سەرەکی » چاوپێکه‌وتن » ئه‌گه‌ر هونه‌ره‌كه‌مان نه‌ما وه‌كو دارێكی وشك ره‌ق و ته‌ق ده‌مێنینه‌وه

سه‌ڵاح محه‌مه‌د كۆیی:

ئه‌گه‌ر هونه‌ره‌كه‌مان نه‌ما وه‌كو دارێكی وشك ره‌ق و ته‌ق ده‌مێنینه‌وه

دیداری‌/ سالار كۆشار

سه‌ڵاح محه‌مه‌د كۆیی، یه‌كێكه‌ له‌ هونه‌رمه‌ندو شانۆكاره‌ دیاره‌كانی‌ شاری‌ هه‌ولێر، به‌تایبه‌ت له‌ بواری‌ مه‌نه‌لۆج و گۆرانی‌ مناڵان، له‌ دیدارێكی‌ تایبه‌ت له‌گه‌ڵ كه‌ناڵی‌ هه‌ولێری‌ ته‌له‌فزیۆنی‌ گه‌لی‌ كوردستان، كه‌ چه‌ند ساڵێك پێش ئێستا سالار كۆشار-ی‌ هاوكارمان له‌گه‌ڵی‌ سازداوه‌، وا لێره‌ به‌شێكی‌ دیداره‌كه‌ بڵاوده‌كه‌ینه‌وه‌:

به‌یانی زوو له‌گه‌ڵ وێنه‌گره‌كه‌م له‌ ته‌له‌فزیۆنه‌وه‌ به‌ره‌و ماڵی مامۆستاسه‌ڵاح محه‌مه‌د به‌ڕێكه‌وتین بۆ ئه‌وه‌ی چاوپێكه‌وتنێكی درێژی له‌گه‌ڵ سازده‌م له‌سه‌ر ژیانی هونه‌ریی و ژیانی ئاسایی.

مامۆستا سه‌ڵاح له‌ساڵی 1947 له‌ كۆیه‌ له‌ دایكبووه‌ هه‌ر له‌زووه‌وه‌ هه‌ستی به‌ده‌نگی خۆی كردووه‌ كه‌ده‌نگی خۆشه‌ بۆیه‌ له‌ زۆرشوێن گۆرانی وتوه‌ له‌ساڵی 1972یه‌كه‌م گۆرانی تۆماركردوه‌ به‌ناوی (بازان بازقه‌دار) له‌ ئێزگه‌ی به‌غدا به‌شی كوردی پاشان له‌گه‌ڵ تیپی هونه‌ری هه‌ولێرچه‌ند گۆرانییه‌كی تۆماركردوه‌ ئینجا له‌گه‌ڵ تیپی باواجی كۆیه‌ كۆمه‌ڵێك گۆرانی تری تۆماركردوه‌ تائێستاش له‌كاره‌ هونه‌رییه‌كانی به‌رده‌وامه‌.

كه‌چووین دیاربوو خۆی گۆڕیبوو به‌ڵام هێشتا نانی به‌یانی نه‌خواردبوو پاش سڵاو كه‌مێك دانیشتن پاشان خێزانه‌كه‌شی هات به‌خێرهاتنی كردین ئه‌و خه‌ریكی سازكردنی چاو نان بوو، سه‌رمێزێكی جوانیان ڕازاندبۆوه‌ سه‌مون و نانی گه‌رم و چه‌ندجۆرێك له‌خواردنی سبه‌ینان، سه‌ماوه‌ر گیزه‌ی ده‌هات. خێزانه‌كه‌شی له‌گه‌ڵ ئێمه‌ دانیشت وه‌رزی یه‌كه‌می گفتوگۆكانمان ده‌ستپێكرد:

