‌ته‌نیشت خۆیه‌وه‌ داینابوو، بێگومان ئه‌مه‌ له‌به‌ر هۆكاری ئه‌منی كه‌ سه‌ربارى ئه‌وه‌ى دۆخی ئه‌منی ناوخۆی رۆژئاوا سه‌قامگیره‌، به‌ڵام دوركه‌وتنه‌وه‌ له‌شارو رۆیشتن به‌ناوچه‌ دوره‌ ده‌سته‌كان پێویستى به‌كه‌مێك ئاگایی و ورییایه‌وه‌ هه‌یه‌.

دوای دووسه‌عاتێك رۆیشتن، نمه‌ نمی باران و به‌ناو ئه‌و ده‌شته‌دا، گه‌یشتینه‌ كه‌مپه‌كه‌. ئه‌وه‌ى من چاوه‌ڕێى نه‌بووم گه‌وره‌یی و قه‌باره‌ى كه‌مپه‌كه‌ بوو، كه‌ شارێكی گه‌وره‌و چڕ دانیشتوان بوو. هه‌زاران هه‌زار چادرو كه‌پرو خیوه‌تی جیاواز به‌ته‌نیشت یه‌كه‌وه‌ له‌گۆڕه‌پانێكی ته‌خت و ده‌شتاییه‌كی بێكۆتایی هه‌ڵدراوه‌، هیچ نیشانه‌یه‌كی شارستانێتی سه‌رده‌می لێ نابینی و له‌ئاسمانه‌وه‌ وه‌ك شاره‌ مێروستان (مێرووله‌) وایه‌! هه‌ر هه‌مووی وه‌ك بونه‌وه‌ری یه‌كپارچه‌ ره‌ش، ته‌نانه‌ت چاوه‌كانیشیان دیار نییه‌ ده‌جوڵینه‌وه‌.

به‌رله‌وه‌ى بچینه‌ كامپه‌كه‌ هه‌ماهه‌نگیمان له‌گه‌ڵ هه‌ڤاڵ عاكیف رێكخستبوو، ئه‌و په‌یوه‌ندی به‌ئیداره‌ى كامپه‌كه‌وه‌ كردبوو. عاكیف بۆخۆی له‌فه‌رمانگه‌ى په‌یوه‌ندییه‌كانی ریڤه‌به‌ری خۆسه‌ر بوو، كه‌ گه‌یشتین له‌ئیداره‌ى كامپ كه‌مێك پشوومانداو هه‌ندێك رێنماییان كردین له‌مه‌سه‌له‌ى چوونه‌ ژوره‌وه‌ى كامپ و خۆ پارێزیی و چۆنییه‌تی مامه‌ڵه‌كردن له‌گه‌ڵ دانیشتوانی ئه‌و كامپه‌.

كامپی هۆل له‌سه‌ره‌تای نه‌وه‌ده‌كانی هه‌زاره‌ى رابردوو (1991) له‌دوای داگیركردنی كوێت له‌لایه‌ن حكومه‌تی ئه‌وكاته‌ى عیراق (سه‌دام حوسێن)ه‌ وه‌ له‌خوار سه‌نته‌ری پارێزگاى حه‌سه‌كه‌ دروستكراوه‌، به‌ڵام له‌دواى 2003 ژماره‌یه‌كی زۆری ئاواره‌ى بارودۆخی دواى روخانی رژێمی سه‌دام روویان له‌سوریا كردو له‌وێ نیشته‌جێ بوون. ئه‌وانه‌ى له‌وێ نیشته‌جێ بوون ژماره‌یان له‌ 15 هه‌زار كه‌س زیاتر بوو. دواى چه‌ند ساڵێك به‌ره‌ به‌ره‌ دوباره‌ روویان له‌عیراق كرده‌وه‌و نزیكه‌ى نیوه‌یان گه‌ڕانه‌وه‌، له‌دواى ئاڵۆزبوونی بارودۆخی سوریاو گرژی ناوچه‌كه‌ به‌تایبه‌ت له‌ دوای شكستی داعش و گروپه‌ تیرۆرخوازه‌كان له‌ كۆتایی 2015 به‌دواوه‌، هێدی هێدی ئه‌م كامپه‌ ژماره‌ى ئاواره‌كانی زیاتر ده‌بوو، به‌ڵام له‌دواى 25ی ئاداری 2019 و رزگاركردنی شارۆچكه‌ى باغۆز وه‌ك دوایین پێگه‌ى داعش له‌سوریا، ژماره‌یه‌كی زۆر خانه‌واده‌و ژن و منداڵی داعش دوای ده‌ستگیركردن و خۆ راده‌ستكردنیان هێنرانه‌ كامپی هۆل و نیشته‌جێكران.

