سەرەکی » دۆسێ » 12هه‌زار داعشی زیندانه‌كه‌ی رۆژئاوای كوردستان ، له‌بۆمبی ئه‌تۆمی مه‌ترسیدارترن

خاكی ره‌ش

12هه‌زار داعشی زیندانه‌كه‌ی رۆژئاوای كوردستان ، له‌بۆمبی ئه‌تۆمی مه‌ترسیدارترن

سه‌رتیپ جه‌وهه‌ر

به‌شی – 11 –

له‌نێو كه‌مپه‌كه‌ هێواش هێواش رێمان ده‌كرد، سه‌یری ئه‌ملاو ئه‌ولام ده‌كرد، هه‌ندێجار دالغه‌ ده‌یبردمه‌وه‌ كه‌ ئه‌وه‌ى بینیومه‌ ده‌شێت رۆژێك بێت هه‌ندێ كه‌س بڕوا نه‌كه‌ن. هه‌ندێجار داڵغه‌ ده‌یبردمه‌وه‌ ناو فیلمی ریساله‌، ئه‌و فیلمه‌ی به‌ منداڵی چه‌ندین جارمان بینیبوو، له‌ژێر كاریگه‌ریی دیمه‌نه‌كانیدا بووین، مه‌به‌ستم له‌دیمه‌نه‌كان زیاتر ئێكسسواراته‌ نه‌ك ناوه‌ڕۆكی فیلمه‌كه‌، واته‌ جلوبه‌رگ و شێوه‌ى ژیانی ناو فیلمه‌كه‌.

راستییه‌ك هه‌یه‌ ره‌نگه‌ نه‌توانین تیشكی بخه‌ینه‌سه‌ر، ئه‌ویش له‌دواى هاتنی داعش و كوشتنی هه‌زاران مرۆڤ و سه‌ربڕینی خه‌ڵكی بێتاوان و به‌كه‌نیزه‌ك كردنی كوردانی ئێزدی، تێبینیمان كرد دیمه‌نه‌كانی مێژووی ئیسلام گۆڕانی گه‌وره‌یان به‌سه‌رداهات. له‌وه‌ به‌دوا به‌شێك له‌ رووداوه‌كانی مێژووی ئیسلام به‌شێوه‌یه‌كی دیكه‌ خرایه‌ڕوو، خه‌ڵك كه‌وتنه‌ ژێر كاریگه‌ریى ئه‌و راستییه‌ مێژووییانه‌ى له‌دوای هاتنی داعش بڵاوكرانه‌وه‌. ته‌نانه‌ت خه‌ڵك له‌ سۆسیال میدیا به‌ته‌واوی كه‌وته‌ ژێر كاریگه‌ریى دووباره‌ وێناكردنه‌وه‌ى مێژووی ئیسلام.

هه‌ر له‌نێو كامپه‌كه‌دا ده‌مگوت: ره‌نگه‌ رۆژانێك نه‌وه‌ى نوێ بڕوا نه‌كه‌ن كه‌ ده‌یان هه‌زار تیرۆریست له‌ كامپێك كۆكراونه‌ته‌وه‌ و هه‌ریه‌كێك له‌وانه‌ وه‌ك مارى ژهراوییه‌ و ده‌شێت رۆژێك له‌ڕۆژان ببێته‌ هۆكارى تیرۆركردنی خه‌ڵك، ده‌شێت نه‌وه‌ى تازه‌ چه‌كه‌ره‌كردووی ئه‌م كه‌مپه‌ ببنه‌ به‌ڵایه‌ك به‌سه‌ر ناوچه‌كه‌ و جیهانه‌وه‌ و به‌كه‌س چاره‌سه‌ر نه‌كرێت.

