سەرەکی » راپۆرت » سۆشیال میدیا جێگە بە دەستگێڕ و دوكاندار لێژ دەكات

سۆشیال میدیا جێگە بە دەستگێڕ و دوكاندار لێژ دەكات

دیار ستار

سۆشیال میدیا لەهەرێمی كوردستان رۆچوەتە ناو سەرجەم كایەكانی ژیانەوەو ئێستا ریكلامكردن لەتۆڕەكۆمەڵایەتییەكان بۆ شمەكە بەكارهاتووەكان یان بەكارنەهاتووەكان پشكی زۆری بەركەوتووەو كاری دەستگێڕو دوكاندارەكانی كەمكردۆتەوە، پسپۆڕانیش بەگرنگی دەزانن ئەم جۆرە بازاڕكردنە بەیاسا رێكبخرێت.
د.نەزاكەت حسێن مامۆستای زانكۆ و پسپۆڕ لەبواری ریكلام‌و بازاڕكردن، بەماڵپەڕی (PUKmedia)ی وت:»بازاڕو ریكلامكردن لەناو تۆڕەكۆمەڵایەتییەكان‌و بەتایبەت لەپەیج‌و گروپەكانی فەیسبووك لەهەرێم پانتاییەكی زۆری بۆ خۆی داگیركردەوەو هاووڵاتیان بەبێ بەشداری كەسی دووەم راستەوخۆ شمەك‌و كاڵاكانیان دەگەیەننە كەسی سێیەم كە كڕیارە».
لەبارەی سوودو زیانەكانی ئەو دیاردەیەش وتی: «ریكلامكردن‌و ساغكردنەوەی شمەكەكان لەتۆڕە كۆمەڵایەتییەكان لایەنی پۆزەتیڤ‌و نەگەتیڤی خۆی هەیە، كە پێویستە ئابووریناسان قسەی خۆیان هەبێت لەسەر ئەو بابەتەو هەوڵی دەركردنی یاسایەك بدەن لەبارەی بازاڕكردن‌و ریكلامكردن لەتۆڕە كۆمەڵایەتییەكان».

ناگەڕێنەوە بۆ ئێمە
دەستگێڕو دوكاندارانیش دانی پێدادەنێن كە تۆڕە كۆمەڵایەتییەكان بۆتە بەڵا بۆ كارو كاسبیان.
عومەر ساڵح كە دەستگێڕەو رۆژانە بەناو گەڕەك‌و كۆڵانەكاندا دەگەڕێت، دەڵێ:»ئینتەرنێت‌و تۆڕە كۆمەڵایەتییەكان كاریگەری خراپیان لەسەر كاری رۆژانەی ئێمە دروستكردوەو هاووڵاتیان لەڕێگەی تۆڕە كۆمەڵایەتییەكانەوە راستەوخۆ بەكڕیار كاڵاكانیان دەفرۆشن‌و ناگەڕێنەوە بۆ ئێمە».
راشیگەیاند: بەناچاری ئێمەش بەشداری لەو كڕین‌و فرۆشتنانەدا دەكەین كە لەتۆڕە كۆمەڵایەتییەكان دەكڕێن‌و جارێكی دیكە ئێمە دەبینەوە بە كڕیار.

هەلی كار كەم دەكاتەوە
د.نەزاكەت حسێن لەبارەی كڕینی شمەكەوە بەشێوەی راستەوخۆ لەكڕیار وتی: «خاڵە پۆزەتیڤەكانی ئەو بازاڕكردنە لەوەدایە كە شمەكەكان نرخی زیاتر دەكات‌و راستەوخۆ بێ كەسی دووەم كاڵاكە دەگاتە دەستی سێیەم كە كڕیارە، هەروەها تێچووی كەمەو كاتێكی كەمیشی پێدەچێت، بەڵام لەگەڵ ئەوەشدا خاڵی نێگەتیڤی هەیەو وادەكات كە دەستی كارو هەلی كار كەمبكاتەوەو مافی بەكاربەر پێشێلبكات، لەگەڵ ئەوەشدا هەندێكجار ئەو ریكلامەی دایدەبەزێنن لەڕادەبەدەر شمەكەكە جوان‌و بەنڕخ دەكات، بەڵام كاتێك كاڵاكە دەبینیت وانییە».