باسوخواسی ئه‌و كامپه‌ حیكایه‌تێكی سه‌یره‌، پێویستى به‌لێكۆڵینه‌وه‌و توێژینه‌وه‌ى وورد هه‌یه‌، له‌هه‌رلایه‌كه‌وه‌ ده‌ستی بۆ ببه‌یت، ده‌رگای دیكه‌و باسی دیكه‌ى لێده‌بێته‌وه‌، باسێكی عه‌جایبه‌و پێویسته‌ زۆر خێرا چاره‌سه‌ر بكرێت، هه‌موو ئه‌وانه‌ى بینیماننن ده‌یانگوت بۆمبێكی دانراوه‌و ته‌وقیتكراوه‌، بێگومان رۆژێك دێت نه‌ك چاره‌ناكرێت، به‌ڵكو یه‌خه‌ى هه‌موو ناوچه‌كه‌و جیهان ده‌گرێته‌وه‌.

له‌و كامه‌دا زیاتر له‌ 72 هه‌زار مرۆڤ ده‌ژییت، له‌و ژماره‌یه‌دا 30 هه‌زارێك عیراقین. له‌و عیراقیانه‌ نزیكه‌ى 5 هه‌زاریان مێژووی نیشته‌جێبونیان ده‌گه‌ڕێته‌وه‌ بۆ پێش و دوای روخانی سه‌دام، واته‌ ده‌یان ساڵه‌ له‌كامپه‌كه‌ نیشته‌جێن، ئه‌وانی دیكه‌ هه‌موویان ژن و منداڵ و كه‌سوكارى تیرۆرخوازانی داعشه‌و له‌شه‌ڕه‌كان به‌دیل گیراون یان خۆیان راده‌ستی هێزه‌كانی سوریاى دیموكرات كردووه‌و له‌وێ نیشته‌جێكراون.

30 هه‌زارێكیشیان هاوڵاتی سوریین و 11 هه‌زارو 500 كه‌سیشیان بیانین هه‌روه‌ك عه‌بدولكه‌ریم عومه‌ر لێپرسراوی په‌یوه‌ندییه‌كانی رێڤه‌به‌رى خۆسه‌ر وتی، خه‌ڵكی وڵاتانی عه‌ره‌بی و ئیسلامیی و ئه‌وروپاو چه‌ند وڵاتێكی ئاسیای ناوه‌ڕاست و روسیان، هه‌موویان ژن و منداڵ و كه‌سوكارى تیرۆرستانی داعشن و له‌لایه‌ن هێزه‌كانی سوریاى دیموكرات یان به‌دیل گیراون یان خۆیان راده‌ستكردووه‌.

كارمه‌ندێكی ئیداره‌ى كامپه‌كه‌و دوو پاسه‌وانی تایبه‌ت هاوڕێیه‌تی سه‌ردانێكی كورتی ناو كه‌مپیان كردین. پێیان وتین ده‌بێ زۆر وریاى خۆتان بن نه‌بادا په‌لامارتان بده‌ن، چونكه‌ په‌لاماردان له‌ناو كامپه‌كه‌ وه‌ك دیارده‌یه‌كی لێهاتووه‌!