كامپێك زیاتر له‌ 72 هه‌زار كه‌س له‌خۆ ده‌گرێت ده‌ڵێت وڵاتی ژن ومنداڵانه‌، به‌پێى ئاماری به‌رده‌ست له‌ 94% كامپی هۆل ژن و منداڵن و ته‌نها له‌ 4%یان پیاون!! ئه‌و ژماره‌یه‌ش زۆر جێى سه‌رنجه‌. هه‌ر له‌ڕێ رۆیشتن ده‌مگوت ئه‌وه‌ چ ژیانێك لێره‌ هه‌یه‌. نه‌ ره‌نگی تێدایه‌و نه‌ مۆسیقاو نه‌خۆشه‌ویستی و نه‌ هیچ هه‌ستێكی بوون و نیشانه‌یه‌كی شارستانیی، بگره‌ به‌جۆرێك داخراوه‌ وه‌ك چۆن ژنه‌كانی ناو كه‌مپه‌كه‌ خۆیان داپۆشیوه‌و پێچاوه‌ته‌وه‌، ژیانیش له‌وێ ئاوها پێچراوه‌ته‌وه‌.

له‌دوكانێك لاماندا ویستم له‌و رێگه‌وه‌ هه‌ندێك پرسیار بكه‌م و بزانم چی له‌م كه‌مپه‌ ده‌گوزه‌رێت. كابرای دوكاندار عیراقیی بوو و ده‌مێك بوو له‌كه‌مپه‌كه‌ نیشته‌جێ بوو. واته‌ داعش نه‌بوو، له‌وانه‌بوو پێش داعش هاتبوونه‌ سوریا و له‌ كامپه‌كه‌دا نیشته‌جێ ببوون، كه‌مێك زمانیشی گۆڕابوو. واته‌ ده‌سته‌واژه‌ و وشه‌ى شێوه‌زارى ناوچه‌كه‌ی به‌كارده‌هێنا. وتی ژیانی ئێره‌ زۆر ناخۆشه‌، هه‌رچه‌ند ده‌مانه‌وێت بگه‌ڕێینه‌وه‌ بۆ زێدی خۆمان، به‌ڵام كه‌مێك زه‌حمه‌ته‌، له‌لایه‌ك وه‌رمان ناگرنه‌وه‌ له‌ عیراق و له‌لایه‌كی دیكه‌شه‌وه‌ عیراق بۆخۆی بارودۆخێكی ناسه‌قامگیریی هه‌یه‌.

ئه‌و پیاوه‌ به‌ره‌چه‌ڵه‌ك خه‌ڵكی موسڵ ناوچه‌ى جزیره‌ بوو، ژیانی سه‌خت و ئاواره‌یی ماندووی كردبوو. حه‌سره‌تی دووریی وڵات ئاهی قووڵی پێ هه‌ڵده‌كێشا. وتی: لێره‌ ژنم هێناوه‌ و 4 منداڵم هه‌یه‌، هه‌روه‌ها ده‌یوت: له‌دۆخێكی خراپداین و نه‌ده‌توانین بگه‌ڕێینه‌وه‌ و نه‌ لێره‌ش خاوه‌نی ره‌گه‌زنامه‌ى سوریاین تا وه‌ك هاووڵاتیانی سوریا هه‌موو مافێكمان هه‌بێت.
به‌قسه‌ی عه‌بدلكه‌ریم عومه‌ر كه‌ لێپرسراوی په‌یوه‌ندییه‌كانی په‌یه‌ده‌ بوو، 5 هه‌زار كه‌س له‌ عیراقییه‌كان ناوی خۆیان نووسیوه‌ تا بگه‌ڕێنه‌وه‌، به‌ڵام تائێستا لایه‌نه‌ په‌یوه‌ندیداره‌كانی عیراق ره‌زامه‌ند نه‌بوون و نه‌توانراوه‌ بیانگه‌ڕێننه‌وه‌.

