سەرەکی » وەرزش » زۆریی ژمارەی یانەكانی كوردستان لە نێوان خواست و پێداویستیدا

زۆریی ژمارەی یانەكانی كوردستان لە نێوان خواست و پێداویستیدا

تیشکۆ

بەم دواییە بەڕێوەبەرایەتی گشتی وەرزش لە وەزارەتی رۆشنبیری لیستی ناوی ئەو یانانەی كوردستانی بڵاو كردەوە كە هەڵبژاردنی دەستەی بەڕێوەبەریی نوێ دەیانگرێتەوە.
ئەو لیستە ناوی سەرجەم یانە وەرزشییەكانی كوردستانی لە زاخۆوە تا گەرمیانی لە خۆ گرتووە، خەرمان بەرەكەت بە بێ یانەكانی كەركوك و خانەقین بە هەولێر و سلێمانی و دهۆك و گەرمیان ئێمە خاوەنی 80 یانەی وەرزشین، ئەگەرچی لە خشتەكەشدا ناوی یانەی نەورۆزیش لە سلێمانی نەهاتووەو نازانین یانەی تریش بیر چووە یان هەر ئەو یانەیە لەبیر چووە و بەوە ژمارەی یانەكان دەگاتە 81 یانە.
لە لیستەكەدا ناوی یانەكانی خانەقین لە خانەقین و خاك و چەند یانەیەكی تری شاری كەركویش نەهاتووە، بەوە ئەو یانانەی لە ژێر ئاڵای لیژنەی ئۆڵۆمپی كوردستاندا چالاكییان هەیە و بەشداریی چالاكییەكانی یەكێتییە وەرزشییەكانی لیژنەی ئۆڵۆمپی كوردستان دەكەن نزیك دەبێتەوە لە 85 یانە.
بەپێی دابەشبوونیشیان بەسەر پارێزگاو ئیدارەكانیشدا بەمشێوەیە دابەشبوون:
*سلێمانی و هەڵەبجەو ئیدارەی راپەڕین: 31 یانە.
*هەولێر 33 یانە.
*دهۆك 14 یانە.
*گەرمیان:3 یانە.
81 یانە بۆ چوار شار (سلێمانی،هەڵەبجە، هەولێر، دهۆك) و دوو ئیدارەی گەرمیان و راپەڕین رەنگە لە ڕوی چەندایەتییەوە زۆرییان پێوە دیار بێت، چونكە وەرزشی كورستان لە ڕوی چۆنایەتییەوە لەئاستێكی باشدا نییە، ئەوەش بە ئاشكرا بە خولەكانی كوردستانەوە دەبینرێت.
81 یانە ژمارەیەكی گەورەیە، ئایا ئەو ژمارە زۆرەی یانەی وەرزشی خواستی وەرزشكارانە یان لەدەرەوەی خواستی ئەوانە، ئەو ژمارە زۆرە لە یانەی وەرزشیی ئەرك و پێدوایستی زۆریان گەرەكە، پێویستیان بە یاریگا و هۆڵی داخراوە، پێویستیان بە بودجەو پارەی باشە بۆ بەڕێكردنی ئەو خول و پاڵەوانێتییانەی بەشداریی تیادا دەكەن، پێویستیان بە كادرو ئیدارەی بەهێز و كەسی شارەزایە بۆ ئیدارەدانی تیپەكانی یانەكان، پێویستیان بە چەندین راهێنەری جۆراو جۆرە لەسەرجەم وەرزشەكاندا بە كوڕان و كچانەوە كە خاوەنی بڕونامەو ئەزمونی باش بن بۆ پێگەیاندنی یاریزانان و بەشدارییكردن لە خولەكاندا، پێویستیان بە یاریزانی باش و لێهاتووە، پێویستییان بە بەشدارییكردنە لە خول و پاڵەوانێتییەكاندا لە كوردستان و تەنانەت عیراقیشدا چونكە زۆرێك لەو یانانە بەشداریی خولەكانی عیراقیش دەكەن.
پرسیارەكە بۆ بوونی 81 یانە تەنیا لە سنوری ئیدارەی هەرێمی كوردستاندا جگە لە كەركوك و خانەقین ئەوەیە: ئایا بۆ بەردەوامی و بوونی 81 یانەی وەرزشیی لە كوردستان ئەو هەموو پێداویستیانەهەن و ئەو هەموو پێداویستییانەیان بۆ دابینكراوە و بەردەستن تا ئەم یانانە بەڕاستی ببن بە یانەی وەرزشیی؟.