ئێمه‌ هێواش هێواش به‌ئۆتۆمبێل به‌ناو كامپه‌كه‌دا ده‌ڕۆیشتین، به‌ناو جیهانێكی تایبه‌ت، كه‌ وه‌ك ریشۆڵه‌ به‌یه‌كه‌وه‌ ده‌جوڵانه‌وه‌و كه‌س كه‌سی نه‌ده‌ناسیه‌وه‌، هه‌مووی ده‌ست و ده‌موچاو داپۆشراو. بازاڕێكی چكۆله‌ له‌ كه‌پرۆكه‌و چادر، زۆربه‌ى پێداویستیه‌كانی رۆژانه‌ى ژیانی لێ ده‌ستده‌كه‌وێت.

ئه‌و كامپه‌ به‌گه‌وره‌ترین مۆڵگای تیرۆرستان داده‌نرێت، به‌هه‌موو پێوه‌رێك جگه‌ له‌و عیراقیانه‌ى پێشتر له‌وێ بوون، ئه‌وانی دیكه‌ هه‌موویان تیرۆرخوازن، ژنه‌كانیان هه‌ستبكه‌ن تۆ بیانیت یان رۆژنامه‌نوسیت ده‌ته‌وێ له‌سه‌ر ژیانی كامپه‌كه‌ بنوسیت لیت نزیك ده‌بنه‌وه‌و به‌هه‌لهه‌له‌و هاوار رسته‌یه‌كی ناسراو هه‌یه‌ دوباره‌ى ده‌كه‌نه‌وه‌ “دوله‌ الاسلام باقیه‌” واته‌ ده‌وڵه‌تی ئیسلام هه‌ر ده‌مێنێت.

له‌و كامپه‌دا كه‌ زیاتر حه‌فتا هه‌زار كه‌سی تێدا، رێكخستنی گروپی تیرۆرخوازی داعش زۆر به‌هێزه‌، ئه‌گه‌رچی ئه‌وانه‌ى له‌ناو كامپه‌كه‌ن په‌یوه‌ندییه‌كی ئه‌وتۆیان له‌گه‌ڵ ده‌ره‌وه‌دا نییه‌و ده‌وریان گیراوه‌، به‌ڵام له‌ناوخۆدا قانونی حوسبه‌ى ئیسلامیی جێبه‌جێده‌كرێت كه‌ له‌سه‌ر بنه‌مای (الامر بالمعروف و النهی عن المنكر) بنیاتنراوه‌.

رووداوه‌كانی ناو ئه‌و كامپه‌ ناگێڕدرێته‌وه‌، بارودۆخێكی كۆمه‌ڵایه‌تی تایبه‌ته‌و له‌هیچ شوێنێكی ئه‌م سه‌ر زه‌مینه‌ نییه‌. هه‌ركه‌سێكی بیانی بچێته‌ كه‌مپه‌كه‌ مۆڕه‌ی لێده‌كرێت. هه‌ندێجار جنێوی پێده‌درێت و هاوارى به‌سه‌ردا ده‌كرێت. هه‌ركه‌سێكیش له‌گه‌ڵ بیانیه‌كان بدوێت یان هه‌ستبكرێت قسه‌یان بۆ ده‌كات، ئه‌گه‌رێكی به‌هێزه‌ شه‌و له‌لایه‌ن ژنه‌كانی كامپه‌كه‌ په‌لامار بدرێت و بكوژرێت! دیارده‌ى كوشتن له‌ناو كامپه‌كه‌دا باوه‌و ئه‌وانه‌ى گومانیان لێده‌كرێت په‌یوه‌ندیان له‌گه‌ڵ په‌یه‌ده‌ یان ئیداره‌ى كامپه‌كه‌دا هه‌یه‌ شه‌و په‌لامار ده‌درێن، یان چادره‌كانیان ده‌سوتێنن یان به‌چه‌قۆ په‌لاماریان ده‌ده‌ن و ده‌یانكوژن، بۆیه‌ زۆر رۆژ هه‌یه‌ یه‌كێك یان دووان به‌كوژراوی ده‌دۆزرێنه‌وه‌. له‌وه‌ خراپتر هه‌ندێجار په‌لامارى ئه‌و خێزانه‌ عیراقیانه‌ ده‌درێت كه‌ په‌یوه‌ندیان به‌داعشه‌وه‌ نه‌بووه‌و پێش دروستبونی داعش له‌كامپه‌كه‌ بوون، بۆیه‌ هه‌ستده‌كه‌یت ئه‌و كامپه‌ له‌شارێك ده‌چێت كه‌ داعش تێیدا حوكمڕانه‌، هه‌روه‌ك تائێستا چه‌ندین جار له‌لایه‌ن تیرۆرستانی كه‌مپه‌كه‌ په‌لامارى هێزه‌كانی ئاسایش و پاراستنی كه‌مپه‌كه‌وه‌ دراوه‌و برینداركراون.