* به‌یانیان لای تۆ چی ده‌گه‌ینێ وه‌كو رۆژێكی تازه‌، رۆژه‌كان هه‌مووی وه‌كو یه‌كن لای تۆ یان گۆڕانكاری تێدا دروستده‌بێ؟
– ئه‌وه‌ی ڕاستی بێ به‌یانی كه‌ ڕۆژ تازه‌ گزینگ ده‌دا ڕۆژێكی تازه‌یه‌ هیوایه‌كی تازه‌یه‌ هه‌موو مرۆڤێك حه‌زده‌كات كه‌ بێته‌ ده‌ره‌وه‌ و ئه‌و دیمه‌نه‌ جوانه‌ی ڕۆژببینێ و ئه‌و پڕشه‌نگه‌ جوانه‌ی ڕۆژببینێ و شتێكی تازه‌ ، ببینین چ ببیستین یه‌عنی ئه‌و شتانه‌ زۆر گرینگه‌ به‌لای منه‌وه‌ دوایه‌ به‌ڕاستی به‌یانی یان سپێده‌ هیوایه‌كی تازه‌ده‌به‌خشێ له‌لای من.

* تاڵ وشیرین له‌ژیانی ڕۆژانه‌تدا به‌تایبه‌تی ئه‌وه‌ی له‌به‌رچاوی هونه‌رمه‌نداندا ده‌مێنێت چۆن به‌راوردی ده‌كه‌ی له‌ناو ژیانی خۆتدا؟
– ئه‌وه‌ی ڕاستیبی من له‌ ته‌مه‌نی ژیانی خۆم چ ئاسایی چ هونه‌ری تاڵیمان زۆردیوه‌ شیرینیمان كه‌م دێت ئه‌و ته‌مه‌نه‌ درێژه‌مان وابه‌رێكرد وامن نزیك به‌شه‌ست ساڵ ده‌بم باوه‌ڕبكه‌ ئه‌گه‌ر بڵێم تاڵیمان زۆرتربو له‌ شیرینی شتێكی ئاساییه‌، چونكه‌ ئه‌و ته‌مه‌نه‌ی ئێمه‌ هه‌مووی له‌ ژێرده‌ستی ڕژێمێكی خوێن ڕێژی بۆگه‌نی وه‌كو به‌عس له‌ئازار و ئه‌شكه‌نجه‌ زیاتر هیچی ترمان نه‌دیت ،به‌ڵام گرینگ ئه‌وه‌بوكه‌ خۆمان ڕاگرت كۆڵمان نه‌دا به‌هه‌رشێوه‌یه‌ك بوتاسه‌ری تێداچوو بۆیه‌ ئێستا ئاسۆیه‌كی ڕوون به‌دیاركه‌وتوه‌ له‌ ژیانی هه‌موو كورددا هیوادارین ئه‌و ئاسۆیه‌ ڕووناكتربێت و گه‌شه‌دارتر بێ بۆ ئه‌وه‌ی بتوانین دوا ڕۆژێكی پرشنگدار بۆ ملله‌ته‌كه‌مان بێته‌دی.

* تۆ هونه‌ر ده‌كه‌یت و ڕۆژانه‌ی خۆشت هه‌یه‌ و هه‌روه‌ها ئه‌ركی خێزانیش ئه‌م سێ شته‌ت چۆن گونجاندووه‌؟
– ئیشی هونه‌ریم له‌و شوێنه‌ی كه‌ئێستاكاری تێداده‌كه‌م ڕۆژانه‌ ده‌چمه‌ ئه‌وێ ئیشه‌ هونه‌ریه‌كانم به‌تایبه‌تی ئێستا زۆرئیشی مناڵان زیاترده‌كه‌م وه‌چه‌ند مناڵێكمان هه‌یه‌ كه‌ ده‌رسیان پێ ده‌ڵێین و ئیتر له‌گه‌ڵیان خه‌ریك ده‌بین وه‌كو سروود و ئاواز و زۆرشتی تریان فێرده‌كه‌ین ئه‌وه‌ كاری هونه‌ری ئیترشتی خێزانیش مناڵه‌كانم هه‌موویان له‌خه‌م چونه‌ته‌ده‌رێ یه‌عنی مناڵی بچوكمان نییه‌ ئیترهه‌ریه‌كێك به‌ئیشی خۆیه‌وه‌ خه‌ریكه‌ بۆیه‌ خه‌مم له‌سه‌رنه‌ماوه‌.

