سەرەکی » زانست » پێویستە باخچەو پاركەكانی شاری كەركوك گرنگی زیاتری پێبدرێت

شەش پارك ‌و 184 باخچە هەیە

پێویستە باخچەو پاركەكانی شاری كەركوك گرنگی زیاتری پێبدرێت

نووسینگەی كەركوك، هێمن ئەحمەد

پێش پرۆسەی ئازادی عیراق تەنیا بیست باخچەو دوو پارك لەشاری كەركوك هەبووە، بەڵام لەئێستادا 184 باخچەو شەش پاركی گەورەو 81 شوستەی سەوزایی لەكەركوك بوونیان هەیە.

سەرۆكی شارەوانی كەركوكیش رایدەگەیەنێت: لەبەرنامەماندایە ژمارەی باخچەكان‌و رێژەی سەوزایی فراوانتر بكەین.

دەمانەوێت پاركەكانمان هاوشێوەی شارەكانی سلێمانی ‌و هەولێر بن
خاتوو شكۆفە كەریم، فەرمانبەرە لەیەكێك لەفەرمانگەكانی كەركوك‌و دانیشتووی گەڕەكی رزگاریە بەكوردستانی نوێ وت: زۆر پێویست لەشارەكە ناوچەیەكی گەشتیاری‌و چەند پارك‌و شاری یاری منداڵان هاوشێوەی شارەكانی هەرێمی كوردستان هەبن، چونكە ئێمەی فەرمانبەران تەنیا رۆژە پشووە فەرمییەكانمان بەدەستەوەیە. بۆ هەر شوێنێك بەمەبەستی گەشت‌و گوزار بڕۆین دەبێت رۆژێك بۆ رێگەوبان تەرخان بكەین‌و كاتێكیش دەگەڕێتەوە ماندوو دەبین‌و چێژ لەگەشت‌و گوزارەكە وەرناگرین، بەڵام لەسلێمانی‌و هەولێر ناوچەی گەشتیاریان زۆرەو بگرە لەباشوریش گەشتیاریان وەك دەریاچەی حەبانیە هەیە، شاری كەركوك بەو پانتاییەی كەهەیەتی بەتایبەتی رووباری خاسە، كە لەكاتی خۆیدا گەشتیاری وەك سەیرانگا روویان تێدە كرد، بەڵام ئێستا ئەو شوێنە بۆتە هەڵگری خۆڵ‌و خاشاك‌و بۆن‌و بەرامێكی زۆر ناخۆشی هەیە، بۆیە داوا لەلایەنە پەیوەندارەكان دەكەم ئەو ناوچەیە بقوزنەوە بۆ ئارام گرتنی هاوڵاتیان.

هەمووان بەماڵی خۆیان دەزانن!
خاتوو لەنجە عەلی، دانیشتووی گەڕەكی دەروازەی شاری كەركوكە، سەبارەت بەباخچەكانی شارەكەی بەكوردستانی نوێی وت: پەندێكی كوردی هەیە دەڵێت «لەكانییەك ئاوت خواردەوە بەردی تێفرێ مەدە» شوێنی حەوانەوەمان باخچەكانە، بەڵام سەرەنج دەدەم ئەوەی كەدێت بەماڵی خۆی دەزانێت ناندەخوات‌و منداڵەكەی یاری دەكات لەدەوری، بەڵام كەدەڕوات شوێنەكەی خۆی خاوێن ناكاتەوەو بگرە گوڵ‌و درەختەكانی ئەو ناوەش دەهەژێنێت‌و لق‌و پۆپەكانی دەشكێنێت، چاوی لەخزمتگوزارێكی بە تەمەنە شوینەكەی خاوێن بكاتەوە قسەشی لەگەڵ بكە دەڵێ: خزمەتگوزاری نییە، بەداخەوە میلەتێكین كە لەكانیەكە ئاومان خواردوە بەردی تێدەكەین.

گلەیی هەیە
باسی لەوەشكرد شاری كەركوك رۆژ لەدوای رۆژ لەفراوان بووندایەو پێویستە لەسەر لایەنە پەیوەندیدارەكان پاركی زیاتر بۆ شارەكە دروست بكەن‌و ئەو پارك‌و باخچانەی ئێستا لەشارەكە هەن وەك پێویست نییە. گلەیی ئەوەشمان هەیە لەگەڕەكە كورد نشینەكان باخچەو شوێنی حەوانەی هاوڵاتیان وەك پێویست نییە، بۆیە داواكارین لەبری دروستكردنی باڵاخانە گرنگی بەدروستكردنی باخچەو پارك بدەن بۆ ئەوەی ئێمەش هاوشێوەی شارەكانی دیكەی هەرێمی كوردستان خۆمان‌و منداڵاكانمان هەفتانە سەردانی ئەو شوێنانە بكەین بەمەبەستی گۆڕینی ژینگە.

