سەرەکی » دۆسێ » داعش پەلاماری قیبتییەكانی میسر دەدات

پێش جەژنی سەری ساڵ بوو

داعش پەلاماری قیبتییەكانی میسر دەدات

لەگەڵ شكستە گەورەكانی لە عیراق و سوریا و پوكانەوەی هێز و تواناكانی، «رێكخراوی دەوڵەتی ئیسلامی» داعش» دەیەوێت لە چەند وڵاتێكی تری ناوچەكە، هێرش و پەلامارە تیرۆریستییەكانی برەو پێبدات و گوزارشت لە مانەوەی خۆی بكات.
داعش بەر لە دەستپێكردنی ئاهەنگەكانی سەری ساڵ، پەلاماری كڵێسایەكی قیبتییەكان دەدات لە میسر و لەو پەلامارەشدا، 9 كەس دەبنە قوربانی.
ئاژانسی «أعماق»ی سەر بە «رێكخراوی دەوڵەتی ئیسلامی» داعش ، بەرپرسیارێتی رێكخراوەكە بەرانبەر ئەو پەلامارە رادەگەیەنێت كە كرایە سەر كڵێسای مارمینا لە حەلوان لە باشووری قاهیرەی پایتەختی میسر.
لە 29ی كانوونی یەكەمی 2017، وەزارەتی ناوخۆی میسر لە بەیاننامەیەكیدا، كوژرانی 9 كەسی لەو پەلامارەدا راگەیاند كە لەلایەن چەكدارێكەوە كرایە سەر كڵێسایەك و كۆگایەكی قیبتی لە باشووری شاری قاهیرە.
وەزارەكە لە بەیاننامەكەیدا، بەشداریكردنی ئەنجامدەرەكەی لە چەند پەلامارێكی  پێشوودا راگەیاندبوو.
راپۆرتە سەرەتاییەكان باسیان لەوەكردبوو كە ئەنجامدەرەكە بە دەستی هێزە ئەمنییەكان كوژراوە، بەڵام دواتر وەزارەتی ناوخۆی میسر رایگەیاند»هێزە ئەمنییەكان تەقەیان لە ئەنجامدەرەكە كردووە و دەستگیرییان كردووە».
هەر بەپێی ئەو بەیاننامەیە»حەوت كەس لە پەلاماری سەر كڵێسای مارمینا و دوو كەسی تر لە پەلاماری سەر گۆكایەكدا كوژراون».
كڵێسای قیبتییەكانیش، بەیانامەیەكی لەبارەی پەلامارەكەوە بڵاوكردبۆوەوە و تێیدا ئاماژەی بە كوژرانی 8 كەس كردبوو،بەیاننامەكە ناو و تەمەنی كوژراوەكانی لەخۆگرتبوو.
لە بەیاننامەی یەكەمی وەزارەتی ناوخۆی میسردا لەبارەی ئەو پەلامارەوە هاتبوو»دەزگا ئەمنییە پەیوەندیدارەكان بۆ پاراستنی سەلامەتی كڵێسای مارمینا لە حلوان، بەرپەرچی كەسێكی نەناسراویان داوەتەوە كە ماتۆڕسكیلێكی پێبووە و هەوڵیدابوو سنوری ئەمنی دەرەكی كڵێساكە ببەزێنێت».
وەزارەتی ناوخۆ رایگەیاندبوو»ئەنجامدەری پەلامارەكە عەلی ئیبراهیم ئیسماعیلە و لەدایكبووی ساڵی 1984»ە.
بەپێی بەیاننامەیەكی تری وەزارەتەكە»ئیسماعیل كرێكارە و دانیشتووی ناوچەی حەلوانە، و ژمارەیەك ناوچەی كشتوكاڵی لە پارێزگای (الصعید) وەك مۆڵگە بۆ خۆحەشاردان بەكارهێناوە».
بەیاننامەكە، (عەلی ئیبراهیم ئیسماعیل)ی  بە كوشتنی سێ‌ كرێكار لەكاتی دەستەبەركردنی پسوڵەی گومرگی لە یەكێك لە رێگەكانی پارێزگای بەنی سویف لە باشووری میسر، تۆمەتبار كردبوو.
ئەو پەلامارە پیش دەستپێكردنی ئاهەنگانی سەری ساڵی زاینی بوو كە یادی لەدایكیبوونی حەزەتی عیسایە (د.خ).
لە ساڵی رابردوودا، زیاتر لە 100 مەسیحی لە تەقینەوە و پەلامارە چەكدارییەكان لە میسر كوژران، «رێكخراوی دەوڵەتی ئیسلامی»ش بەرپرسیارێتی خۆی بەرانبەر بە زۆرێك لەو پەلامارانە راگەیاندبوو.
دەسەڵاتدارانی میسر چەند رۆژێك بەر لە دەستپێكردنی ئاهەنگەكانی سەری ساڵ، ژمارەیەك رێوشوێنیان بۆ پاراستنی ئەو ناوچانە گرتبووەبەر كە جێگەی گردبوونەوەی مەسیحییەكانن، لەنێو ئەو رێوشوێنانەشدا قەدەغەكردنی هاتووچۆ بوو لەو رێگەوبانانەی نزیكن لە كڵێساكانەوە.
وەك «بی. بی. سی»ی بریتانی ئاماژەی پێدەكات، «قیبتییەكان لە رابردوودا دەسەڵاتدارانی میسرییان بەوە تۆمەتبار كردبوو كە رێوشوێنی رواڵەتی دەگرنەبەر بۆ پاراستنیان، ئەو جۆرە پەلامارەش بۆسەر ئەو توێژە نابێتە مایەی هێوركردنەوەی دۆخەكە».
مەسیحییەكان كە زۆربەیان قیبتین، نزیكەی لەسەدا دەی كۆی گشتی دانیشتوانی میسر پێكدەهێنن.
لە مانگی نیسانی رابردوو، لانی كەم 45 كەس لە دوو پەلاماردا لە شارەكانی ئەسكەندەریە و تەنتا كوژران.
لە مانگی ئایاری رابردوو، 29 قیبتی لە پەلامارێكدا بۆسەر پاسێكی نەفەرهەڵگر كە لەرێگەدابوو بۆ یەكێك لە دێرەكان لە ناوەڕاستی میسر، كوژران.
لە تشرینی یەكەمی رابرووشدا، قەشەیەكی قیبتی بە چەقۆ لە قاهیرە كوژرا.
لەلایەكی ترەوە، باڵێوخانەی ئەمریكا لە قاهیرە رایگەیاندبوو كە بەدواداچوون بۆ دوو پەلامارەكەی ناوچەی حەلوان دەكات، هۆشداریشی دابووە هاوڵاتیانی تا لەو ناوچەیە نزیك نەبنەوە، بەپێویستیشی زانیبوو رەچاوی رێوشوێنە ئەمنییەكان و رێنماییەكانی سەفەركردن بكرێت.

