سەرەکی » وتار » بارزان شێخ عوسمان‌ » كورتە بیرەوەرییەك لەگەڵ كاك جەبار فەرماندا

كورتە بیرەوەرییەك لەگەڵ كاك جەبار فەرماندا

بەر لەوەی بچمە ریزەكانی هێزی پێشمەرگە، لە شار ناوی جەبار فەرمانم زیاتر وەك فەرماندەیەكی پێشمەرگەیی ئەبیست، دواتریش كە ئیتر دەرفەتی مانەوەم لە شار نەما و چومە دەرەوە، كاك جەبارم وەك لێپرسراوی مەڵبەندی1ی ی.ن.ك ناسی، دواتریش وەك لێپرسراوی رێكخراوی یەكی كۆمەڵەی رەنجدەرانی كوردستان.

كاك جەبارم لە دورەوە وەك فەرماندە و سەركردەیەكی توند و رەق ئەناسی كە ئەو سەردەمە خەسڵەتێكی گرنگی هەر فەرماندە و كادیرێكی پێشمەرگە و عەسكەریی بوو، چونكە هەلومەرجەكە وای ئەخواست و كەسانی واش خۆشەویست بوون، بەڵام ساڵی 1986 كە بەندە ئەندامی كۆمیتەی گومرگی سەفرە ی ی.ن.ك بووم لەكاتی داستانی قەیوان-ماوەت دا لە نزیكەوە بە خزمەت ئەو سەركردە سیاسیی و روناكبیر و سەربازییە گەیشتم، هەموو بۆچوونەكانی رابردوم هەڵوەشایەوە لە بارەی كەسایەتیی توڕە و توند و رەقی ئەو زاتە.

كاك جەبارێكی خاكیی و سادە و قسە خۆش و سوعبەت چی، هیچ تەكلیفی لە خۆی نەئەكرد لە مامەڵەدا، بەڵكو زۆر حەزی بە تێكەڵاوی ئەكرد لەگەڵ دەوروبەریدا.

بەرێكەوت ئەو ماوەیە كاك جەبار سەرباری ئەوەی فەرماندەیی ئەو بەرەیەی پێ سپێردرابوو كە لە گۆجاڕەوە دەستی پێئەكرد و درێژ ئەبوەوە بۆ وڵاغڵوو و گەڵاڵە و قامیش و تا شینكێ و برزوت و بالۆسە و بەربەرد و ماوەت، سەرپەرشتیكردنی گەیاندنی چەك و موشەك و تەقەمەنییەكانیشی لە سنوورەوە بۆ قوڵایی ناوچە ئازاد كراوەكان و سەركردایەتیی لە یاخسەمەر و سەرگەڵوو كە سەفرە ببووە خاڵی پەیوەندیی، بۆیە كاك جەبار زۆر رۆژ لای ئێمە بوو، بەوەش دۆستایەتیی و ئاشنایەتیی لەگەڵ هەمومان درووستكردبوو، ببووە هاوڕێی هەموومان.

بەندە یەكێك بووم لە ناو ئەو پێشمەرگە و كادیرانەی كە پەیوەندییم لەگەڵیدا بەهێز بوو، بۆیە كاتێك كەگەڵ تیپەقارەمانەكەی 37ی شارباژێڕدا پلانی ئازادكردنی بەرزاییەكانی پشت ماوەت دانرا كە رەبایەكانی شاخی گوڵێ لەنێو ئەو پلانەدا بوو، كاك جەبار لەسەر داوای خۆم خستمیە ئەو مەفرەزەیەی تریش كە پێكی هێنابوو لە رێكخراوی یەك بە فەرماندەیی گیانبەختكردوو غریب هەڵەدنیی و مەفرەزەیەكی تیپی 55ی قەرەداخ بە فەرماندەیی مامۆستا عەلی كە ناسراوە بە مامۆستا علی پەرلەمان، بۆ بەشداریكردن لە چالاكییەكەدا، هەر لەبەر خۆشەویستیی و رێزی بۆ كۆمیتەی گومرگەكە و بەندە، لەكاتی ئازادكردنی چیای گوڵێدا بەشداریی منی بە ناوی مەفرەزەیەكی گومرگی سەفرە دابوو بە ئیزگەكە، دوای گەڕانەوەشم كە ئەركی مەفرەزە هاوبەشەكە تەواوبوو زۆر بەگەرمی بەخێرهاتنەوەی كردم، بەشانو باڵمدا هەڵیدا.

