سەرەکی » کەلتوور » چلەی ماتەمینی كەریم زەند شارەزای مێژوو، جوگرافیا و پەروەردە

چلەی ماتەمینی كەریم زەند شارەزای مێژوو، جوگرافیا و پەروەردە

بە ئامادەبوونی ژمارەیەكی بەرچاو لە بەرپرسانی حكومی و حزبی و رۆشنبیران و بنەماڵەو كەسوكاری خوالێخۆشبوو، لە هۆڵی راپەرینی زانكۆی سلێمانی چلەی ماتەمینی مێژوونووس و گەڕیدەی گەورەی كورد كەریم زەند بەڕێوەچوو.
رێوڕەسمی چلەی ماتەمینی گەڕیدەو مێژوونووسی گەورەی كورد (كەریم زەند) رۆژی 9/11/2017، لەسەر ئەركی سەرۆكایەتی زانكۆی سلێمانی و بە هاوكاری كۆلێجی زانستە مرۆڤایەتییەكانی زانكۆی سلێمانی بەڕێوەچوو كە سەرەتای رێورەسمەكە بە وەستانی ساتێك بە بێ دەنگی بۆ رۆحی شەهیدانی كوردو كوردستان دەستی پێكرد، پاشان وتاری پرۆفیسۆری یاریدەدەر د. رەزا حەسەن حسین سەرۆكی زانكۆی سلێمانی بۆ یادی چلەی مێژونووسی گەورەی كورد كەریم زەند خوێندرایەوە كەتێدا باس لەو هەوڵ و ماندوبوون و بەدواداچوون و خزمەتانەكرا كە خوالێخۆشبوو بە مێژوو جوگرافیاو بواری ئەدەبی و رۆشنبیری و پەروەردەیی و ئەكادیمی كوردی كردوە.
دواتر بەكورتی مێژووی ژیانی كەریم زەندو ئەو كاروبەرهەمانەی ئەو نووسەرە گەورەیە خرانەڕوو، لە خۆنەویستی و خزمەتگەیاندن بە بواری مێژوو جوگرافیاو ئەدەب و پەروەردەی كوردی كە سەرجەمی ژیانی بۆ تەرخان كردبوو، هەروەها فیلمێكی دیكۆمێنتاری لەسەر ژیان و بەرهەمەكانی ئەو نوسەرە گەورەیەی كورد نمایشكرا، كەتێیدا بەكورتی باس لە ژیان و بەرهەموو خزمەتە گەورەكانی كەریم زەندی دەكرد.
هەرلەدرێژەی مەراسیمەكەدا بنەماڵەو چەند هاورێیەكی نزیكی كەریم زەند باسیان لە گەورەیەی و خۆنەویستی و قوربانییەكانی ئەو نوسەرە گەورەیەی كورد كرد كە هەموو ژیانی بۆ خزمەتكردنی گەلەكەی سەرفكردوە.
كۆتایشدا وێرای دووبارە سوپاسكردنی ئامادەبووان، سەرجەم ئەو بروسكەی سەرەخۆشیانە خوێندرانەوە كە لەلایەن بەرپرسانی حزبی و حكومی و نوسەران و رۆشنبیران و رێكخراوەكانەوە ئاڕاستەی بنەماڵەی خۆلێخۆشبوو كەریم زەند كرابوون.
‎كەریم زەند ساڵی ١٩٢٤ لە سلێمانی لە دایكبووەو ‎خاوەنی دەیان كتێبە لە بوارەكانی مێژوو، جوگرافیا و بابەتی دیكەدا یەكێك لەوانە كتێبی «تۆماری تەمەن» كە لە (٥) بەرگ پێكهاتووە باس لە جوگرافیا و شێوەزاری میللەتانی كوردستان دەكات. ‎كاتژمێر ١٠ ی بەیانی ڕۆژی 10/10/2017، لە ماڵەكەی خۆیدا لە شاری سلێمانی بەهۆی نەخۆشییەوە كۆچی دوایی كرد.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*