سەرەکی » زانست » چەند زانیارییەك لەبارەی ڤاكسینی (فایزەر)ەوە

چەند زانیارییەك لەبارەی ڤاكسینی (فایزەر)ەوە

(9)ی ئەم مانگە هەواڵی سەركەوتنی ڤاكسینی(فایزەر) بووە خۆشترین هەواڵ بۆ جیهان كە ماوەی نزیكەی ساڵێكە بەدەست ڤایرۆسی كۆرناوە دەناڵێنێت.

ئەمەش دوای ئەوە دێت كە كۆمپانیای( فایزەر)ی ئەمریكی بەرهەمهێنەری دەرمان رایگەیاند، ڤاكسینە تاقیكراوەكەیان كە تایبەتە بە نەخۆشانی (كۆڤید-19) لەگەڵ گەورە كۆمپانیای(بایۆنتیك)ی ئەلمانیدا كاریان لەسەر گەشەپێدانی كردووە سەركەوتنی بەدەست هێناوە و ڕێژەی كاراییەكەی (%90)ە.

تەكنیكی ئەم ڤاكسینەش پشتی بەستووە بەوەی ماددەیەكی بۆماوەیی بە ناوی (RNA- رەوانەكەر) دەكرێتە لەشەوە لە رێیەوە مامەڵە لەگەڵ ڤایرۆسەكە دەكرێت.

هەردوو كۆمپانیاكەش هەوڵەكانیان بەردەوامە بۆ بەدەستهێنانی مۆڵەتی دامەزراوەی خۆراك و دەرمانی ئەمریكیی (FDA)بۆ ئەوەی لەكۆتایی ئەم مانگە بەكاربهێنرێت.

پسپۆران لە بارەی ڤاكسینەكەوە چی دەڵێن؟
پسپۆڕانی نەخۆشییە درمەكان ئاماژەیان بەوەداوە كە ئەنجامە سەرەتاییەكانی ئەو ڤاكسینە لەسەرووی پێشبینیەكانەوەیە و وەك هەواڵێكی هاندەر وایە بۆ ئەوەی كۆتایی بەو مەرگەساتە بهێنێت كە كۆڤید-19) دروستیكردووە، چونكە ئەوان پێشبینیان دەكرد كارایی ڤاكسینەكە لە نێوان(50 -%60) دا بێت.

زانایان پێیانوایە وێنەكە زۆر ڕوون نییە و پێویستیان بە زانیاریی زیاترەو پێویستە بۆ ماوەی چەند مانگێك چاودێریی دۆخی ئەو خۆبەخشانە بكرێت كەبەشداریی تاقیكردنەوە كلینیكییەكانیان كردووە، بۆئەوەی بزانرێت بە تێپەربوونی كات ڤاكسینەكە چەند بەرگە دەگرێت و ئەو پاشهاتانە چین كە لە خۆبەخشەكاندا دەردەكەوێت بە هۆی وەرگرتنی ئەو ڤاكسینەوە، ئەمەش پێویستی بە شەش مانگ بۆ ساڵێك هەیە.

(ئەمیش ئەدلگا) پسپۆڕ لە سەنتەری زانكۆی( جۆنز هۆبكنز) دەڵێت « ئەو ئەنجامەی بەدەستهاتووە ئومێدبەخشە، چونكە (%90) وەك كارایی ئەو ڤاكسینە وایە كە بۆ سورێژە و ئاوڵە بەكاردەهێنرێت و بە باشترین ڤاكسین دادەنرێت، ئەمەش شتێكی گرنگە».

لە نێو ئەو ئومێدەی ناوەندە زانستیی و پزیشكییەكانەوە هەندێك پێیان وایە دەبێت هێشتا وریابن، چونكە:

ئەو زانیارییانەی كۆمپانیاكە ئاشكرایكردووە هێشتا زانایانی دەرەوەی كۆمپانیاكە چاویان پێدا نەخشاندووەتەوە، لەبەر ئەوەی ڕەنگە ڤاكسینەكە لە ناو تاقیگەدا كارا بووبێت، بەڵام لەدەرەوەی تاقیگە وا نەبێت.
بۆ ئەمەش وتەبێژ بە ناوی كۆمپانیای فایزەرەوە دەڵێت» ئەو ڤاكسینە هێشتا لەقۆناغە كۆتاییەكانی تاقیكردنەوەدایە، ئەنجامی توێژینەوەكانیش دەدرێنە توێژەرەوەی دیكە بۆ ئەوەی وردبینی لە زانیارییەكاندا بكەن و كاریگەریی ڤاكسینەكە هەڵسەنگێنن.

