سەرەکی » وتار » شیلان ده‌رگه‌ڵه‌یی » جیاوازی میللەتان و دەسەڵاتدارەکانیان

جیاوازی میللەتان و دەسەڵاتدارەکانیان

هەڵە نەبم، کۆتایی نەوەدەکان بوو بەرنامەی (الاتجاه المعاکس)ی کەناڵی الجزیرە میوانداری مشعان الجبوری و کابرایەکی تورکی کرد، ناوی تورکەکەم لەبیر نییە بەڵام لەبیرمە تەوەری سەرەکی بەرنامەکە مەسەلەی کورد بوو.

کابرای تورک عەرەبی تاوانباردەکرد بە رەشەکوژیی کورد، ئەو کاتە مشعان الجبوری ئۆپۆزسیۆن بوو، لە دەرەوەی عیراق دەژیا، وەک کەسایەتییەکی دیاری ئۆپۆزسیۆنیش میوانداری کرابوو.

مشعان گوتی:
راستە، کیمیاباران و ئەنفال و وێرانکردن و راگواستنی گوندەکان و هەرچی تاوانە بەرانبەر کورد کراوە لە عیراق، بەڵام ئەوە دەسەڵات و حکومەتی عیراقی و رژیمی بەعس کردوویەتی نەک هاووڵاتی عەرەبی عیراقی، ئینجا هەمان تاوانیش بەرانبەر هاووڵاتی عەرەب کراوە لە خواروو و ناوەراسی عیراق، لای ئێمە ئەوە دەسەڵاتە دژی کورد بەڵام ئێوەی تورک چ وەک دەسەڵات و چ وەک میللەتیش دژی کورد و ناو و زمان و کەڵچەر و تەنانەت جل و بەرگ و بۆنە نەتەوەییەکانی کوردیشن.

تا ئێستا خوێندن و قسەکردن بە کوردی رێپێدراو نییە لە تورکیا، ئێوە تاکە میللەتن کە هاوشانی دەسەڵات دژایەتی ئۆپۆزسیۆن دەکەن لە وڵاتەکەتان.

بەر لە 20 ساڵ مشعان الجبوری ئەوەی بە کابرای تورک گوت، رۆژی پاشتر باشتر ئەو راستییەمان بۆ روون دەبێتەوە کە تورک تاکە نەتەوەیە هاوڕای دەسەڵاتە لە دژایەتیی و سەرکوتکردنی هەر نەتەوەیەکی تر لە تورکیا، جگە لە تورک.

رۆژی چوارشەممەی رابردوو 2/9/2020 بەریتانیا رێژەی پێوانەیی شکاند لە هاتنەناوەوەی پەنابەری نایاسایی کە گەیشتە 409 کەس، لە کاتێکدا حزب و بەشێک لە خەڵکە رەگەزپەرستە توندڕەوەکە بە هەموو شێوەیەک هەوڵی رێگرتن لە هاتنی پەنابەر دەدەن و رێکاری تووندیش گیراوەتەبەر بۆ دزەنەکردنی پەنابەران لە فەرەنساوە بۆ بەندەر و کەناراوەکانی بەریتانیا و رێگایان لە خەڵکێکی زۆر گرت، بەڵام هێشتاش نەیانتوانی رێگا لە هەموویان بگرن.

ئەوەی کە بووە جێی سەرنج و باسی هەموو راگەیاندنی ئەوروپا؛ دروشمەکانی دانیشوانی شاری Doverی سەر سنوور بوو، کاتێک تابلۆی دروشمەکانیان رازاندبووەوە بە وێنەی (ئالان کوردی) ئەو مناڵە کوردەی رۆژئاوا کە بەر لە 5 ساڵ ئیجە خنکاندی و فڕێیدایە کەناراوەکانی.

دانیشتوانی دۆڤەر سەرەڕای باری گرانی ئێمەی بیانی و چەندین سەرپێچی و ساختەکاری و تاوانی گەورەتریش لەلایەن بەرانبەر هاووڵاتیانی رەسەنی وڵاتەکە، هێشتاش ئەوان پێشوازیی گەرم لە پەنابەر و خەڵکی بیانی دەکەن.

ئەوەش بەڵگەیەکە کە پێچەوانەی تورک هاووڵاتی وڵاتەکانی تر هاوڕا و هاوشانی دەسەڵات نین لە توندوتیژی یا رەگەزپەرستی یا دژایەتیکردنی هیچ ئایین و ئایینزا و نەتەوە و کەمایەتییەکانی لە وڵاتەکەیاندا دەژین.
جێی خۆشحاڵییه کە کوردیش یەکێک لە سیما جوانەکانی رۆحی جوانی هاوکاری و بەیەکەوەژیانی هەر بە زیندوویی ماوە، باشووری کوردستان بە نموونە.

 157 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*