سەرەکی » ئەدەب - سێبەر و سایە » خانمی مه‌رگپەڕە 4

خانمی مه‌رگ

مریم علی اكبری

له‌ فارسییه‌وه‌: محه‌مه‌د كه‌ریم

خانمی مه‌رگ، به‌ جووتێ ده‌سكێشی ره‌شه‌وه‌ خێرا خێرا له‌سه‌ر كیبۆردی لاپ تۆپه‌كه‌ی نامه‌ ده‌نووسێت. خوارەوەی نامه‌كان به‌ سه‌یرترین ئیمزایه‌ك كه‌ هه‌تا ئێستا دیومه‌، ئیمزا ده‌كات. ئیمزاكه‌ی به‌شێوه‌یه‌كی سه‌یر ناخی دڵم خاڵی ده‌كاته‌وه‌. له‌ هه‌رلایه‌كه‌وه‌ كه‌ سه‌یری ده‌كه‌ی ده‌توانی به‌شێوه‌یه‌كی تر بیخوێنیته‌وه‌. كاتێ له‌ دووره‌وه‌ سه‌یری ده‌كه‌ی، ده‌ڵێی نووسیوێتی ژیان. به‌ڵام كه‌ نزیك ده‌بێته‌وه‌ له‌ مردن ده‌چێت.
خاڵه‌كانی ژیان دیار نامێنن و لاربوونه‌وه‌ی خۆی له‌ مه‌رگدا كۆده‌كاته‌وه‌. خانمی مه‌رگ به‌ بزه‌وه‌، نامه‌كان ده‌نووسێت بۆ قاوه‌خواردنه‌وه‌ له‌سه‌ر تاكه‌ قه‌نه‌فه‌یه‌ك پان ده‌بێته‌وه‌. روخساریم خۆشده‌وێت. ته‌نانه‌ت كاتێ بزه‌ش ناكات و به‌ جدییه‌ته‌وه‌ سه‌یری هه‌ڵمی قاوه‌كه‌ ده‌كات. قامكه‌ درێژه‌كانی له‌ده‌وری فنجانی قاوه‌كه‌ ده‌كات به‌ ئه‌ڵقه‌ و بێ ئه‌وه‌ی چاو بتروكێنێت سه‌یری فه‌زای خاڵیی به‌رامبه‌ری ده‌كات كه‌ كۆترێكی سپی لێ ده‌رده‌په‌ڕێت. له‌ جادووگه‌رێك ده‌چێت كه‌ شاره‌زایه‌ چۆن بینه‌ران له‌شوێنی خۆیان بچه‌قێنێت. كۆتره‌كان هه‌موو رۆژێك بۆ بردنی نامه‌ دێن. خانمی مه‌رگ، زۆر متمانه‌ی به‌ ئیمه‌یل نییه‌ یان له‌وانه‌شه‌ هه‌ر بۆ پڕكردنه‌وه‌ی فه‌زای نوستالژیا كۆتری نامه‌به‌ر به‌كاربهێنێت. نامه‌كان كه‌ له‌ پرنته‌ره‌كه‌وه‌ دێنه‌ ده‌ره‌وه‌. له‌ هه‌ر چوارگۆشه‌یانه‌وه‌ لوول ده‌بن و ده‌چنه‌ ناو ده‌نووكی پڕ ره‌مز و رازی كۆتره‌كانه‌وه‌ كه‌ شوێنی گه‌یاندنه‌كه‌ ده‌زانن.
من هه‌موو ئه‌مانه‌ ده‌بینم و به‌خه‌مه‌وه‌ بیر له‌ رووه‌كه‌ (سه‌بار)ه‌ وشكه‌كان ده‌كه‌مه‌وه‌. له‌ جێگایه‌ك خوێندوومه‌ته‌وه‌ كه‌ رووه‌كی سه‌بار رۆڵێكی گرنگی له‌ ژیانی ناو ئه‌پارتماندا هه‌یه‌، چاودێریكردنی باشه‌ و وزه‌ی نێگه‌تیڤی ماڵه‌كه‌ ناهێڵێت. سه‌باره‌كان به‌مردنیان ده‌یانه‌وێ چی به‌ من بڵێن. به‌ مردنیان دڵم ته‌نگ ده‌بێت. ده‌ست له‌ قۆقزیی گۆنا له‌ڕ و ئێسقانی و لێوه‌ وشكه‌كانم ده‌ده‌م و ده‌چمه‌ ناو سیسه‌مه‌كه‌مه‌وه‌. سه‌یری سه‌عاته‌كه‌ ده‌كه‌م كه‌ له‌سه‌ر سه‌عات حه‌وت خه‌وتووه‌. له‌ دنیای مندا هه‌میشه‌ سه‌عات حه‌وته‌. ئه‌م ژماره‌یه‌ له‌ ژیانمدا گه‌لێ مانای هه‌یه‌. رۆژی حه‌وت جار له‌په‌نجه‌ره‌وه‌ سه‌یری ده‌ره‌وه‌ ده‌كه‌م. رۆژی حه‌وت جار له‌ شوێنی خۆم هه‌ڵده‌سم. ژیان له‌ خه‌وتن و بێداریدا ئه‌زموون ده‌كه‌م و ئه‌م ئه‌زموونه‌ له‌گه‌ڵ حزوری بێ مۆڵه‌تی خانمی مه‌رگدا شتێكی خۆشه‌. خانمی مه‌رگ به‌ به‌رگه‌ ره‌شه‌كه‌یه‌وه‌ سه‌رنجڕاكێشتر دێته‌ به‌رچاو. هه‌میشه‌ نینۆكه‌ ره‌شه‌كانی له‌ دووره‌وه‌ ده‌دره‌وشێنه‌وه‌، به‌ ده‌گمه‌ن قسه‌ له‌گه‌ڵ من ده‌كات. لاپ تۆپه‌كه‌م به‌كارده‌هێنێت و خۆی به‌ هاوبه‌شی ژیانم ده‌زانێت. له‌گه‌ڵ ئاماده‌گیی ئه‌ودا راهاتووم. ده‌نگی تایپكردنی له‌و ده‌نگه‌ ده‌گمه‌نانه‌یه‌ كه‌ گوێم لێی ده‌بێت و هیچ كاتێ فزولم نه‌بووه‌ بۆ خوێندنه‌وه‌ی نامه‌كانی. كاتێ كۆتره‌كان دێن من ئاسایی له‌ موبه‌ق سه‌رقاڵی شۆردنی قاپه‌كانم. كه‌مێك دوای نانخواردنی نیوه‌ڕۆ په‌یدا ده‌بن و دوای وه‌رگرتنی نامه‌كان ده‌ڕۆن. گوێم له‌ شه‌قه‌ی باڵیانه‌ و له‌ په‌نجه‌ره‌ی موبه‌قه‌كه‌وه‌ ژنی دراوسێكه‌ی به‌رامبه‌رمان ده‌بینم كه‌ جل به‌ ته‌نافدا هه‌ڵده‌خات. جگه‌له‌ كاتی جل هه‌ڵخستن و كۆكردنه‌وه‌ جله‌كان ئه‌و ژنه‌ نابینم. حه‌وشه‌ی ماڵه‌كه‌ی به‌رامبه‌رمان به‌ دره‌خته‌ زۆره‌كانی و چرا هه‌ڵواسراوه‌كانی، قه‌ڵا كۆنه‌كانم به‌یاد ده‌هێنێته‌وه‌ كه‌ زیندانی شازاده‌ خانمێكه‌ به‌ جلوبه‌رگی سپی بووكێنییه‌وه‌ له‌ چاوه‌ڕوانیی یاردا پرچی سپی ده‌هۆنێته‌وه‌.
خانمی مه‌رگ به‌ پێڵاوه‌ پاژنه‌ به‌رزه‌كانییه‌وه‌، زنجیره‌ی بیركردنه‌وه‌م دەپچڕێنێت. خه‌ریكه‌ پیاسه‌ ده‌كات و كاتێ پیاسه‌ ده‌كات یانی سه‌رقاڵی بیركردنه‌وه‌یه‌ له‌ بابه‌تێكی گرنگ. به‌ ده‌ستی كه‌فاوییه‌وه‌، لووتم ده‌خورێنم و سه‌یری دووركه‌وتنه‌وه‌ی ژنه‌كه‌ی دراوسێمان ده‌كه‌م.