* بژێوی ژیان چ جار وای لێ نه‌كردوی واز له‌ هونه‌ره‌كه‌ت بێنی یان ساردت بكاته‌وه‌ له‌سه‌ر هونه‌ر؟
– دوای راپه‌ڕین به‌ڕاستی به‌ڕاستی كه‌وتینه‌ بارودۆخێكی زۆر زۆرگران ئێمه‌ وه‌كو هونه‌رمه‌ند كاكه‌ فێری ئه‌وه‌نه‌ببوین بچین كاربكه‌ین هه‌رچه‌ند من زۆركاریشم كردوه‌ باوه‌ركه‌ من هونه‌رمه‌ندێ بومه‌ ده‌توانم بڵێم له‌ كاركردنا كه‌س وه‌ك من نه‌بووه‌، به‌خوای دووكانی تورشیاتم هه‌بوه‌ تورشیاتم فرۆشتیه‌ ئێ وه‌ختێك له‌ په‌یمانگه‌ی ته‌كنیكی ئه‌وكاته‌ له‌وێ وه‌كو به‌ڵێنده‌ر كارم ده‌كرد یه‌عنی ئیشم زۆركردوه‌وه‌كو ئیش، به‌ڵام دوای 94و ئه‌وانه‌ به‌ڕاستی زۆر كاریگه‌ربوو ئیش نه‌بوو مه‌عاش نه‌بوو ، دوایه‌ كه‌سیش نه‌بوو به‌ڕاستی ده‌ستبارێكم له‌گه‌ڵ بگرێ، دوایه‌ مناڵه‌كانم هه‌مووی قوتابیبوون هه‌مووی له‌ كۆلیج بون له‌خوێندن بون ئیترئه‌و ماوه‌ زۆر زۆر ناخۆشبوو، به‌ڕاستی ده‌توانم بڵێم ئێمه‌ شتی ماڵه‌وه‌مان زۆربه‌ی فرۆشت و شتی زۆرباشیشمان هه‌بوو یه‌عنی باوه‌ربكه‌ خه‌ڵك ته‌سجیلێكی نه‌بوو ئه‌من سێم هه‌بوو، دوو ته‌سجیلی به‌س گراندیكی به‌كره‌م هه‌بوو، مۆنتاربۆم هه‌بوچه‌ند ئاله‌تی مۆسیقیم هه‌بوو، كه‌ مۆسیقیش نه‌بووم هه‌موو ئه‌وشتانه‌م هه‌بوو له‌ ماڵێ زۆربه‌یم فرۆشت هیچی نه‌ما ئیتركه‌وتینه‌ ناوماڵه‌وه‌ش ده‌ستمان به‌شتی ناو ماڵه‌وه‌ش داهێنا، به‌ڵام له‌خوا به‌زیادبێ به‌هه‌رشێوه‌یه‌ك بوو ئه‌و ماوه‌یه‌مان به‌ڕێكرد ئینشه‌ڵای نە بینینه‌وه‌.

* ئێستا بژێوی ژیانت به‌چی به‌رێوه‌ده‌به‌ی ؟
– من وه‌كو مووچه‌ خۆرێك فه‌رمانبه‌رم ئیتر ده‌چمه‌ ده‌وامه‌كه‌م و مووچه‌كه‌م وه‌رده‌گرم، هه‌روه‌ها مووچه‌ی ڕێزلێنانیشم هه‌یه‌ ئه‌ویش وه‌رده‌گرم و باشه‌ بژێوی ژیانمان پێده‌به‌ینه‌سه‌ر مناڵه‌كانیشم هه‌مووی گه‌وره‌ بونه‌ و مووچه‌ی خۆیان هه‌یه‌.

