سەرەکی » دۆسێ » سوپای سوریا لە ئیدلیب پێشڕەوی زیاتر دەكات

ئاوارەبوونی دانیشتووانیش بەردەوامە

سوپای سوریا لە ئیدلیب پێشڕەوی زیاتر دەكات

هێزەكانی سوپای سوریا لەسەر حیسابی گروپە جیهادییەكان لە پارێزگای ئیدلیب (باكووری خۆرئاوا)، پێشڕەوی زیاتر دەكات، ئەوەش هاوكاتە لەگەڵ بەردەوامبوونی تەوژمی ئاوارەبوونی دانیشتوان لە ناوچەكە.
پێشتر شەڕی توند لەنێوان سوپای سوریا و گروپە جیهادییەكان لە ناوچە سنورییەكان لە هەردوو پارێزگای ئیدلیب و حەما روویدا، ئەوەش دوای ئەوەی هێزەكانی سوپای سوریا هێرشێكی فراوانیان دەستپێكردوو و لێوەی توانیان بچنە نێو سنوری ئیداریی پارێزگای ئیدلیب.
رامی عەبدولڕەحمان بەڕێوەبەری روانگەی سوریا بۆ مافەكانی مرۆڤ كە بارەگاكەی لە لەندەنی پایتەختی بریتانییە، بە ئاژانسی فرانس پرێسی راگەیاندبوو»لە رۆژانی كۆتایی مانگی كانوونی یەكەمەوە شەڕ و پێكدادانی توند لە ریفی ئیلیب (بەری باشووری خۆرهەڵات) دەستیپێكرد».
بە گوتەی رامی عەبدولڕەحمان»هێزەكانی سوپای سوریا توانیبویان پێشڕەوی نوێ‌ بكەن و ژمارەیەك شارۆچكە و گوند لە چوارچێوەی ئەو هێرشەدا كۆنترۆڵ بكەن كە بە پلەی یەكەم ئامانج لێی، كۆنترۆڵكردنەوەی ریفی ئیدلیبی باشووری خۆرهەڵات و دەستگرتنە بەسەر رێگەی ستراتیژی كە ناوچەكە بە شاری حەڵەب (دووەم گەورەترین شاری سوریا لەپاش دیمەشق) دەبەستێتەوە».
وەك فرانس پرێس ئاماژەی پێكردبوو، شەڕوپێكدادانەكان هاوشان بوون لەگەڵ بۆردومانی چڕی سوریا و روسیا بۆسەر گوند و شارۆچكەكانی سنوری ریفی حەما (باكووری خۆرهەڵات) و ناوچەكانی دەورووبەری ریفی ئیدلیب لە باشووری خۆرهەڵاتەوە.
ئاژانسی دەنگوباسی سوریاش (سانا) لە زاری سەرچاوەیەكی سەربازییەوە بڵاویكردبۆوە «هێزەكانی سوپا توانیویانە پێنج شارۆچكە و گوند و ژمارەیەك گردۆڵكەی دوروبەری ریفی حەما لە باكووری خۆرهەڵاتەوە كۆنترۆڵ بكەنەوە».
ئەو شەڕوپێكدادانانە كە چەند هەفتەیەكە بەردەوامن، بونەتە مایەی ئاوارەبوونی سەدان خێزان لە ناوچەكە.
فرانس پرێس ئاماژە بە هەڵاتنی دەیان ئۆتۆمبێلی نەفەرهەڵگر و بارهەڵگر كردبوو كە مەدەنییەكانیان لە ناوچەكەوە دەگواستنەوە بۆ ریفی باكوور و شاری ئیدلیب، لەكاتێكدا هەندێك لە خێزانەكان لە ناوچە دەشتاییەكانی نزیك شاری (معرە النعمان) خێمەیان هەڵدابوو.
