سەرەکی » ئاراستە » شەهید مامۆستا محەمەد كەسێتییەكی گرنگ و كاریگەر

شەهید مامۆستا محەمەد كەسێتییەكی گرنگ و كاریگەر

ئاوات كۆكەیی

یەكێك لە تایبەتمەندییەكانی یەكێتیی نیشتمانیی كوردستان و شۆڕشە نوێیەكەی، هەر لەسەرەتاوە گرنكی زۆر درا بە راكێشانی گەنج وكەسانی خوێندەوارو رۆشنفكر بۆ نێو ریزەكانیان.

دواتر، زۆرێك لەوانە وەك كادری دیارو فەرماندەی باڵاو سەركردەی شۆڕشەكە بە دەركەوتن و رۆڵی دیارو كاریگەریان بینی لە هۆشیاركردنەوەی جەماوەرو پێشمەرگەدا، بۆیە یەكێتی و شۆڕشی نوێ زۆر بەزوویی سنوورەكانی بڕی و كەوتە گەشەكردن، بوو بە جوڵانەوەیەكی سەرتاسەریی كوردستان.

لەسیماو ئاخاوتن و كرداری جوانی پێشمەرگەو كادرانی یەكێتیدا، هەر زوو وێنەی جوانی ئەم شۆڕشە كەوتە بەر روانینی جەماوەرو ئەوانیش ئامێزی خۆشەویستی و هاوكارییان بۆكردنەوە.

ئاكاری جوان و ئاستی بەرزی تێگەیشتنی كادران و پێشمەرگە، بووە گرێدانێكی توند لەنێوان شۆڕش و جەماوەردا، پێشمەرگەی شۆڕشی نوێ ئەوەی دەیكردو دەیوت رێك و رەوان خواست و ئامانجی جەماوەر بوو، هەر بۆیە وای لێهات جەماوەر ببوو بە بەشێك لە شۆڕشەكەو ئەگەر تاكێك لە خەڵك پەیوەندیی سیاسیی راستەوخۆشی بە ئۆرگانێكی شۆڕشەكەوە نەبوایە، ئەوا لە مەیدانی كردەیی و واقیعدا، هەر بەشێك بوو لە شۆڕش.

مەرجی سەركردەی تێدابوو
كاتێك مەشخەڵی شۆڕشی نوێ لە ساڵی 1976دا رووناكی دەكاتەوە بە بەر بارودۆخی تاریكیی ئەو سەردەمەی كوردستاندا، هاوكات مامۆستا محەمەدی كۆیە، لە گوندی (ئێنێ)ی سەر بەقەزای چۆمان لەناوچەی باڵەكایەتی بە مامۆستا دادەمەزرێ، ماوەیەكی زۆركەم دوای چەخماخەی ئەو شۆڕشە، لە رێگەی شەهیدی سەركردە دكتۆر خالیدەوە پەیوەندیی بە بزووتنەوەی سۆسیالیستەوە دەكات.

دیارە شەهید مامۆستا محەمەد خەم و پەژارەی شكستی ساڵی رابردووی هەر لەدڵدابووە و بۆ دەرفەت و دەورازەیەك گەڕاوە، هەر بۆیە بەزوویی ئامێزی خۆی بۆ هەواڵی دووبارە سەرهەڵدانەوەی شۆڕش، واڵادەكات.
ئەو هەروەك كەسێتی خۆی كە سەنگین و هۆشیار بووە و كەسێكی خۆشەویستی ناو خەڵك بووە، بە بەشداریكردنیشی لە بزووتنەوەی خەباتی نوێدا هێندەی تر هەوڵ و تەقەلایداوە ئەو پێگەو توانا رۆشنبیرییەی هەیەتی بیخاتە خزمەت دۆزی گەلەكەی.

هەربۆیە شێلگیرانە كاروبارەكانی رێكخستن و ئەو ئەرك و فەرمانانەی شۆڕش كە دەكەوتنە سەرشانی، چەندەش سەخت و پڕ مەترسی بووبن، چالاكانە ئەنجامی دەداو لە دەرئەنجامدا بووە هۆی بەهێزكردنی ئەو تۆڕە رێكخستنەی كە كاری تێدا دەكرد.

كاتێكیش لەلایەن دەزگای سەركوتكەری دوژمنەوە ئاشكرا دەبێت، زیرەكانە خۆی دەرباز دەكات و روودەكاتە شاخ، لەوێش لە قۆناغی نوێی تێكۆشاندا كە پێشمەرگایەتییە، دەبێتە ناوێكی دیارو كەسێتییەكی كاریگەر.