* ئه‌گه‌ر سه‌ره‌تایه‌ك له‌سه‌ر ئیشكردنت له‌م شوێنه‌ باسبكه‌ی وه‌كو كاری هونه‌ری؟
– سه‌ره‌تا كه‌ من هاتمه‌ ئه‌م دائیره‌یه‌ وه‌ها نه‌بوو هه‌ر ئه‌و هۆڵه‌ی لێی دانیشتوین وه‌ها نه‌بوو ئه‌و هۆڵه‌ نه‌بوو یه‌عنی سوپاس بۆ به‌رپرسانی چاودێری كۆمه‌ڵایه‌تی و وه‌زاره‌تی كاروكاروباری كۆمه‌ڵایه‌تی به‌هیمه‌تی هه‌موو لایه‌كی به‌ڕاستی زۆر زۆرپێوه‌ ماندوبوون، هه‌موویان ده‌توانم بڵێم هه‌ر له‌ وه‌زیری هه‌تا به‌ڕێبه‌ری چاودێری كۆمه‌ڵایه‌تی هه‌موویان لێره‌ هاوكاربون تاكو توانیمان ئه‌و هۆڵه‌ دروستبكه‌ین بۆئه‌وه‌ی بتوانین ڕۆژانه‌ لێرانه‌ پڕۆڤه‌ی تێدابكه‌ین كاری مۆسیقی تێدابكه‌ین گۆرانی و هه‌روه‌ها ئاهه‌نگیشی تێدابگێرین،چونكه‌ لێره‌ زۆرئاهه‌نگمان تێدا گێراوه‌ به‌تایبه‌تی به‌بۆنه‌ی ڕۆژی مناڵانی جیهانی وه‌ بۆنه‌كانی تر تایبه‌ت به‌مناڵان ئه‌وه‌ها ته‌كایه‌وه‌ توانیمان ستۆدیۆیه‌ك دروستكه‌ین، توانیمان چه‌ند ئامێرێكی مۆسیقابكڕین كه‌ڕۆژنه‌ئه‌لێرانه‌ بتوانین پڕۆڤه‌ی پێبكه‌ین هه‌رچه‌نده‌ ئێستا پشووی هاوینه‌ زۆربه‌ی قوتابیه‌كانمان له‌ ماڵه‌وه‌ن لێره‌نیینه‌، به‌ڵام ئێمه‌ كاری خۆمان هه‌رده‌كه‌ین، من ڕۆژانه‌ دێم ئه‌لێره‌ داده‌نیشم ئه‌وشتانه‌ی كه‌ له‌مێشكمه‌ ده‌یخه‌مه‌ سه‌ر كاغه‌ز چ له‌شعر بی چ له‌ئاوازبی ئیتر له‌گه‌ڵ كاك فه‌خره‌دین داده‌نیشین ڕۆژانه‌ ئه‌وشتانه‌ تاووتوێ ده‌كه‌ین تاوای لێدێ بشێ كه‌ بتوانین بڵێین ئاوازه‌ و گۆرانیه‌ ئه‌وه‌كاری ڕۆژانه‌مانه‌ ئێستا. هه‌روه‌ها شتی دیكه‌مان به‌ده‌سته‌وه‌یه‌ له‌ داهاتوو كه‌قوتابخانه‌كرایه‌وه‌ ئێستا وه‌ك ئاماده‌كردن ده‌توانم بڵێم5 گۆرانی ئاماده‌كراومان هه‌یه‌ له‌گه‌ڵ2 ئۆپه‌رێت .

*ئه‌وه‌ بۆ منداڵانە؟
– به‌ڵێ بۆ منداڵان، ئێمه‌ نه‌ك هه‌رئیش ته‌نیا بۆ منداڵان بكه‌ین بۆ گه‌ورانیش ده‌كه‌ین ئێستا چه‌ند گۆرانیه‌كم به‌ده‌سته‌وه‌یه‌ ئه‌وانیش وا له‌ ئاماده‌كردندانه‌ یه‌عنی ده‌توانم بڵێم ته‌واوبوو ته‌نیا ماوه‌ مۆسیقایه‌كه‌ی ته‌واوبكه‌ین و سوكێنه‌سه‌ری بۆبكه‌ین.