داعش سۆفییەكانیش دەكاتە ئامانج
«رێكخراوی دەوڵەتی ئیسلامی» داعش لە پەلامارە تیرۆریستییەكانیدا، جیاوازیی لەنێوان ئاینەكاندا ناكات و لە 24ی تشرینی دووەمی 2017 لە پەلامارێكی خوێناوی چەكدارانی رێكخراوەكە بۆسەر مزگەوتی رەوزە لە باكووری سینا، 305 كەس كوژران و 128 كەسی تر برینداربوون، 27 لە كوژراوەكانی ئەو پەلامارەش كە سۆفییەكانی كردبووە ئامانج، منداڵن بوون.
لە 25ی تشرینی دووەمی 2017، داواكاریی گشتی میسر رایگەیاندبوو» ئەنجامدەرانی پەلامارەكە ژمارەیان لەنێوان 25 بۆ 30 چەكدار بووە، لەكاتی پەلامارەكەشدا ئاڵای داعشیان بەرزكردبۆوە، و هێرشبەرەكان لە دەرگای مزگەوتەكە و پەنجەرەكانییەوە كە 12 پەنجەرە بوون، خۆیان قایم كردووە و بەشێوەیەكی كوێرانە تەقەیان بەنێو نوێژخوێنەكاندا كردبوو.
هەر بەپێی راگەیاندنەكەی ئەو دەمەی داواكاریی گشتی میسر»چەكدارەكان بە پێنج ئۆتۆمبێلی دەبڵ ئەكسل هاتبوونە شوێنەكە و حەوت ئۆتۆمبێلی نوێژخوێنەكانیان سوتاندبوو».
عەقید تامر رەفاعی وتەبێژی هێزە چەكدارەكانی میسریش رایگەیاندبوو» سوپا و هێزە ئەمنییەكان بەردەوام دەبن لە بەئامانجگرتنی مۆڵگەكانی تیرۆریستان لە باكووری سینا، و هێزە ئاسمانییەكانیش لەڕێی ئەو زانیارییە هەواڵگریانەی بە هەماهەنگی لەگەڵ خەڵكی ناوچەكە دەستیان دەكەوێت، هێرشەكانیان ئەنجام دەدەن».
ئەو پەلامارەی لەلایەن چەكدارانی داعش لە 24ی تشرینی دووەمی رابردوو ئەنجامدرا، بە خوێناویترین پەلامار لە مێژووی میسری هاوچەرخدا دادەنرێت، و وای لە هێزە سیاسییەكانیش كرد داوا بكەن، دەرگای «خۆبەخشین بۆ لاوان بكرێتەوە لەپێناو بەرپەرچدانەوەی گروپە تەكفیرییەكان لە سینا» و بەرگرتن لە پەلامارە تیرۆریستییەكان.
هەر لەو ماوەیەدا شارەزایان داوایان كردبوو، ستراتیژێكی فكری و ئەمنی هەمەلایەنە بۆ رووبەڕبوونەوەی « هەڵكشانی تیرۆر لە وڵاتدا» دابنرێت و دامەزراوەی ئاینیش رۆڵی خۆی لە وشككردنی سەرچاوەكانی فكری توندڕەویدا ببینێت.
زیا رەشوان سەرۆكی دەزگای زانیارییەكان لە میسر لە 25ی تشرینی دووەمی 2017 رایگەیاندبوو» ژمارەی كوژراوەكانی هێرشی سەر مزگەوتی رەوزە لە باكووری سینا، 197 كەسن، نەك وەكو پێشتر بە 235 كەس راگەیەندرابوو».
رەشوان لە پرێس كۆنفرانسێكدا، ئاماژەی بە ئەگەری بەرزبوونەوەی ژمارەی قوربانییەكان كردبوو، لەبەر سەختی برینی زۆرێك لە بریندارەكان كە بە دەیان كەس بوون.
زانیارییە سەرەتاییەكان لە میسر، باسیان لە كوژرانی لانی كەم 235 كەس و برینداربوونی نزیكەی 100 كەس كردبوو لەو پەلامارەی لەلایەن ژمارەیەك چەكدارەوە كرایە سەر مزگەوتی رەوزە لە باكووری سینا كە لە ماوەی چەندان ساڵی رابردوودا بە خوێناویترین پەلامار دانرا.