ئەبو ئەحمەد (65 ساڵ) كە ئاوارەی ناوچەكانی ریفی ئیدلیبە بە ئاژانسی فرانس پرێسی راگەیاندبوو»نازانم چۆن هەستی خۆم باس بكەم، دوای ئەو هەموو تەمەنە خاك و ماڵ و ئاژەڵەكانمان جێدەهێڵین و دەڕۆین بێ‌ ئەوەی بزانیین بۆ كوێ‌».
فرانس پرێس لە زاری ئەو پیاوەوە كە لە تەنیش ئۆتۆمبێلێك لەگەڵ ئەندامانی خێزانەكەی بە پێداویستی و شتومەكی هەڵاتنەوە دانیشتبوو، بڵاویكردبۆوە»بۆ زیاتر لە جارێك رووبەڕووی بۆردومان بوینەوە، سوپا رۆژ لە دوای رۆژ ناوچەی نوێ‌ كۆنترۆڵ دەكاتەوە، بۆیە نەمانتوانی بمێنینەوە، چونكە منداڵەكانمان لە دەنگی بۆردومانەكان دەترسن».
لەگەڵ نزیكبوونەوەی شەڕەكانیشدا، ئەبو خالید كە پیاوێكی تەمەن سی ساڵانە، لەگەڵ خێزانەكەیدا بەرەو باكووری شاری (معرە النعمان) هەڵاتبوو، لەوێش لە دەشتاییەكی وشكدا خێمەی هەڵدابوو.
ئەبو خالید بە فرانس پرێسی راگەیاندبوو»دوای ئەوەی سوپا لێمان نزیك بۆوە و رووبەڕووی بۆردومان و هێرشی ئاسمانی بوینەوە، بەشێوەیەكی كاتی ئاوارەی ئەم چۆڵەوانییە بوین، تا ئەو كاتەی دەرفەتی گەڕانەوەمان بۆ دەڕەخسێت».
ئەو باسی ئەو ترسەی كردبوو كە دەستی بەسەر دەرونی منداڵەكانیدا گرتبووە و بە ئاژانسەكەی راگەیاندبوو»ئەوەی زیاتر وای لێكردین ئاوارەبین، منداڵەكانمانن، چونكە زۆر لە دەنگی بۆردومان و هێرشی فڕۆكەكان دەترسن».
پارێزگای ئیدلیب كە نزیكی سنورەكانی توركیایە، لە ساڵی 2015دا لەژێر كۆنترۆڵی هێزەكانی حكومەتی سوریا دەرهێنرا.
هەیئەی تەحریری شام بۆ چەند مانگێك دەچێت دەستی گرتووە بەسەر بەشی هەرە زۆری پارێزگاكە، لە ناوچەكانی تریشدا گروپە چەكدارەكانی تر بونیان هەیە.
پارێزگای ئیدلیب و چەند بەشێك لە پارێزگاكانی دەوروبەری، لە چوارچێوەی ئەو ناوچانەدان كە رێكەوتنی هێوركردنەوە دەیانگرێتەوە و لە مانگی ئایاری رابردوو لە ئەستانە بە چاودێری روسیا و ئێران و توركیا رێكەوتنیان لەسەر كرا.
ئەو رێكەوتنە لە مانگی ئەیلولی رابردوودا خرایە بواری جێبەجێكردنەوە.
ئیدلیب لەماوەی دوو ساڵی رابردوو، مۆڵگەی ئۆپۆزسیۆن و ئەو مەدەنیانە بووە كە لە ناوچەكانی خۆیان لە سوریا هەڵكەندرابوون دوای پێشڕەوییەكانی هێزەكانی حكومەت.
شرۆڤەكاران پێیانوایە، ئیدلیب ئامانجی داهاتووی هێزەكانی سوپای سوریا و روسیای هاوپەیمانی دەبێت، دوای كۆتاییهاتنی شەڕەكان لە دژی رێكخراوی «دەوڵەتی ئیسلامی» داعش.

print

 141 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*