سەرەکی » زانست » جیف بیزوس چۆن (amazon)ی دامەزراند؟پەڕە 3

چیرۆكی سەركەوتن

جیف بیزوس چۆن (amazon)ی دامەزراند؟

بەشی چوارەم و كۆتایی

هەموو ئەو هەوڵ و تێكۆشانەی جیف بیزوس لە ساڵی (1994) بەدواوە داویەتی ئەنجامی گەورەی لێكەوتووەتەوە و وایكردووە كۆمپانیاكەی ڕۆژ بە ڕۆژ لە گەشەكردندا بێت بە جۆرێك لە ساڵی (2017) دا سامانەكەی گەیشتە(100) ملیار دۆلاری ئەمریكی و بەوە بەسەر( بیل گەیتس)ی خاوەنی كۆمپانیای (مایكرۆسۆفت) دا سەركەوت و بووە دووەم باشترین بەرێوەبەری جێبەجێكار لە جیهاندا.

جیف بیزوس یەكەم پلانی كۆمپانیای ئەمەزۆنی لە گەشتێكیدا لە نیویۆركەوە بۆ سیاتل داڕشت، ئەوەش پلانێكی بەهێز و تۆكمە بوو بۆ كەسێك كە خەونێكی گەورەی هەبوو و توانیشی ئەو خەونەی بكاتە ڕاستەقینە و لە ماوەیەكی پێوانەییدا نەك هەر كۆمپانیاكەی كەوتە سەر پێی خۆی، بەڵكو لق و بارەگای لە زۆر شوێندا كردەوە .

بارەگا و لقەكانی ئامەزۆن
بارەگای سەرەكیی كۆمپانیای ئەمەزۆن لە شاری(سیاتڵ)ی ویلایەتی واشنتۆنە لە ئەمریكا و چەند لقێكیشی هەیە لە ژمارەیەك وڵاتی جیهان، جیف بیزۆس لقی كۆمپانیاكەی لە ساڵی (1998)دا لە هەریەك لە ئەڵمانیا و بەریتنیا كردەوە و دوای ئەوە لە ساڵی (2000)لە فەرەنسا و ژاپۆن و لە ساڵی (2002)دا لە كەنەدا و لە(2004) دا لە چین و ئیتاڵیا لە (2010) لە ئیسپانیا و لە (2011) لە هیند لە ساڵی (2012)لە مەكسیك و ئوستورالیا و لە ساڵی(2014)شدا لقی كۆمپانیاكەی لە هۆڵەندا كردەوە.

كۆمپانیای ئەمەزۆن هەزاران كاڵا و شمەك پێشكەش دەكات هەر لە كتێب و جلوبەرگ و شمەكی ئەلكترۆنی تا دەگاتە پێداویستییەكانی وەرزش و بابەتەكانی جوانكاریی، ئەم كۆمپانیایە چەندین كۆگای هەیە كە شمەكەكانی تێدا دەپارێزێت تا ئەو كاتەی دەیانگەیەنێتە كڕیارەكانی ئەویش یان بە گەیاندنی بۆ ناونیشانی كەسە كڕیارەكە یان بە گەیاندنی بە نووسینگەكانی باركردن و لە دواتردا گەیاندنی بەدەستی كڕیارەكانی.
هەر ئەم كۆمپانیایە خزمەتگوزاریی كۆمپیوتەریشی پێشكەش كردووە و بەردەوام بووە و لەساڵی (2015) بڕی داهاتەكانی لەڕێی خزمەتگوزاریی كۆمپیوتەرییەوە گەیشتووەتە (8) ملیار دۆلار.

بەم دواییەش جیف بیزوس باسی لەوە كردووە كە پێگەیەكی ڤیدیۆیی دەكاتەوە و ڕكابەری یوتیوب دەكات.

كۆمپانیای ئەمەزۆن چەند ساڵێكە خزمەتگوزاریی(ئەمەزۆن پرایم)ی داناوە كە كۆمپانیایەكی خزمەتگوزارییە دەتوانرێت بە دانانی بڕی(100) دۆلار كە وەك باجێكی ساڵانەیە بەشداریی تێدابكرێت و هەر ئەوكۆمپانیایەش توخمێكی سەرەكی ستراتیژیی(جیف بیزوس)ە بۆ دەستگرتن بەسەر جیهانی بارزرگانیی ئەلكترۆنییداو لە ساڵی (2016)دا و لە وتاری ساڵانەی بۆ بەشداربووانی ئەو خزمەتگوزارییە بیزوس نووسیویەتی»پرایم بووەتە ئامرازێك بۆ دابینكردنی هەموو پێداویستییە ماددی و دیگیتاڵییەكانی كڕیاران، هەروەها ئاماژەی بەوەشداوە كە دەیەوێت (پرایم) بكاتە سەودانامەیەكی وا كە بەشدار نەبوون تێیدا وەك هەڵسوكەوتێكی نابەرپرسیارانە لە قەڵەم بدرێت».

ئەمەش وایكردووە ئەو كۆمپانیایە بنكەیەكی فراوانی هەبێت و نزیكەی(50)ملیۆن بەشداربووی هەیە لەسەرانسەری جیهاندا كە لەو كریارانەن بەردەوام شمەك و كاڵاكانیان لە ڕێگەی ئەمەزۆنەوە دەكڕن.
ڤایرۆسی كۆرۆنا دەوڵەمەندتری كرد

بە گوێرەی ڕۆژنامەی دەیلی مەیلی بەریتانیی، تا كانونی دووەمی ساڵی (2020) سامانەكەی خاوەنی كۆمپانیای ئەمەزۆن (115) ملیار دۆلار بووە، بەڵام لە سەرەتای دەركەوتنی ڤایرۆسی كۆرۆنا لە جیهاندا و بە هۆی كەرەنتینەی گشتیی لەزۆربەی وڵاتانی جیهان و داخستنی بازاڕەكانەوە، خواست لەسەر بازاڕكردنی ئۆنلاین زیادی كرد، بەمەش پشكەكانی كۆمپانیای ئەمەزۆن بە ڕێژەی (%80) بەرزبووەوە و بەمەش سامانەكەی جیف بیزوسی خاوەنی ئەو كۆمپانیایەی كردە نزیكەی (204) ملیار دۆلار و بەو هۆیەشەوە بیزوس بووە یەكەمین پیاوی هەرە دەوڵەمەندی مێژوویی جیهان.

گۆڤاری (فۆربس)ی ئەمریكیش بڵاویكردەوە، ئێستا خاوەنی كۆمپانیای ئەمەزۆن یەكەمین پیاوی هەرە دەوڵەمەندی جیهانە و (90) ملیاری زیاترە لە سامانەكەی بیل گەیتس خاوەنی كۆمپانیای مایكرۆسۆفت كە بە دووەم پیاوی هەرە دەوڵەمەندی جیهان دادەنرێت.

سەرچاوە: ئاژانسەكان

 418 جار بینراوە