* باكه‌مێك بگه‌ڕێینه‌ دواوه‌ چۆنبوو هونه‌ری گۆرانیت هه‌ڵبژارد،یان به‌شێوه‌یه‌كی تربڵێم تۆ گۆرانیت دۆزیه‌وه‌ یاگۆرانی تۆی دۆزیه‌وه‌؟
-ده‌توانم بڵێم به‌ڕێككه‌وتبوو ئه‌و كاته‌ی ئه‌و ته‌مه‌نه‌ی كه‌من ده‌ستم به‌گۆرانی كردوه‌ هه‌رگۆرانی گووتن له‌ ووڵاته‌كه‌ی ئێمه‌ عه‌یب بوو هه‌ر له‌وانه‌یه‌ به‌چاوێكی سوكیش ته‌ماشا ده‌كرا، زۆرجارمن خۆم تانه‌یان لێداوم زۆرجار تیروتزانجیان تێگرتوم، به‌ڕاستی كارێكی زۆر ناله‌باربوو، به‌ڵام من وه‌كو بیروباوه‌ر كه‌ خۆم باوه‌رم پێی هه‌بوو ئیتر گوێم نه‌ده‌دا قسه‌ی خه‌ڵك هه‌ر له‌مناڵیمه‌وه‌ من له‌ناو گۆرانی و له‌ناو مۆسیقا و له‌ساڵی په‌نجاكان له‌ كۆتایی په‌نجاكان كه‌تیپی مۆسیقای باواجی له‌كۆیه‌ دامه‌زرا، من یه‌كه‌م گۆرانی بێژبووم كه‌ منداڵبووم چوومه‌ ناو ئه‌و تیپه‌ هه‌ر له‌گه‌ڵیشیان به‌رده‌وام بووم و دوانه‌كه‌وتم ئیترئه‌وه‌ به‌رده‌وام بوو تاگه‌یاندمانه‌ ئه‌وه‌ی ته‌له‌فزیۆن په‌یدابوو له‌ ساڵی 1970 كه‌شتمان تۆماركرد ده‌ی ده‌ی ورده‌ ورده‌ تا به‌و ڕۆژه‌گه‌یی كه‌ ئه‌مڕۆ وای لێهاتوه‌ له‌خوا به‌زیادبێ ده‌توانم بڵێم جه‌ماوه‌ره‌كه‌مان یاخود میلله‌ته‌كه‌مان له‌ هونه‌ر بگات بزانن كه‌ هونه‌رجێگاو مه‌كانه‌ی تایبه‌ت به‌خۆی هه‌یه‌ ئه‌وه‌ زۆر گرینگبوو كۆڵمان نه‌دا.

*ئێستاش له‌ هه‌وڵی خۆ دۆزینه‌وه‌ی یان ئیتر تۆ خۆت دۆزیوه‌ته‌وه‌ و پێوستت به‌ خۆ دۆزینه‌وه‌ نیه‌ له‌ناو هونه‌رەكه‌تدا ؟
* من وه‌كو خۆم دۆزیه‌وه‌ له‌و ته‌مه‌نه‌ی خۆم زیاتر كار بۆ منداڵان بكه‌م سه‌ركه‌وتوتر ده‌بم وای بۆده‌چم خه‌ڵكیش گۆرانیه‌كانی منداڵانیان له‌لا سه‌ركه‌توتره‌، ده‌ڵێن كارێكی باشت كردوه‌ و منداڵیش ته‌بیعه‌تێكی هه‌یه‌ دائیمه‌ن ئینسانی پیری زیاترخۆش ده‌وێ یه‌عنی به‌ ته‌مه‌نی زیاترخۆشده‌وێ وه‌كو باپیری دەمژمێرێ یه‌عنی من ئه‌وه‌ منداڵه‌كانم خێزانیان هه‌یه‌ ومنداڵیان هه‌یه‌ و پێم ده‌ڵێن باپیره‌.

* واتا تۆ خه‌ریكی بۆ نه‌وه‌كانت كارده‌كه‌ی ؟
– وای بۆ ده‌چم بۆ ئه‌وان كاربكه‌م زیاتر سه‌ركه‌وتوو ده‌بم.