من دڵنیام هیچ كام لەو یانانە بە یانە دێرین و بەهێزەكانی وەك سلێمانی و سیروانی نوێ و هەولێر و دهۆكیشەوە سەرجەم ئەو خەسڵەت و پێداویستییانەیان نییە كە باسمان كردن، بەدڵنیاییەوە كێشەی موچەو بودەجەیان هەیە، هەرچی پێویست بكات لە یاریگا و هۆڵی داخراو و پێداویستی وەرزشیی ناتوانن وەك پێویست دابینیان بكەن، ئەمە بۆ ئەوان، دە وەروە تۆ یانەیەكی هەژاری وەك رزگاری لە گەرمیان و حاجیاوا لە ڕاپەڕین و پێنجوێن و تەق تەق و خورماڵ و چەندان یانەی تر دەبێت چەند كێشەو كەم و كوڕی پێداویستییەكانی وەرزش بەرۆكی گرتبن، ئیتر ئەو یانانە چۆن دەتوانن ئاوات و خواستی خۆیان و ئەو یاریزانانەی هەیانە دەتوانن دابین بكەن؟، ئەمەش دەمانگەیەنێتە ئەو ئەنجامەی كە یانەكانمان لە ئاستی خواست و دواكاریی وەرزشكارانی سنورەكانی خۆیاندا نین، ئەمەش خۆی بۆخۆی باسێكی ترەو قسەی زۆر هەڵدەگرێت.
ئەمانە بەلایەك، لەلایەكی ترەوە كاتێك گوزەر بەناو ناوی یانەكانیشدا دەكەیت ناوی چەند یانەیەكت دێتە بەرچاو كە یانەی تایبەتمەندن بۆ وەرزشی تایبەت یان توێژێكی وەرزشكاران، بۆ نەموونە یانەی رۆژ بۆ خاوەن پێداویستی تایبەت، خانزاد بۆ شەترەنج، ئەفرۆدێت و ئافەرەتان تایبەتن بە كچان و ژنان، ئەسپ سواری تایبەت بە ئەسپ سواری كە لە هەولێرو سلێمان هەن، یانەی ئاسمانی و فڕۆكەوانی كە لە سلێمانی و كۆیەو دهۆك و هەولێریش هەن….هتد.
بۆ ئەمە هەموومان نكوڵی لە یانەكانی خانزاد و ئەفرۆدێت ئافرەتان و رۆژ ناكرێن كە چالاكییان هەیەو لەسەر گۆڕەپانی وەرزشیی كوردستان ئامادە بوونیان هەیە، بەڵام یانەكانی ئەسپ سواری و فڕۆكەوانی ئەو یانانەی كوردستانن كە خاوەنی كەمترین پاڵەوانێتی و نمایشی خۆیانن، ئیتر نازانین ئەو یانانە رووبەڕوی ئەو كێشانە بوونەتەوە كە بەسمان كردن بۆیە هیچ چالاكییەكی ئەوتۆیان نابینین، یان ئەوەتا سەرباری ئەو كێشانە كێشەی تریشیان هەیە و لەسەر گۆڕەپانی وەرزشی كوردستان دەست بەستراون، خۆزگە ئەو یانانە وەڵامیان لەو روەوە دەبوو.
بەپێی خشتە دانراوەكەی بەڕێوەبەرێتی گشتی وەرزش لە وەرزارەتی رۆشنبیری، هەڵبژاردنەكان لەدوێنێ یەكشەممە 17/10 –ەوە دەستپێکردووە و 28/10/2021 كۆتاییدێت.
دەبێت دوێنێ ئەم یانانەی كوردستان هەڵبژاردنیان كردبێن:
*قەرەداغ، دەرەبندیخان، سێمێل، پێشمەرگەی هەولێر، كۆیە، شیروانە، ئافەرتانی هەولێر، نیشتیمان.
ئەمڕۆ دووشەممە پرۆسەكە بەڕێوە ناچێت و سبەی سێشممە 19/10 ئەم یانانە هەڵبژاردن دەكەن:
*گارە، سەنحاریب، شەهیدان، سەید سادق، كفری، رزگاری، پیشەسازی، هەندرێن، حاجیاوا، قەڵادزێ، خەبات، مەخمور.
بەو شێوەیە هەڵبژاردنەكان تا رۆژی پێنجشەممە 28/10 بەردەوام دەبن.

 269 جار بینراوە