ئەو پرسیارانەی دەربارەی ڤاكسینەكە دەكرێن
هەندێك لەو پرسیارانە كە ئاراستەی كۆمپانیای بەرهەمهێنی ئەو ڤاكسینە كراوە ئەوەیە ئایا ڕادەی توانای ڤاكسینەكە چەندە بۆ ئەوەی كەسێك بپارێزێت لەبەرامبەر ڤایرۆسی نەخۆشییەكە؟ ئایا ئەو ڤاكسینە ڕێگریی دەكات لەوەی كەسەكە بە توندی تووشی ڤایرۆسەكە ببێت؟ ئایا ئەو كەسانەی كە ڤاكسینەكەیان لێدراوە دەتوانن ڤایرۆسەكە بگوزانەوە؟ ئەو ڤاكسینە تا چ ڕادەیەك كاریگەریی دەبێت لەسەر بەساڵاچووان؟، چونكە وەك دەزانرێت ئەوان لەو كەسانەن كەمترین وەڵامدانەوەیان هەیە بۆ ڤاكسینەكان.

هەرچی پاشهاتە دیارەكانی ئەو ڤاكسینەیە كە لە سەرەتای تاقیكردنەوەكاندا سەرنجی دراوە بریتی بووە لە «هەوكردنی قۆڵەكان و تایەكی بەرز و هەستكردن بە ماندوێتیی، بەڵام هیچ نیشانەیەكی مەترسیدارتر تۆمار نەكراوە.

هەرچەندە كۆمپانیای (فایزەر)بەڵینی داوە ئەمساڵ(5) ملیۆن بەش لەو ڤاكسینە بەرهەم بهێنێت كە بەشی (25) ملیۆن كەس دەكات، لە ساڵی داهاتوشدا (1.3) ملیار بەش دروست بكات، بەڵام ناوەندە پزیشكیی و ڕەسمییەكان پێیانوایە جگە لەوەی مۆڵەتپێدانی ئەو ڤاكسینە كاتێكی زۆری دەوێت كە ڕەنگە تا كۆتایی ئەمساڵ بخایەنێت، هاوكاتیش ڕەنگە ئەو بڕەی كە دیاریكراوە بەرهەمبهێنرێت بڕێكی كەم بێت و خواستی جیهان پڕ نەكاتەوە ئەمەش مانای بەرهەمهێنانی ڤاكسینی دیكەیە.

سەبارەت بە جیهانیش ئەوا دابەشكردنی ئەو ڤاكسینە چەندین ئاستەنگی دێتە ڕێگە كە سەرەكیترینیان شێوازی گواستنەوەی ڤاكسینەكەیە كە پێویستە لەسندوقی تایبەتدا بن و پلەی گەرمای ناو ئەو سندوقانە (70) پلەی ژێر سفری سەدیی بێت.

هاوكات، جگە لەو كۆمپانیایە چەندین كۆمپانیای دیكە لە ویلایەتەیەكگرتووەكانی ئەمریكا و هیند و چین و چەند وڵاتێكی دیكەی جیهان كار لەسەر بەرهەمهێنانی ڤاكسین دەكەن، پێشبینی دەكرێت كۆمپانیای(مۆدێرنا)ی ئەمریكی لەكۆتایی ئەم مانگەدا ئەنجامی تاقیكردنەوە كلینیكییەكانی ئاشكرا بكات و كۆمپانیای(جۆنسۆن ئاند جۆنسۆن)یش ئەنجامی تاقیكردنەوەكانی لەكۆتایی ئەمساڵدا ڕادەگەیەنێت.

سەرچاوەكان: .sky news

 440 جار بینراوە