بەرپرسانی میسر رایانگەیاندبوو  «بۆمبێك لە مزگەوتی گوندی رەوزە- (بئر العبد) لەكاتی نوێژی هەینیدا تەقیوەتەوە، دواتر لەلایەن ژمارەیەك چەكدارەوە نوێژخوێنانی مزگەوتەكە درابوونە بەر رێژنەی گوللـە».
گوندی رەوزە دەكەوێتە خۆرئاوای شاری عەریش (سەنتەری پارێزگای باكووری سینا) لەو ناوچەیەشدا گروپە ئیسلامییە توندڕەوەكان چالاكییان هەیە.
وەزارەتی تەندروستی میسر لە بەیاننامەیەكیدا، پەلامارەكەی بە «تیرۆیستانە» وەسفكردبوو. تەلەڤیزیۆنی حكومەتی میسریش، ئاماژەی بە كوژرانی 235 كەس و برینداربوونی 130 كەسی تر كردبوو. لەنێوان كوژراوەكانیشدا خەڵكی مەدەنی و سەربازیی سەر بە هێزە ئەمنییەكانی تێدا بوو.
خالید موجاهید وتەبێژی وەزارەتی تەندروستی میسر لەدوای پەلامارەكە رایگەیاندبوو»زیاتر لە 150 ئۆتۆمبێلی ئەمبوڵانس بەشدارییان لە گواستنەوەی كوژراوەكان و بریندارەكاندا كردووە، ئەو بریندارانەی باریی تەندروستییان جێگیر بووە گوازراونەتەوە بۆ نەخۆشخانەی (بئر العبد)، ئەوانەش كە برینەكانیان سەخت بووە، رەوانەی نەخۆشخانەی گشتی ئیسماعیلیە كراون، ئەوانەش كە پێویستییان بە نەشتەرگەریی بووە، براونەتە نەخۆشخانەی پەیمانگای ناسر و نەخۆشخانەی دارولشیفا».
سەرۆك هۆزێك كە سەركردایەتی گروپێك دەكات و لە دژی رێكخراوی داعش لە ناوچەكەدا شەڕ دەكات، بە ئاژانسی فرانس پرێسی راگەیاندبوو:»ئەو مزگەوتەی كرایە ئامانج، سۆفییەكان سەردانیان دەكرد و نوێژیان تێدا دەكرد».
عەبدولفەتاح سیسی سەرۆكی میسر لەپاش پەلامارەكەی 24ی تشرینی دووەمی سەر مزگەوتی رەوزە، بۆ ماوەی سێ‌ رۆژ پرسەی لە وڵاتەكەدا راگەیاندبوو.
لە 2013وە رووبەڕبوونەوە لەنێوان هێزە ئەمنییەكان و گروپە ئیسلامییە توندڕەوەكاندا لە ناوچە دوورە دەستەكانی باكووری میسر روودەدات.
لەم چەند ساڵەی دوایی، لقی رێكخراوی داعش لە میسر، بەشێوەیەكی بەردەوام كاروانە سەربازییەكان و پێگە سەربازی و ئەمنییەكانی لەو ناوچەیەدا كردووەتە ئامانج و لەو نێوەندەشدا سەدان سەرباز و پۆلیس كوژراون. هەروەها رێكخراوەكە لە پەلامارەكانی تریدا زۆرێك لە مەسیحی و سۆفییەكانی كردبووە ئامانج.
لە سەرەتای ساڵی 2017 و لەپاش ئەو پەلامارانەی خرابووە پاڵ جیهادییەكان، دەیان قیبتی هەڵاتبوون و باكووری سینایان بەجێهێشتبوو.
لە مانگی كانوونی یەكەمی 2016، داعش  بەرپرسیارێتی خۆی بەرانبەر بە سەربڕینی دوو شێخی سۆفی لە نیمچە دوورگەی سینا راگەیاندبوو.

print

 117 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*