* ئه‌گه‌ربگه‌ڕێینه‌وه‌ خاڵی سفری جه‌نابت سه‌ره‌تایه‌ك له‌ ژیانی جه‌نابت به‌رله‌وه‌ی تۆگۆرانی بڵێی یان ئه‌و كاتانه‌ی تۆ له‌قۆناغی خوێندنی سه‌ره‌تایی بوویت؟
– من كه‌ چوومه‌ قوتابخانه‌ هه‌ر له‌ هه‌فته‌ی یه‌كه‌مه‌وه‌ مامۆستا یه‌كمان هه‌بوو خوا عافوكا مامۆستا عه‌بدوڵا ئه‌حمه‌د هه‌ر هاته‌ ژووره‌وه‌ و گووتی كێ گۆرانی ده‌زانێ بڵێ ئه‌من، ده‌ستم بڵندكرد گووتم ئه‌من مامۆستا گوتی وه‌ره‌ دڵنیانیم ساڵی چه‌ند چوومه‌ قوتابخانه‌یان 53 بوو یان54 بوو، ئیتر كه‌ چووم گوتی وه‌ره‌ پێشه‌وه‌ به‌رامبه‌ر قوتابیه‌كان یه‌كسه‌ر من ده‌ستم به‌ مه‌قام كرد یه‌عنی مامۆستاكه‌م سه‌ری سوڕما ، له‌وانه‌یه‌ ده‌جاری لێپرسیوم وه‌ره‌ بزانم ئه‌وه‌ له‌كێ فێربوی ده‌مگۆ مامۆستا له‌وه‌ستام ،وه‌ستات كێیه‌؟ ده‌مگۆ وه‌ستا كه‌مال، كه‌ئێستاش ماوه‌ خوا ته‌مه‌نی درێژكا ئه‌وه‌ سه‌ره‌تایه‌ك بوو من ده‌ستم پێكرد، به‌ مه‌قامێكی ده‌شت ده‌ستم پێكرد هه‌رچه‌نده‌ ئه‌و وه‌خته‌ هه‌ستم پێنه‌ده‌كرد، من چ ده‌ڵێم ئیتر ئه‌وه‌بوه‌ بنه‌مایه‌ك بۆمن دوای ئه‌وه‌ هه‌رمامۆستایه‌ك باسی گۆرانی كردبا بانگی منیان ده‌كردم وه‌ره‌ گۆرانی بڵێ ئیترمنیش ده‌ستم پێده‌كرد به‌شعرێكی شاعیری كورد خوالێی خۆشبێ كوردی، به‌ختی ئه‌و ئوستازه‌ ده‌رسی سحری پێ گووتی وا كه‌ تۆی به‌رداوه‌ گشت عاله‌م به‌ مه‌كر و ساحری ئه‌وان له‌كنیان زۆرسه‌یربوو چۆن ئه‌وشعره‌م له‌به‌ركردوه‌ جاری وا هه‌بوو تاده‌رس ته‌واوده‌بوو دوو جاریان هه‌ڵده‌ساندم بۆگۆرانی ووتن ئیترئه‌وه‌ وای لێهات ورده‌ ورده‌ من ناسرام كه‌وامن ده‌نگم خۆشه‌. ئیتر كه‌ گه‌وره‌بوم و بومه‌ پێنج وشه‌شی سه‌ره‌تایی وای لێهات ببومه‌ گۆرانی بێژێكی ته‌واو به‌ مۆسیقا له‌ ئاهه‌نگه‌كان به‌شداریم ده‌كرد له‌گه‌ڵ تیپی مۆسیقای باواجی ئه‌وكاته‌ ساڵی په‌نجاكان ئیتر ئه‌وه‌ سه‌ره‌تایه‌ك بوو بۆ چوونه‌ ناوهونه‌ر.

* پرسیارێكی زۆرتایبه‌تتر، دیوی ناوه‌وه‌ی مامۆستا سەڵاح ئایا ماڵه‌وه‌یه‌ یان هونه‌ره‌كه‌یتی؟
– ده‌بێ من بڵێم هه‌ردوولا،چونكه‌ ئینسان ناتوانێ ماڵه‌وه‌ پشت گوێ بخات به‌یه‌ك جاری، به‌ڵام هونه‌ره‌كه‌شم زۆر زۆرخۆش ده‌وێ به‌ڕاستی هونه‌ر له‌گه‌ڵ خوێنم تێكه‌ڵاوبووه‌ تازه‌ ئه‌وه‌من له‌وته‌مه‌نه‌ ئیش بۆمناڵ ده‌كه‌م وكاری هونه‌ری ده‌كه‌م واتا به‌هیچ شێوه‌یه‌ك ناتوانم واز له‌هونه‌ر بێنم یان لێی دووركه‌ومه‌وه‌، به‌ڵام ماڵه‌وه‌شم پشتگوێ نه‌خستوه‌، به‌ڵام هونه‌رمه‌ند به‌ڕاستی ئێش وئازاری هه‌یه‌ بمانه‌وێ و نه‌مانه‌وێ.