كاتی كەمی دەوێت‌
مامەڵەكردن لەتۆڕە كۆمەڵایەتییەكان جگە لەوەی كەسی سێیەمی لەمامەڵەكاندا نەهێشتووەو قازانجێكی زۆریش بۆ هەریەك لەكڕیارو فرۆشیار دەستەبەر دەكات.
ئامانج عەلی كە چەند جارێك لەتۆڕە كۆمەڵایەتییەكان‌و گروپەكانی فەیسبووك كاڵاو شمەكەكانی فرۆشتووە، روونیدەكاتەوە: ریكلامكردن‌و فرۆشتنی كاڵاكان لەتۆڕە كۆمەڵایەتییەكان سوودی باشی بۆ كڕیارو فرۆشیار هەیە، ئەو سوودەی كەسی دەستگێڕ وەریدەگرێت، دابەشدەبێت بەسەر كڕیارو فرۆشیارو هەردوولا بەسوودی زیاتر كاڵاكانیان دەستدەكەوێت.
وتیشی: «فرۆشتنی كاڵاو كەلوپەری ماڵ لەتۆڕە كۆمەڵایەتییەكان كاتی كەمی دەوێت‌و راستەخۆ كڕیار كاڵاكەت لێ دەكڕێت، هەروەها هەندێك كاڵا دەبینیت كە ئەگەر لەدوكان‌و بازاڕ بۆی بەگەڕێیت دەستت ناكەوێت، بەڵام لەگروپەكانی فەیسبووك بەپێچەوانەوە هەموو جۆرە كاڵایەكی تێدایە».

بە یاسا رێكبخرێت
سەرەڕای هەموو ئەوانەش پسپۆڕان تەئكید دەكەنەوە كە ئەم جۆرە نوێیە لەڕیكلامكردن پێویستە یاسایەك رێكیبخات‌و مافی هەریەك لەكڕیارو بەكاربەر پارێزراو بێت، لەو بارەیەشەوە د.نەزاكەت حسێن پسپۆڕ لەبواری ریكلام‌و بازاڕكردن لە بەشی راگەیاندنی زانكۆی سلێمانی جەختی كردەوە كە لەگەڵ هەموو پێشكەوتنێكی بواری میدیایی دەستبەجێ بواری ریكلام‌و بازاڕكردن جێی خۆی دەكاتەوەو پانتایەكی باش بۆ خۆی داگیردەكات‌و لەئەمڕۆشدا سۆشیال میدیا توانیویەتی ببێتە شوێنێكی گرنگ بۆ ساغكردنەوەی كاڵاو شمەكەكان‌و هاووڵاتیان سوودی لێ ببیینن، بەڵام تەئكید دەكەمەوە كە پێویستە بواری ریكلام‌و بازاڕكردن لەسۆشیال میدیادا لەهەرێمی كوردستان بەیاسا رێكبخرێت‌و هەوڵبدرێت مافی بەكاربەرو كڕیارو فرۆشیار بپارێزرێت.
ئەو گرووپانەی كە لەفەیسبووك هەن‌و هاووڵاتیانی هەرێمی كوردستان بۆ ریكلامكردن سوودیان لێ وەردەگرن، بێ بەرامبەر رێگە بە بەكارهێنەران دەدەن كە بازاڕ بۆ كاڵاكانیان دەستەبەر بكەن، بەڵام هەندێك ریكلامی تایبەتیان هەیە كە لەبەرامبەر بڕێكی كەم پارەدا كڕیار بۆ كاڵای هاووڵاتیان پەیدا دەكەن.

print

 19 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*