سەرەکی » وتار » لەشکر حەمە ساڵح » خۆپیشاندان و هاتوچۆ و شەقامەكانی سلێمانی

یاداشته‌كانی شۆفێرێك

خۆپیشاندان و هاتوچۆ و شەقامەكانی سلێمانی

لەشكر حەمە ساڵح

خۆپیشاندانی ناڕەزایی ژمارەیەك لە خوێندكارانی زانكۆی سلێمانی لە بەردەم كامپی نوێی زانكۆكە و گرتنی رێگەی سەرەكی هاتوچۆی سلێمانی كەركوك، شاری سلێمانی رووبەڕووی قەرەباڵغی و تێكچوونی سیستمی هاتوچۆ و پەككەوتنی جوڵەی ئاسایی هاووڵاتیان و هاتوچۆی بازرگانیی کردووەتەوە.

خۆپیشاندانەكە و گرتنی شەقامەكەش ماوەیەكی زەمەنیی ئەوەندەی نەخایاند، بەڵام كاریگەرییەكەی بۆ چەند سەعاتی داهاتوو بەردەوام بوو، رێگە بەدیلەكان بەرگەی ئەو لۆدە زۆرە و ئەو ژمارە بێ شومارەی ئۆتۆمبێل و پەلە پەلی هاتوچۆی نەگرت.

ئەگەر كەسانێك هەبن بیانەوێت كێشە و ئاستەنگەكانی هاتوچۆ و رێگەوبان لە شاری سلێمانیدا چارەسەر بكەن، ئەو رووداوە نموونەیەكی زیندووە، دەكرێت ببێتە وانەیەك بۆ دۆزینەوەی چارەسەری گونجاو، ئەگەر ئەم دەرفەتەش لە دەست بچێت، ئەوا رۆژ لە دوای رۆژ هەم كێشەكە گەورەتر دەبێت، هەمیش چارەسەری قورس دەبێت.

ئەگەر لایەنی پەیوەندیدار چاوەڕوان بێت شەقامی سەد مەتری كێشەی هاتوچۆ، بەتایبەتی لە دەوروبەری زانكۆی سلێمانی و ناوچەكانی راپەڕین و تاسڵوجە چارەسەر بكات، ئەوا چاوەڕوانییەكی بێ ئەنجام دەبێت، چونكە رۆژ بە رۆژ كێشەكە قوڵتر دەبێتەوە و قەرەباڵغی زیاتر و فراوانتر دەبێت.

جگە لەوەش، ئەو شەقامە تازەیە كاریگەریی گەورەی نابێت و نابێتە بەدیلی رێگەی بەردەم زانكۆی سلێمانی، چونكە دوورترە و ناتوانرێت لەكاتی قەرەباڵغی زۆردا سوودی لێوەربگیرێت، ئەو رێگەیەشی لە ناوچەی قولەرەیسییەوە ناوچەی راپەڕین دەبەستێتەوە بە سەرچنارەوە لە خۆپیشاندانەكانی زانكۆدا دەركەوت بەرگەی لۆدێكی زۆر ناگرێت.

ئەمەش لە كاتێكدایە گرفتی ئەو رێگەیە هەر بەهۆی خۆپیشاندانی خوێندكارانی زانكۆوە دروست نەبووە، بەڵكو لایەنی پەیوەندیدار ئاگادارن لەوەی چەند ساڵێكە ئەو گرفتە بەردەوامە، بەتایبەتی لە كاتەكانی بەیانیان و ئێواران و لە نزیك باخی بەختیاری قەرەباڵغییەكی زۆر دروست دەبێت.

ئەركی بەپەلەی لایەنی پەیوەندیدارە كە بیر لەو شەقامە سەرەكییە و خەڵكی ئەو ناوچەیە و ئەو دەیان هەزار ئۆتۆمبیلە بكاتەوە كە رۆژانە هاتوچۆ دەكەن، بێگومان بەشێكی زۆریشیان سەردانكەری هاتوچۆی سلێمانین لە ناوچەی تاسڵوجە كە هەر یەكەیان نزیكەی 50 هەزار دیناری پارەی ژینگە و رێگەوبان دەدەن، بەڵام شەقامێك نییە خۆیانی پێ بگەیەننە ئەو شوێنەی دەبێت پارەكەی لێ واسڵ بكەن.

ستوونێکی هەفتانەیە لەسەر کێشەکانیشۆفێران و جیهانی ئۆتۆمبیل

 158 جار بینراوە