له‌وه‌ خراپتر، هه‌ڵاتن و راكردن له‌و كه‌مپه‌ یه‌كێكه‌ له‌مه‌ترسییه‌ گه‌وره‌كان، رۆژ نییه‌ چه‌ن كه‌سێك به‌قاچاخ و به‌نهێنی له‌كه‌مپه‌كه‌دا رانه‌كه‌ن. چه‌ند جارێك له‌ڕێى رێكخراوه‌ مرۆییه‌كان به‌قاچاخ ده‌ربازكردنی تیرۆرستانی كه‌مپه‌كه‌ ئاشكرابووه‌. هه‌یه‌ سیم و په‌رژینی كه‌مپه‌كه‌ی بڕیوه‌و رایكردووه‌، هه‌روه‌ك باندی مه‌ترسیدار هه‌یه‌ كه‌ كار له‌سه‌ر ده‌ربازكردنی ژن و منداڵانی داعش ده‌كه‌ن له‌كامپه‌كه‌ له‌به‌رامبه‌ر پاره‌ى زۆر.

دوای پرسیاركردن و به‌دواداچوونی زۆر، پێده‌چێت به‌شێك له‌و تیرۆرستانه‌ى ناو كه‌مپه‌كه‌، په‌یوه‌ندیان له‌گه‌ڵ تیرۆرستانی داعش هه‌بێت له‌ده‌ره‌وه‌ى كه‌مپه‌كه‌ له‌ڕێی مۆبایله‌وه‌، هه‌ر ئه‌و تیرۆرستانه‌ قاچاخچی بۆ ژن و منداڵه‌كانیان له‌ناو كه‌مپه‌كه‌ رێكده‌خه‌ن و پلانی ده‌ربازكردنیان داده‌نێن و جێبه‌جێده‌كه‌ن. به‌قسه‌ى ئه‌وانه‌ى ئاگاداربوون، قاچاخچی هه‌بووه‌ زیاتر له‌ 10 هه‌زار دۆلاری بۆ ده‌ربازكردنی یه‌ك كه‌س وه‌رگرتووه‌.

مه‌سه‌له‌ى كۆنترۆڵكردنی باری ئه‌منی شاره‌كه‌ ئاسان نییه‌، له‌لایه‌ك به‌هۆی باڵاپۆشی و په‌چه‌وه‌ ناسینه‌وه‌ی كه‌سه‌كان زه‌حمه‌ته‌، له‌لایه‌كی دیكه‌ توانای لۆجستی بۆ پاراستنی كامپێكی ئاوها گه‌وره‌ ئاسان نییه‌، نه‌خاسمه‌ له‌رۆژئاوای كوردستان كه‌ له‌بارودۆخێكی ئابوریی خراپدا ده‌ژین به‌به‌رده‌وامی له‌ئاڵۆزیی و به‌ره‌نگاربونه‌وه‌دابوون له‌گه‌ڵ گروپه‌ تیرۆرخوازه‌كان و توركیا.