بارودۆخی ژیان له‌كامپه‌كه‌دا گه‌لێك سه‌خته‌، ژیانێكی تاڵ و پڕ زه‌حمه‌تییه‌. زستانی ئه‌و ده‌شته‌ له‌بن نه‌هاتووه‌ گه‌لێك سارده‌، بۆیه‌ نه‌ك ژن، به‌ڵكو پیاوانیش له‌ترسی سه‌رما و ره‌شه‌بای پڕوكێن، ده‌مامكی خۆیانداوه‌. ده‌رگاى چادره‌كان له‌ترسی سه‌رما تووند داخرابوون، چاوی منداڵانی كامپه‌كه‌ هیچ ئومێدێكیان لێ به‌دی نه‌ده‌كرا. ده‌ستیان قه‌ره‌شت (قڵیشاو) بوو، هه‌ندێكیان پێخاوس و هه‌ندێكیشیان جلێكی شڕو ته‌نك، له‌ترسی سه‌رما خۆیان كورژ كردبۆوه‌.

ئه‌و منداڵانه‌ هیچ گوناهێكیان نییه‌، به‌شێك نین له‌ دۆخێك كه‌ باوان و هه‌ندێجار دایكانیشیان لێى به‌رپرسیارن. هێشتا پێنه‌گه‌یشتوون و نازانن ئایین و ئایدیۆلۆژیا چییه‌، كه‌چی باجی هه‌ڵه‌ و تاوانی باوانیان ده‌ده‌ن و ژیان به‌كوله‌مه‌رگی به‌ڕێ ده‌كه‌ن. بێنازو بێبه‌شن له‌ ژیانێكی سه‌رده‌میانه‌ و هه‌ست و هه‌ڵسوكه‌وتی منداڵانه‌.

له‌و كامپه‌دا هیچ قوتابخانه‌ و خوێندنگایه‌ك نییه‌ بۆ فێركردن و په‌روه‌رده‌كردنی منداڵان. توانای رێڤه‌به‌ری خۆسه‌ر بۆ ئیداره‌دان و ژیاندنی ئه‌و خه‌ڵكه‌ زۆر سنوورداره‌. نه‌ته‌وه‌یه‌كگرتووه‌كان و رێكخراوه‌ نێوده‌وڵه‌تییه‌كانیش گرنگی به‌ ژیاندنی كامپه‌كه‌ ناده‌ن.

گرفته‌كانی كامپه‌كه‌ و گیراو و دیله‌كانی تیرۆریزمی داعش ئه‌وه‌نده‌ ئاڵۆزه‌، بیركردنه‌وه‌ له‌ چاره‌سه‌ركردنی نه‌ك له‌ توانای رێڤه‌به‌ریى خۆسه‌ردا نییه‌، به‌ڵكو به‌ حكومه‌تی سوریاش چاره‌سه‌ر ناكرێت، بۆیه‌ پێویستی به‌هاوكاریی و هاوئاهه‌نگیی نێوده‌وڵه‌تی هه‌یه‌.

یه‌كێك له‌ گرفته‌ هه‌ره‌ زه‌حمه‌ته‌كانی كامپه‌كه‌، بوونی سه‌دان منداڵی بێ دایك و باوك واته‌ هه‌تیووه‌. هه‌ندێكیان دایك و باوكیان ناسراون و دیارن كێن و له‌شه‌ڕه‌كانی سوریادا كوژراون و منداڵه‌كانیان له‌دوای خۆیاندا به‌جێماون و ئێستا له‌ كامپه‌كه‌دا ده‌ژین. هه‌ندێكیان نازانن باوكیان كێیه‌ و هیچ ناسنامه‌ و به‌ڵگه‌نامه‌یه‌كی نییه‌. له‌هه‌مووی سه‌یرتر منداڵ هه‌یه‌ نه‌ك نازانێت باوكی كێیه‌، بگره‌ نازانێت به‌ڕه‌چه‌ڵه‌ك باوكی خه‌ڵكی چ وڵاتێكه‌ و له‌كوێوه‌ هاتووه‌، هیچ به‌ڵگه‌ و شوێنه‌وارێكی نییه‌.

