سەرەکی » راپۆرت » دەستوور بنەما بێت

شرۆڤەی رۆژ

دەستوور بنەما بێت

تەحسین تەها چۆمانی

پەسەندكردنی (یاسای پڕكردنەوەی كورتهێنانی دارایی) لە ئەنجومەنی نوێنەرانی عیراق، بەبێ ئامادەبوونی فراكسیۆنە كوردستانییەكان، كێشەی خستە نێوان لێكتێگەیشتن و رێكەوتنەكانی نێوان هەرێمی كوردستان و حكومەتی عیراقەوە.

هەرێم و بەغدا، تا ئێستا حەوت جار رێكەوتنیان لەبارەی پرسی مووچە و بودجەوە، بە رێكەوتن لەسەر پرسی نەوت و داهاتە نانەوتییەكانەوە كردووە، بەڵام رێكەوتنەكان نەبوونەتە بنەمایەك بۆ كۆتاییهێنان بە كێشەی نێوان هەردوولا. ئەمە لە كاتێكدایە كە هەردوولا هەمیشە تەئكید لە پابەندبوون بە دەستوورەوە دەكەنەوە.

ئێستا هەرێم، بەم هەنگاوەی ئەنجومەنی نوێنەران نیگەرانە و بە پێشێلكردنی شەراكەت وەسفی دەكات. لە بەرامبەردا بەغدا و ئەنجومەنی نوێنەران جەخت لەوەدەكەنەوە كە «هەرێم وەك پێویست بە دەم رێكەوتنەكانەوە نایەت»، بەڵام هەمیشە حكومەتی هەرێم جەخت لە دوو شت دەكاتەوە، ئەویش ماف و ئەركە.

ماف و ئەرك، بەپێی دەستوور و یاسای بودجەی ساڵانی رابردوو، بەپێی رێكەوتنی هەردوولا، لێكتێگەیشتنی لەبارەوە كراوە. هەرێم پێیوایە؛ بەغدا، هەرێمی كوردستان لە هەندێك پرسدا بە بەشێك لە عیراق نازانێت، دەنا وێڕای ناكۆكی لە بارەی كێشەكانەوە، نابێت دەست بۆ قووتی خەڵك ببرێت. كێشەكە لەوەدایە كە هەمیشە لەو كێشە و نەسازانەی نێوان بەغدا و هەرێمدا، مووچەخۆرانی هەرێم قوربانیی یەكەمن. بۆیە دۆزینەوەی چارەسەرێكی بنەڕەتیی بۆ ئەم دۆخە، گرنگە.

مەكتەبی سیاسیی یەكێتیی نیشتمانیی كوردستان، بەردەوامیدان بە گفتوگۆكان لەگەڵ حكومەتی فیدرالی عیراق لەپێناوی گەیشتن بە رێكەوتن بۆ دەستەبەركردنی شایستە داراییەكانی هەرێم و مووچە و بژێویی خەڵكی كوردستان، بە باشترین رێگاچارە دەبینێت. هەروەها بۆ گەیشتن بە رێكەوتنی بنەڕەتی لەسەر شایستە داراییەكانی هەرێم و مووچەی خەڵكی كوردستان، مەكتەبی سیاسی جەختدەكاتەوە لەسەر «پابەندبوونی حكومەتی هەرێم بە جێبەجێكردنی ناوەڕۆكی رێكەوتنەكان و حكومەتی فیدراڵی عیراقیش پابەندی بنەمای تەوافوق و دەستووری هەمیشەیی عیراق بێت».

دۆزینەوەی رێگەچارەی پێویست لەم دۆخەدا، دەبێت ئەولەویەت بێت، ئەمەش وا دەخوازێت هەرێم كلیلی ئەم رێگەچارەیە بدۆزێتەوە، هەروەك هاوسەرۆكی یەكێتی دەڵێت: «دەبێت چارەسەر لای ئێمە بێت». بۆ ئەمەش چ هەرێم و چ بەغدا پێویستە بگەڕێنەوە سەر رێگەچارە سەرەكییەكە كە ئەویش دەستووری هەمیشەیی عیراق و پابەندبوونە بە دەستوورەوە.

 59 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*