ده‌فته‌ری شیعره‌كه‌م نووساندووه‌ به‌ سینگمه‌وه‌، شیعره‌كه‌ی دوێنێ شه‌وم به‌ ده‌نگی به‌رز ده‌خوێنمه‌وه‌. ئه‌و شیعره‌ی كه‌ تیایدا شاعیر پێی وایه‌ دره‌خته‌ و ره‌گ و ریشه‌ی له‌ ژووره‌كه‌دایه‌، شیعره‌ تازه‌كانم به‌ شێوه‌یه‌كی تایبه‌تی له‌گه‌ڵ رابردوودا جیاوازییان هه‌یه‌. هه‌ست به‌م جیاوازییه‌ ده‌كه‌م و خۆشحاڵم پێی. دووركه‌وتنه‌وه‌ له‌ رابردوو باشه‌. مرۆڤ ده‌بێت بتوانێت رۆژێك له‌ جێگایه‌كه‌وه‌، سه‌رله‌نوێ ده‌ستپێبكات و هیچ شتێك له‌و ساته‌وه‌خته‌ی رووبه‌ڕووی ده‌بێته‌وه‌ به‌یادنه‌هێنێته‌وه‌. رابردوو ده‌بێت له‌ جێگایه‌ك له‌ رابردوودا تۆزی لێ بنیشێت. له‌وێ بمێنێته‌وه‌ بۆ رۆژگار نه‌با رۆژێك له‌ رۆژان یاده‌وه‌ریی رزگارت بكات.
هێشتا له‌ ده‌فته‌ری شیعره‌كه‌م دوور نه‌كه‌وتوومه‌ته‌وه‌ كه‌ گوێم له‌ شه‌قه‌ی باڵی كۆترێكه‌. به‌ چاوه‌ شووشه‌ییه‌كانی به‌رامبه‌رم باڵه‌ته‌پێ ده‌كات. به‌ دوودڵییه‌وه‌ نزیك ده‌كه‌وێته‌وه‌. بزه‌م دێتێ. له‌ بزه‌كه‌م تێده‌گات و نزیكتر ده‌كه‌وێته‌وه‌. كاغه‌زێكی سپی له‌ناو ده‌نووكیدا ده‌بینم. ده‌نووكی ده‌كاته‌وه‌ و كاغه‌زه‌كه‌ رێك ده‌كه‌وێته‌ ناو ده‌ستمه‌وه‌. ئیمزای خانمی مه‌رگ ده‌ناسمه‌وه‌ و بۆ یه‌كه‌مجار سه‌یری ئه‌و نامه‌یه‌ ده‌كه‌م كه‌ بۆی نووسیوم. بۆنی خۆی لێدێت. چه‌ند جارێك نامه‌كه‌ ده‌خوێنمه‌وه‌. به‌ هه‌ژانێكی مناڵانه‌وه‌، كه‌یف ده‌كه‌م. چه‌ند باشه‌ كه‌ له‌ سه‌رده‌می دیجیتاڵ و نامه‌ی ئه‌له‌كترۆنیدا، كه‌سێك به‌ كۆتری نامه‌به‌ر، نامه‌كه‌ی بگه‌یه‌نێت به‌ ده‌ستت. وه‌ها له‌ناو نامه‌كه‌دا نقوم بووم ئاگام له‌ رۆیشتنی كۆتره‌كه‌ نییه‌.
بۆ حه‌وته‌مین جار له‌ رۆژێكدا له‌ شوێنی خۆم هه‌ڵده‌سم بۆ ئه‌وه‌ی بۆ حه‌وته‌مین جار له‌ په‌نجه‌ره‌كه‌وه‌ سه‌یری ده‌ره‌وه‌ بكه‌م. شتێك له‌ دڵما رۆشن ده‌بێته‌وه‌. رووه‌كه‌ سوباره‌ مردووه‌كه‌م ژیاوه‌ته‌وه‌، به‌هێز و زیندوو به‌ باڵایه‌كی به‌رزه‌وه‌، سه‌یرم ده‌كات.

سه‌رچاوه‌: nebesht.com

 227 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*