له‌ماوه‌ى زیاتر له‌ سێ ساڵدا تیرۆرستانی داعش به‌پێى نه‌ریتی خۆیان كه‌ به‌قسه‌ی خۆیان ده‌ڵێت (نه‌ریتی ئیسلامه‌)، چه‌ندین جار ژنیان ماره‌ ده‌كرد و هه‌ندێكیان له‌ژێر ناوی “جیهادی جوتبووون” كه‌ له‌ ئه‌ده‌بیاتی ئیسلامدا به‌ (جیهاد النكاح) ناوده‌برێت. هه‌ر ئه‌و گروپه‌ تیرۆریسته‌ له‌ په‌لامار و كۆمه‌ڵكوژییه‌كانی چه‌ند ناوچه‌یه‌كدا به‌تایبه‌تی ئێزدخان، هه‌زاران كچی كوردیان به‌ كه‌نیزه‌ك بردو به‌پێى نه‌ریتی ئیسلامیی كڕین و فرۆشتنیان پێ ده‌كردن له‌پێناوی چێژی سێكسی.

هه‌ر له‌و ماوه‌یه‌دا سه‌دان ژنی گروپه‌ توندڕه‌وه‌كان له‌ ناوچه‌ جیاجیاكانی وڵاتانی عه‌ره‌بی و دونیا روویان له‌ سوریا ده‌كرد بۆ خۆ ماره‌كردن له‌ چه‌كدارانی ئیسلامیی به‌و پێیه‌ى خێره‌ و به‌شێكه‌ له‌ جیهاد دژی كافران.

به‌هۆی ئه‌و بارودۆخه‌ كۆمه‌ڵایه‌تییه‌ی له‌ماوه‌ى ئه‌و سێ ساڵه‌دا روویدا، سه‌دان منداڵ كه‌وتنه‌وه‌ و به‌شێكیان دایكیان ماون و دیارن و لای خۆیانه‌ و به‌خێویان ده‌كه‌ن، به‌شێكیشیان هیچ شوێنه‌وارێكی دایك و باوكیان دیار نییه‌ و نازانن دایكان یان باوكانیان كێن. ئه‌و دیارده‌یه‌ له‌ مێژووی ئیسلامدا پێشتر هه‌بووه‌ و تۆماركراوه‌.

به‌پێى ئه‌و زانیارییانه‌ى له‌وێ وه‌رمگرتن، ژن هه‌بووه‌ 5 منداڵی هه‌بوو، هه‌ر منداڵه‌ى له‌ باوكێك بوو، هه‌ر باوكێكیشی خه‌ڵكی وڵاتێك بوو!!ّ به‌بێ بوونی هیچ به‌ڵگه‌نامه‌یه‌كی ره‌سمی بۆ سه‌لماندنی ئه‌و راستییه‌. ئه‌و ژنانه‌ یان كه‌نیزه‌ك بوون و له‌لایه‌ن چه‌كدارانی ده‌وڵه‌تی ئیسلامیی بازرگانیان پێوه‌كرابوو لای هه‌ر پیاوێك منداڵێكی ببو، یانیش ئه‌و ژنانه‌ بوون كه‌ بۆ جیهادی نیكاح هاتبوون و منداڵیان له‌ چه‌كدارانی ده‌وڵه‌تی ئیسلامی (داعش) هه‌بوو.

