سەرەکی » زانست » دەریای سپی پڕبووە لە کەلو پەلی پلاستیکی

دەریای سپی پڕبووە لە کەلو پەلی پلاستیکی

كەشتی نوح

ژینگە پارێزان ئاشكرای دەكەن، بە هۆی كۆرۆناوە دەریای سپی ناوەڕاست پڕبووە لە ماسك و كەلوپەلە پلاستیكییەكان، ئەمەش هەڕەشەیەكی بەرچاوە بۆ ژینگە ئاوییەكان.

دوای ئەوەی زەوی ماوەیەك هەناسەیەكی ئاسودەی هەڵكێشاو بە هۆی بڵاوبوونەوەی ڤایرۆسی كۆرۆناوە وەك ڕێوشوێنێكی خۆپارێزیی حكومەتەكانی جیهان كەرەنتینەكردنی دانیشتوانی وڵاتەكانیان گرتەبەر، بە هۆی ئەوەوە بەشێكی زۆری چالاكییە مرۆییەكان ڕاگیران، بەڵام ئەم ڕێوشوێنانە كێشەیەكی تری هێنایە ئاراوە كە ئەویش كێشەی كەڵەكەبوونی ماسك و دەستكێش و پاشماوە پلاستیكییەكانە بە تایبەت لە كەنار دەریاكان و تەنانەت ناو ئاوی دەریاكانیش، بە شێوەیەك ئەمە وایكرد دیسانەوە زانا و پسپۆڕانی ژینگەیی زەنگی مەترسیی لێبدەن و ئاشكرای بكەن كە بە هۆی زۆربەكارهێنانی كەلوپەلەكانی وەك ماسك و دەستكێش و كەلوپەلە پلاستیكیی و پزیشكییەكانەوە خەریكە شوێنێكی وەك دەریای سپی ناوەڕاست پڕ دەبێت لەو پاشماوانە.
چالاكانی ژینگەیی فەرەنسیی هۆشداری ئەوەیان داوە كە ئەو ماسك و دەستكێشانە بە چەند ڕێگەیەكی ناڕاستەوخۆ دەگەنە دەریای ناوەڕاست و ڕایانگەیاندووە لە ڕێگەی ڕێكخراوێكی ژینگەیی وەك ڕێكخراوی (پرۆسەی دەریای پاك) ەوە، بەڵگەیان لەبەر دەستە كە ئەو كەلوپەلانە بە ڕێژەیەكی بەرچاو لە نزیك كەنارەكانی دەریای سپی و تەنانەت لە ناو دەریاكەشدا هەن، چونكە ئەو ڕێكخراوە و چەند ڕێكخراوێكی تر، ماوەی چەند مانگێكە دەستیان كردووە بە پاككردنەوەی دەریاكە و بە هەزاران ماسك و دەستكێش و بابەتی تری پلاستیكییان دەرهێناوەتەوە.

رۆژنامەی (ئیندیپێندەنت) یش بڵاوی کردۆتەوە هەندێك لە تیمەكانی ژینگەپارێزی دەریایی لەكاتی پرۆسەی چوونە ناو ئاو و قوڵایی دەریاكەوە، وێنەی ئەو هەموو ماسك و بابەتە پلاستیكییانەیان گرتووە كە خەریكە بە تەواوی دەریاكە پڕ دەكات و لە گەڵیشیدا ئەو مەترسییە گەورە ژینگەییەیان ئاشكرا كردووە كە ڕەنگە دوای كۆتایهاتنی كۆرۆنا هەڕەشە لە مرۆڤایەتی بكات گەر خەڵك هۆشیار نەبن لە چارەسەركردنی ئەو كەلوپەلانەی بۆ یەك جار بەكاردەهێنرێن.

لۆران لۆمبارد یەكێكە لە ئەندامانی ڕێكخراوی ژینگەیی (ئۆپەراسیۆنی دەریای پاك) ی فەرەنسی، دەڵێت”ئەگەر خەڵك هۆشیار نەبن ماوەیەكی تر دەستكێش و ماسك و پاشماوە پلاستیكییەكانی تر لە چرای دەریا زۆرتر دەبن لە ناو دەریاكاندا”.

ئەو دەشڵێت” ئەمە لێپرسراوێتییەكی گشتییە و كاری حكومەت و خەڵكە پێكەوە تا رێگری بكەن لە مەترسییەكی نوێ كە ئەویش پیس بوونی ژینگەیە بەو بابەتانە و پێویستە هەموان پێكەوە بیر لەوە بكەنەوە كارێكی ژیرانە بكەن بۆ دوورخستنەوەی هەموو جۆرە هەڕەشەیەك كە وا دەكات لە دوای كۆرۆناوە مرۆڤایەتی تووشی كارەساتی ژینگەیی تر ببێت”.

(جیفری بیلیتەر) ئەندامێكی تری ئەو ڕێكخراوەیە دەڵێت ” ئەو پیسبوونە هەر دروست دەبێت ئەگەر هەموان دەستەوەستان بین، پێویستە بیر لە ڕێگە چارەی گونجاو بكەینەوە و هەموان بزانین كە پلاستیك چارەسەر نییە و نامانپارێزێت لە (كۆڤید-19)”.

سەرچاوە: elaph

print

 191 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*