مامۆستای شەهید، یەكێكە لەو خاوەن بڕوانامەو رۆشنبیرانەی بە تێگەیشتوویی و هەڵسوڕان و جدی بوونی لە ئەركەكانیدا، پێگەیەكی گەورەی لە ریزی شۆڕشی نوێدا بۆخی درووستكردو هەر زووش خەسڵەت و مەرجەكانی سەركردەیی تێدا دەركەوت.

لەماوەیەكی كەمی پێشمەرگایەتیدا، هێندە بە بیروباوەڕو دڵسۆزانە كاروبارەكانی سەرشانی بەجێدەهێنا، هێندە هۆشیارو لێوەشاوەبوو لە ئا خاوتن و دەربڕینی هەست و بیروباوەڕەكانیدا، سەرنج و خۆشەویستی هەڤاڵانی سەركردایەتیی بەلای خۆیدا بەكێش دەكرد، بەتایبەت هەڤاڵ مام جەلال زۆر رێزی دەگرت، لە دامەزراندنی مەكتەبی سكرتاریەتی سكرتێری گشتیشدا، كرا بە بەرپرسی كاروباری خەڵك و پێشمەرگە.

كاریگەریی لەسەر خەڵك
پێشڕەوی سەیدبرایمی، كە هاوڕێی نزیكی شەهید مامۆستا محەمەد بووە و تەنانەت لە روودوای شەهیدبوونەكەشیدا هەر پێكەوبوون و ئەویش بریندار دەبێت، لە نووسێنێكی دا دەربارەی مامۆستا محەمەدی هاوڕێی دەڵێت:
(ساڵی پار (مەبەستی 2009)یە، لە سەردانێكمدا بۆ گوندی (ئێنێ) سەربەقەزای چۆمان، پرسیاری مامۆستایەكی كۆییم لە خەڵكی ئەوێكرد كە سەرەتای ساڵی 1976 لەو گوندە مامۆستا بووە، یەكسەر باسی كوردپەروەری و خۆشەویستی ئەویان بۆكردم، هێشتا بواری ئەوە نەدرابوو ناوەكەی بڵێم، كەچی قسەو ئاماژەكان هەرهەمووی بۆ شەهیدی نەمر مامۆستا محەمەد ئەبوبەكر دەچوو.

ئەوان نەك هەر باسی چاكەو پیاوەتی ئەویان دەكرد، بەڵكو جەختیان لە پەرۆشی و دڵسۆزیی ئەو وەك پەروەردەكارێك و مامۆستایەك دەكردەوە، كەچۆن بەخۆشی و بە فشار هەوڵی دەدا منداڵ و خەڵكەكە فێری خوێندەواری بكات، هاوكاتیش وانەی كوردایەتیشی بە گوێدا دەچرپاندن، ئەوە لە كاتێكدابوو كە تازە شۆڕشی كورد نسكۆی بەسەردا هاتبوو).

كورتەی ژیاننامەكەی
شەهیدی نەمر، محەمەد ئەبوبەكر ناسراو بە مامۆستا محەمەد، ساڵی 1952 لە خێزانێكی بڕوابوو بە چەپ لە شاری كۆیە لەدایكبووە، وەستا بەكری باوكی یەكێك بووە لە ئەندامە دیارەكانی حزبی شیوعی لە لەساڵانی پەنجاو شەستەكاندا.

شەهید مامۆستا محەمەد خوێندكارێكی زیرەك و لێهاتوو بووە و قۆناغەكانی خوێندنی بەسەركەوتوویی تەواوكردووە، ساڵی 1976 لە قوتابخانەی گوندی ( ئێنێ)ی قەزای چۆمان بە مامۆستا دامەزراوە، هەمانساڵیش پەیوەندیكردووە بەرێكخستنەكانی یەكێتیی نیشتمانیی كوردستانەوە.

ساڵی 1979 لەلایەن بەعسەوە ئاشكرا دەبێت و بەزوویی خۆی دەرباز دەكات و دەبێتە پێشمەرگە.

ئەندامی سكرتاریەتی سكرتێری گشتی ی.ن.ك و جێگەی متمانەی هەڤاڵ مام جەلال بووە.

كادیرێكی هۆشیارو بە ئاگا، خاوەن ئەزموون و توانایەكی تایبەت بوو لە بواری رامیاری و كۆمەڵایەتی و پەروەردەدا، ئەگەر مەرگ رێگەی لێنەگرتایە، دەبووە سەركردەیەكی دیارو كاریگەری شۆڕشی نوێ و ی.ن.ك.

بەداخەوە، رۆژی 9/7/1980 لە بۆردومانی فڕۆكەكانی رژێمی بەعسدا بۆ سەر بارەگای سەركردایەتی ی.ن.ك لە توژەڵە، شەهید كرا.

 210 جار بینراوە