چاره‌نووسی ئه‌و منداڵانه‌ یه‌كێكه‌ له‌ دۆسێ هه‌ره‌ ئاڵۆزه‌كانی شوێنه‌ورار و پاشماوه‌ى داعش، چونكه‌ له‌لایه‌ك دایكی ئه‌و منداڵانه‌ خه‌ڵكی وڵاتانێكن زۆر زه‌حمه‌ته‌ له‌لایه‌ن ئه‌و وڵاتانه‌وه‌ وه‌ربگیرێنه‌وه‌، له‌لایه‌كی دیكه‌شه‌وه‌ هیچ بنه‌مایه‌كی قانونیی نییه‌ بۆ چاره‌كردنی گرفتی ئاینده‌ى ئه‌و منداڵانه‌! بۆیه‌ ئیداره‌ى خۆسه‌ر روبه‌ڕووی گرفتێكی زۆر گه‌وره‌ بۆته‌وه‌ له‌ چاره‌سه‌ركردنی ئه‌و كێشانه‌دا.

یه‌كێكی دیكه‌ له‌ گرفته‌ سه‌خته‌كان، بوون و دۆزینه‌وه‌ی كچانی كوردانی ئێزدییه‌ له‌نێو كه‌مپه‌كه‌دا. كه‌ گومان ده‌كرێت به‌شێك له‌و كچه‌ ئێزدیانه‌ى كه‌ له‌لایه‌ن تیرۆرستانی داعشه‌وه‌ به‌كه‌نیزه‌ك بردران، له‌و كه‌مپه‌دا هه‌بن، به‌ڵام خۆیان ئاشكرا ناكه‌ن و ئاسان نییه‌ دۆزینه‌وه‌یان.
له‌دواى رزگاركردنی باغۆز وه‌ك دوایین حه‌شارگه‌ى تیرۆرستان، ده‌یان هه‌زار ئافره‌ت هێنرانه‌ كامپه‌كه‌، ژماره‌یه‌كی زۆر له‌ كچانی ئێزدی له‌و كامپه‌دا دۆزرانه‌وه‌ و ره‌وانه‌ى لای كه‌سوكاریان كرانه‌وه‌، به‌ڵام هێشتا گومان ده‌كرێت ژماره‌یه‌كی دیار له‌ كه‌مپه‌كه‌دا هه‌بن و نه‌دۆزراونه‌ته‌وه‌.

ده‌توانین بڵێین كێشه‌ى ئه‌و پاكیزانه‌ دوو جۆره‌:

یه‌كه‌م: به‌شێك له‌ پاكیزه‌كانی ئێزدی، خێرا خۆیان ئاشكراكرد و به‌دواداچوونیان بۆكراو گه‌ڕێنرانه‌وه‌ لای كه‌سوكاریان، به‌ڵام ئه‌وانه‌ هه‌ندێكیان منداڵیان له‌گه‌ڵ بووه‌. ئه‌وانه‌ش گرفته‌كانیان دوو جۆر بوون. به‌شێكیان منداڵه‌كانیان له‌ باوكه‌ ئێزدییه‌كانیان بوون و خێرا گه‌ڕێنرانه‌وه‌ شوێن و واری خۆیان و راده‌ستی كه‌سوكاریان كران. به‌شێكیشیان جگه‌ له‌ منداڵی باوكه‌ ئێزدییه‌كه‌یان، منداڵی دیكه‌یان هه‌بوو كه‌ به‌هۆی كڕین و فرۆشتن به‌كه‌نیزه‌ك كردنیان منداڵیان له‌ تیرۆرستانی داعش هه‌بووه‌، ئه‌و گرفته‌ش زۆر ئاڵۆزه‌ و به‌شێك له‌و ئافره‌تانه‌ منداڵه‌ ره‌سه‌نه‌كانیان له‌گه‌ڵ بردۆته‌وه‌ گه‌ڕاوه‌نه‌ته‌وه‌ زێدی خۆیان و منداڵه‌ باوكه‌ داعشه‌كه‌یان (بیژییه‌كان)یان جێهێشتووه‌ و ئێستا یان له‌ كامپه‌كه‌ یان له‌شوێنی دیكه‌ به‌خێوده‌كرێن. هه‌ندێكیش له‌وانه‌ ته‌نها منداڵیان له‌ تیرۆرستانی داعش هه‌بووه‌، كه‌ دۆزراونه‌ته‌وه‌ منداڵه‌كانیان به‌جێ هێشتووه‌ و گه‌ڕاونه‌ته‌وه‌ لای كه‌سوكاریان.