پارك ‌و باخچەكان بەپێی پێویستی شارەكە نییە
هاووڵاتی حسێن مەجید، كە لەنەتەوەی توركمانەو دانیشتووی گەڕەكی سەوزی كەركوكەو سەبارەت بەبوونی پارك‌و شوێنی حەوانەوەی دانیشتوانی شاری كەركوك بەكوردستانی نوێی وت: هەر چەندە لەگەڕەكی سەوزی شارەكە نیشتەجێن، بەڵام هیج جۆرە سەوزاییەكی تێدا بەدی ناكرێت، راستە چەند باخچەیەك‌و چەند پاركێك لەشارەكە كراونەتەوە، بەڵام وەك پێویست نییە، هەر كاتێك لەگەڵ هاوڕێیەكەمان بەنیازی سەیرانكردن بین دەبێت روو لەناوچە گەشتیارییەكانی سلێمانی‌و هەولێر بكەین كەئەمەش خەرجییەكی زۆری پێویستە، ئێمەی گەنجانی كەركوك لەكاتی رژێمی بەعس سەیرانكردنمان لێ قەدەغە كرابوون بەتایبەتی بۆ نەتەوەی كوردو توركمان، چونكە تەنیا ناوچەی تازەو نمرە هەشتی قەزای دووبزمان هەبوو ئەویش ڕژێمی لەناوچوو كردبۆیە ناوچەیەكی سەربازیی، ئەمە جگە لەوەی شوێنێكی تایبەت بۆ سەعیكردنی خوێندكاران بوونی نەبوو بۆ ئەوەی خوێندكاران سەعی لێبكەن، بەڵام من دەپرسم ئایا ناتوانن قەڵای كەركوك وەك ناوچەیەكی گەشتیاری بەكار بهێنن؟ دڵنیاشم دەبێتە شوێنێكی زۆر خۆش بۆ گەشتیارو بگرە لەدەرەوەی كەركوك گەشتیاری رووی لێیدەكات‌و داهاتێكی باشیشی بۆ شارەكە دەبێت.

هاووڵاتیان بۆ شوێنی خۆش‌ و دڵڕفێن دەچن
لەوبارەیەوە فەرەیدون عادل زەنگەنە سەرۆكی شارەوانی كەركوك بەكوردستانی نوێ-ی راگەیاند: بۆ ئەو 184 باخچەیەی كەئێستا لەشاری كەركوك هەیە پێویستیمان بەهەزارو 50 كارمەندە بۆ خزمەتكردنیان، بەڵام لەبەرنەبوونی كارمەند تەنیا 47 كەسمان بۆ تەرخانكردووە ئەمەش گەورەترین گرفتی بۆ دروستكردوین، چونكە هەر باخچەیەك یان پاركێك دروستكرا سەرەتا دەبێت سەرجەم پێداویستیەكانی بۆ دابین بكرێت‌و هەر شوێنێك خزمەت نەكرا بەتایبەتی باخچەو پارك هاووڵاتی سەردانی ناكات، چونكە هاووڵاتی بەدوای شوێنی خۆش‌و كەشێكی ئارام دەگەڕێن.

پێشنیاری چەندین ناوچەی گەشتیاری كراوە
وتیشی: وەك سەرۆكی شارەوانی كەركوك پێشنیاری دروستكردنی چەند ناوچەیەكی گەشتیارم خستووتەڕوو گەر هاتوو جێبەجێكرا ئەوا شارەوانی دەتوانیت بەباشترین شێوە سەرپەرشتی بكات، چونكە دەسەڵاتی شارەوانی كەركوك تەنیا لەناو شارە. بەپێی پێویست توانیومانە باخچەكان نۆژەن بكەینەوەو درەختی تیدا بچێنین، لەشاری كەركوك تەنیا شەش پارك بۆ حەوانەی دانیشتوانی شارەكە هەیەو لەو ژمارەیەش سێ دانەیان بەپێی خواستی هاووڵاتیان نییە، چونكە بەپێی پێویست خزمەت نەكراوەو هاوكارەكەشی بەغدایە بودجەی پێویستمان بۆ دابین ناكات بۆ ئەوەی بەگوێرەی پێویست خزمەتی سەوزایی ناو شاری كەركوك بكەین.

 76 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*