كاتێك سەرۆك مامجەلالی مەزنیش لە مانگی تشرینی یەكەمی ئەوساڵەدا لەرێی سەفرەوە بە گردە رەشدا چوو بۆ ئێران و لای ئێمە وچانێكی دا و نانی خوارد، دووبارە كاك جەبار فەرمانی نەمر لای مامی گەورەمان وێڕایی دەستخۆشیكردن لە مام حەمید لێپرسراوی گومرگەكە، ستایشی رۆڵی هەموو پێشمەرگەو كادیرانی گومرگی سەفرەی كرد لە راپەڕاندنی ئەركی خۆیان و ئەركە زیادەكانی تریش و لەو نێوەدا ئاماژەی بۆ من كرد كە بەشداریم لە ئازادكردنی گوڵیدا كردووە، دیارە مامیش زۆری پێخۆشبوو.

كاك جەبار لە چەندین داستان و قارەمانێتیدا دژی هێزەكانی بەعس رۆڵ و جێ دەستی دیارە، دوای راپەڕینیش هەر ئەو بەنداوی دوكانی پاراست لە دووبارە داگیركردنەوە و هەر بە فەرماندەیی ئەوبوو لە شەڕێكی قارەمانانەدا چۆكی بە هێزەكانی سەدام حسێن دا و دەیان ئەفسەر و دەرەجەدار و سەربازبەدیل گیران و سەرەنجامەكەی دەیان گیراوی سیاسیی ئازاد كران كە هەموشیان سەر بە ی.ن.ك نەبوون.

كاك جەبار سەركردەیەكی بەویژدان و بەوەفا بو بۆ رێبازەكەی و هەڤاڵەكانیشی، بۆ منیش هەمیشە جێگەی رێز بووە و خۆم بەقەرزاریی ئەزانم كە لە هەرشوێنێكدا بووبم باسیكردووم. ساڵی 2002 سەردانی ئیزگەی دەنگی گەلی كوردستانی كرد، ئەو كاتە بەندە ئەركی خزمەتكردنی ئیزگەم پێ سپێردرابوو، تازە هەست بە نەخۆشییەكەی ئەكرا چونكە كە بەسەر پلیكانەكاندا ئەڕۆیشت ئاسایی نەبوو، زۆر خەفەتبار بووم بۆ ئەو دیمەنە، بەهەرحاڵ دوای گەشتەكەی بە بەشەكاندا كە دانیشتین دوای باسكردنی چەند بیرەوەرییەكی لەگەڵ ئیزگەكەداو هەڵسەنگاندنی بۆ رۆڵی ئیزگە، بە هەڤاڵانی ئیزگەی وت ناكرێت باسی ئەم پیاوە تێكۆشەرەش نەكەین، ئیتر ستایشی كردم و منی قەرزبار كرد.

لە كۆتاییدا سەیریكردم و پێكەنی وتی هەندێك بەرتیل ئەدەن بۆ مەدحكردن، كەچی ئەم برادەرە شەرم دای ئەگرێت.

لە دوایین وشەدا بۆ بەرزراگرتنی ئەم سەركردە بەئەمەكە درودی وەفاداریی ئەكەمە تاجە گوڵینە و لەسەر گڵكۆكەی دائەنێم، دوبارە سەرەخۆشیی لە هەڤاڵ و هاوسەنگەرەكانی و خانەوادەی بەڕێزیان ئەكەم، نەمر و هەمیشە زیندو بێت ناوی جەبار فەرمان لە دەفتەری سەرەوریی بزوتنەوەی رزگاریبەخش و دیموكراتیكی كۆمەڵانی خەڵكی كوردستان و ی.ن.ك دا.

 1,012 جار بینراوە