دووم: یه‌كێك له‌ گرفته‌ هه‌ره‌ سه‌ره‌كییه‌كانی دۆزینه‌وه‌ى كچانی ئێزدی پرسی بوونی منداڵه‌. به‌شێك له‌و پاكیزانه‌ى كوردانی ئێزدی منداڵیان له‌ تیرۆرستانی داعش هه‌یه‌ و له‌ترسی ئه‌وه‌ى دوای دۆزینه‌وه‌یان منداڵه‌كانیان لێ وه‌رگرنه‌وه‌ و یان لێیان جودا بكه‌نه‌وه‌، خۆیان ئاشكرا ناكه‌ن، بۆیه‌ گومان ده‌كرێت ژماره‌یه‌كی زۆر له‌ كچانی ئێزدی له‌ كه‌مپی هۆل هه‌بن و له‌ترسی له‌ده‌ستدانی منداڵه‌كانیان خۆیان ئاشكرا ناكه‌ن.

ئه‌م گرفته‌ په‌یوه‌ندیی به‌ تێگه‌یشتنی ئایینی و كۆمه‌ڵایه‌تییه‌وه‌ هه‌یه‌، چونكه‌ چ ئاینی ئێزدیی و چ تێگه‌یشتنی كۆمه‌ڵایه‌تیی كورده‌واریی، رێگری ده‌كات له‌و پاكیزانه‌ منداڵه‌كانیان بهێننه‌وه‌ نێو كۆمه‌ڵگه‌ی كورده‌واریی كه‌ له‌ باوكێكی تیرۆرستی داعشن و به‌بێ ئیراده‌ى خۆیان له‌لایه‌ن داعشه‌كانه‌وه‌ ناچاركراون منداڵیان ببێت.

به‌پێى زانیارییه‌كان زیاتر له‌ 60 منداڵی ئه‌و پاكیزانه‌ كه‌ باوانیان تیرۆرستانی داعش بوون، ئێستا له‌ خێوه‌تگه‌كه‌ی چاكسازیی له‌ رمێلان په‌روه‌رده‌ و به‌خێو ده‌كرێن. ئه‌و منداڵانه‌ نه‌ك ره‌چه‌ڵه‌ك، به‌ڵكو هیچ به‌ڵگه‌نامه‌یه‌كیشیان نییه‌ له‌باره‌ى بوونیان، ئه‌مه‌ش یه‌كێكه‌ له‌ گرفته‌ زۆر گه‌وره‌كان، چونكه‌ نازانرێت چۆن مامه‌ڵه‌ له‌گه‌ڵ ئاینده‌ى ئه‌و كه‌سانه‌دا بكرێت. هیچ بڕگه‌یه‌ك له‌ قانونی باری كه‌سێتی له‌ سوریا نییه‌ سه‌باره‌ت به‌ بوون و ئاینده‌ى ئه‌و منداڵانه‌ تا چاره‌سه‌رێكی بۆ دیاریی كردبێت.

