سەرەکی » ئاراستە » شەهید ئاسۆ و کاروانەڕیشە و سەرگوزشتەی دۆشكەكە

شەهید ئاسۆ و کاروانەڕیشە و سەرگوزشتەی دۆشكەكە

ئا: ئاوات کۆکەیی

لە لاپەڕەی بیرەوەریی- سەروەرانی ژمارە 8256ی رۆژنامەی كوردستانی لە رۆژی 31/12/2020، بابەتێك بەناوی (بیرەوەریی بەشداریكردن لە پرسەی شەهیدان شوانی تەنسیق و مامۆ‌ستا جمهور و كاك نەوزاد دا) نووسینی ئەحمەد كاكەحەمە- هۆشمەند، بڵاوكراوەتەوە.

دیارە ئەحمەد کاکە حەمە پێشمەرگەی دێرینە، بابەتەكەشی بیرەوەریی ئەو رۆژگارەیەو باس لەوە دەكات لەگەڵ چەند هاوڕێیەكی لە گوندی شەدەڵەی ناوچەی سورداشەوە چوون بۆ گوندی سەرچناری ناوچەی شێخبزێنی، بۆ بەشداریكردن لە پرسەی هەرسێ شەهید (شوانی تەنسیق و مامۆستا جمهور و كاك نەوزاد)، كە لە ساڵی 1987دا شەهیدكران.

پاشان باس لە برینداربوونی خۆی و چەند هاوڕێیەكی دەكات بەهۆی وەرگەڕانی تراكتۆرەوەو دەشڵێت: شەهید ئاسۆی دوكان (رەسوڵی كەریم ئاغای عەسكەری) هات بۆ لامان و بەدەستە رەنگینەكانی سەر لەنوێ برینی گوێچكەمی بەبێ بەنج تازە كردەوەو زۆر بەجوانی دووریەوە، كارمەندی تەندروستیش نەبوو، بەڵام سەری لە زۆر شت دەرئەچوو).

هەروەها دەنووسێت: (جێی باسە كە شەهید ئاسۆ لە رێكخستنەكانی كۆمەڵەبوو، بەڵام ئەو كاتە سەربازبوو لە یەكێ لە رەبایەكانی ئاغجەلەر، كۆتایی ساڵی 1982 دۆشكەیەكی تەسلیم كردو خۆشی بوو بە پێشمەرگە، تا لە ئەنفالەكەدا شەهیدكرا).

کاروانەڕیشە دەڵێت: دەستخۆشی لە ئەحمەد کاکەحەمە دەكەم بۆ ئەو بیرەوەرییە، زیاتریش بەهۆی ئەوەی وەفایەكی جوانی پیشانداوە بە باسكردنی شەهید ئاسۆ، بۆیە رەخنەو سەرنجێكم نییە و تەنیا دەمەوێ شتێك وەك تەواوكاری و وەك مافێكی خۆم بۆ ئەو باسەی شەهید ئاسۆ، زیاد بكەم كە من و شەهید ئاسۆ پێكەوە ئەو چالاکییەمان کردووە.

هەروەها دەڵێت: ئەمەی دەیگێڕمەوە ساڵی 2000 هەر لەم رۆژنامەیەدا لە دیدارێكدا بە وردی باسمكردووە و دواتریش لە بەرنامەیەكی تەلەفزیۆنی گەلی كوردستان و چەند شوێنێكی دیكەش باسمكردووە و گێڕاومەتەوە، بۆیە دووبارە وردەكارییەكەی نانووسمەوەو تەنها كورتەیەكی باس دەكەم:

ساڵی 1982 لەگەڵ شەهید ئاسۆ (رەسوڵ كەریم) لە ناوچەی ئاغجەلەر سەربازبووین.

ئاسۆو من هەردووكمان لە رێكخستنی كۆمەڵەی رەنجدەرانی كوردستاندا بووین، بەڵام خۆمان لە یەكتری ئاشكرا نەكردبوو.

رادیۆیەكمان لابوو، رۆژێك دوور كەوتمەوە تا گوێ لە ئیزگەكە بگرم، ئاگام لێی نەبوو ئاسۆ لێم نزیك بۆوە و هەردووكمان بەتەواوی لەیەكتر ئاشكرابووین كە سەر بە رێكخستنی كۆمەڵەین.

دواتر پێكەوە لەگەڵ ئاسۆ بڕیارماندا دۆشكەی رەبایەكە تەسلیم بكەین و خۆشمان ببین بە پێشمەرگە.

ئەوەبوو لەگەڵ تیپی 21ی كەركوك رێكەوتین و شەوێك مەفرەزەیەكیان بەنهێنی هاتن و ئێمەش دۆشكەكەو رەبایەكەمان تەسلیم كرد و هەردووكیشمان بووین بە پێشمەرگە لەو تیپەدا.

خۆشبەختانە بەشێكی زۆری ئەو پێشمەرگەو فەرماندانەی ئەوسای تیپی 21 كە پەیوەندیمان پێوەكردبوون و شەوەكەشی هاتن و دۆشكەكەمان تەسلیم كردن، ئێستا لە ژیاندا ماون و ئاگادارن، بەشێكیشیان كە ئێستا نەماوەن، 20 ساڵ لەمەوبەر ئەوان هێشتا لە ژیاندا مابوون و بە ئامادەبوونی ئەوان لە بەرنامەكەدا، قسەم بۆ تەلەفزیۆنی گەلی كوردستان كردووە.

لەگەڵ ئاسۆ بووینە پێشمەرگەی تیپی 21، دواتر كە تیپی 23ی سورداش تەشكیل كرا، من چوومە ئەوێ و بووم بە جێگری فەرماندەی كەرتی 2، ئاسۆش لە تیپی 21 مایەوە، بەڵام هەر پەیوەندیمان هەبوو تا كاتی شەهیدبوونی.

وەك دوپاتكردنەوەیەكیش بۆ قسەكەی كاك ئەحمەد، بەڵێ شەهید ئاسۆ زۆر بلیمەت بوو، سەری لە هەمووشتێك دەردەچوو، كوڕێكی زیرەك و بە ئاگابوو.

لە كۆتاییدا کاروانەڕیشە دەستخۆشی لە ئەحمەد کاکەحەمە دەکات و سڵاویش بۆ گیانی شەهید ئاسۆی هاوڕێی دەنێرێت.

 310 جار بینراوە