*خۆشحاڵ ده‌بین له‌ ئه‌م ئێوارانه‌ی خۆت قسه‌مان بۆ بكه‌ی چۆنیه‌یه‌تی كاركردنت چۆنیه‌تی مامه‌ڵه‌ كردنت له‌گه‌ڵ ئیش وكاره‌كانی هونه‌رمه‌ندان؟
– من كاری ئێوارانم لێره‌دا باره‌گای ئه‌نجومه‌نی سه‌ندیكای هونه‌رمه‌ندان ده‌سته‌ی باڵا، كاری ئێوارانم ئه‌لێره‌یه‌ وه‌كو به‌رپرسی كارگێری خۆیه‌تی سه‌ندیكای هونه‌مه‌ندان، ئیتر كاری ئێمه‌ ته‌نها ئه‌وه‌نده‌یه‌ كه‌ كاری هونه‌مه‌ندان ده‌به‌ین به‌ڕێوه‌كاری یاساییه‌ له‌بواری ئه‌وه‌ی كێشه‌یه‌كیان هه‌بێ چوارلقمان سه‌ر به‌ئه‌نجومه‌نه‌ كێشه‌یه‌كی كارگێریان هه‌بی كێشه‌یه‌كی یاساییان هه‌بی یاخود ئه‌وه‌ مووچه‌ی ڕێزلێنانه‌ ئێمه‌ ڕێوشوێنه‌كه‌یان بۆده‌كه‌ین ئیستماره‌یان ده‌ده‌ینێ چۆن پڕده‌كه‌نه‌وه‌ یاخود وه‌رگرتنی زه‌وی كه‌ ئێستا ئێمه‌ سه‌رقاڵین به‌ناوكردنی زه‌وی ئه‌و هونه‌مه‌ندانه‌ی كه‌ زه‌ویان وه‌رگرتوه‌ ئیترئه‌و جۆره‌كارانه‌ به‌ڕێوه‌ده‌به‌ین وه‌كو كارگێری.

*پاش ئه‌م ته‌مه‌نه‌ هونه‌رییه‌ ئه‌گه‌رهونه‌ره‌كه‌ت لێ هه‌ڵگرین چی ده‌مێنێته‌وه‌؟
– ئه‌گه‌ر هونه‌ره‌كه‌ نه‌ماوه‌ وەكو دارێكی ووشك ڕه‌ق وته‌ق ده‌مێنینه‌وه‌،چونكه‌ خه‌ڵك كه‌ یه‌كێك ده‌ناسێ به‌ به‌هره‌كه‌ی ده‌ی ناسێ یاخود به‌ هونه‌ره‌كه‌ی ده‌ی ناسێ، من زۆرجاریش ووتمه‌ به‌ڕاستی ئه‌و ڕه‌سیده‌ی كه‌ ئێمه‌ هه‌مانه‌ له‌ناو جه‌ماوه‌رجا خۆشه‌ویستیه‌ هه‌ر شتێكه‌، ئه‌وه‌ هی هونه‌ره‌كه‌یه‌ و باشترین به‌ڵگه‌یه‌ و باشترین ڕه‌سیده‌ بۆ ئێمه‌، زۆرجار ئه‌من چومه‌ته‌ جێیان نه‌شم ناسیون فه‌رموو فه‌رموو مام عه‌ولا ئیشه‌كه‌یان بۆجێبه‌جێكردووم، زۆریش ڕێزیان لێگرتووم یه‌عنی ئه‌وه‌ بۆ ئێمه‌ باشترین ناسنامه‌یه‌ بۆ خۆمان بۆ كه‌سایه‌تی خۆمان، دیاره‌ خه‌ڵكه‌كه‌ لێمان ڕازیه‌.

print

 333 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*