یه‌كێكی دیكه‌ له‌ گرفته‌ هه‌ره‌ دیاره‌كانی رۆژئاوای كوردستان، پرسی چاره‌سه‌ركردنی ئه‌و 12 هه‌زار دیل و گیراوه‌ى داعشه‌ كه‌ له‌ماوه‌ى چه‌ند ساڵی كاری تیرۆرستیان له‌ سوریا، له‌لایه‌ن هێزه‌كانی یه‌په‌گه‌ و سوریاى دیموكراته‌وه‌ ده‌ستگیركراون یان به‌دیل گیراون، له‌و ژماره‌یه‌ سێ هه‌زاریان هه‌ڵگری ره‌گه‌زنامه‌ى وڵاتانی ئه‌وروپی و ئاسیاو چه‌ند وڵاتێكی عه‌ره‌بین، ئه‌و 9 هه‌زاره‌ى دیكه‌ش خه‌ڵكی سوریا و عیراقن. پرسی ئه‌و گیراوانه‌ له‌ بۆمبی ئه‌تۆمی مه‌ترسیدارتره‌، هه‌ریه‌كێك له‌و گیراوانه‌ تاوانبار و بوونه‌وه‌رێكی دڕنده‌یه‌، ده‌شێت هه‌ریه‌كێك له‌وانه‌، چه‌ندین بێتاوانیان سه‌ربڕیبێت و تاوانی قێزه‌ونیان كردبێت. له‌وه‌ش خراپتر هه‌ریه‌كێك له‌وانه‌، گه‌رایه‌كی زیندووه‌ بۆ تاوانی زۆر گه‌وره‌ و مه‌ترسیدار له‌هه‌ر شوێنێك ده‌رفه‌تیان بۆ بڕه‌خسێت.

به‌پێى ئه‌و زانیارییانه‌ى له‌وێ ده‌ستكه‌وتن، ئه‌و دیل و گیراوانه‌، به‌شێكیان له‌ به‌ندیخانه‌ى غوێران له‌ نزیك حه‌سه‌كه‌ن و به‌شێكیشیان له‌ به‌ندیخانه‌یه‌كن له‌ دێرئه‌لزور و ئه‌وانی دیكه‌ش له‌ ژماره‌یه‌ك به‌ندیخانه‌ى جیاوازن له‌ ره‌ققه‌ و شوێنی دیكه‌.

پرسی ئه‌و گیراوو دیلانه‌ى داعش، یه‌كێكه‌ له‌ گرفته‌ زۆر ئاڵۆزه‌كانی رۆژئاوا و كۆمه‌ڵگای نێوده‌وڵه‌تی، چونكه‌ به‌شێك له‌و گیراوانه‌ هاووڵاتی وڵاتانی ئه‌وروپا و به‌شێك له‌ وڵاتانی عه‌ره‌بی و ناوچه‌كه‌ن. بۆیه‌ بۆ چاره‌سه‌رى ئه‌و كێشه‌یه‌ رێڤه‌به‌رى خۆسه‌ر ئه‌و پرسه‌ی رووبه‌ڕووی وڵاتانی ئه‌وروپا و عه‌ره‌بی و ئه‌و وڵاتانه‌ و ته‌نانه‌ت نه‌ته‌وه‌یه‌كگرتووه‌كان و ئه‌و رێكخراوه‌ نێوده‌وڵه‌تییانه‌ كردۆته‌وه‌ كه‌ په‌یوه‌ندییان به‌ چاودێریی مافی مرۆڤه‌وه‌ هه‌یه‌، به‌ڵام وه‌ك خۆیان وتیان مخابن كۆمه‌ڵگه‌ی نێوده‌وڵه‌تی زۆر بێخه‌مه‌ و نایانه‌وێت خۆیان بكه‌نه‌ خاوه‌نی و ئه‌و گرفته‌ گه‌وره‌یه‌یان بۆ رێڤه‌به‌رى خۆسه‌ر له‌ رۆژئاوای كوردستان جێهێشتووه‌ كه‌ توانای چاره‌سه‌ریى زۆر سنوورداره‌. به‌تایبه‌تی جگه‌ له‌ مه‌سه‌له‌ى توانای دابینكردنی ئه‌منییه‌تی گلدانه‌وه‌ و به‌ندكردنیان و به‌خێوكردنیان، پرسی یه‌كلاییكردنه‌وه‌ى چاره‌نووسی ئه‌و گیراوانه‌ له‌رووی قانونییه‌وه‌ یه‌كێكی دیكه‌یه‌ له‌ گرفته‌ زۆر ئاڵۆزه‌كان.

print

 269 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*