یه‌كێكی دیكه‌ له‌مه‌ترسییه‌ زۆر خراپه‌كانی ناو كامپه‌كه‌، پاشماوه‌ى رێكخستنه‌كانی داعش قانونی حوسبه‌ى ئیسلامیی جێبه‌جێده‌كه‌ن كه‌ له‌سه‌ر بنه‌مای (الامر بالمعروف و النهی عن المنكر) بنیاتنراوه‌. به‌جۆرێك به‌تێگه‌یشتنی ئه‌وان ئه‌گه‌ر یه‌كێك له‌پێوه‌رو چوارچێوه‌ دینیه‌كه‌ى ئه‌وان لابدات، ئه‌وا به‌نهێنی دادگایی ده‌كه‌ن و بڕیار له‌باره‌ى چاره‌نوسی ئه‌وكه‌سه‌ ده‌ده‌ن كه‌ له‌و ده‌ق و قانونانه‌ لایداوه‌ كه‌ خۆیان بڕوان پێیه‌تی. هه‌بووه‌ له‌سه‌ر سه‌رپێچییه‌ك له‌و یاسایانه‌ى ئه‌وان بڕوایان پێیه‌تی، كوشتویانه‌، یان داركارییان كردووه‌.

له‌ناو كامپه‌كه‌ بووم و دونیا زۆر سارد بوو، له‌دوره‌وه‌ دیاربوو ئێمه‌ خه‌ڵكی كامپه‌كه‌ نین، له‌لایه‌ك پاسه‌وانمان له‌گه‌ڵ بوو، له‌لایه‌كی دیكه‌ جلوبه‌رگ قسه‌كردن و هه‌ڵسوكه‌وتمان جیاوازبوو. یه‌كێك له‌گرفته‌ زۆر گه‌وره‌كانم بۆ دواندنی خه‌ڵك ئه‌وه‌بوو كه‌ زۆربه‌ى هه‌ره‌زۆری دانیشتوانی ئه‌و كامپه‌ ژنن، ئه‌و ژنانه‌ش خۆیان پێچاوه‌ته‌وه‌ ئاسان نییه‌ قسه‌كردن له‌گه‌ڵیان، به‌ڵكو ناتوانی ده‌رفه‌تێك دروستبكه‌یت پرسیاریان لێبكه‌یت، بۆیه‌ ناچار هه‌ندێجار قسه‌م له‌گه‌ڵ چه‌ند منداڵێك یان مێردمنداڵێك كرد.

ئه‌وه‌ى سه‌رنجی راكێشام منداڵێكی پرچ زه‌رد بوو كه‌ شێوه‌ى له‌ ئه‌وروپیان ده‌كرد. به‌عه‌ره‌بیه‌كی ناڕێك قسه‌ى ده‌كرد، چه‌ند پرسیارێكم لێكرد هه‌ستت ده‌كرد ئه‌مه‌ عه‌ره‌ب نییه‌، له‌گه‌ڵیا به‌و ئینگلیزییه‌ى ده‌یزانم چه‌ند پرسیارێكم لێكرد خێرا وڵامی دامه‌وه‌.

ئه‌و منداڵه‌ نه‌وه‌ى داعشێك بوو دایكی خه‌ڵكی وڵاتانی ئیسكه‌نده‌نافیا (فنله‌ندا) بوو، به‌ڵام له‌گه‌ڵ پرسیار لێكردنیشی به‌جۆرێك له‌خۆدزینه‌وه‌ یان شه‌رم ئیدی وڵامه‌كانی كورت بوون و رۆیشت.

یه‌كێك له‌گرفته‌ هه‌ره‌ گه‌وره‌كانی ئه‌و كامپه‌ پرسی ئه‌و منداڵانه‌یه‌ كه‌ له‌كه‌مپه‌كه‌ن و له‌گه‌ڵ دایكیانن یان ئه‌و منداڵانه‌ى دایك و باوكیان دیارنییه‌و نازانرێت كێین و له‌كوێن!! واته‌ چاره‌نوسی ئه‌و نه‌وه‌یه‌ى له‌كه‌مپه‌كه‌ كه‌ساڵ دوای ساڵ گه‌وره‌تر ده‌بن و له‌ژێر ده‌ستی ئه‌و دایكانه‌ گه‌وره‌ ده‌بن كه‌ بڕوایان به‌تیرۆر هه‌یه‌و زاده‌ى واقعێكی زۆر توندڕه‌و و مه‌ترسیدارن، تائێستاش چاره‌سه‌رێكی ئه‌وتۆ به‌رده‌ست نییه‌ بتوانرێت كه‌مێك له‌و مه‌ترسییه‌ كه‌مبكرێته‌وه‌.

print

 403 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*